بلوچستان ءِ دمگ نوشکی ءَ گرلز ڈگری کالج ءَ تیر گواری ءِ وئیل ءَ سئے نودربر ٹپیگ بوتگ اَنت کہ گشگ بیت کہ یکے ءِ جاور ھال نگیگ اِنت۔ کالج انتزامیہ ءِ گوشگ انت کہ سئے سلاہ بندیں دیم پوشیں مردم کالج ءِ تہ ءَ پترتگ انت ءُ گمانی رنگ ءَ آفس اش پرشت ءُ پروش کتگ ءُ پد ءَ نودربرانی سر ءَ تیرگواری اش کتگ۔
کالج انتزامیہ ءِ رد ءَ اے وئیل گرلز ڈگری کالج نوشکی ءَ بوتگ کہ اود ءَ سئے سلاہ بندیں دیم پوشیں مردماں اولی رند ءَ کالج ءُ پرنسپل ءِ کارگس ءَ ایریں سی سی ٹی وی کیمرہ پروشتگ انت۔ ایشی ءَ پد اُرشکاراں نودربرانی سر ءَ تیرگواری کتگ کہ ایشی ءِ آسر ءَ سئے نودربر ٹپیگ بوتگ اَنت۔
وئیل ءَ چہ ھما دمان ءَ پد ٹپیگیں نودربر میر گُل خان نصیر ٹیچنگ ہسپتال نوشکی ءَ سر کنگ بیتگ اَنت کہ اود ءَ آھاں ٹپانی درمانی ءِ کمک کنگ بیگ ءَ اِنت۔ انتزامیہ ءِ رد ءَ ٹپیگیں نودربراں چہ یکے ءِ جاور ھال نگیگ گشگ بوھگ ءَ انت۔
ٹپیگیں نودربر ءِ پجار مھمنونہ ءُ مریم ءِ نام ءَ بوتگ کہ آ قاضی آباد ءِ نندوک انت ءُ کلی مینگل ءِ نندوکیں رخسانا ءِ پجار بوتگ۔
اے وئیل ءِ پُشت ءَ انگت ءَ مول ءُ مراد ءِ پدر کنگ نہ بوتگ انت۔