بی ایس او آزاد ءِ چیئرمین ابرم بلوچ ءَ گوں گلگدار

الم بوانیت

آھوگ تو اے وڑ مہ کُتیں۔۔۔ – بالاچ قادر

آھوگ تو اے وڑ مہ کُتیں۔۔۔ بالاچ قادر دی بلوچستان پوسٹ گُل ترا یات بیت ھما وھدی کہ توءُ دگہ سنگتے مئے...

کمےّ وھد کشّ – منھاج مختار

کمےّ وھد کشّ منھاج مختار دی بلوچستان پوسٹ تو ھم زانئے کہ من ترا گشگایاں بلے اگاں ترا موھ رست منی اے...

بلوچستان ءِ آجوئی ءِ ترس ءُ پاکستانءِ نوکیں پالیسی: نبشتہ حکیم واڈیلہ

گوشنت زوراک وھدءِ وتا نزور بیگءَ گندیت اگں ماریت گڑا آوتی سرجمیں زورا جنت ءُ وتی زوراکیءَ برجم دارگءِ...

بی ایس او چی یے ؟

بلوچستان ءِ سیاست ءَ بلوچ اسٹوڈنٹس آرگنائزیشن ءِ کرد مدام پر ارزشت بیتگ۔ اے گل ءِ بن ھشت اولی بر ءَ بلوچ اسٹوڈنٹس ایجوکیشنل ارگنائزیشن ءِ نام ءَ 1962 ءَ کراچی ءَ ایر کنگ بیتگ۔ کہ ایشی ءِ بُنکی لوٹانی تہ ءَ بلوچ نودربراں یک جاہ کنگ ءُ آیانی تہ ءَ راجی ءُ سیاسی زانت ودی کنگ ءُ آیانی ھکانی ھاتر ءَ جھد کنگ بیتگ۔ اِشی ءِ تہ ءَ “ایجوکیشنل” گال ءِ گیشی ءِ سوب ایوبی آمریت گُشگ بیت، پرچا آ وھد ءَ نودربرانی سیاست ءِ سر ءَ بندش لگوگ بیتگ۔ 1962 گل ءِ اولی (چیرمین) سروک چنگیز عالیانی گچین کنگ بیتگ اَت۔

26 نومبر 1967 ءَ گل ءِ نام ءَ چہ ایجوکیشنل ھلاس کنگ ءَ پد دلجمیں پیماں بلوچ اسٹوڈنٹس ارگنائزیشن ایر کنگ بیتگ اَت ءُ اولی کونسل سیشن ایر کنگ بیتگ اَت۔ اولی کونسل سیشن ڈاکٹر عبدالحئی بلوچ بی ایس او ءِ اولی چیئرمین ءُ وھدیکہ بیزن بلوچ اولی سیکریٹری جنرل گچین کنگ بوتگ اَت۔

بی ایس او ءِ گوستانک کہ یک نیمگے جھد، دیمونی ءُ زندانی بیگ ءَ چہ پُر اِنت، دومی نیمگ ءَ وت ما وتی دگری ءِ گوستانک ھم ھمینچو دراج ءُ کوھن اِنت۔ اے دگریانی بندات بی ایس او ءِ اولی کونسل سیشن ءَ چہ بیتگ اَت۔ ڈاکٹر حئی ءُ آئی ءِ سنگت نوک اڈ بیتگیں راج دوستیں ھمسنتی گل نیپ ( نیشنل عوامی پارٹی) ءَ گوں نزیکی بیتگ، وھدیکہ گوستگیں سیکریٹری جنرل عبدالرحیم ظفر، امان اللہ گچگی ءُ ایندگہ پیپلز پارٹی ءَ گوں نزیکی بیتگ اَنت۔ ھمیشی ءِ سوب ءَ آیاں بی ایس او ( اینٹی سردار) ءِ نام ءَ بی ایس او ءِ یک جتائیں بھر ءِ اڈ کُت ءُ چہ ھمد ء بی ایس او ءِ بھر ءُ بانگ کنگ ءِ روایت بندات بیت۔

1972 ءَ بی ایس او ( اینٹی سردار) ءِ سر ءَ چہ پی پی پی ءِ سانمندی ھلاس بیت، آ نوکیں کونسل سیشن ءِ کن اَنت، تاج بلوچ چیئرمین گچین بیت۔ دومی نیمگ ءَ بی ایس او (عوامی) اُردو کالج کراچی ءَ کونسل سیشن ءَ برجم دار اَنت، کہ اود ءَ مروچیگیں بلوچ راجی جُنز ءِ مزن بالادیں کارست ءُ گوست ءِ نودربرانی رھشون عبدالنبی بنگلزئی چیئرمین گچین کنگ بیت۔

سال 1974 ءَ بی ایس او ءِ اے دوئیں بھر گپ ءُ تران ءَ پد وتی دگریاں ھلاس کن اَنت ءُ ھوار بیگ ءِ پیسلہ ءَ کن اَنت ءُ ھواریں کونسل سیشن ءِ لوٹارین اَنت، کہ ایشی ءِ تہ ءَ ایوب بلوچ چیئرمین ءُ یاسین بلوچ سیکریٹری جنرل گچین کنگ بنت۔

سال 1986 ءَ داں بی ایس او یک گلے ءِ دروشم ءَ ھست بیت، بلے 1986 ءِ کونسل سیشن ءَ پد وھدے یاسین بلوچ چیئرمین گچین کنگ بیت، بی ایس او ءِ تہ ءَ پد ءَ دیری ءُ دگریانی ودی بیگ بندات بیت ءُ ڈاکٹر کھور خان 1987 ءَ وتی جتائیں بھریں بی ایس او سھب ءِ نام ءَ اڈ کنت۔

بی ایس او ءِ دپتر ءَ نود ءِ دھک ءَ یک سیاھیں دھک ءِ ھساب ءَ یات کنگ بیت، کہ اِشی ءِ نیام ءَ پرشت پروش، وت ماں وتی جنگ ءُ چوپ، ونڈی سیاست سک بُرز بیتگ ءُ بازیں بھر اڈ بیتگ ءُ پُرشتگ اَنت۔

بی ایس او آزاد ءِ بندات:

