بلوچستان ءِ دمگ ھرنائی ءِ ھند شھرگ ءَ پی ایم ڈی سی ءِ اشکرانی کھن ءَ یکشمبے ءِ روچ ءَ زھرناکیں گیس ءِ تراکے بوتگ کہ ایشی ءِ آسر ءَ چار کاریزکار بیران ءُ پنچ ٹپی بوتگ اَنت۔
چیف انسپکٹر مائنز محمد عاطف ءِ رد ءَ ریسکیو آپریشن سرجم بوتگ ءُ چہ کھن ءَ چار کاریز کارندہ بیران ءُ پنچ ٹپیگ بیتگ انت ۔ ٹپیگیں مردم بنداتی جاندراھی ءَ شھرگ ہسپتال ءَ سر کنگ بوتگ انت چہ اود ءَ آ گیشیں الاج ءِ واستا شال ءَ دیم دیگ بوتگ انت وھدیکہ بیران بوتگیں کاریزکارانی لاش کھولانی دست ءَ دیگ بوتگ انت-
ہرنائی ہسپتال ءِ ڈاکٹر عبید ءِ رد ءَ بیران بوتگیں مردمانی تہ ءَ عبید اللہ، خیال محمد، خیال زادہ ءُ زاھد علی ھوار انت ءُ ٹپیگ ءِ نام گل زمان، عاقل زادہ، سعید اللہ، نور بچا ءُ نور عالم ءِ نام ءَ زانگ بوتگ انت۔ واکدارانی رد ءَ اے درستیں کاریزکار خیبر پختونخوا ءِ جھمنند انت۔
چیف انسپکٹر مائنز محمد عاطف ءَ گشتگ کہ تراک زہریلا گیس ءِ پُر کنگ ءِ سبب ءَ بوتگ کہ ایشی ءِ سبب ءَ کھن یک بھرے ڈریتگ بوتگ۔ آئی ءِ رد ءَ اے وئیل ءِ پٹ ءُ پول ءِ پرمان داتگ ۔
بلے دگہ کارمند کہ کھن ءَ کار کنگ ءَ اَنت گش اَنت کہ وئیل رند ءَ زوت ھچ سرکاری ریسکیو ٹیم جاہ ءَ ھست نہ بوتگ ءُ کارمند ءُ دمگی مردماں وتی کمک ءَ ٹپی ءُ بیرانیں ھمکار چہ کھن ءَ در کتگ اَنت۔
اے سال ءِ اگست ءَ شال ءِ دمگ سورینج ءَ اشکرانی کھنطءَ زھرناکیں گیس ءِ تراک ءَ 36 کایزکار بیران بوتگ اَنت کہ آھانی تہ ءَ گیشتریں مردم ضلع شانگلا ءِ مردم بوتگ اَنت۔ ایشی ءَ چہ پیسر جون ءَ خوست ءِ ھرنائی ءِ دمگ ءَ کھن ءِ کپگ ءِ وئیل ءَ دو کاریزکار بیران بوتگ اَنت۔
کان کنی ءِ گوں سیادی داروکیں مزدور گلاں دیر اِنت کہ بلوچستان ءِ کوہنیں کھنانی تہ ءَ ایمنی ءِ بندوبست ءُ ریسکیو ءِ آسراتی ءِ نہ بوھگ ءِ نیمگ ءَ دلگوش گور کتگ انت۔