بلیک لِسٹ
نبشتہ کار : س .ا. بلوچ
دی بلوچستان پوسٹ
سارتی ءَ وتی بانزُل چاریں آتراپاں ایر داتگ ات اَنت ماہ دسمبر ات برپ بستگیں آپ دُت دیگ ءَ ات اَنت۔ میراس ءَ پیسر ءَ زانتگ ات کہ پہ بلوچ ءَ دسمبر یک ناوشیں ماھے۔ دسمبر ءَ بلوچستان ءِ ھر کُنڈ سارت ات بلے پنجگور ءَ وَ گنتر سارت ات۔ پَنجگُور ءِ سارتی گُشے آئی ءِ تہ ءَ پُترتگ ات ءُ میزان میزان ءَ جبین ءَ ٹُکّر ٹُکّر کنگ ءَ ات۔ میراس ءَ نوکی سے روچ بوتگ ات کہ بیگواہ ات۔
ماہ دسمبر ات آئی ءَ دم پہ ساھت جیڑ ات کہ آ شھید کنگ بیت آ کُشگ بیت چوناھا ھر سال ءِ دسمبر ءَ ریاست ءَ بلوچ ءِ کشگ ءُ دور دیگ ءِ شوربندی گوں تیزی ءَ برجاہ داشتگ ات پمیشکا میراس ءَ جیڑ ات آ اوں کُشگ بیت۔ آ چو ھر ءَ لَٹ ورگ ءَ ات چہ بازیں لٹ ءُ پاترپ ءُ بیھاراں آئی ءِ کش ءِ آدگہ بندیگ اوں ترسگ ءَ ات اَنت ترسگ ءِ سوب ایش ات کہ آئی ءَ ٹارچر سیل ءَ دژمن پدائی یے سرپد بوگ ءَ ات اَنت پرچاکہ آئی ءِ سر ءَ نوکنڈی ءِ پدائی ءِ وئیل ءِ بھتام جنگ بوتگ ات ءُ آئی ءَ ھمے بُھتام جنگ بوتگ ات کہ آئی ءَ گوں پدائی زرینہ ءَ سیادی ھست۔ بندی جاہ سک تھار ات زانگ بوگ ءَ نہ ات کہ روچ ات یاکہ شپ۔ آ کوٹی نمبر1 ءَ ات کوٹی اوں سک تھار ات یک نیمگے دہ کوٹی ات اَنت ءُ دومی نیمگ ءَ دہ دگہ کوٹی ھست ات ءُ میان ءَ یک مزنیں دیوالے ھست ات۔ آئی ءِ کوٹی راستیں نیمگ ءَ ات۔ میراس ءَ کوٹی نمبر1 ءِ آرگ ءَ رند آدگہ نوھیں بندیگانی تہ ءَ سے کس پریات ءَ ات۔ آ سے ئیں فدا، حمدان، ءُ ظہیر ات اَنت ءُ باکی شش کیدی ھمے سے ئیں بندیگاں دلبڈی دیگ ءَ ات اَنت۔ بلے میراس ھاموش ات آئی ءَ چہ بازیں لَٹّاں ناں نشت کت ءُ نیکہ وپت ئے کُت۔ کمو دیر ءَ رند یک پنجابی یے اتک میراس ءَ را گشت ئے ھمیش اِنت کہ انو ترا چو ھر ءَ لٹ اش دات اے زالم اَنت کس ءَ نہ بَکش اَنت خدا ءَ اوں نہ منؑ اَنت نمرود ءُ فیرون ءَ چہ گنتر اَنت بلے من سکیں شریں مردمے آں پنچیں وھد ءِ نماز ءَ کناں ءُ یک پکّاھیں مسلمانے آں تو آیاں آس بہ دے من ءَ وتی دْرستیں گپاں بگش تاکہ من ترا چہ اے زندان ءَ کش ات بہ کناں۔ میراس ءَ را پنجابی ءَ اے بابت ءَ ھچ پسّہ نہ دات گڑا پنجابی ءَ زھر زھر ءَ دو دانگ پونسٹن گولی آئی ءِ نیمگ ءَ چگل دات ءُ شُت۔ پیشاپ ءِ بوتل ءُ آپ ءِ بوتگ یکیں جاہ ءَ ات اَنت آپاں آئی ءِ دل زورگ ءَ نہ ات ءُ پونسٹن نہ وارت اَنت ئے۔ وھد کساس شپ ءِ 1:00 بج ات میراس ءَ چہ بازیں درداں واب آیگ ءَ نہ ات پادانی دْرپ دْرپ ءِ پد ءَ توار اَت ءُ چابی ءُ کبل ءِ اوں توار ات۔ ھمے دمان ءَ ایم آئی ءِ مردم پُترت اَنت میراس ءِ کوٹی نمبر1 ات چمیشکا آ تچک ءَ کوٹی نمبر1 ءِ دپ ءَ اتک اَنت۔ دژمان اش دات کہ بگش تو تنظیم ءِ مردم ئِے بلے میراس ءَ ھچ نہ گشت گشے پورا گُنگ ات گڑا آیاں گوں زھر زھر ءَ گشت (ہمیں سب معلوم ہے کہ تم کون ہوں تم ہمارے مہمان ہوں تمارے کچھ دن باقی ہیں اور تم کو ہم بہت جلد اوپر بیجے گئے۔ تم لوگ بلیک لِسٹ میں ہوں۔ )دیر نہ گوست کیدیانی تہ ءَ یکے ءَ پریات کُت ءُ گشت اے سنگت سرمچارے بیت پوج ءَ چست کُتگ پدائی یے بیت ایشی ءَ کُش اَنت مارا اوں کش اَنت گوں۔ ایم آئی ءِ مردم ءَ نہ گشتگ ات کہ ما کُل کیدی بلیک لِست ءَ ایں۔ بلے ھمے بلیک لِست چی یے، فدا ءَ گوں گریوگ ءَ گشت۔ ما نہ زان ایں، ظہیر ءُ حمدان ءَ اوں درّائینت۔ آدگہ بندیگ اوں زانگ ءَ نہ ات اَنت۔
دْرستیں نپسیاتی ات اَنت ءُ پریات کنگ ءَ ات اَنت۔ من وَ پیسر ءَ چپیں نیمگ ءَ بوتگ آں بلے ھما اِنت کہ نوکیں سنگت اتکگ من ءَ آیاں شمے کرّ ءَ آورتگ ایشی ءِ مانا ایش اِنت کہ من اوں کُشگ باں، فدا ءَ گشت۔ راستیں نیمگ بلیک لِسٹ ءَ اِنت ایشی ءِ مانا ایش اِنت کہ یک ءُ دو روچ ءِ تہ ءَ مارا شمارا دژمن شھید کن اَنت، فدا ءَ پد ءَ گشت۔ کیدیاں گشت فدا وتی کَش ءِ نوکیں سنگت ءِ نام ءَ جست کن۔ سنگت تئی نام کئے اِنت، فدا ءَ گشت۔ میراس ءُ پلان جاہ ءَ جھمنند آں، آئی ءَ گشت۔ سنگت تو وانندگے ئے تو بگش اے بلیک لِسٹ چی یے؟ ھچّے نہ اِنت ایم آئی ءِ مردم بس مارا نپسیاتی کنگ لوٹ اَنت بزاں مارا ترسینگ ءَ اَنت۔ کس کُشگ نہ بیت وھم مکن ات، میراث ءَ گشت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت۔