بی ایس او ءِ دپتر ءِ تہ ءَ یک مزنیں بدلی ءِ ھما وھد ءَ ودی بیت اِنت، وھدے فروری 2002 ءَ بی ایس او ( محراب) کونسل سیشن کنگ ءَ بنت اِنت، کہ آئی ءِ بائیکاٹ ءَ بی ایس او ءِ سینئر وائس چیئرمین ڈاکٹر اللہ نظر بلوچ وتی ھمراھانی پجیگ ءَ کنت۔ کہ آئی ءِ سوب ھما وھدے بی ایس او ءِ چیئرمین نادر قدوس ءِ پاکستانی پارلیمانی گلاں گوں نزیکی، بی ایس او ءَ وتی مادنیں کِشک ءَ چہ ترینگ گوشگ بیت۔ ڈاکٹر اللہ نظر آجوئی ءَ، ابید پارلیمانی سیاست ءُ بی ایس او ءِ آجوئیں بستار ءِ لیکھی رھبند ءِ سر ءَ، جتائیں کونسل سیشن ءِ اڈ دنت ءُ بی ایس او آزاد ءِ بن ھشت ءَ ایر کنت ءُ گل ءِ اولی چیئرمین گچین کنگ بیت۔

اے وھد ءَ بی ایس او آزاد ءُ محراب ءَ ابید بی ایس او ءِ دگہ ھم دو بھر ھست بنت۔ بی ایس او ( مینگل) کہ چہ بی این پی ( مینگل) ءَ، ءُ بی ایس او (استار) کہ گوں بی این پی (عوامی) ءَ نزیک بیتگ اَنت۔ کمو وھد ءَ پد بی ایس او (استار) وتی چیئرمین حمید شاھین ءِ سروکی ءَ بی ایس او آزاد ءَ گوں ھوار بیگ ءِ جار ءَ جنت۔ چہ آئی ءَ پد بی ایس او آزاد وتی نام ءَ مٹ کنت ءُ بی ایس او (متحدہ) ایر کنت۔ بی ایس او (متحدہ) ءِ کونسل سیشن پنجگور ءَ بیت، کہ اود ءَ چیئرمین ڈاکٹر امداد بلوچ ءُ جنرل سیکریٹری سعید یوسف بلوچ گچین کنگ بنت۔

بی ایس او آزاد ءُ استار ءِ ھوار بیگ ءَ پد یک برے پد ءَ بی ایس او اے ایندگہ بھراں گوں گپ ءُ تران بندات بیت ءُ درستیں بھر یکجاہ بنت ءُ “سنگل” بی ای او ءِ سر ءَ تپاک کن اَنت۔ کہ سک کسانیں مدتی ءَ داں ھست بیت، پیسرا کونسل سیشن ءَ ساری واحد رحیم بلوچ جتائیں بھر ءِ بی ایس او پجار ءِ نام ءَ جتا جوڑ کنت۔

2006 ءَ دلجمیں پیم ءَ شال ءَ بی ایس او ءِ کونسل سیشن برجم دارگ بیت، اود ءَ بشیر زیب بلوچ چیئرمین، سنگت ثناء بلوچ وائس چیئرمین ءُ گلزار بلوچ سیکریٹری جنرل گچین کنگ بنت۔ کونسل سیشن ءِ نیام ءَ دگریانی سوب ءَ محی الدین بلوچ وتی جتائیں بھر ءِ جوڑ کنت۔ اِشی ءَ پد سنگل بی ایس او وتی کوھنیں نام ءَ بی ایس او آزاد ءَ پد ءَ زیریت۔

سال 2008 ءَ بی ایس او آزاد ءِ آیوکیں کونسل سیشن ءَ بشیر زیب بلوچ دومی رند ءَ گل ءِ چیئرمین وھدیکہ زاھد بلوچ سیکریٹری جنرل گچین کنگ بنت۔ دیمترے کونسل سیشن ءِ ھاتر ءَ بی ایس او آزاد نگیگیں ءُ ترندیں جاورانی سوب ءَ سالے ودار کنگ کپ اِیت۔ 2012 ءَ اڈ داتگیں نوزدھمی کونسل سیشن ءَ زاھد بلوچ چیئرمین، کریمہ بلوچ سینئر وائس چیئرمین وھدیکہ رضا جھانگیر سیکریٹری جنرل گچینگ کنگ بنت بلے بی ایس او آزاد ءِ رد ءَ 14 مارچ 2014 ءَ آھانی چیئرمین زاھد بلوچ ءَ چیریں گلانی کارمند دزگیری ءَ پد بیگواہ کن اَنت، کہ داں انگت دیما آرگ نہ بیتگ۔ آئی ءَ پیسر گل ءِ سیکریٹری جنرل رضا جھانگیر ءَ ھم تُربت ءَ لشکری یک بیڑے ءِ نیام ءَ تیر جن اَنت ءُ کُش اَنت۔

2015 ءَ بی ایس او ءِ بیستمی کونسل سیشن برجم دارگ بیت، اِشی ءِ تہ ءَ کریمہ بلوچ چئیرپرسن ءُ سیکریٹری جنرل ثناء اللہ پنام عزت بلوچ گچین کنگ بنت۔ کریمہ بلوچ ءَ گوستانک ءِ تہ ءَ اولی زالبولیں سروک بوگ ءِ پھر گون اِنت۔ بی ایس او آزاد وتی بیست ءُ یکمی کونسل ءَ 2018 ءَ برجم داریت، اود ءَ سھراب بلوچ گل ءِ چیئرمین گچین کنگ بیت۔ اے یکشلی داں اے سال ءَ برجاہ اَت وھدے 3 نومبر 2020 ءَ بی ایس او آزاد اے جار ءَ جنت کہ “ بی ایس او آزاد ءِ بیست ءُ دومی راجی کونسل سیشن بنام معلم آزادی شھید سبا دشتیاری ءُ درس گاہ آجوئی خیر بخش مری ءِ یات ءَ برجم داشتگیں سیشن مروچی سوبمندی ءَ گوں آسر بیتگ۔ کہ اِشی ءِ تہ ءَ ابرم بلوچ ابید کسی دیما اوشتگ ءَ چیئرمین وھدیکہ مھر زاد بلوچ ابید کسی دیما اوشتگ سیکریٹری جرنل گچین کنگ بیتگ۔”

چیئرمین ابرم بلوچ کَے اِنت؟

ابرم بلوچ بی ایس او آزاد ءِ ھشتمی چیئرمین اِنت، آئی ءَ وتی سیاسی زند ءِ بندات اسکول ءِ وھد ءَ ھپتمی مکتب ءَ چہ کُتگ بیتگ۔ اے ھما زمانگ بیتگ کہ وھدے بلوچستان ءَ پہ آجوئی ءَ پنچمی جُنز ءِ بندات بیتگ اَت ءُ اے سرجمیں بلوچستان ءَ سربیتگ اَت۔ ابرم بلوچ ءِ سیادی گوں بلوچستان ءِ یک انچیں دمگے ءَ اِنت، کہ سیاسی دروشم ءَ مدام دیما بیتگ، پمیشکا کسان سالی ءَ آئی ءَ جتائیں سیاسی گلانی دیوان، مراگش اور مچیانی تہ ءَ نندگ ءِ موہ رس اِتگ۔ چہ ھمد ءَ آئی ءِ بُنکی سیاسی زانگ بندات بیتگ۔

