بی ایس او آزاد ءِ چیئرمین درپشان بلوچ ءِ گون ءَ دی بلوچستان پوسٹ ءِ گچینی گلگدار
۱۹ اپریل ۲۰۲۳ ءَ بلوچ اسٹوڈنٹس آرگنائزیشن، ءَ وتی بیست ءُ سیمی راجی کونسل سیشن سوبمندی ءَ گوں برجاہ داشتگ، ءُ کونسل سیشن ءِ گُڈ سر ءَ جار جنگ بیت کہ درپشان بلوچ بی ایس او آزاد ءِ نوکیں چیئرمین وھدیکہ زروان بلوچ نوکتریں سیکریٹری جنرل گچین کنگ بیتگ اَنت۔
اے ھما راج دپتری یک شلی ءِ بھر اِنت کہ آ بی ایس او ءِ دپتر ءِ تہ ءَ یک مزنیں بدلی ءِ ھما وھد ءَ ودی بیت اِنت، وھدے فروری 2002 ءَ بی ایس او ( محراب) کونسل سیشن کنگ ءَ بنت اِنت، کہ آئی ءِ بگیرداری ءَ بی ایس او ءِ سینئر وائس چیئرمین ڈاکٹر اللہ نظر بلوچ وتی ھمراھانی پجیگ ءَ کنت۔ کہ آئی ءِ سوب ھما وھدے بی ایس او ءِ چیئرمین نادر قدوس ءِ پاکستانی پارلیمانی گلاں گوں نزیکی، بی ایس او ءَ وتی مادنیں کِشک ءَ چہ ترینگ گوشگ بیت۔ ڈاکٹر اللہ نظر آجوئی ءَ، ابید پارلیمانی سیاست ءُ بی ایس او ءِ آجوئیں بستار ءِ لیکھی رھبند ءِ سر ءَ، جتائیں کونسل سیشنے اڈ دنت ءُ بی ایس او آزاد ءِ بن ھشت ءَ ایر کنت ءُ گل ءِ اولی چیئرمین گچین کنگ بیت۔
اے وھد ءَ بی ایس او آزاد ءُ محراب ءَ ابید بی ایس او ءِ دگہ ھم دو بھر ھست بنت۔ بی ایس او ( مینگل) کہ چہ بی این پی ( مینگل) ءَ، ءُ بی ایس او (استار) کہ گوں بی این پی (عوامی) ءَ نزیک بیتگ اَنت۔ کمو وھد ءَ پد بی ایس او (استار) وتی چیئرمین حمید شاھین ءِ سروکی ءَ بی ایس او آزاد ءَ گوں ھوار بیگ ءِ جار ءَ جنت۔ چہ آئی ءَ پد بی ایس او آزاد وتی نام ءَ مٹ کنت ءُ بی ایس او (متحدہ) ایر کنت۔ بی ایس او (متحدہ) ءِ کونسل سیشن پنجگور ءَ بیت، کہ اود ءَ چیئرمین ڈاکٹر امداد بلوچ ءُ جنرل سیکریٹری سعید یوسف بلوچ گچین کنگ بنت۔
بی ایس او آزاد ءُ استار ءِ ھوار بیگ ءَ پد یک برے پد ءَ بی ایس او اے ایندگہ بھراں گوں گپ ءُ تران بندات بیت ءُ درستیں بھر یکجاہ بنت ءُ “سنگل” بی ای او ءِ سر ءَ تپاک کن اَنت۔ کہ سک کسانیں مدتی ءَ داں ھست بیت، پیسرا کونسل سیشن ءَ ساری واحد رحیم بلوچ جتائیں بھرے ءِ بی ایس او پجار ءِ نام ءَ جتا جوڑ کنت۔
2006 ءَ دلجمیں پیم ءَ شال ءَ بی ایس او ءِ کونسل سیشن برجم دارگ بیت، اود ءَ بشیر زیب بلوچ چیئرمین، سنگت ثناء بلوچ وائس چیئرمین ءُ گلزار بلوچ سیکریٹری جنرل گچین کنگ بنت۔ کونسل سیشن ءِ نیام ءَ دگریانی سوب ءَ محی الدین بلوچ وتی جتائیں بھرے جوڑ کنت۔ اِیشی ءَ پد سنگل بی ایس او وتی کوھنیں نام ءَ بی ایس او آزاد ءَ پد ءَ زیر ایت۔
سال 2008 ءَ بی ایس او آزاد ءِ آیوکیں کونسل سیشن ءَ بشیر زیب بلوچ دومی رند ءَ گل ءِ چیئرمین وھدیکہ زاھد بلوچ سیکریٹری جنرل گچین کنگ بنت۔ دیمتر ءِ کونسل سیشن ءِ ھاتر ءَ بی ایس او آزاد نگیگیں ءُ ترندیں جاورانی سوب ءَ سالے ودار کنگ کپ اِیت۔
سال 2012 ءَ اڈ داتگیں نوزدھمی کونسل سیشن ءَ زاھد بلوچ چیئرمین، کریمہ بلوچ سینئر وائس چیئرمین وھدیکہ رضا جھانگیر سیکریٹری جنرل گچینگ کنگ بنت بلے بی ایس او آزاد ءِ رد ءَ 14 مارچ 2014 ءَ آھانی چیئرمین زاھد بلوچ ءَ چیریں گلانی کارمند دزگیری ءَ پد بیگواہ کن اَنت، کہ داں انگت دیم ءَ آرگ نہ بیتگ۔ آئی ءَ پیسر گل ءِ سیکریٹری جنرل رضا جھانگیر ءَ ھم تُربت ءَ لشکری یک بیڑے ءِ نیام ءَ تیر جن اَنت ءُ کُش اَنت ئِے۔
سال 2015 ءَ بی ایس او ءِ بیستمی کونسل سیشن برجم دارگ بیت، اِیشی ءِ تہ ءَ کریمہ بلوچ چئیرپرسن ءُ سیکریٹری جنرل ثناء اللہ پنام عزت بلوچ گچین کنگ بنت۔ کریمہ بلوچ ءَ گوستانک ءِ تہ ءَ اولی زالبولیں سروک بوگ ءِ پھر گون اِنت۔ بی ایس او آزاد وتی بیست ءُ یکمی کونسل ءَ 2018 ءَ برجم داریت، اود ءَ سھراب بلوچ گل ءِ چیئرمین گچین کنگ بیت۔ اے یکشلی داں سال ءَ برجاہ اَت وھدے 3 نومبر 2020 ءَ بی ایس او آزاد اے جار ءَ جت کہ “بی ایس او آزاد ءِ بیست ءُ دومی راجی کونسل سیشن بنام معلم آزادی شھید سبا دشتیاری ءُ درس گاہ آجوئی خیر بخش مری ءِ یات ءَ برجم داشتگیں سیشن مروچی سوبمندی ءَ گوں آسر بیتگ۔ کہ اِیشی ءِ تہ ءَ ابرم بلوچ ابید کسی دیم ءَ اوشتگ ءَ چیئرمین وھدیکہ مھر زاد بلوچ ابید کسی دیم ءَ اوشتگ سیکریٹری جرنل گچین کنگ بیت اَنت۔”
درپشان بلوچ، وتی پھازگی ءَ چاران ءَ وتی راستیں نام ءَ رسانکدر ءَ پدر نہ کنت۔ دی بلوچستان پوسٹ ءَ جتائیں اھوالکارانی رد ءَ یکشلیں کوشستاں پد گوں آئی ءَ اھوال کُتگ ءُ ناشناسیں ھندی ءَ نیاد کُتگ، ءُ گوں آئی ءَ اے گلگدار کُتگ کہ پہ وانوکانی ھاتر ءَ شنگ کنگ بیگ ءَ اِنت۔
ٹی بی پی: شما وتی سیاسی زندمان ءِ بندات کدی کُتگ ءُ داں انگت کجام چِست ءُ ایراں چہ گوستگ اِت؟
