نوشکی ءَ جنکانی دربرجاہ ءِ وئیل
ٹی بی پی شونگال
27 اکتوبر ءَ بلوچستان ءِ دمگ نوشکی ءَ ناشناسیں سلاہ بندیں مردماں جنکانی دربرجاہ ءِ سر ءَ اُرش کتگ ءُ وانگی ادارہ پرشت ءُ پروش کتگ ۔ اُرشکاراں دربرجاہ ءِ سی سی ٹی وی کیمرہ ھم تاوان داتگ انت ، چریشی ءَ اود ءَ جاڑیگیں اسٹاپ لٹ ءُ کُٹ کتگ ءُ ترسینتگ انت۔ وئیل ءِ وھد ءَ سلاہ بندیں مردماں تیرگواری کتگ ، چریشی ءِ آسر ءَ سَے جنک ٹپی بیتگ انت ۔ ھمے وھد ءَ نوشکی کادر آباد میتگ ءَ یک زری وانگ جاہ رژن ءِ سلاہ بند مانرتکگ انت ءُ انتزامیہ ءُ استاد لٹ شاپ کتگ انت ءُ وانگجاہ ءَ تالان بیتگ انت ءُ جنک ءُ بچکاں کلاساں جتا جتا کنگ ءِ بیھار داتگ انت۔
نوشکی ءِ وئیل بلوچستان ءَ اے دابیں وئیلاں اولی وئیل نہ انت ۔ ایشی ءَ پیش جتا جتائیں جاھاں وانگی ادارہ ، نودربر ءُ استاد بیھار ، کڈنی ءُ لٹ شاپیانی دیمپانی ھال دیم ءَ اتکگ انت ۔ پنجگور ءَ اے دابیں وانگی بگیرداریانی وئیلانی ھال دیم ءَ اتکگ انت ، اود ءَ نودربر نشانگ کنگ ءُ وانگجاھانی بند کنگ ءِ بیھار ھم دیگ بیتگ انت۔ ھمے وڑ ءَ کیچ ءِ جتا جتائیں جاہ گچینی بلیدہ ، تمپ ءُ تربت وانگی پرکاریانی سر ءَ بگیرداریانی اھوال اتکگ انت۔ اود ءَ وانگجاھانی ماندارگ ءُ وانگجاھانی واھند ءُ اسٹاپانی سر ءَ اُرش ءُ ٹپیگ کنگ ءُ آیاں بیھاری کاگد دیگ بیتگ انت ، مستونگ ءُ ھاران ءِ وڑیں جاھاں وانگجاھاں سانمند کنوکیں بیھار ءُ کاروائیانی اھوال ھم دیم ءَ اتکگ انت۔
یک نیمگے بلوچستان پیش ءَ وانگی ناگیگی ءِ چیرکپتگی ءِ آماچ انت ، گریبی، بے روزگاری ، وانگی آسراتی ءِ نہ بوگ ءُ بنکی ھکاں زبھری ءِ وڑیں جاورانی آماچ انت ، اود ءَ ھزاراں زھگ گچینی وانگیاں زبھر انت ۔ دومی نیمگ ءَ اے وڑیں پرکاریاں اے دابیں زبھری گیش ناگیگیانی سبب بیگ ءَ انت کہ چشکہ جتا جتائیں رنگ ءُ ڈولانی وانگی تَک ءَ تاوان دیگ ءَ انت ءُ وانگ ءُ زانشت ءِ راہ ءَ اڑانک مِک کنگ ءَ انت ۔اے جاورھال ایوک ءَ وانگی تَکانی سر ءَ اُرش نہ انت بلکیں بلوچستان ءِ باندات ، مچانکی دیمروئی ءُ نوکین پدریچ ءَ بنکی انسانی ھکاں تچک ءَ تچک زبھر کنگ انت ۔ اے درچ ءَ ھما وانگی دشمن پرکاری ءُ بگیرداری گامگیج ءِ سر ءَ ریاست ءِ سرجم ءَ بے توار بوگ بازیں جیڑگ ودی کن انت۔ ریاست ءِ یکشلیں بے تواری ءُ ندارگ چارگ ایوک ءَ انتزامیہ ءِ نادلگوشی ءُ بے وسی ءِ درشان نہ انت بلکیں ایشی ءَ پدر کنت کہ اے وڑیں مردمانی پشتگیری ءَ وڑے ناں وڑے ریاستی سروکی ، بے تواری پلامرزی یا کم چہ کم درجارانکی پھریزی ھست انت۔ اگاں اے وڑ نہ انت گڑا جست ایش انت کہ اے ٹولیانی نیمگ ءَ بلوچستان ءَ وانگ ءِ ھلاپ ءَ برجاھیں پرکاریانی دارگ ءِ واستا پرچا الکاپیں گامگیج زیرگ بوگ ءِ نہ انت؟ آیانی ھلاپ ءَ کانون پرچا نہ سُر ایت ءُ وانگی ادارہ ، استاد ءُ نودربراں پھریزگ ءَ ریاستی گامگیج پرچا نیست انت کہ بہ بوتیں ۔
بلوچ مھلوک ءَ چہ وانگ ءَ زبھر کنگ ایوک ءَ وانگی بے سوبی نہ انت بلکیں آیانی ھالاں چیرترینگ ، آیانی زانشت ءَ چیرترینگ ءُ آیانی باندات ءَ تھاری ءِ برگ ءِ برابری انت ۔ اے جاورھال ایوگ ءَ انتزامیہ ءِ نادلگوشی ءِ آسر نہ انت بلکیں یک زانتے ءَ ریاستی پالیسی ءُ پہ ھوشے ءِ منسوبگ ءِ پدراھی ءَ کنت ، کہ راجدپتر ءَ دری تاکتاں زیردستیں راج چیر کنگ ، آیانی وتواجھی زانشت ءِ کسان کنگ ءُ آیانی سر ءَ وتی مانسرانی مشگ ءِ واک ءَ کنت انت۔