TBP Balochi

بلوچستان ءِ دمگ مستونگ ءُ زامران ءَ چہ مروچی سھب ءَ پاکستانی لشکر ءِ آپریشن برجاہ انت ۔ گن شپ ھیلی کاپٹر ءُ ڈرون آپریشن ءِ بھر زورگ ءَ امت ءُ ھمے وھد ءَ سلاہ بندیں جنگ ءُ چوپانی ھال ھم ھست اَنت۔

پاکستانی لشکر ءَ مرچی مستونگ ءِ دمگ دشت ءُ کمبیلا ءَ دمگ انگر کتگ ءُ آپریشن بندات کتگ ۔ ھمے وھد ءَ لشکر ءِ سر ءَ اُرش بوتگ۔ دمگ ءَ تاں گڈی ھالاں مزنیں تیر گواری ءُ تراکانی توار بوتگ انت۔

دومی نیمگ ءَ مرچی سھب ءَ زامران ءِ دمگ نوانو ءُ کش ءُ گوری دمگاں گن شپ بالی گراب ءُ ڈرون بال کنگ ءَ گندگ بوتگ اَنت۔

دمگی مردمانی رد ءَ پورسز دمگ ءَ آپریشن کنگ ءَ انت۔

زانگ بہ بیت گوستگیں روچ ءَ زمران ءِ ھمے دمگ ءَ پاکستانی لشکر ءِ راشن ءَ لوڑیں دو گاڑی سلاہ بندیں مردماں سوتکگ انت ۔

انگت ءَ واکداراں فوجی کارروائیانی بابت ءَ ھچ وڑیں ھال ءُ اھوال نہ داتگ۔

بلوچستان ءِ جتاجتائیں دمگاں پاکستانی پوج ءِ دست ءَ سے مردم آوار جنگ ءُ چار یل کنگ بیتگ اَنت-

گیشیں ھالانی رِد ءَ ھُزدار ءِ جھمنند نوزدہ سالی ئیں مھران ء اللہ بخش، کہ ایف ایس سی ءِ نودربرے، دوازدہ اپریل 2026 ءِ شپ ھشت ءَ شال ءَ چلڈرن ھسپتال ءِ نزیک ءَ چہ گریب پلازہ کاؤنٹر ٹیررازم ڈیپارنمنٹ (سی ٹی ڈی) ءِ کارندھاں آوار جنگ ءَ پد بیگواہ کتگ-

ھمے وڑ پنجگور ءَ پاکستانی پوج ءَ بیڑ برتگ ءُ دو مردم آوار جتگ ءُ بیگواہ کرتگ اَنت۔

پاکستانی پوج ءَ ھپدہ اپریل 2026 ءَ بیگاہ ءَ پنجگور ءِ ھند خدابادان ءَ بیڑ برتگ ءُ عبدالوحد داد ء داد محمد ءُ اشفاق آدم ء آدم آوار جتگ ءُ بیگواہ کتگ اَنت۔

دومی نیمگ ءَ جتاجتائیں دمگاں چہ بیگواہ بیتگیں چار مردم یل کنگ بیتگ اَنت-

ھاران ءِ جھمنند نیاز احمد ء ماسٹر ایاز دوازدہ اپریل 2026 ءَ آوار جنگ ءَ پد شانزدہ اپریل ءَ خاران ءَ یل کنگ بیتگ-

گوادر ءِ دمگ جیونی ءِ جھمنند آصف ء عیسیٰ بلوچ کہ شش جنوری 2026 بیگواہ بیتگ، یازدہ اپریل 2026 ءَ چہ گوادر ءَ یل کنگ بیتگ-

کیچ ءِ دمگ مند (بلوچ آباد) ءِ جھمنند امیر ء جاسم داد کہ نوزدہ دسمبر 2025 ءَ بیگواہ کنگ بیتگ، دہ اپریل 2026 ءَ چہ گوادر ءَ یل کنگ بیتگ-

ھمے وڑ کیچ ءِ دمگ تربت (گوکدان) ءِ جھمنند الیاس ء میاد داد کہ شش اپریل 2026 ءَ بیگواہ کنگ بیتگ اَت، دوازدہ اپریل 2026 ءَ ایف سی بُنجل چہ ڈی بلوچ تربت ءَ یل کنگ بیتگ-

