پرتگال ءِ جھان ءِ نامداریں فٹبالر کرسٹیانو رونالڈو ءَ وتی 23 سال ءِ میان استمانی کیریئر ءِ آسر بوھگ ءِ جار جتگ ءُ راجی ٹیم ءِ نمائندگی کنگ ءَ چہ ریٹائرمنٹ کتگ۔
چل ءُ یک سالی ئیں رونالڈو ءَ پنچ شمبے ءِ روچ ءَ 5 نومبر ءَ سوشل میڈیا ءِ سر ءَ شنگ بوتگیں ویڈیو بیان ءِ تہ ءَ گْوشتگ کہ نوں وھد اتکگ کہ آ پرتگالی راجی ٹیم ءِ 7 نمبر جرسی ءَ آیوکیں نسل ءِ دست ءَ بہ دنت۔ آئی ءَ گوشتگ کہ اے پیسلہ آسان نہ بوتگ پرچا کہ ایشی ءِ تہ ءَ ایوک ءَ زھن ءِ گپ نہ اِنت بلکیں دل ءِ گپ ھم ھوار اِنت۔
رونالڈو ءَ اگست 2003 ءَ پرتگال ءِ واستا وتی میان استمانی کیریئر بندات کتگ ات۔آئی ءَ راجی ٹیم ءِ واستا 234 میچ گوازینگ ءِ وھد ءَ ریکارڈ 146 گول کتگ ءُ مردانی میان استمانی فٹبال ءِ تہ ءَ گیشتریں گول کنوک جوڑ بوتگ ات۔
آئی ءِ سروکی ءَ پرتگال ءَ 2016 ءَ اولی رند ءَ یورپی فٹبال چیمپئن شپ ”یورو“ ءِ ٹائٹل گپتگ ءُ 2019 ءُ 2025 ءَ یوفا نیشنز لیگ ءِ ٹائٹل ھم گپتگ۔
وتی بیان ءِ تہ ءَ رونالڈو ءَ پرتگالی راج ، ھمراھیں کلاڑی، کوچ ءُ باسکانی منت گپتگ ءُ گوشتگ کہ پرتگال مدام منی دل ءَ بیت۔
زانگ بہ بیت کہ رونالڈو چہ میان استمانی فٹبال ءَ ریٹائرمنٹ ءِ ابید سعودی کلب النصر ءِ واستہا کلب فٹبال ءَ برجاہ دار ایت۔