زندگی دلبریں اوشو! زندگی چی یے؟۔اوشو| س.ا بلوچ

الم بوانیت

زندگی دلبریں اوشو! زندگی چی یے؟
‎
‎کتاب: زانت ءِ کتاب

‎نبشتہ کار: اوشو

‎رجانک: س ا بلوچ
‎
دی بلوچستان پوسٹ

‎دیوآنند! زندگی چُشیں چیزے نہ اِنت کہ آئی ءِ ڈِپینیشن اَڑَل کنگ بہ بیت۔ ءُ زندگی چُشیں شئے یے نہ اِنت۔ اِد ءَ ھَمینچُک مردم اَنت ھَمینچُک کسّہ اَنت۔ زندگی تھنا اگزِبیشنے نہ اِنت۔ منی زندگی ءِ وتی یک جُتائیں تامے، تئی زندگی ءِ وتی یک جُتائیں رنگے۔ بیشَک یک دْرچکے ءِ زندگی تئی زندگی نہ اِنت، ءُ یک زِرّے ءِ زندگی دْرچکے ءِ زندگی نہ اِنت۔
‎
‎زندگی مُچّی یے، زندگی ءِ سک باز دْروشم اَنت۔ ایشی ءِ ڈِپینیشن چیتو اَڑل کنگ بیت؟ ھچ ڈِپینیش ایشی ءِ گوم ءَ انساپ کُت نہ کنت۔ اَلبت زندگی ءَ گوازینت کُت کن ئے، آئی ءِ تام ءَ چش ات کُت کن ئے، بلے آئی ءِ ڈِپینیشن اَڑل کنگ نہ بیت۔ اگاں اے پیم بہ بیت گڑا تئی اَڑل داتگیں ڈِپینیشن بس تھنا تئی سَرگْوست ءِ رِپلیکشن اِنت۔ زندگی ءِ بابت ءَ من ھچ گُشت نہ کناں، اے بس ھمے گُش ایت کہ تو وتی زندگی ءَ وت پوہ بَہ ئے۔ اے ھچ کس ءِ زندگی ءَ ھچ سیادی نہ دار ایت۔ اگاں تو اے گپ ءَ یات بکن ئے گڑا زندگی باز اَجبیں رازے مارَگ بیت۔
‎
‎سول گرین برگ ٹیکساس ءِ کسانیں شَھرے ءِ نندوکیں یک مالداریں ہیودی یے ات۔ آ یک دَسپچیں انسانے ات۔ آئی ءَ ھاسکر سیاہ پوستیں مردماں باز زَرّ دات۔ پد ءَ اے وڑ بوت کہ گرین برگ بیران بوت۔ پرچاکہ آئی ءَ زھگ نیست ات، آئی ءَ وتی سھجیں دولت، مال، ءُ مڈی شَھر ءِ نندوکیں دْراھیں مردمانی نام ءَ کُت اَنت۔ شَھر ءِ نندوکیں مردماں گرین برگ ءَ وتی مھر ءِ درشان کنگ ءِ پیسلہ کُت کہ گرین برگ ازت ءُ شان ءِ گوم ءَ کَل ءُ کسارت کنگ بہ بیت۔ آیاں آئی ءَ را کاوبوائے ءِ یک کاملیں پوشاکے گْوَرا دات۔۔۔ یک مزنیں ءُ گرانیں کُلاھے ءُ سُھر ءِ کُڑی یے۔ آیاں سُھر ءِ گاڈی یے اڈ کنائینت ءُ گرین برگ ءِ جون ھمے سُھر ءِ گاڈی ءِ تہ ءَ ایر کُت۔ پد ءَ آیاں یک انچیں کبرے جَت کہ ھمے سُھر ءِ گاڈی شرّی ءِ سر ءَ جاگہ بہ کنت۔ وھدے آ گرین برگ ءِ جون ھوار گاڈی ءَ کبر ءِ تہ ءَ ایر دیگ ءَ ات اَنت گڑا سیاہ پوستیں مردمانی تہ ءَ یک سیاہ پوستے ءَ دگہ یکے ءَ را گُشت: ”بچار یار! زندگی ءِ گوازینگ ءَ تھنا ہیودی زان اَنت”۔
‎