آئی ءَ دلجمیں وڑے ءَ بی ایس او آزاد ءِ پتر ءِ سر ءَ سیاسی کارانی بندات ھما وھد ءَ کُت، وھدیکہ سال 2008 ءَ گل وتی کونسل سیشن ءَ کنگ ءَ اَت۔ بلے اے وھد ءَ آ گل ءِ باسک نہ اَت، آ دیمی سال 2009 ءَ باسک بیت ءُ گل ءَ ھوار بیت۔ وتی جوانیں کرد ءِ سوب ءَ ھما سال ءَ بزاں دسمبر 2009 ءَ آ وتی بُنزہ ءِ ڈپٹی یونٹ سیکریٹری گچین بیت، ءُ کسانیں وھد ئِے تہ ءَ وتی بُنزہ ءِ بُنزہ سیکریٹری ھم گچین کنگ بیت۔

سال 2010 ءَ وھدیکہ آیانی ھنکین ھلاس کنگ ءُ آرگنائزنگ کمیٹی اڈ دیگ بوت گُڑا آ اولی رند ءَ زونل آرگنائزنگ کمیٹی ءِ باسک گچین بوت ءُ وھدے سال 2011 ءَ آئی ءَ نوک وتی میٹرک ھلاس کُتگ اَت، گُڑا آ وتی نوک اڈ بیتگیں ھنکین کابینہ ءِ باسک جوڑبیت۔
 
سال 2009 ءَ چہ بی ایس او آزاد ءِ سر ءَ پاکستانی کریک ڈاؤن بندات بیتگ اَت، گل ءِ وائس چیئرمین ذاکر مجید دزگیری ءَ پد بیگواہ کنگ بیتگ اَت، کہ داں انگت ءَ بیگواہ اِنت۔ آئی ءَ پد بی ایس او آزاد ءِ مزنیں کساسے ءَ رھشون ءُ باسک ھمروچی یے ھساب ءَ بیگواہ کنگ ءُ کُشگ ءِ شل بندات بیتگ اَت۔ مارچ 2013 ءَ بی ایس او آزاد یک بندش جتگیں گلے ءِ نامینگ بیت۔ چیئرمین ابرم بلوچ ءِ رد ءَ “ اے وھد بی ایس او آزاد ءِ ھاتر ءَ گران ءُ ترند بیتگ اَنت، بلے گل ءِ رھشونانی دور چاری، ھمرواجی ءُ جاورانی سرپدی ءَ گل ءُ باسکانی ھاٹیگانی تہ ءَ کمی آیگ ءَ اِشتگ۔ اے سیاسی وھد ءُ اے ترندیں جاور مئے دربرگ ءِ دروشم بیتگ اَنت، کہ ایشاں ماراں ھمک گرانیں جاورانی دیمپانی کنگ ءِ ھاٹیگ داتگ ءُ منی راستیں سیاسی سوجکاری ھمے گرانیں جاوراں کُتگ۔”
 
پاکستانی گلانی نیمگ ءَ بی ایس آزاد ءِ سر ءَ برجاھیں زوراکی ءِ سوب ءَ بی ایس او آزاد ءَ نوکیں جاورانی ھساب ءَ وت ءَ مٹ کُتگ ءُ سرجماں وتی دروشم مٹینتگ ءُ 2011 ءِ نیام ءَ یک نوکیں دروشمے “سیل سسٹم” ءِ رد ءَ نوکیں وڑے ءَ گل ءَ دیم برگ بندات کُتگ۔ نوکیں دروشم ءِ رد ءَ ابرم بلوچ زونل سیل ءِ آرگنائزر گچین کنگ بوت۔
 
آئی ءَ پد آ داں ھشت سالاں بی ایس او آزاد ءِ جتائیں بنجاھی اگدوھانی سر ءَ زمہ واری پیلو کنگ ءَ بیتگ ءُ ھمے سال 2020 ءَ گل ءِ بیست ءُ دومی کونسل سیشن ءَ ابرم بلوچ بی ایس او آزاد ءِ نوکیں چیئرمین گچین کنگ بیت۔

 
چیئرمین ابرم بلوچ ءَ گوں نیاد:
 

ابرم بلوچ وتی راستیں نام ءَ رسانک ءِ تہ ءَ پدر نہ کنت، ءُ آئی ءِ پجار نامگ ءَ چہ ھم انچیں اھوال دیر کنگ بیتگ اَنت، کہ چہ آیاں آئی ءِ پجار زانگ بہ بیت۔ دی بلوچستان پوسٹ ءَ جتائیں جاہ ءُ مردماں گوں یکشلیں جھداں پد گوں آئی ءَ اھوال کُت ءُ ناشناسیں جاگھے ءَ گوں آئی ءَ نیاد کُتگ، کہ اود ءَ آئی ءَ اکس کَشگ ءَ مکن کُتگ ءُ سرجمیں گُلگِدار ءِ نیام ءَ آئی ءَ دبکو دیما بیتگ۔ سوب جُست کنگ ءِ سر ءَ آئی ءَ پسہ دات کہ اے ماسک چہ کرونا ءَ رکگ ءَ گیشتر پاکستانی لشکریاں چہ رکگ ءِ ھاتر ءَ اِنت۔ آئی ءَ درور دیان ءَ گُشت کہ آئی ءِ گل ءِ پیسرگیں سروک (چیئرمین) زاھد بلوچ ءَ بی بی سی ءَ یک گُلگِدارے داتگ اَت، کہ آئی ءِ تہ ءَ آئی ءَ وتی دیم چیر نہ داتگ اَت، اے گُلگِدار ءِ لھتے ھپتگ ءَ پد آ لشکر ءَ چِست کُت، شش سال سرجم بیگ ءَ پد ھم داں مروچی بیگواہ اِنت۔ ابید اِشی ءَ کہ آئی ءَ وتی گُلگِدار ءَ ساپیں لبزانی تہ ءَ گُشتگ اَت کہ آئی ءِ گل پُر ایمیں جھد ءِ سر ءَ باور دار ایت ءُ تھنا یک وانندھیں گلے۔

