وڈھ ےَ پاکستانی لشکر ءِ تیرگواری، بلوچ رھشوناں اے“ نسل کشی ” نامینتگ ءُ میان اُستمان ءَ پٹ ءُ پول کنگ ءِ لوٹ کتگ

بلوچستان ءِ دمگ وڈھ ءِ ھند کلی یار محمد سونارو ءَ گوستگیں شپ ءِ نزیک ءَ 10 بج ءَ فرنٹیئر کور ءِ تیرگواری ءِ وئیل ءِ سر ءَ بلوچ سیاسی ءُ انسانی ھکانی رھشوناں سکیں دلپدردی درشان کتگ کہ ایشی ءِ تہ ءَ چار مردم بیران ءُ بازیں ٹپیگ بوتگ اَنت۔ ٹپیانی تہ ءَ ھپت سالی شھزیب ھم ھوار اِنت ۔

بلوچ یکجھتی کمیٹی ءِ بنجاھی رھشون ڈاکٹر صبیحہ بلوچ ءَ وتی بیان ءِ تہ ءَ بلوچستان ءَ برجاھیں جنگی آپریشن ءِ وھد ءَ لس مھلوک ءِ سر ءَ انسانی ھکانی سنگینیں لگتمالی گوشتگ۔ آئی ءَ چہ درکانودی کوش، شھریانی ٹپیگ، زورانسری ءَ بیگواہ کنگ ءُ مچانکی سزا ءِ وڑیں وئیلانی درور داتگ ءُ گوشتگ کہ کلی یار محمد ءَ چار شھریانی کوش ءُ ھپت سالی شاہزیب ءُ دگہ مردمانی ٹپیگ کنگ پوجی کاروائیانی تباہکاریں انسانی نھادانی پدراھی ءَ کنت-

ڈاکٹر صبیحہ بلوچ ءِ گشگ انت کہ بلوچ شھریانی ھلاپ ءَ بازیں رند ءَ جنگی تاکت ءِ کارمرز کنگ، زھگانی کُشگ یا ٹپی کنگ ءُ آبادیاں مُدامیں تُرس ءُ بیم یکیں وئیل ءِ رد ءَ رد کنگ نہ بیت۔ آئی ءَ گوشتگ کہ یکشلیں سلسلگ بلوچ آبادیانی لگتمال ءُ بنیاتی ھکاں چہ زبھر کنگ ءِ زانت ءُ مھکمیں پالیسی ءِ پدراھی ءَ کنت۔ آئی ءَ اے دابیں وئیل”نسل کشی“ گْوشتگ ءُ میان اُستمان ءَ کارروائی ءِ لوٹ کتگ۔

بلوچستان نیشنل پارٹی ءِ سروک سردار اختر مینگل ءَ اے گپ ءِ سر ءَ پدردی درشان کتگ ءُ گْوشتگ کہ یک میتگے ءَ کہ آروس ءِ تیاری ءَ گوں دزبند بیتگ بلے اچانگی پرسی پتری جوڑ بیتگ۔ آئی ءِ بیان ءِ رد ءَ شپ ءِ 10 بج ءِ نزیک ءَ وڈھ ءِ کلی یار محمد سونارو ءَ ایف سی ءِ اُرش ءَ چار مردم بیران ءُ بازیں ٹپیگ بوتگ اَنت کہ آھانی تہ ءَ ھپت سالی شاہزیب ھم ھوار اِنت۔

سردار اختر مینگل ءَ گوشتگ کہ چار مردمانی جانی تاوان ءَ چہ ھاندان ءِ تب ءُ مئیل ھلاس بوتگ ءُ وشیں مراگش ءَ را پرس ءِ تہ ءَ بدل کتگ۔ آئی ءَ ایراد گپتگ ءُ گوشتگ دگنیا ءِ دلگوش ءِ گرگ ءَ پیسر دگہ چنچو بے گناہیں جان گار کنگ لوٹ اَنت۔

سمی دین بلوچ ءَ ھم اے وئیل ءِ سر ءَ لیکہ درشان کتگ ءُ گْوشتگ کہ وڈھ ءَ کلی یار محمد سونارو ءَ ایف سی ءِ تیرگواری ءَ چار لس مردم بیران ءُ بازیں ٹپیگ بیتگ اَنت۔ آئی ءَ گوشت کہ ھپت سالی زھگ ءِ سر ءَ تیرگواری کنگ ءُ چار لس مردمانی کوش ءَ چہ جنگی آپریشن ءِ انسانی کوشانی پدر کنگ بیت۔

سمی دین بلوچ ءَ وتی بیان ءِ تہ ءَ گْوشتگ اے رنگیں زوراکی پہ بلوچ راج ءَ ناں نوکیں وئیلے ءُ ناں کہ زوراکی یے۔ آئی ءِ گْوشگ ءِ رد ءَ بلوچستان ءَ لس مھلوک ءِ کُشگ، زورانسری ءَ بیگواہ کنگ، لوگانی سر ءَ چھاپہ جنگ، کھول ءِ سر ءَ زوراکی کنگ ءُ ورنایانی بندیگ کنگ ءِ وئیل برجاہ اَنت۔

آئی ءَ اے پسو لوٹ اتگ کہ کجام ھم آپریشن ءَ ”سیکورٹی آپریشن“ گْوشگ ءَ پیسر چنچو بلوچ لس کشگ بنت ءُ چنچو زھگ تیر جنگ ءَ پد پہ رکھینگ ءِ لائک زانگ بنت؟

سمی دین بلوچ ءَ گشتگ کہ ھپت سالی شھزیب تیرگواری کنگ مہ بیت انت ءُ چار شھری کشگ مہ بوتیناں۔ آئی ءِ گشگ ءِ رد ءَ شھری مردمانی کُشگ پہ ایمنی ءِ برجائی ءَ یک منّگ بوتگیں بھا یے بوت نہ کنت۔ آئی ءَ گْوشتگ کہ بلوچ زھگاں تپنگ ءِ ساھگ ءِ چیر ءَ مزن کنگ ءَ لاچار کنگ نہ بیت ءُ شھری کوش، زورانسری بیگواھی، بندیگ کنگ ءُ بیم ءِ آماچ مہ بنت۔