بلوچستان ءَ زورانسری آوار جنیانی ھلاپ ءَ پُرکاریں کارکناں ھکومت ءَ چہ دزبندی کتگ کہ سرجمیں بیگواھیں مردماں کانود ءِ ھساب ءَ دیم ءَ آرگ بہ بنت ءُ سانمندیں کھولاں انساپ دیگ بہ بیت-

پاکستانی لشکر ءَ رحیمہ بی بی ءُ آئی ءِ برات دالبندین ءَ آھانی لوگ ءِ سر ءَ چھاپہ ءِ وھد ءَ آوار جتگ انت ۔

گیشیں رد ءَ رحیمہ بی بی بنت محمد رحیم کہ گوں وتی کستریں برات ءِ ھواری دالبندین ءَ زورانسری ءَ بیگواہ کنگ بوتگ انت مرچی شال ءَ دیم ءَ آرگ بوتگ ءُ ”وت کُش بمبتراک“ ءِ آسراتی ءِ رد ءَ پیش کنگ بوتگ ، وھدے کہ آئی ءِ برات زبیر انگت بیگواہ انت ۔

رحیمہ بی بی بنت عبدالرحیم ءُ آئی ءِ برات زبیر گوستگیں سال ءَ 9 دسمبر 2025 ءَ پاکستانی لشکر ءَ چہ آھانی لوگ ءَ دستگیر کتگ ءُ گوں وت برتگ اَنت کہ ایشی ءَ پد آ دوئیں بیگواہ بیتگ انت۔

بلے مرچی شش ماہ ءَ پد پاکستانی لشکر ءِ کمک ءَ سوشل میڈیا اکاؤنٹس ءُ سرکاری ھال چینلانی سر ءَ آھانی دزگیری ءُ منانکی ءِ ویڈیو ءِ شنگ کنگ ءَ آ وت کُشیں اُرش کنوک ءُ آسراتی ءِ رد ءَ جار جنگ بوتگ اَنت۔

بلوچستان ءِ دمگ جھل مگسی ءُ زامران ءَ پاکستانی پوج ءِ چوکی دستیگ کنگ ءُ راشن گاڑی ماندارگ ءِ وئیل دیم ءَ اَتکگ اَنت-

جھل مگسی ءَ لیویز فورس ءِ شوران چوکی سلاہ بندیں مردماں دستیگ کتگ- ھالانی رِد ءَ سلاہ بندیں مردماں چوکی ءَ ساڑی کارندھانی سلاہ ءُ پرپٹ ھم وتی دستیگ کتگ اَنت-

ھمے وڑ زامران ءَ کنردان، نوانو ءَ سلاہ بندیں مردماں پاکستانی فوج ءِ واستا راشن بروکیں دو گاڑی راشن ءَ ھوار دستیگ کنگ ءَ پد مانداشتگ اَنت-

اے اُرشانی زمہ واری انگت ھچ گل ءَ نہ زرتگ اَنت بلے گوستگیں روچاں جھل مگسی ءَ لیویز فورس ءِ دو جتاجتائیں چوکیانی سر ءَ دستیگ کنگ ءُ ھاران ءُ پنجگور ءَ پوج ءِ رسد گاڑیانی دستیگ کنگ ءُ ماندارگ ءِ زمہ واری بلوچ لبریشن آرمی ءَ منّ اِتگ اَنت-

بلے تنی وھدے اے دوئیں وئیلانی درگت ءَ ھچ وڑیں ھال دیم ءَ نیتکگ-

بلوچستان ءِ جتا جتائیں جاھاں پوج ءِ سر ءَ یکشل ءَ اُرشانی درچ برجاہ انت ءُ ھرنائی ءُ بسیمہ ءَ پد تربت ءَ بمب ڈسپوزل ءِ سر ءَ اُرش کنگ بیتگ-

گیشیں اھوالانی رد ءَ تربت ءِ دمگ نودِز ءَ ایف سی ءِ بمب ڈسپوزل ٹیم ءِ سر ءَ بمبتراکے بیتگ۔