جُست ءُ پَسّو
 
دی بلوچستان پوسٹ: درستاں پیسر ما شمارا بی ایس او آزاد ءِ نوکتریں چیئرمین گچین بیگ ءِ سر ءَ مرادباتی گوش ایں ءُ گل ءِ نیمگ ءَ شمئے منتواریں کہ شما مئے گون ءَ گپ جنگ ءِ ھاتر ءَ ھو کُتگ۔

ابرم بلوچ: دی بلوچستان پوسٹ رسانک نیٹورک ءِ منتوار کہ مئے لیکہ ءُ گپانی گوشدارگ ءَ اتکگ اَنت۔
‏‎
دی بلوچستان پوسٹ: گوستگیں یک دھکے ءَ چی گیشتر وھد ءَ گندگ ءَ پیداک اِنت کہ بی ایس او آزاد ءِ بگیری ءَ پاکستانی ترندی ءُ زوراکی گوں ترندی ءَ برجاہ اِنت ءُ مارچ 2013 ءَ گل کانودی رد ءَ بندش ءِ ھم آماچ اِنت۔ چُشیں جاورانی تہ ءَ جمھوری روایاتانی برجم دارگ یک گلے ءِ ھاتر ءَ داں کجام ھد ءَ گران بیت؟ کونسل سیشن ءِ برجم دارگ ءِ وھد ءَ شمارا چونیں جیڑھانی دیمپانی بیتگ ؟
 
‏‎ابرم بلوچ: بوت کنت آ نگیگیں جاوراں اد ءَ لبزانی تہ ءَ درشان کنگ ممکن مہ بیت کہ آیانی دیمپانی مارا کونسل سیشن ءِ برجم دارگ وھد ءَ کنگ کپتگ۔ بلوچستان سرجمی ءَ یک جنگ زدگیں دمگی ءَ مٹ بیتگ۔ اد ءَ کجام ھم کسانیں سیاسی کار آجوئی پیماں اڈ دیگ بیت نہ کنت۔ چُشیں جاورھالانی تہ ءَ کونسل سیشن پیمیں گل ءِ مزنیں دیوان ئِے اڈ دیگ مئے ھاتر ءَ سک گران بیتگ، بلے مئے گل ءِ پگری جھدکارانی شپ ءُ روچی یے جھد ءُ کوشست کُتگ ءُ چُشیں سکیں نگیگیں جاواراں چہ گوستگ ءُ کونسل سیشن ءِ برجم دارگ سرجم کُتگ۔

اے گپ ناں تھنا اے ترندیں جاوروانی تہ ءَ بی ایس او آزاد ءِ تہ ءَ مھکمیں جمھوری گلانی پدراھی ءَ کنت، بلکیں درستاں گیشتر گل ءُ لیکہ ءَ گوں مئے پگری جھدکارانی مھکمیں کمٹمنٹ ءِ ھم درشان اِنت۔ ھمے مھکمیں گلی رھبندی پتر ءُ پگری کمٹمنٹ بنجاھی سوب اَنت کہ یک ڈیھے ءِ سرجمیں مشینری گل ءِ ھلاپ ءَ کارمرز بیگ ءَ پد ھم بی ایس او آزاد مروچی وتی جاگہ ءَ مھکمی ءَ گوں برجاہ اِنت۔


دی بلوچستان پوسٹ: بی ایس او آزاد دگہ بلوچ وانندہ گلاں چہ چوں جتا اِنت؟
 
‏‎ابرم بلوچ: بی ایس او وتی 53 سالاں چہ گیشتر نبشتگیں گوستانک جتائیں چِست ءُ ایراں چہ گوستگ۔ بی ایس او ءَ کدی راجی آجوئی ءِ لیکہ دیما بُرتگ، گُڑا کدی اُستانی وتواکی ءِ پیمیں دروگیں اوگامانی پُشت ءَ ھم شُتگ، ساھل ءُ وسائل ءُ دگہ کسانیں اگاں رُنگ راھاں بروکیں بنگپانی گم بی ایس او ءِ مساپری یے بھر بیتگ اَنت۔ بی ایس او ءِ ھمک نوک گچین بیتگیں چیئرمین ءَ بی ایس او ءِ دیما وتی نام پر کُتگ بی ایس او ءِ مراگشاں اگاں لوٹانی تہ ءَ بدلی آران کُتگ۔ وھدیکہ جتائیں وھداں بی ایس او بازیں ٹولی ءُ گلاں چہ ھم سانمند بیتگ۔ بلے 2002 ءَ وھدے بی ایس او ءِ لیکھی سنگتاں اے پیسلہ کُت کہ بلوچ نودربر کسانیں اوگام ءُ پارلیمانی گلانی سانمندی ءَ چہ آزاد کنگ، بی ایس او ءَ آئی ءِ راستیں گزرانی نیمگ ءَ برگ لوٹ ایت گُڑا آ سنگتاں بی ایس او آزاد ءَ بُنھشت ایر کُت۔

مروچی دو دھک گوزتگ، مروچی من اے کاروان ءِ ھشتمی چیئرمیناں بلے بی ایس او آزاد داں مروچی ناں وتی راستیں ءُ بُنکی لوٹ گزراں چہ پد کنزیتگ ءُ ناں کہ کجام کابینہ ءُ چیئرمین ءِ بدل بیگ ءَ گوں بی ایس او آزاد ءِ راستیں لوٹانی تہ ءَ بدلی اتکگ۔ اِشی بُنکی سوب بی ایس او آزاد ءِ لیکھی رد ءَ یک پدرائیں راہ ئِے گچین اِنت۔
 بی ایس او آزاد اے ھاتر ءَ چہ دگہ وانندہ گلاں جتا اِنت کہ بی ایس او آزاد وتی لوٹ، لیکہ ءُ مراگشانی تہ ءَ سرجم ءَ پدرائیں وژن ءِ دار ایت۔ بی ایس او آزاد بلوچ نودربراں دروگیں اوگام ءُ سبزیں باگانی دروگانی تہ ءَ ایر کنگ ءَ ابید آیاں راستیں جیڑھانی درگت ءَ سرپدی دنت ءُ راجی سنچ، راستیں راجدپتر ءَ زانگ ءُ راجی گلامی ءِ ھلاپ ءَ جھد کنگ ءِ ھاتر ءَ نودربراں یک مھکمیں پتر دنت۔