‎ڈِپینیشن ءِ وازمَندَگی تئی سر ءَ اِت۔ ڈِپینیشن دائم ءَ تئی ڈِپینیشن بیت اِنت، کہ تو زندگی ءَ چیتو جیڑ ئے۔ اے زندگی ءِ ڈِپینیشن نہ بیت۔ زَرّ ءُ مال ءِ شیدائیں مردم ءِ ھاتر ءَ زندگی سِکّھانی توار اِنت، بس تھنا سُھر ءِ سِکّھای توار۔ واک ءِ شیدائیں مردم ءِ واست ءَ، واک ءِ واست ءَ گنوک بووٚکیں مردم ءِ ھاتر ءَ زندگی یک جُتائیں تامے ءِ چشّگ اِنت۔ اے گپ ءَ ھچ شک نیست کہ شائر ءِ واست ءَ زندگی یک انچیں شے یے بیت اِنت کہ شائری ءَ دیم ءَ بہ بارت۔
‎
‎اے نپر نپر ءِ واست ءَ جُتا جُتا اِنت، اے کَمپریٹب اِنت۔ البت اِد ءَ یک چیزے باز زلوری اِنت، ءُ آئی ءَ من ترا گُشگ پسند کناں۔ یک گپّے باز ارزشت دار ایت، سک باز ارزشت دار ایت۔۔۔ءُ آ ایش اِنت کہ ھما مردم اسل ءَ زندگ اِنت، گڑا بزان کہ آ ”اِد” ءُ ”انوں” ءِ تہ ءَ زندگ اِنت۔ آئی ءِ نپری زندگی ءِ ھرچی کہ دْروشم اِنت، ءُ ھرچی کہ آئی ءِ نپری زندگی ءِ درشان اِنت، اِد ءَ اے گپ یک بُنِشتی ارزِشتے جوڑ بیت ءُ آ ایش اِنت کہ ایشی ءِ تہ ءَ ”اِد” ءُ ”انوں” ءِ گپ لازم بیت۔ گوَست ءِ جِند نیست اِنت ءُ باندات انگت نیاتکگ، ھما مردم گْوَست ءَ زندگ اَنت آ زندگ نہ اَنت، آ بس ھمے جیڑ اَنت کہ آ زندگ اَنت۔ ھر ھما مردم باندات ءَ بزاں آو٘کیں وھد ءَ زندگ اَنت، آ زندگ بوت کُت نہ کن اَنت۔ ایشی ءِ سوب ایش اِنت کہ تو باندات ءَ چیتو زندگ بوت کن ئے وھدیکہ باندات انگت نیاتکگ۔
‎
‎بلے مردم ھمے ڈول ءَ زندگی کنگ ءَ اَنت۔ لَک ءُ کُروڑانی کچّ ءَ مردم گْوَست ءِ تہ ءَ زندگ اَنت بلے ایندگہ لَک ءُ کُروڑانی کَچّ ءَ مردم باندات ءِ تہ ءَ زندگی کنگ ءَ اَنت۔ ‎اے پیمیں مردم باز کَم رس ایت کہ ”اِد” ءُ ”انوں“ ءِ تہ ءَ زندگی گوازینگ ءَ اَنت۔ ھمے مردم گْواچِنی اَنت، ھمے مردم گْواچِن ءِ تہ ءَ زندگ اِنت۔ زندگی ءَ تھنا یک چیزے ءِ زلورت اِنت ءُ آ ایش اِنت کہ زندگی ءِ روتگ ھستیں وھد ءِ تہ ءَ بہ بیت۔ آئی ءِ روتگ دگہ ھچ جاہ ءَ بوت نہ کنت۔ گْوَست وَ یک یاتے بلے باندات یک ھیالے۔ دوئیں دَرگْواچِنی اَنت۔ گْواچِی یا راستی و انوں ءِ بزاں ھستیں وھد ءِ ساھت اِنت۔۔۔تھنا ھستیں وھد ءِ ساھت۔‎تو جُست کُت: ”زندگی چی یے؟” ‎زندگی ایش اِنت! ‎ترا اے چیز دربرگ لوٹ ایت کہ تو گْوَست ءُ باندات ءِ ڈُبّہ ءَ چہ آجوئی چیتو گیپت کُت کن ئے، گڑا تو گُلاب ءِ پُل ءِ وڑ ءَ زندگی گوازینگ ءِ لائک بَہ ئے، یاکہ انچیں مُرگانی، جانورانی، ءُ دْرچکانی وڑ ءَ۔ پد ءَ تئی تہ ءَ اوں تاجگی، وشّی، شادانی، ءُ رُژنائی ودی بیت۔ پد ءَ تئی اندر ءَ چہ اوں ھمے وڑیں زندگی ءِ شیرکِِنی گیش جَلَشکوک بیت۔ من ءَ وَ دگانی سر ءِ رو٘کیں لک ءُ کُروڑانی کَچ ءِ مردم ھمے ڈول لگ اَنت کہ گُشے آ زندگ نہ اَنت بلکیں دگانی سر ءِ روٚکیں نیم زندگیں زومبی اَنت۔ آ مُرتگیں انسان اَنت۔ تو آیانی چمّانی تہ ءَ چہ زندگی ءِ جَلَکشگ ءَ نہ گِند ئے، زندگی ءِ شیرکِنی ءِ تام ءَ نہ چش ئے۔ آیانی زندگی بے مانا اَنت، بزاں بزانت ءَ چہ ھورک اِنت۔ زندگی ءَ چمیشکا مکسد نیست پرچاکہ اے زندگی ءِ جِندے نہ اِنت۔
‎
‎کوھَنیں وھد ءِ گپ اِنت کہ یک پادری یے ءِ کرّ ءَ یک سیاہ پوستیں گلامے ات، آئی ءِ نام ایزرا ات۔ ایزرا باز زانتکارے ات ءُ دیمروئی ءِ لوٹوک ات بلے بزّگ وانگ ءُ نبشتہ کنگ ءِ واست ءَ مُدام ساڑی ات۔
‎پادری ءَ آئی ءَ را چرچ ءِ تہ ءَ دیست ءُ آ ھم اے ھال ءِ تہ ءَ دیست کہ پادری ءِ تَبلیگ ءِ وھد ءَ ایزرا یک کاگد ءِ سر ءَ تیزی ءِ گوم ءَ چیزے نبشتہ کنگ ءَ ات۔ پادری باز ابکّہ ات۔ رند ءَ آئی ءَ ایزرا ءَ گُشت: ”ایزرا! تو چرچ ءَ چے کنگ ءَ ات ئے؟” ‎”من چیزے نبشتہ کنگ ءَ اتاں”۔
‎”کموکیں من ءَ پیش ئے دار کہ تو چی نوٹ کُرتگ“، پادری ءَ گُشت۔
‎نبشتہ چی ات، ھمے وڑ لگ ات کہ گُشے کِرم ءُ مُور اڈ کُرتگ ات ئے۔
‎پادری ءَ ابید جیڑگ ءَ گُشت: ”ایزرا اے چونیں بکواسے۔”گلام ءَ اوں ابید جیڈگ ءَ گُشت: ”تو ھمے چیزاں تَبلیک دیگ ءَ ات ئے۔”
‎
‎زندگی جوڈ کُتگیں شے یے نہ اِنت کہ ھر کجا موجود اِنت۔ ترا ھما ڈولیں زندگی یے رس ایت ھما ڈولیں زندگی یے تو ساچِشت کن ئے۔ تو چہ زندگی ءَ ھمے چیز گِر ئے کہ تو آئی ءَ را داتگ۔ اولسر ءَ وَ ترا آئی ءَ مانایے دیگ لوٹ ایت۔ ترا آئی ءَ را دْروشم، زیمر، ءُ شائری دیگ لوٹ ایت، تو وت یک ساچِشتے جوڈ بِہ بو۔ ھما وھد ءَ داں تو وت یک سرجمیں زندگی یے مہ بَہ ئے۔ دومی بُندری ارزِشت ءِ گپ ایش اِنت کہ بس تھنا کمیں مردم ھست کہ ساچِشتی اَنت، ھمے مردم سرپد اَنت کہ زندگی چی یے۔ درساچِشتی مردم اے الم نہ زان اَنت کہ زندگی چی یے۔ ایشی ءِ سوب ایش اِنت کہ زندگی ساچِشتکاری یے، ساچِشتکاری زندگی اِنت۔ زاناں تو اے نہ گِند ئے کہ زندگی چیتو ساچِشت کنگ بیت؟ زندگی ساچِشتکاری ءِ برجاھی اِنت، برجاھیں ساچِشتکاری، ھر ساھت ءَ ساچِشتکاری۔
‎
‎اسل ءَ بھگوان ھُدا نہ اِنت، ایشی ءَ ساچِشتکاری یے گُشگ گیشتر شرتِر اِنت۔ ایشی ءِ سوب ایش اِنت کہ کارگال نامگالاں چہ گیشتر راست اَنت۔ نامگال چیز گِندگ ءَ کاینت بلے کارگال برجاھیں عمل گُشگ بیت۔ بھگوان ھُدا ءَ چہ گیشتر ساچِشتکاری یے۔