سرکاری بنشون ءِ رد ءَ ایف سی بی ڈی ٹیم دمگ ءَ ھمک روچی ءِ وڑ ءَ دگ ءَ چیک کنگ ءَ بوتگ انت کہ بمبتراکے ءِ نشانگ بیتگ انت۔ اُرش ءَ پاکستانی لشکر ءِ بیرانی ءِ ھال انت۔

وئیل ءَ پد پاکستانی لشکر ءَ دمگ انگر کتگ ءُ اُرش کنوکانی شوھازگ بندات کتگ ۔

زانگ بہ بیت بلوچستان ءِ جتاجتائیں جاھاں اُرشانی درچ برجاہ انت گوستگیں روچ ءَ بسیمہ ءَ ڈیتھ اسکواڈ ءُ پوج ءِ سر ءَ اُرش بیتگ ءُ ھمے وڑ مروچی ھرنائی ءَ اُرش ءَ پوج ءِ کارندھے دزگیر کنگ بیتگ- چِد ءُ پیش گوستگیں روچ ءَ پسنی ءَ ھم سلاہ بندیں مردماں دگ بستگ ءُ گاڑی پٹ ءُ پول کتگ انت-

بلوچستان ءِ دمگ ھرنائی ءُ بسیمہ ءَ پوج ءُ ڈیتھ اسکواڈ ءِ سر ءَ سلاہ بندیں مردماں اُرش کتگ انت-

گیشیں اھوالانی رد ءَ ھرنائی ءَ پوجی آپریشن ءُ جنگ ءُ چوپانی وھد ءَ سلاہ بندین مردماں پوج ءِ یک کارندھے دزگیر کتگ-

اھوالانی رد ءَ دزگیر بیتگیں کارندہ ءِ پجار عبدالحلیم ء شفیع محمد ءِ نام ءَ زانگ بیتگ-

اھوالانی رد ءَ پوج ءِ کارندہ ءِ ھواری ءَ سلاہ بنداں پاکستانی چیریں ادارھانی یک کارندھے ھم دزگیر کتگ ءُ برتگ-

ھمے وڑ ءَ بلوچستان ءِ دمگ بسیمہ ءَ پاکستانی لشکر ءُ ’’ڈیتھ ءم اسکواڈ‘‘ دو جاگہ ​​ءَ اُرشانی تہ ءَ نشانگ جوڑ کنگ بوتگ اَنت، دمگ ءَ چار کلاک ءَ تاں ترندیں جنگ ءُ چوپ برجاہ بوتگ اَنت۔

گوستگیں روچ ءَ بسیمہ ءِ دمگ جُر ءَ سلاہ بندیں مردماں پاکستانی لشکر ءِ کمک ءَ سلاہ بندیں گل ’’ڈیتھ اسکواڈ‘‘ ءِ سر بستگ ءُ اُرش کتگ وھدے کہ آ دمگ ءَ دیم ءَ روگ ءِ جھد ءَ بوتگ اَنت۔

دومی نیمگ ءَ صمد سمالانی ءِ سروکی ءَ سلاہ بندیں گل ءَ ممائی ءِ ھند ءَ اُرش ءِ دیمپانی کنگ کپتگ۔

دمگی مردمانی رد ءَ پاکستانی لشکر ءَ ڈیتھ اسکواڈ ءِ باسکاں کمک کنگ ءِ ھاترا دمگ ءَ دیم ءَ روگ ءِ کوشست کتگ ءُ اود ءَ ترندیں جنگ ءُ چوپ بندات بوتگ۔

اے اُرشانی تہ ءَ انور سمالانی ءَ ھوار 7 مردم ٹپیگ بوھگ ءِ پدر کنگ بوتگ انت بلے انگت ءَ ٹپیگ بوتگیں مردمانی بابت ءَ دگہ گیشیں اھوال سر نہ بیتگ انت۔

بلوچستان ءِ تیابدپی دمگ پسنی ءِ نزیک ءَ شتنگی ءِ ناشناسیں سلاہ بندیں مردماں راہ بستگ ءُ پٹ ءُ پول کتگ۔

چمدیستگیں مردماں گشتگ کہ سلاہ بندیں مردماں ناکہ بندی ءِ وھد ءَ گیس ءِ ٹرک ءَ ھوار بازیں گاڑی داشتگ ءُ لھتیں گاڑیاں تاوان رس اتگ۔