دی بلوچستان پوسٹ: بی ایس او آزاد ءِ باسک بیگ ءِ سر ءَ یک نودربرے ءَ چوں ایندگہ وانندہ گلانی پیم ءَ پھازگی نہ رس ایت بلکیں آ گیشتر نگیگیانی آماچ بیت، چُشیں جاورانی تہ ءَ کجام ھم نودربر پرچا بی ایس او آزاد ءِ گچین ءَ بہ کنت؟

ابرم بلوچ: اے گپ گوں اے شئے ءَ کار داریت کہ شما پھازگ ءِ درشانی ءَ چون کن اِت؟ ما سرپد بئیں کہ بی ایس او آزاد یکیں گل اِنت کہ بلوچ نودربراں پھازگ ءَ اِنت۔ اگاں رکگ ءَ شمئے بزانت روایتی ھاسٹل ءِ کوٹی، استاداں بیھار دیگ ءُ چکاساں پاس کنائینگ، آپ، دگ، نالی وڑیں رکینگ اِنت گُڑا بلکیں مئے ھبناکی ءُ دل گوشی دوئیں چُشیں رکینگی ءِ سر ءَ نہ اِنت بلے ما پہ پھر گُشت کن ایں کہ بی ایس او آزاد بلوچ نودربرانی پگری پھازوک اِنت، بی ایس او آزاد نودربرانی تہ ءَ راجی آجوئی ءُ دیمروئی ءِ لیکہ ءَ پھازگ ءَ اِنت، ما نودربرانی جزباتی سیادیانی پھازگ ءَ کن ایں ءُ آیاں کجام ھم مردم ءُ رھشون ءِ جند ءِ پائدگانی ھاتر ءَ کارمرز بیگ ءَ نیل اِنت، بی ایس او آزاد پگری زوراکی، نوک آبادکاریں وانگ ءِ ھرابیں سان ءَ چہ نودربراں رکین اِیت، آھانی تہ ءَ راجی ءُ ایراد گری ءِ سنچ ودی کنت۔ درستاں گیشتر بی ایس او آزاد راجی باندات ءُ پدریچانی پھازوک ءِ کرد ءَ پیلو کنگ ءَ اِنت۔
 
اے گپ ھم یات کنگ لوٹ ایت کہ مرچیگیں بلوچ نودربر جنگ ءِ زمانگ ءِ نسل اِنت۔ ایشانی ردوم جنگ ءِ اھد ءَ بیتگ۔ مروچی راجی جُنز، نودربرانی وت سوج کاری ءَ کنگ ءَ اِنت۔ اے جاورانی تہ ءَ بلوچ ورنایانی ھاتر ءَ پاکستانی زوراکی ءُ تُرس بے مانا بیتگ اَنت۔ مرچیگیں بلوچ نودربر زوریں بیگواھی، ژانگولیں جون، لوگانی ماندارگ، جنین ءُ چکانی کم شرپی، کم لبزانی تہ ءَ زلم ءُ زوراکی ءِ ھمک دیم گوں وتی چماں دستگ اِش۔ بلوچ نودربرانی انیگیں نسل گیشتر سنچ دار ایت، پمیشکا اے پدریچ کسانیں اوگام ءُ دروگیں واباں گوں ریپینگ بیت نہ کن اَنت۔ ‎
 
اے نسل وتی راستیں جھد ءُ گل ءِ گچین کنگ ء پجار ءَ زانت۔ پمیشکا مرچیگیں بلوچ نودربراں کجام ھم پیمیں زلم ءُ زوراکی ءُپاکستانی تُرس بی ایس او آزاد ءَ ھوار بیگ ءَ داشت کنگ ءَ نہ اِنت۔
 
دی بلوچستان پوسٹ:
اے وھد ءَ بی ایس او بندش جنگ بیتگ، بازیں جھدکار ءُ رھشون بیگواہ اَنت، بازیں کُشگ بیتگ اَنت۔ پشت کپتگیں گل ءَ گوستگیں یک دھکے ءَ چہ چیروکائی کار کنگ کپگ ءَ اِنت، وانگی ادارھاں چہ دور، نودربراں چہ دور، چی بی ایس او آزاد راستی ءَ انگت یک وانندہ گل اِنت؟ یا شمے کِرا نودربراں داں وتی کلوہ سر کنگ ءِ انچیں راھبند ءُ وڑ ءُ پیم ھست؟

ابرم بلوچ: کجام ھم سیاسی گل ءُ زرمبش ءَ پروشگ ءُ دور دیگ ءِ جھد ھما وھد ءَ بیت، وھدیکہ آئی ءِ لیکہ راستیں پیماں بدلی آرگ ءَ بہ بیت ءُ آئی ءِ وڑ ءُ پیم کاراں چہ زوراک، زور گِپت اگاں آمریں تاکت بیم آیگ بندات بہ بیت، بے بزانت ءُ بے پائدگ سیاسی گپانی سر ءَ کس لٹ نہ گوار ایت۔ بی ایس او آزاد اگاں چیر اِنت ءُ زاھری ءَ گراؤنڈ ءِ سر ءَ اتک نہ کنت، آئی ءِ سوب مئے نالائکی ناں بلکیں آئی ءِ سوب مئے سیاسی پیم ءَ سان زیرگ اِنت، ورنایانی سر ءَ مھکمیں سان دارگ ءُ بدلی آرگ ءِ وس دارگ اِنت۔ ءُ دانکہ مئے گل ءِ لیکہ ءُ مراگش ءِ تہ ءَ اے لائکی ھست بنت اِنت، بی ایس او آزاد ایندگہ وانندہ گلانی پیم ءَ روایتی سیاسی پِڑ ءَ ایر کپت نہ کنت، وھدیکہ ما وتی سانمندی گار کُت گُڑا ما ھم سرزاھری ءَ وانگی ادارگانی تہ ءَ ھما درستیں کاراں کُت کن ایں، کہ درزنانی ھساب ءَ گیر سانمندیں وانندہ گل پیسر ءَ چہ گوں آجوئی ءَ کنگ ءَ اَنت۔

سرجمیں جھان ءَ آشوب ءُ جنگانی زمانگ ءِ گیشتر وانند گل ھمے پیمیں نگیگیں ءُ ترندیں جاوراں چہ گوستگ اَنت۔ بلے یک آشوبی لیکھ ئِے ءُ پھکیں لوٹ ئِے بیگ پہ کجام ھم گل ءِ مھکم ءُ سوبمند بیگ ءِ منانک اَنت ۔
 
