پنجگور ءِ دمگ پروم ءَ ناشناسیں سلاہ بندیں مردمانی تیرگواری ءَ یک مردمے بیران بوتگ۔
بیران بوتگیں مردم ءِ پجار اختر انور ءِ نام ءَ بوتگ۔
مردمانی گوشگ اِنت کہ اختر انور گوستگیں زمانگ ءَ گوں بلوچ جنگولیں گلے ءَ ھمگرنچ بیتگ۔ آئی ءَ وتی یک سنگتے ءِ کوش ءَ پد پاکستانی لشکر ءِ دیم ءَ سرنڈر کتگ۔
اے وئیل ءِ مول ءُ مراد زانگ نہ بوتگ اَنت۔
بلوچ لبز زانت، لچہ کار ءُ زبان زانت سید زھور شاہ ھاشمی ءِ بوتن ءِ سدمی سال روچ ءِ درگت ءَ ماں گوادر ءَ آر سی ڈی کلب گوادر ءِ نیمگ ءَ دیوانے اڑ دیگ بوتگ-
دیوان ءَ لبزانکی مھلوک ءَ ھوار زالبولاں بازیں کچے ءَ بھر زرتگ ءُ اود ءَ سیاسی ءُ چاگردی مھلوک ھم گندگ ءَ اتکگ انت-
دیوان ءَ بلوچی زبان ءِ لبزنکاراں ھم بازیں کچے ءَ بھر زرتگ ءُ اود ءَ زبان دوست حاجی فدا حسین دشتی، اشرف حسین، ریٹائرڈ جسٹس شکیل اھمد بلوچ بی ایس او پجار ءِ گوستگیں چیئرمین بوھیر صالح بلوچ، آل پارٹیز کیچ ءِ ڈپٹی کنوینئر فدا جان بلیدی، بجار بلوچ، گوادر یونیورسٹی ءِ پی آر او نصیر بلوچ، تربت ءَ ڈاکٹر عبدالمالک بلوچ ـ جان مھمد بلیدی، گلزار دوست، اے آر داد بلوچ، ڈاکٹر رحیم مھر ءَ ھوار بازیں کچے ءَ مھلوک ءَ بھر زرتگ-
اود ءَ مھلوک ءَ تران کنان ءَ گوشتگ سید ھاشمی لبزانک ءِ ھما رژنائیں چراگ بیتگ کہ آئی ءَ بلوچی لبزانک ءُ زبان ءَ یک راھے ءِ شون داتگ- مھلوک ءَ گوشت سید ھاشمی بیتگ کہ آئی ءَ پہ بلوچی لبزانک ءَ جوانتریں راہ گچین کتگ انت-
دیوان ءَ ساز ءُ زیملی ءَ سید ھاشمی ءِ شَیر ءُ لچہ گشگ بیتگ انت کہ اود ءَ زیمر کاراں مھلوک ءِ دلگوش وتی نیمگ ءَ کتگ –
دیوان ءَ کتاب ءِ میلہ برجم دارگ بوتگ کہ اود ءَ جتا جتائیں کتاب ایر بیتگ انت-
سید زھور شاہ ھاشمی
نبشتہ کار : ایم شکاری
دی بلوچستان پوسٹ
واجہ سید ھاشمی 21 اپریل 1926 ءَ گنجیں گوادر ءَ واجہ سید مھمد شاہ ءِ لوگ ءَ ودی بوت. سید ءَ اربی ءُ پارسی چہ وتی آریپیں پت ءَ دربُرت. نمیرانیں سید اُردو ءُ انگریزی ءَ هم زانتکار بوتگ ، بلوچ ءِ راجدپتر شاھد اِنت کہ واجہ ءِ دل پہ ماتیں زبان ءُ پہ راج ءَ سُتکگ .
