ماتی ھَسمَت ءِ لاڑیں بچّ جِند ندْریں شکیل جان
نبشتہ کار :میراس بلوچ
دی بلوچستان پوسٹ
ماں بلوچستان ءَ بازیں کارِست ھست کہ زمین ءِ رکّینَگ ، وپاداری ءُ مِھروانی مُکلسی ءُ جپاکشّی وتی ابرمی تاک جوڑ کُرتگ ات ءُ درد ءُ اندوھاں چیر دیَان ءَ مُدام شوکیں بچکندے ءَ گون تئی ارواہ ءَ تاھیر بکش اَنت پدائین شکیل جان ھم چہ ھما کارِستاں یکّے اَت۔
من ءَ یات اِنت کہ ما سپَرے ءَ جُنزان اِت ایں سنگتاں گُشت کہ شَپی پرنٹ ءِ سنگتانی اوتاک ءَ داریں ما وھدے گون وتی ژندے بالاد ءَ مگرِب ءِ تہاری ءَ اوتاک ءَ رس اتیں گُڑاں شھیدیں پپُل جان مئے دیم ءَ اتک ءُ مارا وشّ آتکے کُت کمبلے مچّانی بُن ءَ تالان اَت ما کُل نِشت ایں منی چمّ پہ شکیل جان ءَ کپتاں چاراں بچکندے لُنٹاں تالان اِنت ءُ چاگلے آپ ءِ منی نیمَگ ءَ شہارت اَنت من چاگَل ءِ آپ زُرتاں گرمے سارت کُت مارا شوکیں چاھے دیم ءَ دات ئے شپ تہار اَت بلئے منی چمّ آئی ءَ را سک اِتاں ءُ گُشے من پیسرا جاھے دیستگ اَت رندا ھیال کُت کہ آئی ءَ را الاکہ ءَ من دیستگ۔
سُھب بوت گُڑا ما یکّے دومی ءَ را جُست ءُ پد بناہ کُت نِشت ءُ بازیں کِسّہ آؤرت شھری سنگتانی بارو ءَ گپ رپ کُت ءُ من ءَ سماہ بوت کہ شکیل سکّیں دل پھک ءُ مِھروانیں سنگتے آئی لُنٹانی سر ءَ مُدام شوکیں بچکندے تالان اَت ءُ ھمُک سنگت آئی ءِ دیوانے شیدائی اَت۔
وھد گون تیزیں گاماں جُنزان اَت شکیل چہ مِسکان ءَ سُھراب بوت ءُ سُھراب زمین ءُ راج ءِ اِشک ءِ انتہا ءَ رَس اتگ اَت ءُ گون سنگت الماس ءَ ھوار دگہ پنچ سنگت ءَ گوادر ءَ بدواہ ءِ کیمپ ءَ اُرش کُت ءُ وتارا پہ ابَدی نمیران کُت۔
مرچی کہ شکیل جان گلزمین ءِ ھاکانی تہ ءَ وش واب اِنت باریں ھَسمت ءِ ھال چی اِنت پھریگ اِنت ارسیگ اِنت ءُ لئیکو جنان ءَ پتو چندے کلوہ روان دیان اِنت ءُ گُھارُکانی چمّ پُر ارس اَنت ءُ پھری اَنت رنجی اَنت کہ ھمے ساھت ءَ تئی کماش ءُ برادل چہ زِندان ءَ آجو بوتگان ءُ یک براسے انگت زِندانی اِنت۔
مِھروانیں شکیل جان اے بچکندانی پُشدر ءِ درد ءُ آھاں سرپد اَت ھمُک یاگی ئیں بامرد ءِ کھول ھمے زِندے تہلی ءُ سکّیاں گُوَزان اِنت ءُ گیش مُھکم بوھان اِنت جزماں اے توکل مارا الّم سوبین کنت مارا وژنام کنت ءُ ڈیھ ءِ درامدیں بدواھاں چہ آجو کنت۔زمین تئی نواھیں سراں تئی ارزِشت زانت ءُ پہ ترا پہ ابَدی نمیران بوت اَنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت۔