نمدی: پہ منی مھروانیں دوست جلال اساک ءِ نام ءَ
نبشتہ کار: س ا بلوچ
دی بلوچستان پوسٹ
منی دوست، ساہ ءُ نَپَس من اے نمدی ءَ تئی سلامتی ءِ واستا نبشتہ کنگ ءَ نہ آں پرچاکہ من زاناں اگاں مردمے آئی ایس آئی ءُ ایم آئی ءِ کِر ءَ بندیگ بہ بیت ءُ یاکہ تھاریں کوٹی ءِ تہ ءَ بے وس بہ بیت گڑا پہ آئی ءَ سلامتی ءِ اُمیت ءِ دارگ سک باز مشکل اِنت بلے پد ءَ اوں منی زِرد نہ منّ اِیت ءُ ھمے زبان ءَ در کَئیت کہ جلال جان منی ساہ! تو ھر کجا بَہ ئے مدام وش ءُ سلامت بات ئے ءُ زند ءَ ھچ سکّی مہ گندات ئے۔
من چمیشکا تئی دْراھی ءِ اُمیت ءَ کنگ ءَ نہ آں پرچاکہ من اوں تئی ڈول ءَ یکیں مار ءِ وارتگین آں پہ من اوں اے تھاریں کوٹی ازابے بوتگ من ھم تئی وڑ ءَ نپسیاتی ٹاچر بوتگاں من ءَ اوں دژمان دیگ بوتگ، لَٹ ءُ کُٹ کنگ بوتگ من ءَ اوں بزیں سیاھیں پُچّے سر ءَ دیگ بوتگ ءُ پد ءَ پہ من ساہ ءِ کشّگ سک گران بوتگ گُش ئے پورا ھیسک ءِ نادْراھی ءَ گْور جَتگ دست ءُ پاد ماں سانکلاں ، گُٹ ءَ سادے-گُٹّوسک بوتگ آ چِتّر بے ھساب ءَ جُنگ بوتگ، کرنٹ دیگ بوتگ، دْرنجگ بوتگ برے بچار ئے سر بُرز ءَ برے سر جَھل ءَ ءُ دگہ باریں چے چے۔۔۔
جلال جان تئی ھاتر ءَ باز جیڑگ ءَ آں چہ تئی گماں وت ءَ وت ورگ ءَ آں کہ زندان ءَ باریں تئی چے ھال بیت؟ باریں کدی تو آجو بہ ئے؟ یاکہ ھدا مہ کنت دژمن تئی ژانگولیں جون ءَ دور مہ دنت۔ بلے جلال جان تو گپے زان ئے نپسیاتی ٹارچر ءَ من ءَ یک سَبکے اوں دات آ سَبک گلامی ءِ مارشت اَت اگاں ڈن ءَ من گلامی مار اِتگ گڑا زندان ءَ گلامی دو ھَمنچو مار اِتگ ءُ من زاناں تو زندان ءَ من ءَ چہ گیشتر گلامی ءَ مارگ ءَ ئے پرچاکہ ترا پُرّیں نو ماہ بیت کہ زالم ءِ پَنجگاں کَید ئے۔
جلال جان! تو لَٹ، دژمان، ٹارچر ءُ نپسیاتی ٹارچر سگگ ءَ ئے ءُ باریں تئی بالاد داں کد چُنت سگّ ءُ اوپار کنت۔ منی ارواہ نپسیاتی ٹارچر چمیشکا زوراور اَت پرچاکہ جسمانی ٹارچر یک مُدّتے ءِ واستا اَت بلے نپسیاتی ٹارچر دائمی گون اَت ءُ سرجمیں اندام ءَ چو وروک ءِ ڈول ءَ ورگ ءَ اَت۔ برے بچار ئے کڈی ءِ توار، بُوٹانی توار ءُ کوٹی ءِ گیٹ ءِ زراب زراب ءَ ٹکّگ، دست پُشت ءَ بستگ ءُ چماں پٹی دیگ ءُ پد ءَ روچ شپ دْرنجگ ءُ پد ءَ پُشت ءَ زمزیل ژِپ ژِپ ءَ توار بہ کنت ءُ باریں دگہ چے چے۔۔
ھمے ساھت ءَ جلال جان بگند ئے ترا ھوش کنت یاکہ نہ کنت بلے من ءَ شر ھوش کنت کہ مدام ترا سیاسی سنگتاں سیاسی مزدور لیک اِت ءُ ترا بازیں کارانی تہ ھاتر ءَ کارمرز کُت بلے آ وت سرپد نہ اِت اَنت کہ تو سرپد اِت ئے کہ تو کارمرز بوگ ءَ ئے بلے سنگت اے چیز ءَ بِھ سرپد نہ اِت اَنت کہ ترا بلوچ بلوچ جیڑہ ءُ بلوچستان ءَ گوں باز مھر اَت چمیشکا تو وت مدام کارمرز بوگ لوٹ اِت۔ ترا مدام وش بوت کہ تو بلوچ ءِ کاز ءِ ھاتر ءَ کارمرز کنگ بہ ئے۔ منی پل تئی ھمے پھم وت یک سیاسی میچورٹی یے اَت ءُ ھمے میچورٹی ءَ ترا یک کاملیں بلوچے کُتگ اَت ءُ بگند ئے میچورٹی ءِ سَوَب ءَ مرچی تو ٹارچرسیل ءَ ٹارچر سگگ ءَ ئے۔
گڈی ءَ جلال جان گوں تو گپ سک باز اَنت ءُ منی ءُ تئی دُچار کپگ ءِ اُمیت اوں نیست بلے بوت کنت زندگی بہ بیت ءُ من ءَ ترا دُچار کپگ ءِ نیمونے بہ رس اِیت۔ گڑا لازم کسہ کنیں۔ بس دوا ھمیش اِنت کہ واجہ ھدا ترا سلامت بکنت ءُ تئی مات ءِ دل سرد بات۔ بلوچے بات ئے۔
تئی س۔ ا بلوچ
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-