1946 ءَ کہ گوادر مشکت ءِ ایر دست اَت، واجہ ءَ انجمن اسلاہ ء بلوچاں ءِ نام ءَ تنزیمے ءِ بندات ایر کُرت. همے نیمون ءَ بلوچی دیوان ءِ بنگیج ئِے ایر کُرت. آئی ءَ جدّ ءُ جُھد ءِ نام ءَ یک روتاکے (اخبارے) ھم شنگ کُت، بلے مشکت ءِ اگدہ دار ءُ واگداراں واجہ ءِ اے کار دوست نہ بو ت۔۔چیزے وهد ءَ رند سید ءِ جھدانی دیم گِرگ بوت ، انجمن پْرشت ءُ سید چہ گوادر ءَ درانڈیھ کنگ بوت.1949 ءَ واجہ سید پہ ڈاکٹر جاهین سڈا سر ءِ گْوشگ ءَ هندوستان ءَ شُت کہ بلوچی زبان ءِ بارہ ءَ گیشتر پٹ ءُ پول بہ کنت .
ءُ اود ءَ واجہ ءَ پہ بلوچی زبان ءَ بازیں پٹ ءُ پولے کت۔ پد ءَ 1950 ءَ واجہ کراچی ءَ اتک، اد ءَ ریڈیو ءِ کار مستر جوڑ کنگ بوت واجہ ءَ اے ریڈیو ءِ تُرو ءَ بلوچ راج ءُ بلوچی زبان ءِ سک باز ھزمت کت . مردمے کہ لوٹ اِیت منی زبان مدام دیمتر ءَ کِنزان بہ کنت گڑا مدام ھمے ھیال ءَ بیت کہ کجام ناں کجام وڑ ءَ بلوچی زبان دیم ءَ بہ رَوت پمیشکا واجہ ءَ 1952 ءَ گوں وتی اے دگہ بلوچ دوزواھاں (بلوچی سَرچمگ) ءِ نام ءَ زبان ءِ دیمروی ءِ هاتر ءَ یک انجمنے بنگیج کُرت-
سید ءَ پہ (سَر چمگ) ءُ بلوچی زبان ءِ دیمروی ءِ هاتر ءَ بلوچستان ءِ گیشتریں هند ءُ دمگاں دو ماہ ءَ پُرّیں ترّ اِت ءُ گول اِت بلے بژن چہ وت ماں وتی ناتپاکیاں سَر چمگ نہ سبز اِت ءُ سرچمّگ ءِ تاک لیمّراں بوت اَنت . بلوچی زبان ءِ اے شھزانت چہ بلوچانی اے ناتپاکی ءَ دل پروش نہ بوت . واجہ ءَ گوں وتی نزوریں کوپگاں بلوچی جھد برجم داشت، بلے 1955ءَ شومیں رنج ءِ نادْراھی ءَ واجہ گْور جَت
گوں ھمے نادْراھی ءَ کہ واجہ ئِے روچ پہ روچ نزور کنان کُرت بلے انگت چہ بلوچ ءُ بلوچی ءَ بے هال نہ بوت مدام گوں بلوچی ءَ سَر ءُ چیر اَتئ
بلوچی زبان ءِ پٹ پول ءَ بلوچستان ءِ گیشتریں هند ءُ دمگاں پاد شپاد ءَ یک یک گالوارے ءِ هاتر ءَ تَرّ اِت کہ بلوچی گوهر کیمتی لبزاں پَٹ ءُ پول بہ کنت سید ءِ ھاشمی ءِ چہ درستاں مستریں کار بلوچی لبز بلد (ڈکشنری) “سید گنج” ءِ نبیسگ اِنت کہ بلوچی زبان ءِ اولی لبزبلد زانگ بیت. ءُ سید ءَ بلوچی زبان ءِ سْیاھگ (رسم الخط ) ءِ بارہ ءَ ھم باز جُھد کتگ، اے بارہ ءَ سید ءَ دو جْوانیں کتاب نبشتگ یکے “بلوچی سْیاھگ ءِ راست نبیسگ” ءُ دومی “بلوچی بنگیجی پہ رستگیناں”- پہ زبان ءِ گھبودی ءَ ھمک تھر ءَ کتاب نبیسگ ءُ شنگ کنگ ھم سک زلوری اِنت اے رِد ءَ سید ءِ ھما کتاب کہ چاپ ءُ شنگ بوتگ اَنت ایش اَنت:
وانگی:
1: سِستگیں دستونک
2: انگر ءُ تْرونگل
3: بْرتکگیں بیر
4: تْراپکنیں تْرمپ
5: بلوچی بنگیجی
6: بلوچی سْیاھگ ءِ راست نبیسگ
7: جُز عمّ بلوچی
8: میر گند
9: نازک
10: بلوچی زبان و ادب کی تاریخ
12: سِچکانیں سسّا
13: شکّلیں شھجو
14: اوستا ءِ بنگیج ءُ پیشگال
15: شھلچّہ کار (ملا پازل ءِ زند ءُ ازم ءِ بارہ ءَ نبشتگیں کتاب )
16: چکّاسنگ
17: گسدگْوار
18: سید نمدی
19: سید گنج
20 :سید آزمانک
ءُ ھما کتاب کہ نبشتگ ءُ ایر اَنت بلے پہ چاپگ ءُ سرجم کنگ ءَ مھتل اَنت، ایش اَنت:
21۔بلوچی دربر
22-پاپولر پوئٹری آف بلوچ
23۔گورکی ءِ مات ءِ بلوچی
24۔ زوت گِر ءُ دیر ھٚلّ
25: سستگیں دستونک (اردو)
26: شھگوستن شاھار
27:بلوچی دلپسندیں لچھکاری
ءُ ھما کتاب کہ سید ءَ وتی زند ءَ گْوشتگ کہ من ءَ ارادہ ھست کہ اے کتاباں بہ نبیساں (بلے ملکموت ءَ گیگ نہ دات ءُ نبیسگ نہ بوتگ اَنت ) ایش اَنت:
1-کلام اللہ ءِ بلوچی رجانک
2- انگریزی بلوچی بزانت بلد
3- بلوچی دربری درسی سرجَمیں کتاباں
4-بلوچی کْوھنیں رم ءُ لچّھانی درگیجگ ءُ یکجاہ کنگ
ءُ ھما کار کہ سید ءِ واھگ بوتگ کہ کنگ بہ بنت ایش اَنت:
1- بلوچی وانینگ ءَ دربرجاہ پچ کنگ
2-بلوچی کتاباں چاپ کنگ
3-بلوچی ءَ اَلّمیں ماھتاک کشّگ
4: پہ رُستگیناں دربرجاہ پچ کنگ
5: پہ بلوچی زبان ءِ الّمی ءَ جوانیں دیوان پچ کنگ
6-بلوچی کتاباں چاپ کنگ
7-بلوچی ءَ اَلّمیں ماھتاک کشّگ
8-پہ رُستگیناں دربرجاہ پچ کنگ
9-پہ بلوچی زبان ءِ الّمی ءَ جوانیں دیوان پچ کنگ۔ واجہ گْوش اِیت کہ من ءَ اے گم نہ اِنت کہ پہ منی مرگ ءَ منی چُک چورہ بنت، ھَو من ءَ اے گم ھست اِنت کہ من مُرتاں بلے پہ بلوچی ءَ ھچ نہ کت۔ 4 مارچ 1978 ءَ واجہ ءَ اے کوڑھیں امروز یلہ دات، اللہ واجہ ءِ مانش ءَ روژنا کنات۔ واجہ ءِ درستی اُمر 52 سال بوتگانچوش سما بیت کہ گْوش ئے زاناں اللہ ءَ سید بس پہ بلوچی زبان ءِ ھاتر ءَ ودی کتگ۔
“بیا پد ءَ شتکیں تلارانی دل ءَ دِرّاں کنیں”
“گرانبھائیں دوستی ءُ مھر ءُ پد ءَ ارزاں کنیں”
دور نہ اِنت منزل ھزار ناز ءُ ھزار گنجیں سید
ھمبلاں زوریں چو کور ءَ دور سریں رُمباں کنیں۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-