چیئرمین بی ایس او آزاد: گلامی وتی تہ ءَ وت یک لانتے بلے من سرپد باں مئے انیگیں پدریچ وش بھت اِنت کہ یک انچائیں اھدئے ءِ تہ ءَ زندگ اَنت، وھدے، بلوچ زورگیر ءِ بگیری ءَ وتی گُڈی جنگ ءَ مِڑگ ءَ اِنت۔ چہ ھما دمگ ءَ منی سیادی اِنت اود ءَ منی کسانی ءَ چہ آشوبی سُرپُر برجاہ بیتگ اَنت ءُ وھدے من بود کُتگ ما ژانگولیں جون، بیڑ، زور گیر ءِ شدت وتی چماں گوں دیستگ اَنت، وھدیکہ اِیشی ءِ دیمپانی کنان ءَ بلوچ ورنایانی اے جزبگ ھم دیستگ کہ اود ءَ آیاں وتی ساہ نَدر کُتگ اَنت ءُ بلوچ الُس ءَ اے باور کنائینتگ کہ ما یک راجے ءِ دروشم ءَ چون پنجابی ءِ زورگری ءِ تہ ءَ مانگیشیتگ اِنت۔ چوناھا من وتی اسکول ءِ وھد ءَ چہ سیاسی سُرپُرانی بھر بیتگ اَنت ءُ ھنکین ءَ مُچی ءُ روانک، زھرشانی ءُ جتاھیں آشوبی سُرپُرانی سوب ءَ منی تہ ءَ زور گیر ءُ گلامی ءِ بُنکی تپاوت پدراہ بیتگ۔
اے کساس ھما وھد اَت، وھدیکہ من ھشتمی مکتب ءِ چکاسانی تہ ءَ سوبمند بیتگ اَنت ءُ پہ گیشتر وانگ ءَ کراچی ءَ شتگ بیتگ اَنت۔ کراچی چُشکہ بلوچ سیاست ءُ لبزانک ءِ بنجاہ اِنت ءُ اود ءَ مدام سیاسی سُر ءُ پُر برجاہ بیتگ اَنت گُڑا منی پجاروکیں سنگت ھمود ءَ بیتگ اَنت، کہ بی ایس او آزاد ءِ باسک بیتگ اَنت۔ من ھم کراچی ءَ رس اتگ اَنت ءُ 2010 ءِ بنداتی روچاں بی ایس او آزاد ءِ سرجمیں باسکے جوڑ بیتگ اَنت ءُ سیاسی سُر ءُ پُرانی بندات کتگ۔ باسکی ءَ پد من اولی بر ءَ ڈپٹی یونٹ سیکرٹری ءُ پد ءَ یونٹ سیکرٹری وتی زمہ واری پیلو کُتگ اَنت ءُ پد ءَ کساس داں چار سالاں کراچی زون ءِ چیردستی ءَ وتی سُر ءُ پُر برجاہ داشتگ اَنت۔ اے چار سال منی بنکی سیاسی کیرئیر ءِ ھاتر ءَ باز مھم بیتگ اَنت، چُشکہ اے اھد بی ایس اوآزاد ءِ ھاتر ءَ گل ءِ رد ءَ باز ناگیگ ءُ ترند بیتگ اَنت ءُ گل ءُ باسکاں اے نیام ءَ ھما مزنیں تاوانانی دیمپانی کنگ کپتگ، ھمود ءَ گوں گل ءَ ھمراہ داری کنوکیں باسکاں بازیں تجربگ ھم رس اتگ اَنت۔ اے نیام ءَ گل پھزگی راہ کارمرز کنان ءَ سیل سسٹمامنی بُنھشت ایر کت اَنت، یک سیاسی کیڈرئے ءِ دروشم ءَ اے درستیں وھد ءَ گل ءِ درستیں سُر ءُ پُرانی تہ ءَ بھر زرتگ ءُ گل ءِ نیمگ ءَ داتگیں وتی زمہ واری پیلو کُتگ اَنت۔ 2013 ءِ گُڈی روچاں، من چہ کراچی ءَ وتی دمگ ءَ واتر بیت اَنت، کہ اود ءَ ھمودی زون ءِ سنگتانی پجیگ ءَ وتی سیاسی سُر ءُ پُر برجاہ داشت اَنت، پیسر ءَ زونل وائس پریذیڈنٹ ءُ پد ءَ زیت زونل پریذیڈنٹ گچین کنگ بیت اَنت۔
2015 ءِ بنجاھی کونسل سیشن ءَ داں جتاھیں زونل اگدھانی سر ءَ بیتگ اَنت ءُ پد ءَ سینٹرل کمیٹی ءِ باسک گچین کنگ بیتگ اَنت۔ اے نیام ءَ جتاھیں بنجاھی اگدھانی سر ءَ زمہ واری پیلو کُتگ اَنت ءُ یک سیاسی باسک ئے ءِ رد ءَ وتی جھد برجاہ داشتگ ءُ گل ءِ بیست ءُ سیمی بنجاھی کونسل سیشن ءَ چیئرمین گچین کنگ بیتگ اَنت۔
ٹی بی پی:بی ایس او آزاد ءِ نوک گچین بیتگیں چیئرمین ءِ دروشم ءَ، شما گل ءَ کجام نوکتریں دیمرویاں سر کنگ لوٹ ئے ؟
چیئرمین بی ایس او آزاد: چوناھا وَ جاور ھال ایشی ءِ اجازت نہ دے انت کہ گل ءِ گامگیج ءُ پروگرام رسانکدر ءِ تہ ءَ شنگ کنگ بہ بیت، البت انچو گُشت کناں کہ ما گل ءِ دروشم ءَ اے گپ ءِ سر ءَ تپاک بیتگیں کہ ورنایاں روایاتی سیاسی سُر ءُ پُراں چہ کشگ ءُ آشوبی لیکھاں گوں ھوار آیاں اے لائک ھم جوڑ بہ کن ایں کہ آ دیمتر ءَ جُنز ءِ جتاھیں تک ءُ پھناتاں مھکم کنگ ءِ تہ ءَ کرد پیلو کُت بہ کن انت۔ گل ءَ بندوکیں سیاسی باسک زھنی دروشم ءَ ساڑی بیگ ءَ ھوار لائیکی ءُ بودناکی ءِ رد ءَ ھم ساڑی بہ بنت دانکہ آ دیمتر ءَ جُنز ءِ جتاھیں سنگرانی تہ ءَ روایتی لیکھانی بدلی ءَ زانشتی ءُ بودناکیانی بنھشت ءَ وتی پرکاریں کرد پیلو کُت بہ کن اَنت۔ پرچاکہ انیگیں جاورانی تہ ءَ تاکت ءُ لائکی باجبری ءُ پروش ورگ ءِ پیسلہ ءَ کنت۔ مئے کوشست ھمے بیت کہ گل ءِ یکشلیں جھد ءِ تہ ءَ کجام ھم پئیمیں نزوری مئیت ءُ وھد وھد ءِ مٹ بیوکیں جاورھالانی پجیگ ءَ گل ءِ پروگرام ءُ پالیسیانی تہ ءَ المی بدلی آرگ بہ بنت اِنت۔
ٹی بی پی: مارچ 2013 ءَ بی ایس او آزاد ءِ بندش جنگ بیتگ اَنت، چریشی سوب ءَ گل زوراکیانی آماچ اِنت۔ چشیں جاورانی تہ ءَ جمھوری روایاتانی برجاہ داران ءَ، کونسل سیشن ءِ اڈ دیگ ءَ ، کجام ناگیگی ءُ جنجالانی دیمپانی بیتگ اَنت؟