چوشکہ دگہ جانی ھچ وڑیں تاوان ءِ ھال ءُ اھوال نہ بوتگ۔

دمگی مردمانی رد ءَ سلاہ بندیں مردم لھتیں وھد ءَ جاہ ءَ بوتگ اَنت ءُ پد ءَ شتگ اَنت وھدے کہ انگت ءَ کس ءَ اے وئیل ءِ زمہ واری نہ زرتگ۔

بلوچستان ءِ تیابدپی شھر گوادر ءَ پاکستانی سیکورٹی ادارھانی انوگیں سیکورٹی جاور ھال ءِ سر ءَ دمگی دریا وردانی سر ءَ نوکیں بندش جتگ کہ ایشی ءِ چیر دستی ءَ شپ ءَ لھتیں دمگاں زِر ءَ روگ ءُ ماھیگ ءِ گرگ ءِ سر ءَ سرجمیں بندش جنگ بوتگ۔

مھکمہ ماھی گیری ءِ نیمگ ءَ شنگ بوتگیں سرپدی ءِ رد ءَ گوادر ریڈ زون، بندرگاہ ءِ دمگ، پاکستان کوسٹ گارڈ کیمپ ءُ زر ءَ ھواریں یک ناٹیکل میلے ءِ ھَد ءَ شپ ءَ ھچ وڑیں ماھیگ گیری ءِ اجازت نہ بیت۔ ھچ ماھی گیر ءَ اے ھَد ءِ تہ ءَ شپ ءِ ماھی گیری ءِ کاراں گوں بندوک بوگ ءِ اجازت نہ بیت۔

دریا ورد سرپد کنگ بوتگ انت کہ آ ماھی گیری ءِ وھد ءَ وتی نوکیں ماھی گیری لائسنس، راجی پجار کارڈ، ماھی گیری کارڈ ءُ دگہ المی ئیں کاگداں گوں وت برگ بہ بنت۔ سیکورٹی کارندھانی نیمگ ءَ چہ داتگیں ھرچ سنگنل یا ھشدار ءِ سر ءَ زوت امل کنگ بہ بیت۔

واکداراں بیھار داتگ کہ اے سرپدیانی ھلاپ ورزی کنوکیں مردمانی ھلاپ ءَ ھمگرنچیں کانودانی رد ءَ سکیں کانونی کارروائی کنگ بیت کہ ایشی ءِ ھلاپ ورزی کنوکیں مردم سرجمیں زمہ وار بیت۔

دومی نیمگ ءَ دمگی دریا ورداں اے پیسلہ رد کنگ ءِ وھد ءَ ترندیں زھر ءِ درشانی کتگ۔ آھاں گْوشتگ کہ آ پیسر ءَ چہ سکیں سیکورٹی گامگیج ءُ بے ھالیں بندشانی آماچ اَنت ءُ نوں شپ ءِ ماھی گیری ءِ بندش ءَ چہ آھانی زندمان گیشتر تاوان رس اِیت۔

دریا ورداں لوٹ کتگ کہ سیکورٹی ادارہ ناجائزیں ٹرالنگ ءِ ھلاپ ءَ گامگیج بہ زور اَنت کہ آھانی رد ءَ اے دمگی زندمان ءِ ھاترا مزنیں ھترہ یے ۔

زانگ بہ بیت کہ سیکورٹی ادارھانی رویش ءِ سر ءَ پیسر ءَ ھم دمگی دریا ورداں زھرشانی کتگ۔ آھانی گشگ انت کہ کوسٹ گارڈ ءُ دگہ ادارھانی نیمگ ءَ چہ زگرشانی ءُ یکشلیں بندشاں آھانی زرکاری جاورھال سانمند کتگ انت۔

اے گامگیج ھنچیں وھدے ءَ زورگ بوتگ کہ لھتیں روچ پیسر بلوچ لبریشن آرمی ءَ وتی بھری ونگ ”ھمل میری ٹائم ڈیفنس فورس (HMDF)“ ءِ جوڑ کنگ ءِ جار جتگ ءُ گوادر ءِ کش ءُ گوراں کوسٹ گارڈ ءِ سر ءَ اُرش ءَ سئے کارندہ بیران بوتگ اَنت۔