چہ کراچی ءُ بلوچستان ءَ یک زالبولے ھوار دو مردم زورانسری بیگواھی ءِ وئیل رپورٹ بیتگ اَنت-
گیشیں ھالانی رِد ءَ چہ آواران ءَ سیادی داروکیں حسینہ بلوچ، کہ کراچی ءِ دمگ نیول ءَ جھمنند بیتگ، 16 اپریل 2026 ءِ شپ ءَ پاکستانی پوج ءِ کارندھاں آوار جتگ ءُ بیگواہ کتگ-
دومی نیمگ ءَ سے مارچ 2026 ءَ سھب ءَ کیچ ءِ بُنجاھی شھر تربت ءَ بلوچ ھسپتال ءِ نزیک ءَ پاکستانی پوج ءِ چیریں ادارھانی کارندھاں عبدالباسط ء محمد سعید کہ یک ڈرائیورے آ آوار جتگ ءُ بیگواہ کتگ-
بلوچستان ءَ زورانسری آوار جنی ءِ درچ یکشل ءَ برجاہ ءَ اِنت دو ورنا آوار جنگ ءُ سے یل کنگ بیتگ اَنت وھدے کہ کیچ ءَ بیگواھیں مردمانی کھول ءِ زھرشانی-
گیشیں ھالانی رِد ءَ کیچ ءِ دمگ چہ گوکدان تربت ءَ دو مردم، بیست نُھ سالی ئیں نعمان ء حاجی عیسیٰ ءُ بیست ھپت سالی ئیں اکرام ء حاجی عیسیٰ ھژدہ اپریل ءِ شپ ءَ ساھت یک ءَ چہ لوگ ءَ فرنٹیئر کور (ایف سی) کارندھاں آوار جتگ ءُ بیگواہ کتگ- نعمان یک دکاندارے وھدے کہ اکرام یک نودربرے-
ھمے وڑ چہ سوراب کراچی ءَ زورانسری بیگواہ کنگ بیتگیں سے مردم یل کنگ بیتگ اَنت کہ آیانی تہ ءَ محمد اشرف ء اللہ بخش ء عبدالکریم ھوار اَنت ھشت اپریل ءَ چہ سوراب ءَ آوار جتگ اَت ءُ پانزدہ اپریل ءَ سوراب پولیس اسٹیشن ءَ یل کنگ بیتگ-
ھمے وڑ بلال ء خیر محمد کہ کراچی ءِ دمگ شرافی گوٹھ ءِ جھمنند اِنت آھم ھشت اپریل ءَ آوار جنگ ءَ پد پانزدہ اپریل ءَ صدر کراچی ءَ یل کنگ بیتگ-
دومی نیمگ ءَ کیچ ءَ یک ورنایے زورانسری آوار جنی ءِ ھلاپ ءَ کھول ءَ مروچی زھرشانی کنان ءَ سی پیک دگ بند کتگ-
بالگتر ءِ جھمنند بیست پنچ سالی ئیں عبدین کہ یک دھکانکارے، نوزدہ اپریل 2026 ءِ بیگاہ ءِ کساس ھپت چہ ءَ کیلکور دگ ءَ زورانسری بیگواہ کتگ-
کھول ءِ گوشگ اِنت کہ عبدین پاکستانی پوج ءِ نیمگ ءَ چہ آوار جنگ ءُ بیگواہ کنگ بیتگ چریشی ءَ پد آئی ءِ درگت ءَ ھچ وڑیں گپ دیم ءَ نیتکگ-
مروچی سانمندیں کھول ءَ دمگی مردماں زھرشانی کنان ءَ سی پیک دگ بالگتر ءِ ھند ءَ نندانک داتگ گاڑیانی واستا بند کتگ-
کھول ءَ گوشتگ کہ آ اے وھد ءَ سک زھنی گم ءَ رنج ءِ تہ ءَ گوزگ ءَ اَنت ءُ ھمگرنچیں ادارھاں چہ دزبندی کن ایں کہ عبدین ءِ یل کنگ ءِ ھاتر ءَ گامگیج بزور اَنت-