چیئرمین بی ایس او آزاد: من سرپد باں کہ گل ءِ سر ءَ 2013 ءَ چہ نہ بلکیں وتی بنیات ءَ چہ ڈیھی زوراکی، کریک ڈاؤن ءُ زلم ءِ دیمپانی کنگ ءَ اِنت۔ 2013 ءَ چہ پیسر ھم گل ءِ سروک ءُ باسکانی زورانسری بیگواھی ءُ آیانی ژانگولیں جون دزکپتگ اَنت۔ بلے گل ءِ دروشم ءَ ما اے سرپد بہ ایں جاور تُری کجام ھم دروشم ءِ بہ بنت بلے گل ءِ کونسل سیشن جمھوری ءُ سیاسی اخلاکیات ءِ بنیات ءَ ھرچ پیئم کنگ لوٹ ایت پرچاکہ اے کونسل سیشن اِنت کہ پہ گل ءَ نوکیں سروک گچین کنت، جُنز ءَ کیڈر دنت، نوکیں کیڈرانی تہ ءَ راہ پچ کنت، مٹ بیوکیں جاورانی پجیگ ءَ نوکیں پروگرام، سسا ءُ گامگیج اڈ دنت اِنت ءُ جُنز ءِ یکشلی ءَ برجاہ دار ایت۔ کونسل سیشن ءِ وڑیں ھاسیں ءُ بنکی پروگرام ءِ تہ ءَ دیری ءُ ایشی ءِ اڈ دیگ ءِ تہ ءَ سُستی ءِ درشان گل ءِ سُر ءُ پُراں آسری ءِ آماچ کنگ ءِ مَٹ اِنت، پمیشکا منی لیکہ ھمیش اِنت کہ اِیشی ءِ ھرچ پئیم وھد ءِ سر ءَ برجاہ دارگ لوٹ ایت، ھمے جمھوریت ءِ ھُسن ءُ گل ءُ جُنز ءَ پہ جوانتریں پیسلہ اِنت۔ پشت کپت ڈیھی زوراکی ءِ ھبر گُڑا راجی جُنز ءَ ھواریں کجام ھم پاٹی ءُ گل ءَ پہ جاورھال ھچ بر گیگ نہ بنت ءُ بی ایس او آزاد ءِ ھاتر ءَ جاور ھال گوستگیں بیست سالاں چہ ھمے پئیم برجاہ اَنت۔
چشکہ اگاں انیگیں برجاھیں کونسل سیشن ءَ بیتگیں دیمپانیانی گپ کنگ بہ بیت گڑا مدامی رنگ ءَ باز نگیگ، جنجالی ءُ مشکلیں جاوراں چہ گوزگ ءَ پد جوانیں گلے ءِ گامگیجانی سوب ءَ سوبمند بیتگ۔ گوستگیں سئے چار کونسل سیشنز کہ من وت آیانی بھر بیتگ اَنت اگاں آیانی گپ کنگ بہ بیت گڑا مئے سنگتاں وتی زند ءُ مرگ ءِ سودہ جتگ ءُ ایشانی تہ ءَ بھر زرتگ۔ نہ تھنا کونسل سیشن بلکیں مئے کیڈرز ھمک روچ ھمک دمان جُنز ءُ گل ءِ سُر ءُ پُراں کنگ ءِ وھد ءَ نگیگیں جاوراں چہ گوزان بنت۔ یک آشوبی کیڈرے ءِ جوانیں جاورانی تہ ءَ ھم ترندیں چکاس ءُ جنجالانی دیمپانی کن اَنت ءُ پد ءَ آئی ءَ چشیں مراگش اڈ دیگ ءِ ھاتر ءَ چونیں جاوراں چہ گوزگ کپ ایت ایشی ءِ اندازگ جُنز ءَ بندوکیں مردم شر جت کن اَنت۔ البت انچو گُشت کناں کہ جوانیں گلی گامگیج ءُ پالیسیاں ابید اے ھچبر باوری نہ اِنت کہ چشیں مزنیں مراگش برجاہ دارگ بہ بنت۔
ٹی بی پی: بی ایس او آزاد سر زاھریں سیاست کُت نہ کنت ءُ نانکہ پہ آئی ءَ نوکیں باسک گچین کنگ ءَ ارزانی اِنت، چشیں جاورانی تہ ءَ زاناں بی ایس او آزاد ءِ گور ءَ ھمینچوکیں مردمی تاکت ھست کہ آ لائکیں کیڈر ودی بہ کنت ءُ نوک باھندیں رھشوناں ءَ زمہ واریاں دات بہ کنت؟
چیئرمین بی ایس او آزاد: اگاں گپ سرپیس سیاست ءِ ئیگ اِنت گُڑا من جھان ءِ آشوبی راج دپتر ءُ آجوئی ءِ جد ءُ جھد ءِ تہ ءَ چشیں جُنزاں چہ بے سمایاں، کہ آ زورگیراں سرپیس سیاست کنگ ءُ وتی ڈیھ جوڑ کنگ ءِ جد ءُ جھد ءِ آجوئیں پرمان دیگ بیتگ اَنت، برتانیہ ءِ پئیمیں وتگڑیں مردمی ءُ راجی اگبالانی چیمپئن ڈیھاں ھم وتی گور ءَ آجوئی ءِ جد ءُ جھداں نہ سگ اَنت گُڑا پاکستان ءِ پیئمیں زوراک ءُ گیر پتری ڈیھ چشیں گامگیجاں چوں سگ ایت کن انت، وھدیکہ انیگیں جاورانی تہ ءَ بلوچ آجوئی لوٹوکیں کجام ھم گل سرزاھری ءَ نشت ءُ کار کنگ ءَ نہ اِنت بلے جُنز ءِ تہ ءَ گیشی ءُ ترندی ھمک روچی رد ءَ گندگ ءَ پیداک اِنت، اِیشی ءِ بنکی سوب گل ءِ کالب ءِ ڈڈی، ادارگانی سر ءَ باور ءِ ودگ، جُنز ءَ جتاھیں پھناتانی تہ ءَ مھکم کنگ ءُ جُنز ءَ ھما جاھاں سر کنگ کہ اود ءَ گل ءُ جُنز یک مردم، ادارگ اگاں ھاسیں ءُ اوشتاتگیں لیکھی ءِ بندوک نہ بوگ بلکیں ھمک دومی گام ءَ گل جتاھیں دروشم ءُ بھناتاں کار کنگ ءَ بہ بیت، کہ اود ءَ جتاھیں لیکہ ءُ آشوبی ھیال برجاہ بہ بنت، چریشی ءَ مردمی تاکت نا بلکیں ھما ادارگی لیکہ سوبمندی ءَ سر کنت۔ منی کسانیں زانت ءِ رد ءَ جُنز مردمی تاکت ءَ چہ بلکیں آشوبی تاکت ءَ چہ باجبر بنت اِنت۔
چونیا ھما سرزاھریں سیاست ءِ بزانت شما کَشگ ءَ اِنت ما آئی ءِ سر ءَ گزران ءَ سرجم کُت کَنگ ءَ نہ اِنت، بلے ورنایانی پگری ءُ املی سُرپُرانی بابت ءَ گُل ھمک جاہ ءَ ءُ ھمک وڑ ءَ ھست اِنت ءُ وتی زمہ واریاں پیلو کنگ ءَ اِنت۔ گل چہ مرچیگ ءَ نہ بلکیں 2012 ءَ چہ وتی رھشوناں سرزاھر ءَ پدر کَنگ ءَ نہ اِنت بلے اے یازدہ سالانی جد ءُ جھد ءِ تہ ءَ نزوری ءُ سُستیاں ابید ھم کجام ھم گل ءِ سُرپُر سرجمی ءَ اوشت آماچ نہ بیتگ انت۔
ءُ پشت کپت باسک گچینی ءِ گپ گُڑا ایشی ءِ ھاتر ءَ منی ھیال ءَ سرزاھریں سیاست ءَ گیش پِڑ ءَ ھست بیگ ءُ کردگار سان دار اَنت، بی ایس او آزاد گل ءِ دروشم ءَ وتی کرد ءُ کردگار ءِ سوب ءَ بلوچ ورنایانی زانتکاری ءِ بھر جوڑ بیتگ۔ چریشی ءَ گُل ءَ باسک گچینکاری ءِ تہ ءَ ھچ پئیمیں جنجالانی دیمپانی نہ اِنت بلکیں من باوری ءَ گوں گُشاں کہ ھمک دومی سماداریں بلوچ ورناہ بی ایس او آزاد ءِ باسک بئیگ ءِ واھگ دار ایت۔
دومی نیمگ ءَ اگاں کیڈرز ودی کنگ ءِ جیڑہ اِنت گُڑا اشی درور انیگیں کونسل سیشن ءَ چہ دیاں کہ اود ءَ کونسلر گچین کَنگ ءِ وھدءَ گل ءِ ھمک زون ءَ چہ کونسلرانی دو سئے کھیپ جاڑیگ بیتگ اَنت، وھدیکہ ھمے جاورھال سینٹرل کمیٹی ءِ باسکانی گچینکاری ءِ وھد ءَ ھم بیتگ اشانی زانگ ءَ گوں 70 درسد رھشونی زمہ واری نوک باھندیں سنگتانی دست ءَ دیگ بیتگ اَنت، ایشی ءِ بزانت ایش اِنت کہ گل یک انچائیں کیڈر ودی کنگ ءَ اِنت کہ آ نہ تھنا لائک اَنت بلکیں گل ءِ گیشتر مھکم و توانا کنگ ءِ لائکی دار اَنت۔
