بی ایل اے ءِ نوک پتر سروک ءِ گچین کنگ ، مھکمی یے یا نیزوری یے؟
نبشتہ کار : مھرشان
دی بلوچستان پوسٹ
بلوچ لبریشن آرمی ءِ وتی نوک شنگ کتگیں جارانک ءَ گوشتگ گل ءِ نوکیں لیکہ ءِ سر ءَ کوھنیں سروک ءِ سروکی واک ھلاس کتگ ءُ نوکیں سروکے گچین کنگ ءَ وتی گچین دیواناں کنگ اِنت ءُ گل ءَ نوکتریں گامے ءَ دیم ءَ جنزینگ ءِ پیسلہ اِنت ۔
گڑا الم اے گپ پہ بی ایل اے ءُ بلوچستان ءَ ھوار دنیا ءِ سلاہ بندیں گلانی تہ ءَ نوکیں رھبندے کہ گل وتی واک ءِ تہ ءَ کجام رنگ ءَ بہ لوٹ اِیت آ کت کنت اے گپ ءِ پدراھی گل ءِ مھکمی ءُ پالیسیانی سرجمی ءِ پدراھی ءَ کن اَنت۔
چریشی ءَ چہ زانگ بیت بلوچ لبریشن آرمی بزاں ( بی ایل اے ) ءِ بنھشت ایر کنوک ءَ وتی پتر مھکمی ءَ دومی سروک ءِ دست ءَ داتگ اگاں چوش مہ بیتیں گڑا مروچی گل یک جاھے ءَ یک سروکے ءَ گون اَت بلے بی ایل اے ءِ اے پیسلہ ءَ پد اے گپ گیش اِیت کہ بی ایل اے وتی اندری ھڈ ءَ مھکم اِنت ءُ کجام ھم وھد ءَ وتی ترندیں گامگیجانی سر ءَ زوت گام چِست کت کنت۔
اے داب ءَ ھما گل کہ چوشیں گامگیج زیر اِیت گڑا ایشی ءَ زانگ بیت گل تھنا یک مردمے ءِ نہ اِنت بلکیں سرجمیں راج ءُ آئی ءِ ھستانکی ئیگ اِنت ءُ بی ایل اے چوشیں پالیسی گل ءِ اندر ءَ آئی ءِ زانتکار ءُ سوھویں مردمانی پدراھی ءَ ھم کن اَنت۔
اگاں مروچی بی ایل اے ءِ واگ وت پرست یا وت مان کتگیں مردمے ءِ دست ءَ بوتیں گڑا بوت کتگ اَت کہ بی ایل اے تھنا زند ءِ بَر یکیں سروک ءِ سروکی ءَ اوشتاتگ اَت بلے اے ھما سرپرست ءُ سروکانی سوھوی اِنت کہ آیاں اے گل تھنا یک مردمے ءَ گوں بندوک نہ کتگ بلکیں ایشی ءِ تہ ءَ راجی پیسلہ ءُ زور ھوارینتگ اَنت ۔
بی ایل اے وھدیکہ سال دوھزار ءُ ھژدہ ءَ دو بھر ءَ بیتگ اَت گڑا دومی بھر ءَ بازیں رنگے ءَ بلوچستان ءَ وتی گام ترند کنان کتگ اِت اَنت کہ آئی ءِ اولی گام آئی ءَ وتی نوک نوکیں یونٹ دیم ءَ آران کت اَنت مروچی بی ایل اے ءِ بھنشت ءَ ھمے کساس ءَ دیمروئی کتگ گڑا آئی ءَ وتی ھساب ءَ وھد پہ وھد نوک نوکیں یونٹ دیم ءَ آورتگ اَنت۔
گڑا اے چیز ءُ چھرگانی توک ءَ اگاں اندازگ ءُ کچ ءُ کساسی بہ بیت گڑا زانگ بیت بی ایل اے ءِ پیشی سروک یک مھکم ءَ زانشتیں مردمے بیتگ ءُ آئی ءَ الم وتی آیوکیں سروک ھم یک مھکمیں مردمے ءِ دست ءَ داتگ ۔
نی گڑا بی ایل اے ءِ اے پیسلہ ءَ زانگ بیت کہ بی ایل اے اگاں وھد ءِ سر ءَ وتی مَٹی ءَ کجام ھساب ءَ کت کنت کجام رنگ ءَ آ پہ وت رھبند گچین کت کنت گڑا اے گل ءِ مھکمی ءِ نشانی ءُ زانشت ءَ پدر کن اَنت۔