نوکیں ھالانی رِد ءَ اے وھد ءَ عبدین کھول ءُ انتزامیہ ءِ میان ءَ گپ ءُ دیوان سوبمند بیتگ ءُ چریشی ءَ پد کھول ءَ نندانک ھلاس کتگ ءُ دگ پہ گاڑیانی واستا پچ کتگ-
بلوچستان ءِ دمگ کیچ ءِ ھند زامران ءَ پاکستانی پوج ءِ آپریشن یکشل ءَ برجاہ ءَ اِنت-
دمگی اِھوالکار ءَ گوستگیں دو روچ ءَ چہ برجاہ اے آپریشن ءِ میان ءَ دمگ ءَ پاکستانی پوج ءِ سُر پُرانی تہ ءَ گیشی گندگ اَتکگ-
ھال اِنت کہ آپریشن ءِ میان ءَ تیرگواریں ھیلی کاپٹراں چہ جتاجتائیں ھندانی سر ءَ شیلنگ کتگ وھدے کہ دمگاں ڈرون اُرشانی ھم ھال اِنت-
دومی نیمگ ءَ واکدار ءَ اے آپریشن ءِ درگت ءَ ھچ وڑیں سرکاری درشان دیم ءَ نیتکگ-
بلوچستان ءِ دمگ مستونگ ءِ ھند دشت ءَ مرچی دومی روچ ءَ جاور ھال نگیگ انت کہ اود ءَ پاکستانی لشکر ٹوھیں کَچے ءَ دمگ ءَ دیم ءَ روگ ءِ کوشست ءَ انت۔ گوستگیں شپ ءَ یک رندے پد ءَ لشکر ءَ اُرشانی دیمپانی کنگ کپتگ۔
دشت ءِ دمگ کمبیلا ءَ سلاہ بندیں مردماں پاکستانی لشکر اُرشانی نشانگ جوڑ کتگ کہ ایشی ءِ آسر ءَ لشکر ءِ گاڑی سُتکگ ءُ ھاک ءُ پر بیتگ اَنت ءُ کُشتگیں کارندہانی لاش جاہ ءَ گندگ بیتگ اَنت۔
ھالانی رد ءَ اُرش کنوکاں بیران بوتگیں کارندھانی سلاہ ھم گون وت برتگ انت۔
دشت ءَ اُرشانی بندات ھما وھد بوتگ کہ گوستگیں روچ ءِ سھب ءَ پاکستانی لشکر ءَ دمگ ءِ سر ءَ اُرش کتگ ءُ آپریشن بندات کتگ بلے سلاہ بندیں مردماں اُرشانی تہ ءَ آپریشن ءَ ھواریں کارندہ نشانگ جوڑ کتگ اَنت۔
دومی نیمگ ءَ دشت مسوری کنڈ ءَ لشکر ءِ مستریں کیمپ ءِ سر ءَ مزنیں کساسے ءَ سلاہ بندیں مردماں اُرش کتگ ءُ بیگاہ ءَ ڈگاری کراس ءَ لشکر ءِ دو گاڑیانی سر بستگ ءُ سلاہ بندیں مردماں اُرش کتگ ۔
واکداراں اے ٹی ایف ءِ کارندہ ءِ سروک رحمت اللہ خلجی ءِ بیرانی ءُ شش کارندہ ءِ ٹپی بوھگ ءِ ھال راست کتگ انت۔
بلے دمگی مردمانی رد ءَ بیران بوتگیں کارندھانی کچ ءِ گیش بوھگ ءِ گمان اِنت کہ ایشی ءِ بابت ءَ واکداراں انگت ءَ ھچ وڑیں ھال ءُ اھوال نہ داتگ۔
گوستگیں روچاں کمبیلا ءِ دمگ ءَ یک رڈار سسٹم بلوچ لبریشن آرمی ءِ کنٹرول کنگ ءَ پد تباہ کنگ بوتگ ءُ ھمے دمگ ءَ ایم پی اے عاصم کرد گیلو ءِ کیمپ ءِ تباہ کنگ ءِ زمہ واری بی ایل اے ءَ ھم من اتگ ات۔