ٹی بی پی: اے وھد ءَ بلوچستان ءِ تہ ءَ بازیں بلوچ نودربر گل ھست کہ ایشانی تہ ءَ کم چہ کم بی ایس او ءِ پنچ بھر سُر ءَ پُر کنگ ءَ اَنت، بی ایس او آزاد دگہ بلوچ نودربر گلاں چہ چتور جتا اِنت؟
چیئرمین بی ایس او آزاد: من سرپد باں کہ بی ایس او یک اِنت ءُ آ بی ایس او آزاد ءِ دروشم ءَ مھکم ءُ توانا اِنت ءُ راجی ءُ پگری ءُ بنیاتی لیکہ ءِ رد ءَ جد ءُ جھد ءَ جُنزان اِنت، پشت کپت اَنت ھما بھر کہ آیانی شما گپ کنگ ءَ اِت اے کجام پاٹیانی پاکٹ آرگنائزیشن اگاں جندی ءُ نمائشی ٹولی بیت کن اَنت، بلے گل ءِ دروشم ءَ ایشانی ھچ بستار ءُ جاہ نیست اِنت ایشی ءَ درستاں مستریں درور ایش اِنت کہ گوستگیں سالاں چہ برجاھیں یکشلیں زوراکی ءُ ھونواری ءُ کُشت ءُ ھوناں پد ھم بی ایس او آزاد داں مروچی ھم بلوچستان ءِ مھکم تریں سیاسی تاکت ءُ ورنایانی آئیڈیل گل اِنت، کہ راج ءُ جُنز ءَ راستیں دروشم ءَ رھشون ءُ کیڈر ءِ ھستی دار ایت، وھدیکہ دومی نیمگ ءَ نمائشی ءُ پاٹی پاکٹ کجام ھم لیکہ ءُ پگر ءَ ابید ھشکیں گپ ءُ پاٹی باسک بندی ءِ ھاتر ءَ کار کنگ ءَ اَنت، کہ آ بلکیں بی ایس او ءِ نام ءَ کار مرز کُت کن اَنت بلے آئی ءِ لیکہ، پگر ءُ پلسپہ ءُ کردگار ءَ گوں آیانی ھچ سیادی نیست کہ آ بی ایس او ءِئیگ اِنت، بزان کہ راجی ءُ آشوبی پگر ءُ لیکہ کہ بی ایس او ءِ بن ھشت اِنت۔ مروچی بی ایس او آزاد ھمک جاہ ءُ ھمک ھند ءَ جُنز ءَ بگر داں چاگردی بدلیاں بگر داں زانت ءُ لبزانکی سُر ءُ پُراں داں یک مھکمیں ادارگ ئے دروشم ءَ راج ءُ ورنایانی نیام ءَ ھست اِنت، وھدیکہ ھما بھر کہ آیانی نام ءَ شما گِرگ ءَ اِت آ سرزاھری سیاست ءَ بیگ ءَ ابید ھم داں روچ مرچی 10 لیکھی نودربر یکجاہ کنگ ءَ بے سوب اَنت، چریشی ءَ پدر بیت کہ ورناہ ءُ راج کئے ءَ راستیں بی ایس او بزاں نودربرانی راستیں تاکت سرپد بنت، وھدیکہ آیانی دیم ءَ اَنت کجام پگر ءُ پلسپہ ءِ پد ءَ نہ بیتگ بلکیں ھما وتگڑیں پارلیمانی پاٹیانی واھگانی پد ءَ بیتگ کہ آیانی دست وت بلوچ جُنز ءُ راج ءَ تاوان دیگ ءَ ھوار اَنت، گُڑا چُشیں ٹولی جُنز ءُ راج ءُ بی ایس او ءِ لیکہ چون وارس بوت کن اَنت؟
وھدیکہ اے درستاں ابید بی ایس او آزاد ءِ مزنیں کساسے ءَ کیڈر نمیران کنگ بیتگ اَنت، سدانی کچ ءَ زنداناں بندیگ اَنت، وھدیکہ مزنیں کچے ءَ مروچی جُنز ءُ چاگرد ءِ جتاھیں پھناتانی تہ ءَ کار کنگ ءَ اَنت، شما ھما بھرانی گپ کنگ ءَ اِت آیاں پہ راج، جُنز ءُ چاگرد ءَ چی ودی کُتگ؟ منی ھیال ءَ اَے ٹولی بی ایس او ءِ نام ءَ کارمرز کنان ءَ پردی اگاں پہ وتی ٹولیاں مپاد گپت کن اَنت بلے بی ایس او ءُ راجی، لیکہ ءُ آشوبی لیکہ ءَ گوں اشانی ھچ سیادی نیست اِنت۔ البت منی جند ءِ زانت ءِ رد ءَ مئے لھتیں انچائیں سنگت کہ آ زمینی راستیاں چہ بے سما اَنت اشاں ارژشت دئے انت، البت زمین ءُ پِڑ ءَ ھستیں نودربر ءُ ورناھانی ھاتر ءَ اے ٹولیانی ھچ ھم ارژشت نیست، پرچہ کہ آ اہشانی راستی ءَ سرپد اَنت۔ چُشیں نمائشی ءُ مپاد دوستیں ٹولیانی گوں بی ایس او آزاد بزانکہ بی ایس او ءَ برابری کنگ من جندی دروشم ءَ کم زانتی اگاں ناسرپدی سرپد باں۔
ٹی بی پی: بلے بی ایس او ءِ بابت ءَ چُشیں لٹریچرھم نیست اِنت کہ ما چُشیں چپیں شے آں کساس کُت بہ کنیں؟
چیئرمین بی ایس او آزاد: اگاں گھگیریں لبزانک یا لٹریچر ءِ گپ کنگ بہ بیت گُڑا منی ھیال ءَ تھنا بی ایس او آزاد نہ بلکیں سرجمیں جُنز اے پِڑ ءَ نزوریانی آماچ اِنت، بلے اِیشی ءِ سر ءَ گلگ داری جنگ نہ بیت، بلکیں آیانی برھلاپ گیشتر کار کنگ ءِ زلورت اِنت۔ ما ادارگ ءِ بستار ءَ اِے نزوری ءَ ماریں ءُ گل لٹریچر کمیٹی ءِ سر ءَ درستاں گیشتر دلگوش دیگ ءَ اِنت۔ سگار کمیٹی گوستگیں دو سالاں چہ لٹریچر ودی کنگ ءَ بے کساسیں جھد کنگ ءَ اِنت ءُ بی ایس او ءِ بابت ءَ ھم گل ءِ لٹریچر کمیٹی گوستگیں دو سالاں چہ کار کنگ ءَ اِنت۔ اے رد ءَ گل بی ایس او ءِ بابت ءَ یک زگریں ءُ دلجمیں لٹریچرے ءِ سر ءَ کار کنگ ءَ اِنت ءُ واھگ داریں کہ زیتاں زیت راج ءُ ورناھاں بی ایس او ءِ بابت ءَ یک دلجمیں راجدپترے دات بہ کن ایں۔ البت لھتیں ٹولی وتی مپادانی ھاتر ءَ بی ایس او ءِ نام ءَ کارمرز کُت کن اَنت بلے ھما لیکھی یکشلی کہ بی ایس او ءِ ئیگ اِنت آ بی ایس او آزاد ءِ دروشم ءَ برجاہ اِنت۔
ٹی بی پی: آجوئی ءِ لوٹ ءَ ابید شمئے گور ءَ زاناں دگہ پروگرام ھست کہ آ ورناھاں وتی نیمگ ءَ دلگوش کُت بہ کنت؟
