کلات، بسیمہ، چاگی ءُ ہوشاپ ءَ ھوار جتا جتائیں دمگاں اُرشانی ھال انت کہ فورسز ءِ پوسٹ، گاڑی ءُ سامان نشانگ جوڑ کنگ بوتگ اَنت۔
بلوچستان ءِ جتا جتائیں دمگاں پاکستانی لشکر ءُ دگہ نشانگانی سر ءَ بازیں اُرشانی ھال رس اِتگ اَنت کہ ایشی ءِ تہ ءَ لشکر ءِ پوسٹ، گاڑی ءُ راشن ءِ برگ ءِ گاڑی ھم نشانگ جوڑ کنگ ھوار اَنت۔
گیشیں ھالانی رد ءَ کلات ءِ دمگ رودینجو ءَ پاکستانی لشکر ءِ سر ءَ اُرش کنگ بوتگ کہ ایشی ءِ آسر ءَ جانی تاوانانی ھال دیم ءَ اتکگ انت۔
دومی نیمگ ءَ بسیمہ ءِ دمگ درگ ءَ ناشناسیں مردماں پاکستانی لشکر ءِ کارمرد بوتگیں پوسٹ تراکناکیں شورواں گوں تباہ کتگ۔
قلعہ عبداللہ ءِ دمگ گلستان ءَ گیلو پولیس تھانہ ءِ سیمسراں اوگان فوج ءِ پیسریگیں کارندہ کمانڈر اکبر ءِ گاڑی ءِ سر ءَ بمب اُرش ءِ ھال اِنت کہ ایشی ءِ آسر ءَ جانی ھال ھم رس اِتگ۔
چاگی ءَ یکمچ ءُ دالبندین ءِ میان ءَ سلاہ بندیں مردماں پاکستانی لشکر ءِ راشن ءِ برگ ءِ گاڑی یے داشتگ ءُ راشن گپتگ اَنت۔
دمگی مردمانی رد ءَ راشن نوکنڈی ءَ فورسز کیمپ ءَ دیم دیگ بوھگ ءَ بیتگ انت۔
دومی نیمگ ءَ ھوشاپ ءَ پاکستانی لشکر ءِ سر ءَ دو جتا جتائیں اُرش ءِ ھال بیتگ اَنت۔ دمگی مردمانی رد ءَ گوستگیں روچ ءِ سھب ءِ ھپت ءِ نزیک ءَ ھوشاپ زیرو پوائنٹ ءَ سلاہ بندیں اُرش ءَ فورس پوسٹ نشانگ جوڑ کتگ۔ اُرش ءَ پد ایمبولینس اُرش جاہ ءِ نیمگ ءَ روگ ءَ گندگ بوتگ اَنت۔
ہوشاپ ءَ ھم گوستگیں روچ ءِ نیمروف ءَ سی پیک ءِ راہ ءَ گونڈ سرین ءَ پاکستانی لشکر ءِ گاڑی بمبتراک ءِ نشانگ جوڑ کنگ بوتگ۔ اے وئیل ءِ تہ ءَ ھم تاوان ءِ ھال ھست بلے انگت ءَ چہ واکداراں ھچ وڑیں تاوان ءُ دگہ ھال ءُ اھوال ءِ پدر کنگ نہ بوتگ انت۔