بلوچستان لبریشن پرنٹ ءِ جارکش میجر گْوھرام بلوچ ءَ وتی درشانے ءَ گوشتگ کہ بی ایل ایف ءِ سرمچاراں پانزدہ اپریل 2026 ءَ آواران ءِ ھند جاؤ ءَ سیڑ ءَ زورگریں پاکستانی پوج ءِ کاروان ءِ سرءَ ترندیں اُرشے کرتگ۔ اے کاروان چہ آواران ءَ درکپتگ ءُ جاؤ ءِ نیمگ ءَ روگ ءَ بوتگ کہ سنگر گپتگیں سرمچاراں اُرش کرتگ۔
آئی ءَ گوشتگ کہ سرمچاراں دژمنیں پوج ءِ کاروان ءِسر ءَ چہ چاریں نیمگاں گوں راکٹ لانچر، ایل ایم جی ءُ آدگہ سلاھاں ارش کرتگ۔ دژمنیں پوج ءِ سے گاڑی اُرش ءِ زد ءَاتکگ ءُ سرجم ءَ تباہ بوتگ، ایشی آسر ءَ گاڑیاں سواریں دہ کارندہ جاھی مرتگ ءُ دگہ باز ٹپی بوتگ۔ اے کاروائی ءِ میان ءَ دژمن ءَ سرمچارانی سنگرانی سر ءَ گوں کواڈ کاپٹر ءَ بالی اَرش کنگ ءِ کوشست کرتگ۔ باز سرمچار ءَ یکیں وھد ءَ کاروائی کرتگ ءُ پد ماں پد ءَ تیرگواری کرتگ چریشی ءِ آسر ءَ دژمن ءِ کواڈ کاپٹر تباہ بیتگ۔
جارکش ءَ گوشتگ کہ دگہ یک کاروائی یے ءَ سرمچاراں 18 اپریل 2026 ءَ تربت ءِ ھند نودز ءَ زورگریں پوج ءِ سے گاڑیانی کاروان ءِ سر ءَ اُرش کرتگ۔اے کاروائی ھما وھد ءَ کرتگ کہ دژمن ءِ کاروان ھمے ھند ءَ پہ تر ءُ گرد ءَ راہ ءِ چارگ ءِ کوشست ءَ بوتگ۔ اُرش ءِ بندات ءَ سرمچاراں کاروان ءِ پھازداری ءَ راہ ءِ چاروکیں بمب چاروکیں دو کارندہ نشانگ کرتگ، ایشی آسر ءَ دوئیں کارندہ جاھی مرتگ اَنت۔ رند ءَ کاروان ءَ ھواریں سے ئیں گاڑیانی سر ءَ گوں وتکاریں سلاھاں اُرش کرتگ۔ ایشی آسر ءَ دگہ یک کارندہ مرتگ ءُ دو ٹپی بوتگ۔ ارش ءَ گاڑی باز تاوان بوتگ اَنت۔
جارکش ءَ گوشتگ کہ دگہ یک کاروائی یے ءَ سرمچاراں 18 اپریل 2026 ءَ ھزدار ءِ ھند بازگیر ءَ ایف سی ءِ ھیلکاری جاہ ءِ سر ءَ گوں دستی بمب ءَ اُرش کرتگ۔ سرمچاراں ایف سی ءِ نندانجاہ ءِ سر ءَ دستی بمب اُرش کرتگ کہ آگوں زور ءَ ترک اِتگ، چریشی ءِ آسر ءَ دژمن ءَ باز تاوان رس اِتگ ءُ ترس آماچیں پوجیاں تیرگواری کرتگ۔
جارکش ءَ گوشتگ کہ دگہ یک کاروائی یے ءَ سرمچاراں ھپدہ اپریل 2026 ءَ آواران ءِ ھند کنیچی ءَ پاکستانی پوج ءِ چوکی ءَ ارش کرتگ۔ تھرمل اسکوپ کارمرز کرتگ دژمن ءِ یک کارندہ کشتگ۔ سرمچارانی آدگہ ٹولی ءَ چوکی ءِ سر ءَ گوں وتکار ءُ مزنیں سلاھاں اُرش کرتگ ءُ دژمن جانی ءُ مالی تاوان داتگ۔