چیئرمین بی ایس او آزاد: بی ایس او آزاد ءِ گور ءَ یک نہ اوشتوکیں پروگرامے ھست اِنت کہ ایشی درستاں مستریں درور بلوچستان ءِ تہ ءَ سرداری پگرءِ ھلاسی ءِ تہ ءَ بی ایس او آزاد ءِ کرد، زالبولانی بابت ءَ ھستیں تھری پرک کنوکیں لیکہ ءِ جُنز ءُ چاگرد ءِ تہ ءَ چہ ھلاس کنگ ءَ چہ رس اتگیں سوبمندی ءُ زالبولاں نہ تھنا سیاسی سنگر ءَ مھکم کنگ بلکیں آیاں ھما رھشونی ءُ سروکی ءِ کالب ءَ سرکنگ ءُ ھمک تک ءَ بلوچ زالبولاں مھکم ءُ توانائیں دروشم ءَ جُنز ءُ چاگرد ءِ تہ ءَ دیما آرگ ءَ، بلوچ چاگرد ءُ ھاسیں پئیماں نودربرانی نیام ءَ نشاہ ءِ ھلاسی ءِ درور مئے دیما اِنت کہ اشی ءِ مٹ بی ایس او ءِ سر ءَ رؤت کہ آئی ءِ کیڈرزانی جھد ءِ سوب ءَ وانگجاہ ءُ بلوچ ورناھانی تہ ءَ نشاہ یک ھدے ءَ داں دارگ ءَ سوبمندی رس اتگ، وھدیکہ بلوچ ورناھاں ڈیھی مشینری ءُ کولونیل وانگ ءِ بدلی ءَ یک الکاپیں ءُ زانشتی ءُ سائنسی وانگے ءِ نیمگ ءَ برگ ھاسیں پئیماں نودربر ءُ ورناھانی تہ ءَ کتاب ءِ دود ءَ دیمروی دیگ، کہ من سرپد باں کہ بی ایس او آزاد ءِ سوبمندی اِنت وھدیکہ آشوبی ءُ ایرادگریں لٹریچر ودی کنگ ءِ کرد انچائیں بازیں پالیسی ءُ مراگش اَنت کہ ایشانی رد ءَ بی ایس او آزاد ءَ چاگرد ءِ تہ ءَ جوانیں بدلی آرگ ءَ مزنیں کردے پیلو کُتگ ءُ باز ھم جتاھیں دروشم ءَ اے کار یکشلی ءَ گوں برجاہ اَنت۔
بلوچستان ءِ تہ ءَ انسانی اگبالانی ھلاپ ورزی ءُ چاگرد ءِ تہ ءَ دگہ کالونیل ءُ چاگردی سلکاریاں پدر کنگ ءُ آیانی گِر ءُ دار کنگ ءِ ھاتر ءَ بی ایس او آزاد ءِ گور ءَ مدام گھتریں پروگرام جریدگ بیتگ اَنت ءُ مروچی ھم ھست اَنت بلے من سرپد باں آجوئی بُنکی لوٹ اِنت مروچی بلوچ چاگرد ءِ تہ ءَ کجام ھم نادراھیانی کہ ھست اَنت آ گلامی ءِ سوب ءَ اَنت، یک ویلفئیر ءُ آجوئیں ڈیھ ءِ جوڑ بئیگ ءَ پر ماں دگہ نادراھیاں چہ رکیت کن ایں۔ داں وھدے بلوچ یک راجی بستارے ءَ یک آجوئیں ڈیھی ءِ واھند نہ بیت اے چاگردی سلکاری وڑیں نہ وڑی ءَ ودی بیان بنت، پمیشکا اے المی اِنت کہ ما درستاں پیسر ھما بُنکی جیڑہ ءِ گیواری ءَ بہ کن ایں، کہ آئی ءِ سوب ءَ دگہ نادراھی ھست اَنت۔ تو یک نیمگے شومک ءِ نادراھی ءِ آماچ بہ بئے ءُ دومی نیمگ ملیریا اگاں تپ ءِ آماچ اِت چشکہ تو چہ اے بیماریاں رکگ لوٹ ئے بلے ھژدری اِلاج شومک ءِ ئیگ اِنت پرچہ کہ آ کُشت کنت، وھدیکہ شومک ءِ اِلاج بیت، تو زندگ مانے گُڑا ایندگہ نادراھیانی اِلاج بیت کنت پرچہ کہ آ تاوانبار الم ھست اَنت، بلے گلامی ءِ دروشم ءَ کوشکار نہ اَنت۔
بی ایس او آزاد اے سرپد بیت کہ بلوچ چاگرد ءَ ھستیں درستیں نادراھیانی بنیات پاکستانی ناجائزیں زورگری اِنت، اے پاکستانی ریاست اِنت کہ اِیشی ءَ بلوچ مھلوک ءِ سر ءَ وتگڑیں سردار نادینتگ اَنت، اے ریاست اِنت کہ ایشی ءَ ڈیتھ اسکواڈ، منشیات ءِ باپاری، زورگر مافیا، جاگیردار داشتگ اَنت، کہ آ بلوچ مھلوک ءِ ھلاپ ءَ زوراکی ءِ کوہ پروشگ ءَ اَنت۔ اے زورگیریں ڈیھ اِنت کہ ایشی ءَ بلوچستان چہ وانگ، زبان ءُ دود ءُ ربیدگ ءَ زبھر کُتگ، اے زورگیر اِنت کہ یک سیکولر بلوچ چاگرد ءَ نیکراھی شدت دوستی ءِ نیمگ ءَ برگ ءَ اِنت۔ اے زورگیری ءِ سوب اِنت کہ مروچی مئے مادنانی لُٹ ءُ پُل برجاہ اِنت، مئے آسراتی پُلگ بئیگ ءَ اَنت وھدیکہ ایشی ءِ بدلی ءَ مارا ژانگولیں جون ءُ ھمک دومی لوگ ءَ چہ زورانسری بیگواھی ءِ سانمند ءِ دزکپ ایت۔ داں وھدیکہ بلوچ سرڈگار ءَ چہ اے زورگیر ھلاس مہ بیت داں وھدے کہ زور گپت بلوچ سرڈگار ءِ سر مانیت، ما کجام ھم پئیم ءَ بلوچ راج ءَ یک وشھال ءُ مھکمیں راج ءِ جوڑ کُت نہ کن ایں پہ اِیشی ءَ زلوری اِنت کہ مئے درستیں دلگوش زورانسری زور ءِ سر ءَ بہ بیت ءُ آئی ءِ بگیر ءَ جد ءُ جھد کنگ ءُ آ ھلاس کنگ بہ بیت اِنت۔
ٹی بی پی: بی ایس او آزاد ءِ بھر بیگ کجام ھم نودربر ءِ ھاترءَ وتی زندمان ءَ تُرس ءِ تہءَ مان کنگ ءِ بدل اِنت، چُشیں جاورانی تہ ءَ کس پرچہ گل ءَ گچین بہ کنت؟
چیئرمین بی ایس او آزاد: اگاں گپ زند ءُ مرگ ءِ ئیگ انت گُڑا منی ھیال ءَ ھمک دومی روچ ءَ ورنایے بیگواہ بیت، اگاں ڈیھی زوراکی یا دروگیں انکاؤنٹر ءِ نشانگ بیت ءُ نمیران کنگ بیت اِنت یا اگاں زورگیر ءِ زھنی جنگ ءِ سوب ءَ زندمان ءَ چہ بے امیت بنت ءُ مرگ ءَ امباز کن اَنت اگاں دگانی تباھی ءِ سوب ءَ دگانی وئیلاں بیران بنت، ایشاں ابید ھزارانی کچ ءَ ورناہ بے مانا ءُ زھنی نادراھیانی سوب ءَ وتی زندمان ءَ ھلاس کنگ ءَ اَنت۔ منی نزیک ءَ بی ایس او آزاد ءُ راجی آجوئی ءَ گوں بندوکیں ادارگ مردمے زندمان ءَ بزانت ءِ دے اَنت – یک گلامی ءِ دروشم ءَ تو انچائیں زندمان ءِ واھگ داشت نہ کن ئے کہ یک آجوئیں چاگردئے ءِ تہ ءَ رس ایت بلکیں آزندمان ءِ جند نیست اِنت۔ تو یک مردمے ءِ بستار کجام کہ سوبمندیانی واھگ ءَ دارگ ءِ آ ترا آنچیں چاگردے ءَ رس اَنت کہ آجو، وت واک ءُ درستیں موہ بہ رس اَنت بلے پاکستانی زورگیری ءِ تہ ءَ بیگ ءَ پہ بلوچاں تباھی ءِ راہ باز بنت، بلے سوبمندی ءِ راہ تھنا راجی جد ءُ جھد ءُ آجوئی ءِ پند ءِ تہ ءَ اِنت۔
