بلوچستان ءِ تیاب دپی ضلع گوادر ءِ تھسیل پسنی ءِ میتگ اسپھاک کلمت ءِ مھلوک گوستگیں سئے ماھاں چہ ورگی آپ نیستی ءِ آماچ انت۔
ھندی مردمانی رد ءَ سرکاری واٹر ٹیکنر سروس ءِ بندی ءَ چہ آ سکیں جنجالانی دیمپان انت، آپ ءِ نہ رسگ ءِ سوب ءَ ھندی مردم ڈنی ٹینکراں چہ گرانیں نھاداں گوں آپ بھا زیرگ ءَ لاچار انت۔
وھدے یک چیمبر آپی ءِ نھاد کساس ھپت ھزار ءَ تاں سر بیتگ۔
آیانی گُشگ انت کہ پہ میتگ ءِ نیزگار ءُ نزوریں مردماں پیسر ءَ چہ ھمروچگیں ھرچ ءُ درچانی سرجم کنگ گران بیتگ ،اے نگیگی آں آپ ءِ وڑیں المی شئے ءُ لوٹانی ھاتر ءَ ھزارانی کچ ءَ زر ھرچ کنگ چہ آیانی واک ءُ وس ءَ ڈن درایگ ءَ انت۔سرکاری واٹر ٹینکر سروس ءِ گوستگیں سئے ماھاں چہ یکوھی بند بوھگ ءَ ھاس نزوریں کھولانی جنجالانی تہ ءَ گیشتری آورتگ۔
اسپھاک کلمت ءِ مھلوک ءَ گوادر ءِ ایم پی اے مولانا ھدایت الرھمان بلوچ ءُ گوادر ءِ ڈپٹی کمشنر نکیب اللہ کاکڑ ءَ چہ لوٹ کتگ کہ آ میتگ ءِ تھ آپی ءِ سر ءَ گامگیج بہ زیر انت ءُ سرکاری واٹر ٹینکر سروس ءَ پچ بکن انت ءُ میتگ ءِ مردمانی ورگی آپ ءِ پُجارینگ ءَ زوتاں چہ زوت گامگیج بہ زیر انت۔
لس مھلوکانی گشگ انت کہ ورگی ساپیں آپ اولی انسانی لوٹ انت ءُ آ چہ مھلوک ءِ دزرس ءَ ڈن کنگ مہ بیت۔چہ سئے ماھاب برجاھیں تھ آپی ءِ ھلاس کنگ ایوکیں ٹاپاراں چہ نہ بیت بلکیں زوت ءُ المی گامگیج زیرگ ءَ چہ ھلاس بیت، ھستیں واکدارانی زمہ واری انت کہ اسپھاک کلمت ءِ مھلوک ءَ پہ اے بنداتی لوٹ ءِ پُجارینگ ءَ سدکی بدینت۔