بلوچ لبریشن آرمی ءَ گْوستگیں سئے ماہانی تہ ءَ بلوچستان ءِ جتائیں دمگاں باپاری راھانی سر ءَ پاکستانی لشکر ءِ چیک پوسٹانی سر ءَ اُرش ءُ تباہ کنگ ءِ ویڈیو شنگ کُتگ۔
ویڈیو کیپشن ءِ رد ءَ بی ایل اے ءِ سرمچاراں گوستگیں سَے ماھانی تہ ءَ جتا جتائیں دمگاں پاکستانی لشکر ءِ 14 ءَ چہ گیش چیک پوسٹ گپتگ ءُ تباہ کتگ ءُ اود ءَ سلاہ برتگ اَنت۔
ویڈیو ءِ تہ ءَ بلوچستان ءَ گوں ایران ءَ ھمگرنچیں شال ءُ تلتان ءِ تجارتی راہ (N-40 شاھدگ) ءِ سر ءَ تجارتی گاڑیانی نشانگ جوڑ کنگ ءِ ندارگ ھوار اَنت، شال ءَ گوں کراچی ءَ ھمگرنچیں پُھلاں تراک ءِ آسر ءَ تباہ کنگ ءَ گندگ بنت، ھمے وھد ءَ ایف سی ءُ پولیس ءِ چیک پوسٹانی سر ءَ اُرش کنگ ءِ ندارگ ھوار اَنت۔
ویڈیو ءَ پولیس ءُ لیویز ءِ کارندھانی دزگیر کنگ ءُ چہ آھاں سلاہ ءِ دست گرگ ءِ ندارگ ھم گندگ بنت۔
بلوچ لبریشن آرمی ءَ اے سال ءِ بندات ءَ بلوچستان ءَ گوں ایران ءَ ھمگرنچیں تجارتی راھانی سر ءَ ایل پی جی، تیل ءُ دگہ سامانانی سوداگری ءِ سر ءَ بندش ءِ جار جتگ اَت کہ ایشی ءِ پد ءَ تجارتی گاڑی ءُ پاکستانی لشکر کہ آھانی رکھینگ ءِ ھاترا دیم داتگ اَنت جتا جتائیں دمگاں بازیں اُرشانی آماچ بوتگ اَنت۔
ایشی ءَ چہ پیسر گل ءِ نیمگ ءَ یکے پد دومی اُرشانی تہ ءَ مڈی بروکیں ٹرانسپورٹ گاڑیانی نشانگ جوڑ کنگ بوتگ کہ ایشی ءِ سبب ءَ مڈی ٹرانسپورٹ گاڑیاں لوڈنگ بند کنگ ءِ جار جتگ ات۔