اگاں بھگت سنگھ ءِ پئیمیں ورناھاں انگریزانی گلامی ءِ تہ ءَ تھنا یک نوکری ءِ سوبمندی سرپد بہ بیت اِنت گُڑا مروچی ھندوستان ءِ لکھانی کچ ءَ مھلوک ءَ اے زندمان نہ رس اتگ اَت، ھمے وڑا اگاں فیڈل ءَ امریکی، لینن ءُ ٹراٹسکی ءَ زار روس ءِ، جنرل گیاب ءِ پئیمیں مردماں امریکہ گلامی بہ من ایت ایں گُڑا مروچی اے آجوئی نہ رس اتگ اَت، ھمے درور جھان ءِ آشوبیانی ھاتر ءَ اِنت، کہ آیاں زور گیر ءِ بگیر ءَ جنگ داتگ ءُ وتی راج اے جاہ ءَ سرکُتگ۔ اگاں امریکہ ءُ یورپین راجاں برتانیہ ءِ گلامی ءِ تہ ءَ پہ وت ءَ سوبمندی ءِ سرپد بہ بیت ایں گُڑا مروچی آیانی راجی دروشم جوڑ نہ بیتگ اَت۔ منی نزیک ءَ ورناہ تھنا جُنز نہ بلکیں اے گلامی ءِ نیام ءَ زندمان ءِ شوھاز ءَ اسے جد ءُ جھد ءِ بھر بہ بنت۔ چوناھا یک گلامی ءِ زند مدام ھترہ ءِ آماچ بیت، تُری آئی سیادی گوں گل ءَ بہ بیت اگاں مہ بیت، مرچاں ھمک دومی روچ ءَ یک نودربرے بیگواہ کنگ بیت، آیانی پروفائلنگ کنگ بیت، آ شدت ءِ آماچ کنگ بنت، حیات بلوچ ءُ احتشام ءِ پئیمیں نودربراں دگانی سر ءَ تیر گواری ءَ کُشگ بیت، ڈاکٹر مختار ءُ شہزاد پئیمیں ورناھاں دروگیں میڑانی تہ ءَ نشانگ کنگ کُشگ بنت۔ آیانی سیاسی گوں بی ایس او آزاد ءَ نہ بیتگ گُڑا آ پرچا نشانگ کنگ بیتگ اَنت؟ منی نزیک ءَ کجام ھم بلوچ ورناہ اے وھد ءَ استانی زوراکیاں چہ نہ رکیتگ پمیشکا ورناہ اے کرد ءُ پگر ءِ بھر بہ بنت کہ چریشی ءَ زوراک ءِ چہ اے سرڈگار ءَ ھلاس کنگ باوری بہ بیت اِنت۔
ٹی بی پی: بی ایس او آزاد ءِ سر ءَ ریاستی ادارھانی نیمگ ءَ بھتام اِنت کہ شما نودر گلے نہ ات بلکیں آجوئی دوستیں سلاہ بندیں گلانی کمکار اِت، اے بھتامانی توک ءَ کجام کساس ءَ راستی ھست؟
چیئرمین بی ایس او آزاد: پاکستان ءِ نگاھاں ھمک بلوچ ورنا آجوئی دوستیں سلاہ بندیں گلانی کمکار اَنت ، ھمے سبب ءَ ھمک روچ بلوچستان ءِ کنڈ کنڈ ءَ مردم چست کنگ بوگ ءَ اَنت، آیانی لوگانی سر ءَ بمبگواری کنگ بیت اِنت، آ لٹ ءُ کُٹانی نشانگ کنگ بنت – پاکستانی ادارہ بس بی ایس او آزاد ءَ نا بلکیں ھمک بلوچ ورنا آیانی رویشاں جوانی ءَ سرپد اَنت، آ ھمک روچ ءَ بلوچ ورنایاں سلاہ بندانی کمکار سرپد بنت – ھمے ڈول ءُ بی ایس او آزاد ءِ سر ءَ اے بھتام ءَ جنت ءُ وتی مردماں بلوچ ورنایابی ھلاپ ءَ زوراکی ءُ تاکت ءِ رستری ءِ کارمرد کنگ ءِ چیدگ کنگ ءِ جھد ءَ کنت-
بی ایس او آزاد ءِ ورجا پکری ءُ زانت ءِ رنگ ءَ بلوچ آجوئی ءِ زانت ءَ گام جنان اَنت، چوشکہ مئے راہ ءُ رھبند لٹ ءُ کٹے نہ اِنت بلکیں بلوچ ورنایانی المی ءُ پکری، سیاسی ءُ شاھزانتی ءِ دروشم ءَ پاکستانی زورگری ءِ ھلاپ ءَ سرپدی اِنت، آیانی ھیلکاری ءَ کن ایں – بی ایس او آزاد ءِ چیئرمین ءَ بگر دانکہ باسکاں اے وھد ءَ سدانی کچ ءَ ھمراہ زورگیر ءِ دست ءَ بندیگ کنگ ءَ پد شھید اش کتگ اَنت بلے آ ھما وھد ءَ کہ چست کنگ بیتگ اَنت گڑا آیانی گور ءَ کلم ءُ کتاباں ابید ھچ دز نہ کپتگ اَنت – اگاں آ آجوئی دوستیں سلاہ بندیں گلانی کمکار بوتیناں گڑا گل ءِ چیئرمین اے داب ءَ ھشکیں دستاں گوں دزگیر نہ بیتگ ات – آجوئی ءِ پکر ءَ داروکیں ھمک بلوچ دشمن ءِ نگاھاں سلاہ بند اِنت ھمے سبب ءَ آ اے پندل ءَ کنت، بلے وتی تچکیں رھبند ءَ پدر کنت بی ایس او آزاد سیاسی المی ءُ زانتکاری ءِ بنچک ءَ زرمبشت ءِ مھکم کنگ ءَ جد ءُ جھد ءَ دزگٹ اِنت-
ٹی بی پی: نوک بوتگیں چیئرمین ترا چونیں جیڑھانی دیمپانی اِنت؟
چیئرمین بی ایس او آزاد: جی ھاں اے وھد ءَ بستار ءِ گل مارا بازیں چیلینجانی دیمپانی اِنت، یک نیمگے ھمود ءَ دشمن ءَ راجی جھدکارانء ھلاپ ءَ بندش بنا کتگ ءُ بلوچستان ءَ سیاسی جد ءُ جھد ءِ گام گڈ اتگ اَنت، ھمے ڈول ءَ دومی نیمگ ءَ دشمن جتا جتائیں رپکاں بلوچ ورنایاں برین واش کنگ ءِ جھد ءَ اِنت – ریاست یک نیمگے وتی تاکت ءُ رستری ءَ کارمرد کنگ ءُ بلوچ ورنایاں راجی زرمبشت ءُ جد ءُ جھد ءَ ترسینگ ءَ اِنت دومی نیمگ ءَ وتی سافٹ پاور پالیسیانی درچ ءَ بلوچ ورنایاں کرپٹ ءِ سسٹم ءِ تہ ءَ آرگ ءُ آیاں کرپٹ کنگ ءِ جھدے برجاہ داشتگ – کیڈٹ کالجز ءاپ گوستگیں روچاں پرائیوٹ سینٹرزانی دروشم ءَ نودربرانی زھن ءَ ترینگ ءِ جھد ءَ اِنت ایشی ءِ توک ءَ لھتے کاسگ چٹ ءُ دمگی وتگڑیں وانندہ ھم ھوار اَنت – ھمے ڈول ءَ یک نیمگے مدرسہ ءِ دود ءَ ھم چست کنگ ءَ اَنت دانکہ بلوچ نودربرانی تہ ءَ جیڑگ ءُ پکر ءِ رودم ھلاس کنگ بہ بیت اِنت-