بی ایل اے ءِ دیمروئی ءِ ھساب ءَ چمشانک دیگ بہ بیت گڑا بی ایل اے ءَ کمیں سالانی تہ ءَ وت ءَ میدان ءَ مھکمیں رنگے ءَ پیش داشتگ آئی ءَ وتی دیمروئیانی توک ءَ وتی جتا جتائیں یونٹ چوشکہ “ مجید بریگیڈ ، فتح اسکواڈ ، ٹیکٹیکل اسکواڈ ، زراب ، ھمل میری ٹائم ڈیفنس ، برزی اُرش یونٹ ءُ وتی میڈیا ونگ ھکل “ دیمروئی ءِ پدراھی گندگ کاینت کہ بی ایل اے میدان ءَ یک مھکمیں گلے ءِ بستار ءَ جاڑیگ اِنت ءُ آئی ءِ ھمک اُرش ءِ پشت ءَ دومی اُرش گیش ترندی ءَ گندگ بیت اِنت راستی ایش اِنت کہ گل آ نہ اِنت کہ وتی ستاہ ءَ وت بہ کنت بلکیں گل ھما اِنت کہ آئی ءِ ستاہ ءَ ھرکس بہ کنت ءُ بہ چار اِیت گڑا مروچی بی ایل اے وتی پتر ءَ اے کارانی میان ءَ گندگ بیت اِنت ۔
بوت کنت لس مردم ءُ زانتکار وتی میان ءَ اگاں اڑ اِتگیں گپ ءُ ھنر پرست کار اَنت کہ اے گل ءِ نیزروی اِنت بلے من ھمے سرپد باں اے گل ءِ نیزروی نہ اِنت بلکیں گل ءِ اندر ءَ ھما وتمانی ءِ ھلاسی اِنت کہ اے گل تھنا وت مانی ءِ سر ءَ دیم ءَ جنزگ ءَ نہ اِنت بلکیں وتی رھبند ءُ نوکتریں دور ءِ ھساب ءَ دیمروئی کنگ ءَ اِنت ءُ آئی ءِ دیم ءِ دشمن ھمے ھساب ءَ لاچاری ءَ گندگ بیت کہ برے برے دیم ءِ دشمن ءِ لیکھاں زانگ بیت کہ آئی ءِ دزرس اَچ بی ایل اے ءَ گونڈ اِنت بلکیں زھن ءُ آئی ءِ بندوکیں مردمانی ھیال سک ءَ دور اِنت کہ گمان ءَ ھما چیز نہ بیت آئی ءَ گل مروچی کنگ ءُ گندگ بیت اِنت ۔
مھلوک ءِ واھشت اگاں میدان ءَ اے چیز گندگ بیت کہ بی ایل اے پرکار اِنت ءُ توانمند اِنت گڑا اے چیز ھم گندگ ءَ بیت بی ایل اے ءَ مھلوک ءِ پلامرزی بازیں ھسابے ءَ وتی نیمگ ءَ برتگ چش کہ اے مزنیں اُرشانی میان ءَ آئی ءَ داں مھلوک ءِ پلامرزی گون مہ بیت گڑا آ کراچی شھر ءَ بہ گر داں گوادر ءَ مزنیں کاروائی پراھی ءَ جنجال بوت کن اَنت بلے آ آسانی ءَ گوں وتی اُرشانی جاھاں وت ءَ سر کنت ءُ وتی کاراں سرجم کنگ ءَ گندگ بیت اِنت اے آئی ءِ وتی جاگہ ءِ جوڑینگ ءُ مھلوک ءِ جوڑینگ ءِ تک اِنت ۔
گوستگیں سروک بشیر زیب ءَ بی ایل اے مزنیں ھسابے ءَ دیم ءَ جنزینتگ ءُ برتگ ایشی ءَ اے زانگ بیت کہ بشیر زیب سلاہ بندی ءِ ھواری ءَ یک سکیں سوھو ءُ دورچاریں مردمے ءُ گڑا بی ایل اے ءِ گوستگیں کارانی کساس کنگ ءَ اے زانگ بیت بی ایل اے وتی آیوکیں سروک ءَ ھم یک لائک ءُ جوانیں مردمے گچین کنت ءُ دیم ءَ جنزان کنت ۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت۔