کیچ ءِ دمگ تمپ ءِ ھند چہ بالیچاہ ءَ پاکستانی لشکر ءِ دست ءَ زورانسری ءَ بیگواہ بوتگیں ورنا ءِ لاش دزکپتگ۔
دمگی مردمانی رد ءَ کُشگ بوتگیں ورنا ءِ پجار تمپ ءِ دمگ کلگ تگران ءِ نندوکیں یار محمد ءِ چُک عثمان ءِ نام ءَ بوتگ۔
کھول ءِ رد ءَ عثمان پانزدہ روچ پیش ریاستی ڈیتھ اسکواڈ ءَ آوار جتگ ءُ بیگواہ کتگ ۔
گشگ بوھگ ءَ اِنت کہ عثمان ءِ زورانسری ءَ بیگواہ کنگ ءَ پد آئی ءِ کھول ءِ سر ءَ زور دیگ بوتگ کہ آ پریس کانفرنسے بہ کن اَنت ءُ چہ وتی یک زھگے سلمان بلوچ ءَ جتا بوھگ ءِ جار ءَ بہ جن اَنت۔
عثمان ءِ پت یار محمد ءَ ھپتگے پیسر تربت پریس کلب ءَ پریس کانفرنس ءِ وھد ءَ وتی چُک سلمان بلوچ ءَ چہ سیادی ءِ سندگ ءِ درشانی کتگ ات۔ بلے ایشی ءَ ابید ھم یار محمد ءِ دومی چک کہ پہ زور بیگواہ کنگ بوتگ کُشگ بوتگ ءُ آئی ءِ لاش چگل دیگ بوتگ۔
زانگ بہ بیت کہ بلوچستان ءَ بلوچ راجی جنبش ءَ گوں ھمگرنچیں مردمانی کھول لشکری ادارہانی نیمگ ءَ پریس کانفرنس ءِ وسیلگ ءَ چہ وتی نزیکیں مردماں چہ جتا بوھگ ءِ بیان دیگ ءَ لاچار کنگ بنت ءُ چہ ایشی ءَ پد اے کھول مچانکی سزا ءِ آماچ بنت۔
دومی نیمگ ءَ سوراب ءِ ھند دشت گوران ءِ دمگ ءَ نزیک ءَ مل شاہورائی ءَ دو ناشناسیں مردمانی لاش دزکپتگ انتب کہ آہانی اُمر کساس 28 ءُ 27 سال ءِ کچ ءَ انت۔
بنداتی ھالانی رد ءَ دوئیں مردم تیرگواری ءَ چہ بیران بوتگ اَنت۔
سوراب پولیس ءَ دوئیں لاش چست کتگ ءُ پہ المی ئیں کانونی کارروائی ءُ پجارینگ ءَ ڈی ایچ کیو نادراھجاہ سوراب ءَ برتگ اَنت۔
پولیس ءَ چہ وئیل ءِ جتا جتائیں تک ءُ پھناتاں پٹ ءُ پول بندات کتگ کہ بیران بوتگیں مردم، کوش ءِ مول ءُ مراد ءُ ایشی ءِ تہ ءَ ھواریں ملزمانی پجار کنگ بہ بیت۔ پٹ ءُ پول سرجم بوھگ ءَ پد گیشیں ھال پدر کنگ بنت۔
ھمے وڑ خاران شال دگ ءَ باب خاران ءِ نزیک ءَ چہ یک مردمے ءِ لاش دزکپتگ کہ آئی ءِ پجار صلاح الدین ء محمد علی ءِ نام ءَ بوتگ۔
زانگ بہ بیت گوستگیں روچ ءَ سی پیک روڈ ءِ نزیک ءَ چہ یک مردمے ءِ تیرسپتگیں لاش دزکپتگ بیتگ۔
دومی نیمگ ءَ خضدار ءِ دمگ وڈھ ءَ سلاہ بندیں مردمانی دست ءَ آوار جنگ بوتگیں مردم ھزور بخش بارنزئی ءِ لاش ھم دزکپتگ۔