مروچی این جی اوز ھم اے درچ ءَ ریاست ءِ گوشگ ءِ سر ءَ کار کنگ ءَ اَنت ھمے ڈول ءَ سرجمیں بلوچستان ءَ ردیں آشوبی تاکت جتا جتائیں نام ءُ آئیدیالوجی ءِ رنگ ءَ وت ءَ مھلوک ءِ دیم ءَ آشوبی پیش کنگ ءَ اَنت بلے تچک ءَ آ گڈسر ءَ راجی زرمبشت ءِ ھلاپ ءُ جد ءُ جھد ءَ پندل کنگ اَنت ءُ کجام نا کجام رنگ ءَ ورنا ءُ زرمبشت ءِ تاوان اَنت – اے درسانی دیمپان کنگ ءُ بلوچ ورنایاں راجی آجوئی ءِ سسائیں پکر ءُ زانت ءَ بندوک کنگ گمانی مشکل ءُ دردناکیں سپرے بلے من ءَ بی ایس او آزاد ءِ باسکانی پھتویں رنگے ءَ ستک اِنت آ اے درستین چیلینجاں وتی سینگ ءَ دیم ءَ دار اَنت آیاناں پروشی ءِ آماچ کن اَنت –
ٹی بی پی: آ کجام سبب اِنت شما کونسل سیشن ءَ دارے ءُ گچینکاری ءِ روچ ءَ ھم دارے بلے گوستگیں پنچ سالانی توک ءَ کونسل سیشناں شمئے گل ءِ دراھیں اگدودار ابید دیم ءِ اوشتوکیں مردماں دارگ بوگ ءُ آیگ ءَ انت؟
چیئرمین بی ایس او آزاد: اے وڑ نہ اِنت کہ دراھیں اگدودار ابید ءِ دیم ءِ اوشتگ ءَ دارگ بوگ ءَ اَنت ھاں گل ءِ پالیسیانی رد ءَ دو اگدودارانی نام رسانکدرانی دیم ءَ آرگ بنت چوشکی سینٹرل کمیٹی ءَ ھوار پتر ءِ دگہ باسکانی نام رسانکدراں نیاریں کہ ایشی ءِ سبب بیت کنت گل ءِ کونسل سیشن ءَ گچینکاری ءِ دیمدراھی نہ اِنت – بیست ءُ سیمی کونسل سیشن ءَ دراھیں سینٹرل کمیٹی ءِ باسک گچینکاری ءِ بیتگ ءُ دارگ بیتگ اَنت،ھمے ڈول ءَ من سرپد باں اے سیاسی زانتکاری ءِ پھکی اِنت انیگیں گل ءِ ھمراہ یکے دومی ءِ زانت ءَ سرپد اِنت اگدو ءِ واستا یک دومی ءِ سر ءَ کپگ ءَ ابید یکے دومی ءَ من ایت، چوشکہ ایشی ءَ ابید دراھیں ھمراھاں اے واک دیگ بیت اِنت آ آھین ءِ رھبندانی رد ءَ گچینکاری ءِ پیساں مچ کنگ ءَ کجام ھم اگدو ءِ واستا وتی تاک ءَ آور کنت – اے درگت ءَ ھچ کس ءَ بندش نیست اِنت –
ٹی بی پی: انیگیں میان اُستمانی ءُ دمگی سیاست ءِ سر ءَ، کجام درشماں وتی دگری ءِ آرگ شما بی ایس او آزاد ءَ گمانی چی کرد ءِ پیلو کنگ ءِ واھگ ءَ دار ایت؟
چیئرمین بی ایس او آزاد: بی ایس او آزاد یک نودربر گلے ءِ بستار ءَ اے دراھیں دگریانی درگت ءَ بلوچ ورنایانی المی ءُ پکری دروشم ءَ ھیلکاری ءَ گیشتر دلگوش دیگ ءِ جھد ءَ کنت – اے مانزمانی ءَ گل ھمے جد ءُ جھد ءَ کنگ ءَ اِنت کہ میان اُستمانی سیاست ءِ دگری ءِ برز ءُ جھلیانی درگت ءَ گیش ءَ چہ گیش لبزانک ودی کنگ بہ بیت ءُ ورنا ءُ زرمبشت ءَ بندوکیں سیاسی جھدکارانی واستا اے مانزمانی ءَ یک مچیں لبزانکے ودی کنگ ءِ ھواری ءَ ودی بوھوکیں جیڑھانی درگت ءَ گیش ءَ چہ گیش سرپدی ودینگ بہ بیت دانکہ زرمبشت ءَ بندوکیں مردم چریشی ءَ چہ نپ چست بہ کن اَنت – بستار ءِ تھریکی اسکول، ما اے مازگی پکر ءَ ودینگ لوٹ ایں ھرچی کہ اے جاوراں سانمند بیتگ ءُ وتی دیم ءَ پیسلہ کنگ ءَ ایوک ءَ بہ جیڑ ایت بلکیں سیاست ءِ برز ءُ جھلیاں واکب بہ بیت گمانی دگری ءَ پیسر زرمبشت ءُ جد ءُ جھد ءِ درگت ءَ یک گچینی گامے چست بہ کنت-
زرمبشت ءَ بندوکیں سیاسی جھد کار گچینتر اے مزنیں زمہ واری بیت اِنت کہ اے جیڑھاں جھلانکی ءَ بچار ایت پرچاکہ دمگی ءُ میان اُستمانی دگری کجام نا کجام رنگ ءَ بلوچ راجی زرمبشت ءِ سر ءَ وتی سان ءَ دور دے اَنت، پرچاکہ انیگیں ورلڈ آرڈر ءَ دنیا سرجم ءَ کیپیٹلزائزیشن اِنت ءُ کیپیٹلسٹ دنیا ءَ ودی بوکیں کسانوکیں جیڑہ وتی سان ءَ سرجمیں دنیا ءِ سر ءَ چگل دے اَنت – اے وھد ءَ باز المی اِنت کہ ما بستار ءِ زرمبشت اے دگری بوکیں جاوراں شری ءِ سر ءَ سرپد بہ ایں ءُ مٹ بوتگیں جاوراں زرمبشتی اژدری ءَ چار ءُ ٹپاسی ءَ بہ کن این ءُ گمانی رنگ ءَ مٹی ءِ دروشم ءَ بولڈ پیسلہ سازی یے بہ کن ایں دانکہ ما میان اُستمانی نگاھاں مٹ بوتگیں سیاسی جاورھالاں چہ نپ چست کت بہ کن این ءُ کجام تاوان ءَ وت ءَ رکینت کت بہ کن ایں –
ٹی بی پی: بی ایس او آزاد ءِ چیئرمین ءِ دارگ پد تو نی تچک ءَ ریاست ءِ ھائی ویلیو ٹارگٹ بیتگ ئے، ھا تو اے ترسناکی ءِ واستا ساجوئے، ءُ کجام ھم نودربر ءَ اے ترس چست کن لوٹ ایت؟
چیئرمین بی ایس او آزاد: آشوبی جد ءُ جھد ءِ وتی رھبند ءُ زلورت بنت اِنت، منی نز ءَ مروچی ھما ھمراہ اے جد ءُ جھد ءِ سپر ءَ گام جنان اَنت آیاں اے جاور ءِ سر ءَ شری ءَ سرپدی ھست اَنت ءُ بستار ءِ یک جھدکارئے ءَ من زانتکاری ءَ وتی مروچیگ ءُ باندات ءِ پیسلہ کتگ، مازگی رنگ ءَ من اے ترس ءِ دیم ءَ اوشتگ ءَ جاڑیگاں – بی ایس او آزاد ءَ بندوکی ءَ ھشت، دہ سالاں من باز مشکلیں جیڑہ دیستگ اَنت ءُ زانتکاری ءُ پکری بنچک ءَ من اے سسائی ءَ ستک داراں کہ اے جد ءُ جھد ءَ راستیں زند جاڑیگ اِنت – بستارئے یک نودربرے مئے سیاسی سرکل سرجم ءَ زوگر ءَ پوجی بنجل جوڑ کتگ اَنت – مئے چمانی دیم ءَ مئے سنگت، ھمراہ ءُ لس ورنا ھمک روچ چست کنگ بوگ ءَ اَنت ایاں تاوان دیگ بیت اِنت، ھمے واستا من مازگی رنگ ءَ تیاراں پھریز ءَ ابید ما ھم چست کنگ بہ ایں، ما پوسٹر جوڑ بوت کن ایں، مئے ھم ژانگولیں جوناں مئے ھمراھاں ٹیکی کن اَنت بلے آشوبی جد ءُ جھد ءِ رھبند ھمیش اَنت کہ ما سرجم ءَ وت ءَ ساجو بہ کن ایں –