مروچی سرجمیں پاکستانی زوراکیاں پد ھم بی ایس او آزاد بلوچستان ءُ پاکستان ءِ گیشتریں وانگی ادارگانی تہ ءَ نودربرانی نیام ءَ اَنت۔ یک سرجمیں وانندہ گلے ءِ دروشم ءَ بی ایس او آزاد وانگی ادارگانی تہ ءَ نودربرانی زانشتی سنچ ءَ ھم کنگ ءَ اِنت دومی نیمگ ءَ نودربراں چہ دروگیں اوگاماں دیر دارگ ءِ ھاتر ءَ یک مھکمیں پتر ءِ ھم دیگ ءَ اِنت۔
 
بلے ھو مروچی گل گوست ءِ پُرسودگیں روایاتاں ابید آشوبی رھبند ءُ وڑ ءُ پیمانی سر ءَ وتی مراگش ءُ پالیسیانی اڈ کنگ ءَ اِنت ءُ آیانی سر ءَ گامگیج زورگ ءِ سر ءَ زور دیگ ءَ اِنت۔

دی بلوچستان پوسٹ: شمئے گل ءِ سر ءَ پاکستانی گلانی نیمگ ءَ اے بھتام جنگ بیتگ کہ شما یک وانندہ گلے نہ اِت بلکیں آجوئی لوٹوکیں سلاھبندیں گلانی آسراتی دیوک بلکیں آھانی بھر اِت، اے بھتامانی تہ ءَ چی کد ءَ راستی ھست؟
 
‏‎ابرم بلوچ: اگاں چُشیں ھبر اِنت گُڑا مئے رھشون ءُ جھدکاراں وانگجاھاں ءُ ھاسٹلاں چہ پرچا دزگیری ءَ پد بیگواہ کنگ بیگ ءَ اَنت ءُ چہ کوہ ءَ ناں؟ گوستگیں یک دھک ءَ مئے گل سرجمی ءَ پاکستانی زلم ءُ زوراکیانی آماچ اِنت۔ راستی ایش اِنت کہ جھان ءِ دیما ھستاں وتی اے زلم ءُ زوراکیانی پُشدر ءَ یک سوب ءِ پیش دارگ ءِ ھاتر ءَ مدام چُشیں بھتام جنگ بیت۔

 بلوچستان ءِ لس نودربراں بہ گر ھمک زانتکاریں مردم ھم اے راستی ءَ نوں زان اَنت کہ اے بھتامانی گوں راستی ءَ ھچ نزیکی نیست۔
‏‎
بی ایس او آزاد یک پُرایمنیں آجوئی لوٹوکیں وانندہ گل اِنت، کہ وانگجاھانی تہ ءَ نودربرانی وانگ ءُ زانگ ءُ نودربرانی زانشتی کارانی نیمگ ءَ برگ ءِ ھاتر ءَ جھد کنگ ءَ اِنت۔ آجوئی ءِ ھاتر ءَ پُر ایمنیں جھد کنگ ھمک مردم ءِ بُنکی سیاسی ءُ انسانی ھَک اِنت۔ مھتریں جھانانی راج اِشی ءَ سرجم ءَ ھک ءَ دے اَنت، اِشی ءَ ناشرکاری ءُ جرمکاری ءَ گوں ھوار نہ کن اَنت، اے ھیالانی درشانی ءِ آجوئی اِنت۔ اسکاٹلینڈ ءُ کٹالونیا ھمے دھک ءِ پدراھیں درور اَنت۔

دی بلوچستان پوسٹ: گل ءِ نوکیں چیئرمین ءِ ھساب ءَ، تو گل ءَ کجام نوکتریں بالاداں سر کنگ لوٹ ءِ ءُ کجام نوکیں پالیسیاں آرگ لوٹ ءِ، یا اگاں شما گوست ءِ کاراں چہ دلجم اِت؟

ابرم بلوچ: آشوبی جھدانی تہ ءَ آشوبی جھدکار وتی گل ءِ ھمک پالیسی اگاں سیاسی مراگشاں چہ سرجمیں پیم ءَ دلجم بیگ ءَ ابید مدام گل ءِ پالیسی ءُ مراگشاں سر ءَ جیڑگ ءُ پگر کن اَنت۔ آیانی سر ءَ سیاسی دیوان کن اَنت، گپ کن اَنت دانکہ گیش ءَ گیش نوکتریں مھکمیں وڑ ءُ پیمانی کارمرز کنگ ءَ گوں جھد کنگ ءَ گوں وتی لوٹ پچ گرگ بہ بنت ءُ وھد ءُ جاورانی دروشم وتی راھبندانی دروشم ٹھینگ بہ بیت۔‎
 
‏‎وتی لوٹ ءُ گزرانی پچگرگ ءِ ھاتر ءَ آشوبی گل وھد ءُ جاورانی ھساب ءَ وتی پالیسیانی تہ ءَ بدلی کاران بنت۔ ما ھم ھمے آشوبی رھبندانی سر ءَ کاربند اِت۔ مئے گل نزوریانی سر ءَ جیڑگ ءُ سوڑگ کنگ ءَ گوں ھر وھد ءَ وتی دیوانانی تہ ءَ ایشانی سر ءَ گپ کنگ بیت دانکہ وتی پالیسی ءُ مراگشانی تہ ءَ المی ءُ بُنکی بدلی آرگ ءَ گوں گیش ءَ چہ گیش مھکمیں پیماں جھد بہ کن ایں۔
 
نوکتریں چیئرمین ءِ پیم ءَ من ھم ھمے شون داتگیں آشوبی درسانی ءُ وڑ ءُ پیمانی سر ءَ جُنزگ ءِ منوک ءُ بندوک اَنت۔ وھد ءُ جاورانی رد ءَ کدی ھم مارا وڑ ءُ پیمانی تہ ءَ بدلی آرگ ءِ اژدری مار اِت، گُڑا نامینتگیں ادارگ ءُ گچین کُتگیں راھبندانی رد ءَ ایشانی سر ءَ گپ تران ءُ اھوال بنت۔
 
دی بلوچستان پوسٹ: بلوچ نودربر ھمک لھتے روچاں پد زھرشانی، روانک، شُد کُشیں ھڑتال، لانگ مارچ کنگ ءَ گندگ بنت۔ دمگ ءَ دگہ راجانی ھساب ءَ بلوچ نودربر گیشتر زھرشانی کنگ ءَ گندگ بنت، اِشی ءِ سوب چی اَنت؟

