مستونگ ءِ ھند کلی کنڈاوہ ءِ نزیک ءَ ایف سی بنجل ءِ گوں شوروھاں پُریں گاڑی ءِ سر ءَ نشانگ کنگ ءِ ھال ءُ بازیں ایف سی ءِ کارمندانی زدگ بوھگ ءِ ھال داتگ۔
پولیس ءِ داتگیں ٹاپار ءِ رد ءَ زدگ بیتگیں مردمانی تہ ءَ لس مھلوک ءُ زھگ ءُ زالبول ھوار انت۔
پولیس ءِ رد ءَ بلوچستان ءِ ضلع مستونگ ءِ ھند کانک ءَ کلی کنڈاوہ ءِ نزیک ءَ ھستیں ایف سی پانگس ءِ سر ءَ بیتگیں وتکش تراک ءَ چہ بازیں ایف سی ءِ کارمندے زدگ بیتگ۔
پولیس ءِ رد ءَ شوروھاں چہ پُریں یک گاڑی یے ایف سی ءِ پانگس ءَ گوں ڈیک دیگ بیتگ، آئی آسر ءَ چہ تُرندیں تراکے بیتگ۔ تراک ءَ پد چہ جتاھیں نیمگاں پانگس ءِ سر ءَ تیرگواری ھم کنگ بیتگ۔
پولیس ءِ رد ءَ وئیل ءَ چہ زدگ بیتگیں مردم نواب گوس بکش نادرہ جاہ ءَ سر کنگ بیتگ انت۔
دومی نیمگ ءَ بلوچ لبریشن آرمی(بی ایل اے )ءِ جارکش جیئند بلوچ ءَ رسانکدر ءَ شنگ کتگیں وتی درشان ءَ گشتگ کہ گل ءِ فدائی یونٹ مجید برگیڈ ءَ مستونگ ءِ ھند کانک کنڈاب(کنڈاوہ) ءَ پاکستانی لشکر ءِ بنجل نشانگ کتگ۔
گل ءَ وتی بنداتی درشان ءَ ھژدہ لشکری کارمندانی مرگ منّ اتگ ءُ گشتگ کہ مُرتگیں کارمندانی کچ گیشتر بیت کن انت۔
وئیل ءَ پد کوئٹہ ءَ ھوار سرجمیں بلوچستان ءَ سیکورٹی شیوار کنگ ءِ ھال اِنت۔ ھاسیں جاہ ءُ ھندانی سیکورٹی گیش تُرند کنگ بیتگ انت۔
زانگ بہ بیت کہ بلوچستان ءَ چہ اشی ءَ پیسر ھم پاکستانی لشکر ءِ بنجلانی سر ءَ بیتگیں اُرشاں پد سرکار ءِ نیمگ ءَ چہ جانی تاوانانی سرجمیں ھال گشگ نہ بیتگ انت۔
بلے مرچگیں اُرش ءِ بابت ءَ ھندی مھلوک ءُ پولیس ءِ نیمگ ءَ چہ اتکگیں ھالانی تہ ءَ باز دِگری گندگ بیت۔
دومی نیمگ ءَ مستونگ ءَ نواب گوس بکش رئیسانی نادرہ جاہ ءَ ایمرجنسی جنگ بیتگ۔