بلوچستان ءِ دمگ قلعہ عبداللہ ءَ چہ پنجاب ءَ سیادی داروکیں پنچ مردم سلاہ بندیں مردماں دزگیری ءِ ھال اِنت-
پولیس ءِ رِد ءَ وئیل دوشمبے ءِ شپ ءَ قلعہ عبداللہ ءِ تھسیل گلستان ءِ دمگ گردی پنکئی ءَ بیتگ ، اود ءَ پنجاب ءِ دمگ مظفرگڑھ ءَ سیادی داروکیں پنچ مردم آوار جتگ اَنت-
پولیس ءِ رِد ءَ موٹر سائیکلانی سر ءَ سوار پنچ سلاہ بندیں مردم اود ءَ سر بیتگ اَنت کہ زورانسری وتی ھمراھی ءَ برتگ اَنت-
دمگی اِھوالکار ءِ رِد ءَ آوار جنگ بیتگیں مردمانی پجّار انعام رضا ،باقر حسین ، محمد عدنان ،محمد شھزاد ءُ محمد ادنان نام ءَ چہ بیتگ اَنت- اِھوالکار ءِ گوشگ اِنت کہ پنچینانی سیادی چہ مظفر گڑھ ءَ اِنت-
پولیس واکدار ءَ وئیل سوب، آوار جنگ بیتگیں مردم کجا برتگ اَنت ءُ آوار جنوکانی پُشت کجام مردم اَنت- اے درگت ءَ گیشیں سرپدی دیگ نہ بیتگ-
تنی وھدے ھچ گل ءَ نہ زرتگ-