‏‎ابرم بلوچ: بلوچ نودربرانی جیڑہ دگہ راجانی نودربراں چہ سک باز اَنت۔ پمیشکا بلوچ نودربر ھمک دومی روچ ءَ وتی وانگی ھکانی ھاتر ءَ زھرشانی کنگ ءَ گندگ بنت۔ بلوچستان ءِ گیشتریں ھنکین بُنکی وانگی ادارگاں چہ زبر اَنت۔ دومی نیمگ ءَ ھما لھتے وانگجاہ کہ ھست اَنت ، آ ھم پاکستان ءِ دگہ دمگانی وانگجاھانی ھساب سک باز پدمنتگ اَنت، ءُ ھزاراں جیڑھانی آماچ اَنت وھدیکہ ھما بلوچ نودربر کہ چہ بلوچستان ءَ ڈن پاکستان ءِ جتائیں دمگانی تہ ءَ وانگ ءَ رؤ اَنت گُڑا اود ءَ ھم آیاں بازیں جیڑھانی دیمپانی کنگ کپ اِیت۔

دومی نیمگ ءَ اے ھم یک راستی اِنت کہ بلوچ نودربر اے دمگ ءِ دگہ راجاں چہ گیشتر سیاسی سنچ دار اَنت، بلوچ نودربر وتی ھکاں چہ آشنا اَنت ءُ زورگری ءَ نہ سگ اَنت، اِشی ءَ ھوار ھوار وھدیکہ یک بلوچ نودربرے کجام ھم مزنیں وانگجاھانی ءَ سر بیت گُڑا آ تھنا وتی جند ءِ باندات ءِ باروا ناں جیڑ ایت بلکیں وتی راجے دگہ نودربرانی جاورھالانی سرپدی دارگ ءِ سوب ءَ آیانی وانگی ھکانی پھازگ ءَ ھم وتی ڈُبہ لیک ایت۔ ھمے راجی ءُ سیاسی سنچ ھم یک سوب اِنت کہ بلوچ نودربر توری کجا ھم وانگ ءَ بہ بنت، آ یک پیمیں جھد ءَ گوں ھوار بنت اگاں زھرشانی کنگ ءَ گندگ بنت۔
 
 
‏‎دی بلوچستان پوسٹ: گوشگ بیت کہ 2006 ءَ بی ایس او آزاد ءَ آجوئی ءَ ، ابید پارلیمانی سیاست ءُ آجوئیں بستار ءِ اوگام دیگ ءَ گوں داں پنچ سالاں بلوچ نودربرانی تہ ءَ پہ وت ءَ مزنیں نامے کَٹ اِتگ اَت، بلے نی اے اوگام گْوش ئے ارزشت ءُ کوھن بیتگ اَنت، نی نودربراں اے اوگام ءُ لوٹاں گوں ھچ ھبناکی پشت نہ کپتگ، پمیشکا پاکستانی زوراکیاں چہ گیشتر بی ایس او آزاد ءَ اے شئے ءَ تاوان داتگ، اِشی ءِ تہ ءَ چی کد ءَ راستی ھست؟

‏‎ابرم بلوچ: اِشی ءِ تہ ءَ ھچ راستی نیست، گوستگیں یک دھک ءَ چہ بی ایس او آزاد درستاں گیشتر پاکستانی زوراکیانی آماچ بیتگ، بلے مروچی ھم وت گلائی اگاں پیش دارگی ٹاھانی ما سرجم ءَ گوں منانک ءُ راستی ءِ بنیات ءَ اے گپ ءَ گْوش ایں کہ بی ایس او آزاد مروچی ھم بلوچستان ءِ درستاں مستریں ءُ نامداریں وانندہ گل اِنت۔ مروچی ھم نودربر مزنیں کساسے ءَ بی ایس او آزاد ءِ باسک بیگ ءَ اَنت۔

اگاں بی ایس او آزاد ءِ سیاسی مراگشاں بے ارزشت ءُ کوھن بہ بیت اِنت گُڑا مروچی بی ایس او آزاد اے کد ءَ نودربرانی تہ ءَ نامدار نہ بیتگ اَت ءُ ناں کہ چُشیں مزنیں کساسے ءَ نودربر بی ایس او آزاد ءِ کاروان ءَ ھوار بیتگ اِت اَنت۔
 
اگاں بی ایس او آزاد ءِ سیاسی مراگشاں بے ارزشت ءُ کوھن بہ بیت ایں گُڑا چُشیں مزنیں، ترندیں ءُ دراجیں وھدی ءَ داں جنزوکیں پاکستانی زوراکی ءَ بی ایس او آزاد ھلاس کُتگ اَت، بلے اے مئے سیاسی مراگش ءُ آشوبی پگر ءِ بَرورد اِنت کہ بی ایس او آزاد مروچی ھم بلوچ نودربرانی ھاتر ءَ درستاں گیشتر من اِتگیں نودربر گل اِنت۔
 
دومی گپ ایش اِنت کہ راجی آجوئی ءُ ابید پارلیمانی سیاست ءِ لیکہ بی ایس او آزاد ءِ ودی کُتگیں نہ اِنت بلکیں اے بلوچ راجے سیاسی پگر اِنت کہ اِش گلامی ءُ زورگیری ءِ لاپ ءَ چہ ودی بیتگ، ءُ گوستگیں ھپتاد سالاں چہ جتائیں بلوچ گل اے لیکہ ءِ سر ءَ جتائیں دروشم ءُ ناماں گوں کار کنگ ءَ بیتگ اَنت۔ اے لیکہ داں ھما وھد ءَ بیت، دانکہ راجی گلامی ءُ زورگیری برجاہ اِنت۔ بی ایس او آزاد ءَ ھمے راجی پگر بلوچ نودربرانی تہ ءَ زندگ کُتگ ءُ اے راجی لیکہ ءِ سر ءَ وانندہ گل یے دروشم ءَ وتی وڑ ءُ پیمانی سر ءَ جُنزان اِنت۔ اے راجی پگر اے لوٹ آجوئی ءِ گرگ ءَ پد کوھن بیت کنت، چہ آئی ءَ پیسر ناں۔

‏‎ دی بلوچستان پوسٹ: کجام سوب اِنت کہ شما اِشی ءَ کونسل سیشن ءِ نام دے اِت ءُ گچین کاریانی روچ ھم ایر کن اِت بلے گوستگیں چار کونسل سیشن ءَ شمئے گل ءِ درستیں اگدہ دار ابید دیم ءِ اوشتوکیں مردم ءَ کَٹ اَنت ءُ دیما کاینت؟
 
