بلوچ لبریشن آرمی ءِ زالبولیں کماندار کَے انت ؟ آیا بلوچ آجوئی گھگیری ءِ نوکیں در ءِ بندات بوتگ ؟
بلوچستان ءَ برجاھیں آجوئی لوٹوکیں سلاہ بندیں گل بلوچ لبریشن آرمی ءِ اولی رند انت کہ وتی زالبولیں کماندارے دیم ءَ آورتگ ۔ گل ءِ نیمگ ءِ یازدہ منٹ ءُ چل ءُ یک سکینڈ ءِ تامر ءِ شنگ کنگ بوتگ کہ ھمائی ءِ تہ ءَ اے ورنائیں زالبول پیش دارگ بوتگ کہ آ سلاہ بند انت ءُ وتی کلوہ ءَ دئیگ ءَ انت ءُ بی ایل اے ءَ وتی کماندارے گوشتگ ۔
تامر ءِ تہ ءَ زالبول ءِ نام شھناز بلوچ کنگ بوتگ وھدیکہ گل ءِ نزیکیں مردمے ءِ گوشگ انت آئی پنام سدو انت ءُ سدو ءِ نام ءَ توار پرجنگ بیت ۔ اے گامگیج ءَ ایوک ءَ بلوچ گھگیریں زرمبشتی تکاں ناں بلکیں سیاسی ءُ سیکورٹی ءَ باوستاں ھم اے گپ چست بوتگ ۔
شھناز بلوچ کَے انت ؟
ھمے گوشگ بوگ ءَ ایں کہ شھناز بلوچ ءِ سیادی کیچ ءِ دمگ تمپ ءَ انت ءُ آئی The Oasis School ءَ وانگ بندات کتگ وھدیکہ پد ءَ رند ءَ آئی ءَ ایپ ایس سی تمپ ڈگری کالج ءَ سرجم کتگ ۔
وانگ ءِ زمانگ ءَ آ بلوچ نودربر گل بی ایس او آزاد ءَ گوں ھمگرنچ بوتگ ۔
بلوچ سلاہ بندیں گلانی تہ ءَ زالبول ءِ کرد : بلوچ گھگیری زرمبشتانی تہ ءَ زالبولانی ھوار بوگ نوکیں گپے نہ انت ، گوست ءَ ھم اے گپ جنگ بوتگ کہ بی ایل اے ءِ تہ ءَ زالبول ھست انت وھدیکہ جند ندری یونٹ ”مجید برگیڈ “ ءِ ھم بھر بوتگ انت ۔
سال 2022 ءَ کراچی شھدربرجاہ ءَ بوتگیں ارش ھم زلبولیں جندندر شاری بلوچ ءَ کتگ ات ۔ اے ارش ءَ پد تربت ، بیلہ ، نوشکی ، پسنی ، گوادر ءَ ھم بوتگیں اُرشاں زالبولیں جند ندراں بھر زرتگ بلے آپریشن ھیروپ 2 ءَ زالبولانی بھر زورگ گیشتر بوتگ ۔
بلے پد ءَ زانتکارانی رد ءَ یک زالبولے ءِ کمانداری ءِ دروشم ءَ دیم ءَ آیگ نوکیں گپے ۔
نوکیں باوست ۔
شھناز بلوچ ءِ تامر ءِ آیگ ءَ پد چاگردی ترامجاہ ءُ سیاسی تکاں اے جست ءِ سر ءَ گپ جنگ بوگ ءَ انت ایا بلوچ زرمبشت یک نوکیں مرھلے ءَ تہ ءَ روگ ءَ ایں ۔
لھتے تکاں ھمے گوشگ بوگ ءَ انت کہ اے بلوچ گھگیری زرمبشت ءِ تہ ءَ نوکیں درے بندات انت وھدیکہ بازینے ءِ گوشگ انت چریشی ءَ بلوچستان ءِ تہ ءَ پاکستانی پوج ءِ جیڑہ گیش بوت کن انت ۔ بلوچستان ءِ تہ ءَ سلاہ بندانی ارش چہ پیسر ءَ گیشتر ءُ ترندی ءَ برجاہ انت ۔