شھیدی سوگاتے
نبشتہ کار : شپانک بلوچ
دی بلوچستان پوسٹ
من ءَ یات انت کہ وھدے شَے جان (ظریف) شھید بیت ءُ آئی ءِ میت ءَ کہ آئی ءِ ھمپگریں یاگی ماں لوگ ءَ سر ئِے کن انت گڑا، شَے جان ءِ پت پہ شَے جان ءَ موتک نیار ات ءُ نے کہ واھ ءُ پریات کنت، شَے جان ءِ پت ھمل پرینے کہ پہ شَے جان اَرس مہ گوار ات کہ مرچی آئی ءِ سالونکی ءِ روچ انت، ھمے وڑ ءَ آئی ءِ پرس ءِ پتر ءِ جاہ ءَ چاپ ءُ ھالو بیت ءُ آئی ءِ تاسپیں جون گوں پھریگیں دلے ماں ھاکاں ایر کپ ات۔ ھمے وڑ ءَ شھید امجد بشام ءِ مات ھوں آئی ءِ جون ءِ دیم ءَ نند ات ءُ گوں پھر گوش ایت کہ منی چک برو وتی کلیں نمیرانیں براتاں سلام بکن۔ ءُ اے وڑیں ھزار مات ءُ پت ھزار گوھار ءُ ھزار برات ماں بلوچستان ءِ سینگ ءَ ودی بوتگ انت کہ پہ آھاں شھیدی یک سالونکی یے ءُ پلسپہ ءِ آجوئی ءِ ھاترا چو البرز ءَ مک بوھگ ءِ نام انت، پمیشکا بلوچ پسگاں پہ ڈیھ ءِ لوٹانی ھاترا جنگ دیگ ءُ شہید بوھگ پہ ھمک مات ءَ یک پھری ساھتے نَے آ موتک کار انت ءُ نَے کہ آئی ءِ مرگ ءَ جتائی یے سمج ایت بلے، شہید وتی پشت ءَ جھد ءِ یک چراگے روک کنت ءُ روت کہ آ چراگ داں دائم ءَ بل ایت ءُ جنز ءَ رژنائی بکش ایت، شہید نمیرانی ءِ یک چیدگے ءُ ھمے چیدگ جنز ءِ پلسپہ ءَ دیمترا کنزین ایت ءُ زندگ دار ایت۔
شہید سلمان ھمل وتی کتاب ءِ تہ ءَ نبشتہ کنت، کہ باندا من شہید بوھگ ءَ روگ ءَ آں ءُ ھمے وشی ءَ چہ من ءَ واب پیداک نہ انت، ادا چہ پدر بیت کہ پہ یک سرمچارے ءَ ءُ پہ یک آجوئی ءِ جھد کارے ءَ وتی ڈیھ ءِ ھاترا ندر بوھگ چنکسیں مزنیں پہری ھبرے۔ بلوچستان ءِ سینگ ءَ چہ ھزار تاسپیں بچاں ءُ ھزار نگرھیں گوھاراں وتی ھون داتگ پہ جھد ءِ سینگارگ ءَ ءُ آشوب ءِ چراگ ءِ بلینگ ءَ۔ ھمک راج ءِ راجی بستار ءِ رکگ ءِ ءُ یک آجوئیں نامے ءِ واھند بوھگ ءِ پشت ءَ آئی ءِ پسگانی ندر بوھگ ءُ گہگیری یے ھست، داں ھما وھدا یک راجے راجی بستارے ءِ واھند بوت نہ کنت دانکہ آ پہ وتی لوٹانی ھاترا جونانی نزران ءَ نہ دنت ءُ پہ ڈیھ ءَ ھون نہ ریچ ایت۔ بلوچ ھوں ھما راجانی یک درورے کہ کساس ھپتاد سال ءَ چہ گیش انت کہ پہ وتی ڈیھ ءِ آجوئی ءِ ھاترا ھون ریچگ ءَ انت۔
ھمے وڑ ءَ بلوچستان ءِ آجوئی ءِ ھاترا زورگیر ءِ بنداتی روچاں بگر داں روچ مرچی، بلوچ آجوئی ءِ گہگیری ترند تر ءُ شاھگان تر بوان انت بلے، جھد ءِ اے ترندی ءُ لیکہ ءِ آزاتی ءِ منارینگ ءِ ھاترا ھزاراں پسگاں وتی جان ندر کتگ ءُ پیش داشتگ کہ آجوئی ھون لوٹ ایت آجوئی، کربانی، لوٹ ایت ءُ پہ آجوئی ءَ شپ بے وابی گوازینگی آں ھاجت گٹ گیر کنگی انت، ءُ ھمک ناشریں جاورانی دیمپان بوھگی انت۔ پہ ڈیھ ءَ ندر بوتگیں پسگ دائم ءَ زندگ منگ بنت، آھانی پلسپہ داں دائم ءَ ھست مان انت، ھمے ھاترا جنز وتی ھمک پسگ ءِ یات ءَ آئی ءِ پگر ءُ پلسپہ ءِ زندگ دارگ ءَ راجدپتر ءِ ھونیگیں تاکانی تہ ءَ نبشتہ کنت ءُ سنگار انت۔