دومی گپ ایش اِنت کی یک نودربرے ءَ اے ترس چست کنگ لوٹ ایت یا ناں بلے منی نزیک ءَ ما آجویں چاگرد یا آجویں ریاستانی نودربر نہ اِنت بلکیں پنجاپی سامراج ءِ چیردست اِنت، وتی راجی پجار ءُ زبھر، وتی زر ءُ مڈیاں زبھر ءُ آجوئی ءَ چہ زبھر یک گلامیں راجے ءَ سیادی داریں ھمے واستا یک گلامے ءِ زند ءَ ھچ بستار نیست اِنت – بلوچ ورنا بلوچستان ءِ زمینی جاوراں سرپد بہ بنت ءُ راستیاں بہ زان اَنت وتی مرچیگ ءُ باندات ءِ پیسلہ ءَ بہ کن اَنت ءُ من زانتکاری تکاں اے ترس ءَ جائز سرپد باں پرچاکہ گلام ءِ زند کجام ھم رنگ ءَ ترس ءِ تہ ءَ اِنت – راستی ءَ سرپد بوگ ءِ گپ ایش اِنت زورگر ءِ دیم ءَ ھمک بلوچ ورنا یک ترسے ءُ آ ھمک بلوچ ورنایا وتی دشمن سرپد بیت اِنت –
ٹی بی پی: کجام کامریڈ،سنگت ھنچش تو وتی آئیڈیل منے ءُ پرچا؟
چیئرمین بی ایس آو آزاد: جھد ءِ آجوئی ءِ سپر ءَ شھید بوتگیں ءُ زنداناں بندیگیں ھمک ھمراہ ءُ سنگت منی آئیڈیل اَنت، منی گور ءَ لبز نیست کہ آیانی ستاہ ءَ بہ کن آں کہ آیاں وتی درست اے پدریچ ءُ آجوئی ءِ واستا کربان کتگ اَنت، اگاں گپ اے وڑ اِنت کہ کرد اِنت گڑا راجی زرمبشت ءَ من ءَ درستاں گیش اگاں سانمند کتگ گڑا آ کمبر چاکر اِنت – کمبر چاکر وتی توک ءَ یک آشوبے بیتگ ءُ آشوب ءِ دراھیں رھبنداں ھوار بیتگ – اگاں کسے اے دابیں آشوبی جھدکارے ءِ بارو ءَ جست بہ کنت آ درستیں رنگ ءَ اشوب ءَ وتی رنگ ءُ بندانی توک ءَ جاہ دنت گڑا من دِھ دِھ ءَ کمبر چاکر ءِ نام ءَ دیم ءَ ایر کت کن آں – اگاں من ءَ کسے سرجمی ءَ آشوب ءِ مانا ءَ جست بہ کنت اے مزنیں جست ءِ پسو ءَ من کسانوکیں دابے ءَ بس کمبر چاکر ءِ نام اِنت-
منی نیز ءَ کمبر اے دور ءِ جد ءُ جھد ءِ ھما آشوب اِنت کہ آئی ءَ ھزاراں ورنا اے گچینی ءِ امل ءِ واستا جاڑیگ کتگ اَنت – آئی ءِ کمنٹمٹ، جزبگ کربانی ءُ کرد بازیں جستانی پسو ءُ باز کنفیوژن گیشنگ اِنت – کمبر وتی توک ءَ یک زرمبشتے، کہ دشمن ءِ سر ءَ ھمک روچ پروشگ اِنت- ریاست ءِ کجام ھم مزنیں سلاہ ءَ کمبر ءِ سر ءَ کار کت نہ کتگ پرچا آ یک راستیں آشوبی ءِ چیدگ بیتگ – منی نیز ءَ کمبر ءِ زوت روگ نا ایوک ءَ بی ایس او بلکیں راجی زرمبشت ءِ واستا مزنیں تاوانے بیتگ-
انیگیں دور ءِ آشوبی ورنا کمبر چاکر ءَ بہ ٹپاس اَنت، آئی ءَ بہ وان اَنت ءُ کرد ءِ سر ءَ شناسی بہ کن اَنت، پرچاکہ کمبر اِنت گلامی ءِ سنکلانی سیندگ ءُ کمبر اِنت زند ءِ مانا – کمبر چاکر ءِ وڑیں ورنا جد ءُ جھد ءِ رژنائیں چیراگ اَنت – نرم، کمزور ءُ ترسوکیں ورنا گلامیں راجانی توک ءَ نادراھیں مردم ھست کہ آیانی زند ءُ مرگ ھچ مانا نہ دار ایت بلکیں اے آجوئی ءِ سپر ءَ گام جنوکیں کمبر چاکر ءِ وڑیں ورنا ھست کہ ایوک ءَ گلامیں راجاں یک منزلے ءَ سرکنگ ءِ جزبگ ءَ دار اَنت بلکیں وتی پکر ءُ نزریہ ءِ واستا کجام نا کجام رنگ ءَ کربانی دیگ ءَ چک ءُ پد نہ بنت اِنت-
ٹی بی پی: اگاں ترا ھما بلوچ ورنایاں یک کلوھے دیگی اِنت آ بی ایس او آزاد ءِ بھر نہ اَنت، تو چی گوش ئے؟
چیئرمین بی ایس او آزاد: بلوچ ورنایاں اے گوش آں وتی تاکت ءُ بستار ءَ بہ زان اَنت انیگیں وھد ءَ وتی سر ءَ بیوکیں زلم ءُ زوراکی ءِ ھواری ءَ ھما دراھیں نادراھیانی ٹپاسی ءَ بہ کن اَنت مڈی ءَ پرگنجیں یک سرڈگارے اے کساس مزنیں دودمانیں دودے ءِ بوگ ءَ ابید پرچا مروچی یک بلوچ دریا وردے وتی زر ءَ شت نہ کنت؟ پرچا مروچی بلوچ مزدور وتی سرڈگار ءِ سر ءَ دری مردمے ءِ دست ءَ ھمک روچ کمشرپی ءِ دیمپان کنگ بیت اِنت؟ پرچا مروچی آیانی واستا وانگ ءِ واستا جوانیں وانگ نیست اِنت؟ پرچا مروچی آیانی گوھار چست کنگ بوگ ءَ اَنت؟ پرچا بلوچ مروچی کجام ھم جاہ ءَ ایمنی ءَ زند گوازینت کت کنگ ءَ نہ اِنت؟ ایشی ءِ سبب گلامی اِنت ءُ اے گلامی ءِ تھاریں شپ ءَ درکپگ ءَ گیشنتگیں راہ آجویں بلوچ ڈیھ ءِ ساھگ اِنت- اے سرڈگار تھنا ایوک ءَ سیاسی جھدکار ءُ سرمچارانی نہ اِنت بلکیں ھر ھما بلوچ ءِ ھک اِنت ءُ ایشی ءِ ھک ءِ ادا کنگ ھمک بلوچ ءِ سر ءَ پرز اِنت – تو نیوٹرل بوت ئے یا جد ءُ جھد ءَ دور بوگ کجام نا کجام رنگ ءَ ریاست ءِ ماون بیت اِنت پرچاکہ یک جنگ زدگیں راجے ءَ کجام نیوٹرل پش نہ کپ ایت – مارا راجی آیوکیں باندات ءَ اے جیڑگی پیسلہ کنگی اِنت ما وتی آیوکیں پدریچ ءِ واستا چی پہ باندات ءَ کنگی اِنت –