بلوچستان ءِ جتاجتائیں دمگاں پاکستانی پوج ءِ سر ءَ اُرش ءُ پُھل تراکینگ بیتگ اَنت

بلوچستان ءِ جتاجتائیں دمگاں پاکستانی پوج ءِ سر ءَ اُرش ءُ پُھل تراکینگ بوتگ-

گیشیں ھالانی رِد ءَ ھُزدار ءِ دمگ کرخ ءَ گوستگیں روچ ءَ پاکستانی پوج، کاؤنٹر ٹیررازم ڈیپارنمنٹ “سی ٹی ڈی ” ءُ اے ٹی ایف ءِ کساس سی گاڑیانی ھمگرنچیں یک کاروانے سلاہ بندیں اُرش ءِ نشانگ کتگ-

گوشگ بیگ ءَ اِنت کہ اے میان ءَ دْراجیں میڑے بیتگ، آیانی تہ ءَ پانزدہ ءَ چہ گیش کارمندانی بیرانی ءُ ٹپی بیگ ھال اِنت، اے میان ءَ دو سلاہ بندیں مردمانی جنگ ءِ ھال دیم ءَ اَتکگ-

ھمے وڑ ھُزدار ءَ باغبانہ ءِ ھند سر ءَ یک پُھلے تراک ءَ چہ تباہ کتگ کہ چریشی ءِ سوب ءَ گاڑیانی روگ ءَ آیگ مھتل بیتگ –

دومی نیمگ ءَ نوشکی ءِ دمگ احمد وال ءَ ھم گوستگیں روچ ءَ پاکستانی پوج ءِ سر ء سلاہ بندیں مردماں اُرش کتگ چریشی ءِ آسر ءَ جانی تاوان ءِ ھال اِنت-

ھمے وڑ تربت ءِ دمگ گیبن ءَ پاکستانی پوج ءِ گاڑیانی ھمگرنچیں کاروان سلاہ بندیں مردمانی نیمگ ءَ چہ نشانگ کنگ ءِ ھال اِنت ءُ جانی تاوان ءِ گمان اِنت

تنی وھدے وئیلانی زمہ واری ھچ گل ءَ نہ زرتگ اَنت-