بلوچستان ءِ جتا جتائیں جاھاں شانزدہ سالی ئیں جنکے ءَ ھوار شش مردم پاکستانی پوج ءِ دست ءَ بیگواہ کنگ بیتگ انت-
چہ ھزدار ءَ سر بیتگیں ھالانی رد ءَ سلاہ بندیں مردماں ھزدار گرلز ھائی اسکول کھٹان ءَ شانزدہ سالی ئیں سدرہ ء اللہ بخش آوار جتگ ءُ گون وت برتگ-
اھوالانی رد ءَ شانزدہ سالی ئیں نودربر ءِ آوار جنی ءِ وئیل گوستگیں روچاں یازدہ ستمبر ءَ پیش اتکگ کہ آ وتی اسکول ءَ جاڑیگ بوتگ کہ سلاہ بنداں آوار جتگ ءُ برتگ ءُ چریشی ءَ پد سدرہ اللہ بخش واپس دیم ءَ نیتکگ –
ھمے وڑ چہ مستونگ ءَ 17 اگست 2026 شانزدہ سالی ئیں نودربر ابرار بلوچ ء قادر بلوچ، چہ پسنی شادی کور ءَ 30 اگست ءَ دو مردم 38 سالی ئیں رشید بلوچ ء قادر بخش ء 36 لال بلوچ ء موسیٰ ، چہ کلات منگچر ءَ دکاندار الطاف بلوچ ء خان محمد 3 ستمبر 2026 ءَ آوار جتگ ءُ بیگواہ کتگ انت-
اے مردم جتا جتائیں وھداں ایف سی ءُ سی ٹی ڈی ءِ کارندھاں آوار جتگ ءُ بیگواہ کتگ انت-
ھمے وڑ ءَ چہ شال ءَ کلی کمبرانی ءَ 27 سالی ئیں ٹیکسی ڈرائیور بابا جان ء محمد جان 10 فروری 2026 ءَ نیم روچ ءِ ساھت ءَ سی ٹی ڈی ءُ ایم آئی ءِ کارندھاں دزگیر کنگ ءَ پد بیگواہ کتگ-
دومی نیمگ ءَ چار مردم یل کنگ بیتگ انت کہ آیانی توک ءَ چہ کیچ ءَ ھشت ستمبر ءَ آوار جنگ بیتگیں جمیل اقبال سیزدہ ستمبر ءَ یل بیتگ، چہ شال ءَ منوجان روڈ ءَ 9 ستمبر ءَ آوار جنگ بیتگیں جمیل احمد ء چھٹان خان 12 ستمبر ءَ شال ءَ یل بیتگ،چہ کیچ ءَ 8 ستمبر ءَ آوار جنگ بیتگیں دو ڈاکٹرز جمشیر بلوچ ے گنگوز ءُ ماھر مزار 13 ستمبر ءَ اَچ تربت ءَ یل بیتگ انت –
زانگ بہ بیت بلوچستان ءَ زورانسری آوار جنیانی وئیل ریاستی ترس ءُ بیمانی سبب ءَ پہ وھد دیم ءَ نیاینت چریشی ءَ چوشیں اھوال بازیں وھدانی گوزگ ءَ پد دیم ءَ کاینت-