بلوچ ڈیھ ءِ ھاترا ندر بوتگیں پسگ ھوں ھمک سال یات کنگ بنت ءُ آھانی لیکہ نوک رود کنگ بنت۔ 13 نومبر ھما روچ انت کہ پہ بلوچ شھیدیں بچاں نام دئیگ ءُ جوڑ کنگ بوتگ، ھمک 13 نومبر ءَ راجپتر نوک بیت، بلوچ جھد وتی توامی ءِ نیمگ ءَ کدم جنان کنت، شہید بوتگیں پسگانی کچ ودان بیت، پلسپہ ءِ آجوئی کوھن تر ترندتر ءُ زھر آور تران بیت۔ 13 نومبر نا بس بلوچ شہیدانی شہیدی ءِ ھاترا منگ بیت بلے اے روچ جھد ءِ لیکہ ءَ نوکتر ءُ جھد ءِ ھاترا نمیران بوتگیں پسگانی کسہ ءُ داستان آں ودین انت ساڈائیت۔ ھمک سال بلوچ راج دگنیا ءَ اے باور کنائین ات کہ، زمین ءِ ھاترا شھیدیں پسگ زندگ انت، آئی ءِ پلسپہ ءِ گڈی پیگام زورگ ءُ دیم ءَ برگ بوتگ ءُ جھد ءِ لیکہ گوں پرد ءِ پردیت ءَ بندوک نہ انت بلے گوں آئی ءِ آجوئی ءِ پگر ءَ گوں بندوک انت، پمیشکا ھمک ھما پسگ وتی مرگ ءَ یک مڑایے پہم ایت، شھید رزا جہانگیر گش ایت کہ شھیدی ھما کربانی انت کہ آجوئی ءِ لوٹ انت، آجوئی لوٹوکیں راج ءِ پسگ شہیدی ءَ یک پھرے سمج انت۔ 13 نومبر پہ بلوچ راج ءَ ھما روچ انت کہ پہ گلام مھمد ءِ بیھار ءِ ھست بوھگ ءَ دارگ بیت، پہ لمہ یاسمین ءِ مزن جگری یات کنگ بیت، ءُ بانک کریمہ ءِ دم نہ برتگیں اوپار ءُ ھاٹیگ ءَ دارگ بیت۔ اے روچ ءَ بلوچ وتی نمیرانیں پسگاں یات کنت کہ آھاں پہ جھد ءِ آجوئی ءِ ھاترا وتی سر ندر کتگ بلے پشت ءَ نہ کنزتگ انت، ءُ نَے کہ گلزمین ءِ سود ءَ کتگ۔
اگاں ماں جھد ءِ ساڑایگ ءِ ھاترا بلوچ نمیرانیں پسگانی کچ ءُ کساس ءَ بچاریں گڑا ما ماریں کہ ھمک 13 نومبر گوں وت یک نوکتریں داستانے کار ایت کہ آ شہیدانی لڑا شاھگان تر ءُ دراج تر کنان کنت، آئی ءِ تہ ءَ مرگ آپ ءِ یات گیشتر تازہ تر بنت، آئی ءِ تہ ءَ کمبر چاکر ءِ ھردکیں بالاد ءُ البرزیں پلسپہ ھمک بلوچ ءِ سینگ ءَ پہریگ کنت ءُ اے سما کنائین ایت کہ شہیدی یک سوگاتے کہ جھد کار ءَ رس ایت۔ اے روچ بلوچ ءِ کلیں پسگانی اکساں نگاھ ءِ دیم ءَ رژن ءَ کنت کہ پہ گلزمین سالونک بوت ءُ نمیران بوت انت۔ اے روچ مئے مئے گوشاں ماں شہید واجہ گلام مھد ءِ بیھار ءَ سما کنائین ایت کہ آئی ءِ راج ءِ ٹوھینگ ءِ ھاترا ریاست ءِ سانکلانی دیم ءَ پروش نہ وارت ءُ نَے کہ جاورانی رد ءَ نزور تر ایت بلے پہ ڈیھ ءِ ھاترا پہ وت مرگ ءَ مڈایے سمج ایت ءُ نمیران بیت۔ اے روچ ھما پیر ءُ ورنایاں مئے دیم ءَ پدر کنت کہ آھانی جون چو رستری داب ءَ ماں سڑکانی سر ءَ چگل دیگ بوتگ انت. بلوچ راجی بامرداں وتی رجدپتر گوں ھوناں نبشتہ کنگ ءِ ھاترا شہید لالا منیر ءِ وڑیں سر کربان کتگ انت، کہ مرچی 13 نومبر ءِ روچ ءَ آئی کارست اے باور کنائینگ ءَ انت کہ لالا منیر ھست مان ایت۔ نوں پہ بلوچ پرزنداں المی ءُ اژدری انت کہ آ وتی راجی شاھزانت ءُ نمیرانیں پسگاں گوں ھما گالاں ماں راجدپتر ءَ بہ بویس ایت کہ آئی آؤکیں پدریچ پہر بہ بند ایت ءُ دگنیا ءِ راجانی تہ ءَ یک نام ءُ ناموسے ءِ واھند بہ بیت۔
راجدپتر اے لیکہ ءَ برز ءُ بالاتر کنت ءُ گش ایت کہ، پہ گلامی ءِ سانکلانی پروش دیگ ءِ ھاترا جھد مدام ھون لوٹ ایت ءُ ھمے پلسپہ ءِ زندگ دارگ ءِ ھاترا بی، بی ھتم ناز گوں وتی نزوریں ءُ پیرکماشیں بالاد ءَ گہگیری کنت ءُ دژمن ءَ داں اے بیھار ءَ سر کنت کہ آ پہ وتی سر ڈگار ءَ شہید بوت کنت ءُ سر دات کت کنت ءُ اے پلسپہ ءِ دیم ءَ برگ ءَ آئی ءَ ھچ وڑیں سانکل ءُ ھچ وڑیں جاور پشت ءَ کنزینت نہ کن انت۔ سرڈگار ءِ ھاترا بانک شاری وتی تپلیں زھگاں چہ گسر بیت ءُ وتی ھاجتاں گٹگیر کنت ءُ دژمن ءِ لشکر ءِ سر ءَ پدائی کنت ءُ شھید بیت ھمے شہیدی ءِ پلسپہ انت کہ مرچی بلوچ ھمک کاڈ شاری جوڑ انت ءُ بلوچ ءِ ھمک مات ھتم ناز جوڑ انت ءُ بلوچ ءِ ھمک پیر کماش فضل جوڑ انت، چیا کہ فضل ءَ پہ ڈیھ ءَ شہید بوھگ ءِ ھاترا آئی ءِ کماشی ءَ داشت کت نہ کت بلے آئی ءِ پلسپہ ءَ گہگیری کنگ پرمات ءُ ندر کت پہ آجوئی ءِ چراگ ءِ بلینگ ءِ ھاترا۔
13 نومبر سرجمیں بلوچستان موتک نیار ایت بلے پہر بند ایت پہ وتی نمیرانی ءِ ھاترا کہ آھانی جونانی بلوچ جنز ترندتر کتگ ءُ راجپتر شاھگان تر کتگ۔ پمیشکا کلیں بلوچ نودربر کسان ءُ مزن ءُ راج ءِ ورنایاں پہ المی انت کہ اے روچ ءَ راجی بامردانی پگر ءَ تاجگ بکن انت ءُ شہیدانی پلسپہ ءِ رند گیری ءَ بکن انت، دانکہ گلامی ءِ سانکلانی پروش دیگ ءِ ھاترا ھمک شہید ء وارتگیں گڈی تیر پہ آیوکیں اوبادگ ءَ یک لیکھے جوڑ بہ بیت۔من پمیشکا سما کن آں کہ شہیدی پہ ھمک راجی بامرد ءَ یک سوگاتے، انچیں سوگاتے کہ اشی ءِ آتراپ داں جھان ءِ گڈی ھستانک ءَ ھست مان ایت، انچیں سواگتے کہ ایشی ءِ رژنائی داں دائم ءَ بلیت ءُ جھد ءِ راھسراں رشنائی بکش ایت، انچیں سوگاتے، کہ راجدپترے تاکاں گوں پہر سمبھین ایت۔ سہریں سلام انت ھمک ھما راجی پسگ ءَ کہ پہ ڈیھ ءِ آجوئیں لوٹ ءِ ھاترا داں گڈی وھد ءَ گہگیری اش کتگ ءُ وتی ساہ اش داتگ ءُ شہیدی وتی نام ءَ کتگ بلے پشت ءَ نہ کنزتگ انت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت۔