بلوچستان ءِ تیابدپی شھر گوادر جیونی ءَ گوستگیں شپ ءَ پاکستانی پوج ءَ بیڑ برتگ ءُ اود ءَ لوگانی دروازگ پرشت ءُ پروش کنگ ءِ ھواری ءَ یک ورنایے آوار جتگ ءُ برتگ-

گیشیں اھوالانی رد ءَ جیونی پانوان ءَ گوستگیں شپ ءَ پاکستانی پوج ءَ یک لوگے ءِ سر ءَ بیڑ برتگ ءُ اود ءَ علی اصغر ء نور محمد نامیں ورنایے آوار جتگ ءُ برتگ-

دمگی مردمانی رد ءَ گوستگیں شپ ءَ پوج ءَ بیڑ برتگ ءُ اود ءَ لوگانی پٹ ءُ ھنڈ کنگ ءِ ھواری ءَ لوگانی دروازگ پروشتگ ءُ ساز ءُ سامان شِنگ ءُ شانگ کتگ انت-

زانگ بہ بیت بلوچستان ءِ جتا جتائیں جاھاں پاکستانی پوج یکشل ءَ آپریشن کنگ ءَ انت گوستگیں روچ ءَ مستونگ ءَ آپریشن ءِ وھد ءَ پوج ءِ تیرگواری ءَ دو مردم زدگ بیتگ ات انت- ھمے وڑ چِد ءُ پیش ھم بارکھان ءَ پوج ءَ یک گاڑی ءِ سر ءَ تیرگواری کتگ ات ءُ چریشی ءَ یکیں کھول ءِ زھگ ءُ زالبولاں ھوار دوازدہ مردم بیران بیتگ ات انت-

بلوچستان ءِ دمگ مستونگ ءِ ھند کردگاپ گرگینہ ءَ مروچی سھب ءَ چہ پاکستانی پوج ءِ آپریشن برجاہ ءَ اِنت، اے میان ءَ پوج ءِ تیرگواری ءَ چہ دو ورنا سکا ٹپی بیتگ اَنت-

گیشیں ھالانی رِد ءَ آپریشن ءِ میان ءَ کردگاپ ءِ دمگ کلی مینگی ءِ نزیک ءَ پوج ءَ تیرگواری کتگ دو ورنا، فاضل خان ءُ ظاھر سکا ٹپی کتگ اَنت سول نادُراھجاہ شال ءَ برتگ اَنت، اود ءَ آیانی الاج کنگ بیگ ءَ اِنت-

اِھوالکار ءِ رِد ءَ ٹپی بیتگیں دو ورنا بے میار بیتگ اَنت ءُ وتی ڈگاراں کار ءَ بوتگ اَنت وھدے آیانی سر ءَ تیرگواری کنگ بیتگ- دوئیں مردم وت ماں وت سیاد اَنت-

گیشیں ھالانی رِد ءَ دمگ ءَ مزنیں کچے ءَ پوجی ءِ کارندہ ءُ تاکت کارمرز کنگ ءَ اِنت-

ھمے وڑ ھزدار ءِ دمگ زھری ءَ گوستگیں روچ ءَ چہ جاور ناگیگ اَنت، پاکستانی پوج ءُ ڈیتھ اسکواڈ سر ءَ اُرش جانی تاوان دیمپانی-

زھری ءِ دمگ سوھندہ ءَ پاکستانی پوج ءُ آیانی پلامرزی سلاہ بند ٹولی، ڈیتھ اسکواڈ، سلاہ بندیں مردماں سنگر گپتگ اُرش ءِ نشانگ کتگ چریشی ءِ آسر ءَ آیانی جانی تاوان ءِ دیمپانی کنگ کپتگ-

اِھوالکار ءَ ٹی بی پی ءَ ڈیتھ اسکواڈ ءُ پوج ھما وھد ءَ نشانگ کتگ وھدے آ لَس آبادیاں نشانگ کنگ ءَ پد واتر آیگ ءَ بیتگ- واکدار ءَ تنی وھدے درگت ءَ ھچ وڑیں ھال دیم ءَ نیتکگ-