ابرم بلوچ: ما دلجمیں پیم ءَ گل ءِ رھبند ءِ رد ءَ جمھوری وڑ ءُ پیم ءَ گل ءِ کونسل ایش ءَ برجم داریں۔ کہ اود ءَ مئے گل ءِ ھمک کونسلر ءَ سرجمیں ھک دیگ بنت ءُ ھمک کونسلر سرجم ءَ واکدار گون بنت۔ مرچیگیں بلوچستان ءِ سیاسی جاورھال ءِ تہ ءَ ھما گل ھم دو سال ءِ تہ ءَ کونسل سیشن ءَ داشت نہ کن اَنت، کہ آیاں جیڑھانی دیمپانی نیست۔ وھدیکہ بی ایس او آزاد سرجم پاکستانی زوراکیانی آماچ اِنت آئی ءِ ابید ھم جمھوری روایتاں زندگ دار اَنت ءَ ھمک دو سال ءَ پد گل ءِ رھبند ءِ رد ءَ کونسل سیشن ابید دیری برجم دارگ بیت۔

پشکپت گپ ابید ء دیم ءِ اوشتوکیں مردم ءِ گچین بیگ، گُڑا ما پہ پھر گُشت کن ایں کہ بی ایس او آزاد ءَ گوست ءِ بازیں بے ارزشتیں سیاسی روایات ھلاس کُتگ اَنت۔ گوست ءِ گیشتریں کونسل سیشنانی تہ ءَ گل پہ اگدھانی ھاتر ءَ دو ٹکر کنگ بیتگ اَنت یا اگاں اگدھانی ھاتر ءَ پیش دارگی (نمائشی) سیاست کنگ بیتگ۔ بی ایس او ءِ ھمک کونسل سیشن ءِ بزانت جنگ ءُ چوپ ءُ یک نوکیں ونڈے ودی بیگ بیتگ، مرچی کونسل سیشن ءِ اگدھانی ھاتر ءَ جنگ ءُ چوپ اگاں پرشت ءُ پروش ءَ ابید راجی پالیسی اڈ دیوکیں مزنیں گل ءِ بستار ءَ وتی کرد ءَ پیلو کنگ ءَ اِنت۔

بلے اِشی ءِ ھچ وڑ ءَ بزانت اے نہ اِنت کہ بی ایس او آزاد ءَ جمھوری وڑ ھلاس کُتگ اَنت، بلکیں مروچی ھم کونسل سیشن ءِ رھبند ءِ رد ءَ برجم داشتگ اَنت ءُ ھمک اگدہ ءِ سر ءَ ھمک کونسلر اوشتگ ءِ یک کچے ءَ ھَک بیت۔ کونسل سیشن ءَ گچین کاری کمیشن گچین کنگ بیت۔ گچین کاری کمیشن آجوئیں پیم ءَ گچین کاریاں برجم دار ایت، کہ اود ءَ ھمک کونسلر ءَ ھک بیت کہ کجام ھم اگدہ ءِ ھاتر ءَ وتی کاگد ءَ جم دات کنت۔ ھمک کونسل سیشن ءِ نیام ءَ یک اگدھ ئِے سر ءَ یک ءَ چہ گیشتر کاگد پُر کنگ بیت۔ بازیں وھداں گل ءِ سنگت وت ماں وت سیاسی اھوال کن اَنت، گُڑا یک سنگتے دومی سنگت ءِ ھک ءَ پُشت کنز ایت، دانکہ گوست ءِ روایات پد ءَ دیما آرگ مہ بنت وھدیکہ باز وھد ءَ اگدھانی سر ءَ سنگتانی نیام ءَ اوشتوک ھم بنت، کہ پلگاریں وڑ ءُ پیم برجم بیت۔ پرچا اے سرجمیں کار پاک اِنت ءُ ابید جنگ ءُ چوپ ءَ بیت گُڑا پمیشکا اِشی ءِ درگت ءَ گپ باز کم چہ گل ءَ ڈن در کپ اَنت۔

ما سرپد بئیں اے بی ایس او آزاد ءِ سنگتانی سیاسی سنچ ءُ مزنی اِنت کہ آ بلوچ نودربر سیاست ءِ تہ ءَ گوستگیں روایات ھلاس کُتگ اَنت ءُ نوکتریں جمھوری وڑ ءُ پیمانی بنھشت ایر کُتگ اَنت۔
 

گُڈی گال:

چیئرمین ابرم بلوچ ءَ گوں دلجمیں دیوان ءَ پد وھدے ما آئی ءَ جُست کُت کہ اگاں آ پہ درستیں بلوچ نودربراں یک کلوھے دیگ لوٹ ایت گُڑا آ چی گُشگ لوٹ ایت؟ گُڑا آئی ءَ دیوان ءِ ھلاسی ءَ گوں اے لبز ءَ گوں کُت “من بلوچ نودربراں تھنا اینچو گْوشگ لوٹ آں کہ انیگیں پدریچ، کہ جنگ ءُ جُنز ءِ بُرزی ءِ وھد ءَ ودی بیتگ اَنت، اے جنگ ءِ نیام ءَ اشان ردوم زرتگ، اے پدریچ اے راج دپتر ءِ یک انچیں اھدے ءِ پدریچ اِنت، کہ اِشی ءِ زندمان ءِ نیام ءَ اے راجے باندات ءِ پیسلہ بیگی اِنت کہ مئے باندات ننگ، شرپ ءُ آجوئی بیت یا اگاں کمتری ءِ تہ ءَ مٹ بیگ ءُ مدامی گلامی۔ اے زمینے ءُ اے آشوب ءِ شرپ شمارا ایر کنگی اِنت۔ اگاں مرچی شما گوں اَے زمین ءَ، اے زرمبش ءَ چہ وت ءَ بے سما کُت، گو راجدپتر ءُ آیوکیں پدریچ شمارا کدی پھل نہ کن اَنت۔”

نوکتریں

کیچ الندور ءَ ناشناسیں مردماں ھائی اسکول سوتکگ

دی بلوچستان پوسٹ کیچ ءِ دمگ بلیدہ الندور ءَ ناشناسیں مردماں گورنمنٹ ھائی اسکول بُن داتگ، چریشی...

گچک: دو زالبول ءُ چُکاں ھوار نُھ مردم بیگواہ

دی بلوچستان پوسٹ چہ گچگ ءَ پاکستانی پوج ءِ دست ءَ دو زالبول ءُ چکاں ھوار نُھ...

مند ءَ پاکستانی پوج ءِ پانگس ءِ سر ءَ اُرش، اُرش ءِ زمّہ واری بی ایل ایف ءَ منّ اِتگ –

گوک رودان ءَ پاکستانی پوج ءِ پانگس ءِ سر ءَ اُرش کتگ دو کارمند کُشتگ یکے زدگ کُرتگ - میجر گْوھرام...