ھردیں کہ تو ساچِشت کنگ ءَ بَہ ئے، گڑا تو زندگی ءِ تام ءَ چَش ئے۔ ءُ ایشی ءِ چمداری تئی پرپِکشن ءُ شِدِت ءِ سر ءَ اِنت۔ زندگی یک پَلسَھپی جیڑھے نہ اِنت، اے وَ یک دینی چیدگے۔ ھمے پیم ءَ ھر شے یک درے جوڑ بیت۔ ھَد ایش اِنت کہ زمین ءِ ساپ کنگ ءَ ھم اگاں تو اے کار ءَ پرپِکشن، مھر، ءُ ساچِشتکاری ءِ گوم ءَ بکن ئے، گڑا تو زندگی ءِ تام ءَ چش ات کن ئے۔
‎
‎اِد ءَ تو آشرم ءِ تہ ءَ گِند ئے کہ مردم چیتو چیرگیجاں ساپ کنگ ءَ اَنت، پَسیلّاں ساپ کنگ ءَ اَنت، بان اڈ کنگ ءَ اَنت، ءُ گالی بزاں چیرگیج جوڑ کنگ ءَ اَنت۔ پد ءَ ھم تو یک جُتائیں دْروشمے گِند ئے۔ ءُ ارزِشداریں گپ ایش اِنت کہ آ ھر چیز کنگ ءَ اَنت، سک باز مھر ءِ گوم ءَ کنگ ءَ اَنت۔ ءُ تو وشّی گِِند ئے۔ اے وشّی کار ءَ چہ ودی نہ بیت، اے وشّی وَ پرپِکشن ءِ گوم ءَ کار کنگ ءَ چہ ودی بیت، اے وشّی وَ کار ءِ ھاتر ءَ آیانی سرجمیں ایرمنّگ ءَ چہ ودی بیت۔ ھچ کار ھما وھد ءَ داں وشّی نہ دنت ھما وھد ءَ داں تو آئی ءِ تہ ءَ وشّی نہ گِند ئے۔ گڑا مہ جیڑ کہ زندگی چی یے؟ اے بہ جیڑ کہ زندگی ءِ تہ ءَ چیتو پُتِرگ بہ بیت ”””اِد ءَ””” اَنّوں۔۔۔ ءُ ترا ساچِشتی بوگ لوٹ ایت، بس ھما وھد ءَ داں تو در ءِ دپ ءَ وتی پاداں ایر مکن ئے۔ اے وڑ مہ بیت کہ بادگیر ءِ دیم ءَ در ءَ چہ ڈنّ اوشتاتگ ئے۔ گڈی ءَ بُنشتی ارزِشت ءِ گپ ایش اِنت کہ ساچِشتی بِہ بو۔ اگاں تو اے گپ ءَ سرپد بِوت ئے، گڑا تو زان ئے کہ زندگی چی یے۔


دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت۔

نوکتریں