آئی ءَ گوشتگ کہ ھمے وڑ ءَ دگہ یک کاروائی یے ءَ سرمچاراں ھپدہ اپریل 2026 ءَ نیمروچ ءَ سے ءِ نزیک ءَ پسنی ءِ ھند تشنگی ءَ مکران کوسٹل ھائی وے ءَ دگ بندی کرتگ۔ سرمچاراں شھدگ ءِ مزنیں بھرے سرجم ءَ بند کرتگ ءُ دژمنءِ تر ءُ گرد داشتگ۔ دگ بندی ءَ میان ءَ اوشتاتگیں گاڑی پٹ ءُ پول کرتگ اَنت۔
جارکش ءَ گوشتگ کہ بی ایل ایپ مھلوک ءُ شھدگ ءَ سپر کنوکیں مساپرانی گون ءَ لوٹ کنت کہ آ سرمچارانی نیمگ ءَ دگ بندیانی میانءَ کمک بہ کن اَنت۔ ما اے گپ ءَ تچک ءَ گوش ایں کہ دگ بندی ءِ میان ءَ سرمچارانی گپانی زورگ پہ شمئے جان سلامتیءَ ھژدری اِنت۔ اگاں کجام مردم یا گاڑی دگ بندی ءِ بگیری ءَ بہ کنت ءُ کمک کنگ ءِ جاہ ءَ وت ءَ شکی بہ کنت گڑا سرمچار آئی ءَ دژمن ءِ کمکار سرپد بنت۔
میجر گْوھرام بلوچ ءَ درشان ءِ گڈیءَ سرجمیں کاروائیانی زمہ واری منّ اَنت۔
بلوچستان ءِ دمگ مستونگ ءِ ھند دشت کمبیلا ءَ مروچی آپریشن ءِ میان ءَ تُرندیں میڑے ءِ آسر ءَ یک پولیس کارندھے بیرانی واکدار ءَ راست کتگ-
پولیس رِد ءَ بیران بیتگیں کارندہ ءِ پجّار ھیڈکانسٹیبل رحمت اللہ خلجی نام ءَ چہ بیتگ وھدے کہ دگہ شش کارندہ ٹپی بیتگ اَنت-
اِھوالکار ءِ رِد ءَ پاکستانی پوج ءَ دشت ءِ دمگ کمبیلا ءَ انگیر ءَ کتگ آپریشن بندات کتگ بلے آپریشن ءِ میان ءَ سلاہ بندیں مردمانی نیمگ ءَ چہ پوج ءِ سر ءَ تُرندیں اُرشانی دیمپانی کنگ کپتگ-
سیکیورٹی ءِ گوشگ اِنت انچش کہ پوج ءَ پیشگامی کتگ، سلاہ بندیں مردماں جتاجتائیں ھنداں چہ اُرش بندات کتگ،چریشی ءِ آسر ءَ تیرگواری ءِ رِد تُرند بیتگ-
اے میان ءَ دشت کنڈ مسوری ءِ ھند سر ءَ ھم سلاہ بندانی مزنیں کچے ءَ پوج ءِ یک بُنجلے نشانگ کتگ-
دمگی اِھوالکار ءِ رِد ءَ دمگ ءَ داں دیراں تُرندیں تیرگواری ءُ تراکانی توار اش کنگ بیتگ-
ھمے وڑ ڈغاری ءِ دمگ ءَ پوج ءِ گاڑیانی سر ءَ سلاہ بنداں اُرش کتگ-
بلوچستان ءِ دمگ چہ کیچ ءُ پنجگور ءَ سئے مردم پاکستانی لشکر ءَ دزگیر کتگ ءُ بیگواہ کتگ اَنت۔
بیگواھیں مردمانی پجار ندیم ء حاصل خان ، محمد تاج ء تاج محمد ءُ سلیمان ء امان اللہ ءِ ناماں بوتگ اَنت۔
دمگی اھوالانی رد ءَ ندیم گوستگیں شپ ءَ کیچ ءِ دمگ تمپ ملک آباد ءِ دمگ ءَ لوگ ءِ سر ءَ بیڑ برگ ءَ دزگیر کنگ بوتگ کہ ایشی ءَ پد آ بیگواہ اِنت۔
ھمے وڑ 17 مارچ ءَ محمد تاج چہ کیچ ءِ دمگ شاپک ءَ ءُ سلیمان چہ پنجگور ءِ دمگ خدا آبادان ءَ دزگیر کنگ بوتگ کہ ایشی ءَ پد چہ ھما روچ ءَ بیگواہ اَنت۔
