بلوچستان ءِ دمگ چاگی ءَ دو جتا جتائیں وئیلاں سلاہ بندیں مردماں واپاری گاڑیاں ھوار پہ فوج ءَ راشن بروکیں گاڑی گپتگ انت۔ اے وئیل شال ءُ تفتان بیپاری راہ ءِ سر ءَ بوتگ انت۔
مرچی سھب ءَ چاگی ءِ دمگ چھتر ءَ سلاہ بندیں مردماں مزن شھدگ ءِ سر ءَ دو تجارتی گاڑی ھما وھد ءَ داشتگ انت کہ گاڑی تفتان ءِ نیمگ ءَ روگ ءَ بیتگ انت۔
گوستگیں روچ ءَ دالبندین ءُ یکمچ ءِ نیام ءَ سلاہ بندیں مردماں پاکستان ءِ راشن ءِ برگ ءِ گاڑی دستیگ کتگ۔
ھالانی رد ءَ پورسز اے راشناں نوکنڈی ءِ بنجل ءَ برگ ءَ بیتگ۔
زانگ بہ بیت کہ بلوچ سلاہ بندیں گل بلوچ لبریشن آرمی ءَ ’’اقتصادی ناکہ بندی‘‘ ءِ جار جتگ کہ ایشی ءِ چیر دستی ءَ بلوچستان ءِ شھدگانی سر ءَ ناکہ بندی ءُ گاڑی گرگ ءُ ماندارگ ءِ درچ برجاہ انت۔