بلوچستان ءِ دمگ قلات ءَ پاکستانی لشکر ءَ دو جاگھاں جیٹ ءُ یک جاگھے ءَ ڈرون ءِ بمبگواری کتگ ءُ ھیلی کاپٹر ءِ یکشلیں تیرگواری ءُ کواڈ کاپٹرانی بمبگواری-
مرچی سھب ءَ کلات ءِ دمگ چپر ءَ جیٹ بالیگاں بمبگواری کتگ انت۔ دمگی مردمانی رد ءَ دمگ ءَ مزنیں تراکانی توار بوتگ بلے تاوان ءِ بابت ءَ انگت ءَ ھال ءُ اھوال نہ بوتگ۔
چہ ایشی ءَ ابید توک ءُ دشت گوران ءِ کش ءُ گوری دمگاں دگہ تراکے ءِ توار اتکگ بلے انگت ءَ جاہ ءِ زانگ نہ بوتگ۔ دمگی مردمانی ءِ رد ءَ تراکانی ھمراھی ءَ دمگ ءَ جیٹ بالی گرابانی بال کنگ گندگ بوتگ انت۔
دمگی مردماں گوں ٹی بی پی ءَ گشتگ کہ گوستگیں روچ ءَ
کلات ءِ منگچر ءِ دمگ ءَ ڈرون ءَ گاڑی ءِ نشانگ جوڑ کتگ بلے تاوان ءِ بابت ءَ ھچ وڑیں ھال ءُ اھوال نہ بوتگ۔
دومی نیمگ ءَ گوستگیں روچ ءَ گن شپ ءِ ھیلی کاپٹراں رودینجو ءُ کش ءُ گوری دمگاں بازیں کلاکاں تیرگواری کتگ ءُ کواڈ کاپٹراں بمبگواری کتگ۔
نیٹورکانی بند بوگ ءُ سر ءُ پرانی سر ءَ بندش ءِ سبب ءَ سرجمیں اھوال دیم ءَ نیتکگ انت-
گْوستگیں روچاں بلوچستان ءِ جتاجتائیں دمگاں پاکستانی لشکر ءِ بمبگواری ءَ ھوار لس مھلوک ءِ بیرانی ءِ وئیل ھم دیم ءَ اتکگ انت۔ سئے روچ پیسر خضدار ءِ دمگ وڈھ ءَ آروس ءِ مراگشت ءَ پاکستانی لشکر ءِ نیمگ ءَ چہ دیم پہ دیمیں تیرگواری ءَ چار لس مردم بیران ءُ بازیں ٹپیگ بوتگ اَنت کہ آھانی تہ ءَ مزنیں کساسے ءَ جنین ءُ چُک ھوار اَنت۔
یازدہ اگست ءِ شپ ءَ پاکستانی لشکر ءِ جیٹاں جھازاں گدار گوندان ءَ بازیں لوگانی سر ءَ بمب تراکی کتگ ءُ ایشی ءِ آسر ءَ بیست ءَ چہ گیش لس مردم ٹپی ءُ بیران بوتگ اَنت کہ آھانی تہ ءَ مزنیں کساسے ءَ جنین ءُ چُک ھم ھوار اَنت۔ بازیں ٹپیگیں مردمانی انگت ءَ درمان کنگ بوھگ ءَ اِنت ءُ آیانی جاور ھال نگیگ بوھگ ءَ اِنت۔
پاکستانی لشکر ءِ آئی ایس پی آر ءُ سرکاری کارندھاں سوراب ءَ فوجی بالی گرابانی بمبتراک ءِ ھال راست کتگ ءُ اے گپ ءِ پدرائی کتگ کہ آیانی نشانگ بلوچ سلاھ بندیں گلانی پناہ گاہ بوتگ اَنت۔