بلوچستان ءِ جتاجتائیں دمگاں پاکستانی پوج ءُ بجلی ءِ ٹاورانی سر ءَ اُرش

بلوچستان ءِ جتاجتائیں دمگ کیچ ءُ ڈیرہ مراد جمالی ءَ پاکستانی پوج ءُ بجلی ٹاورانی سر ءَ اُرش –

گیشیں ھالانی رِد ءَ چہ کیچ ءِ دمگ دشت ءِ ھند چیرکنچتی ءَ پاکستانی پوج ءِ گاڑیانی کاروان سر ءَ پیسر ءَ بمب اُرشے کنگ بیتگ ءُ پد ءَ سلاہ بنداں اُرش ءِ نشانگ کتگ-

اِھوالکار ءِ رِد ءَ اُرش ءَ پاکستانی پوج ءِ سئے گاڑی اُرش ءِ زد ءَن اتکگ انت، چریشی ءِ آسر ءَ پوج ءَ جانی تاوان چست کنگ کپتگ – بلے سرکاری نیمگ ءَ ھچ وڑیں درشان دیم ءَ نیتکگ-

ھمے وڑ ڈیرہ مراد جمالی ءَ ناشناسیں سلاہ بندیں مردماں شپ ءَ گوٹھ حاجی مغل خان مگسی ءِ نزیک ءَ چہ گوزوکیں بجلی ءِ بُنجاھی ٹرانسمیشن لائن سر ءَ تراکے بیتگ، چریشی ءِ آسر ءَ اوچ پاور پلانٹ ءَ چہ پنجاپ ءَ رؤکیں بُنجاھی پُجارینوکیں لائن ءِ یک ٹاورے کپتگ-

وئیل ءَ پد پوج ءَ دمگ انگیر ءَ کتگ گیشیں پٹ ءُ پول کتگ-

وئیلانی زمہ واری انگت ھچ گل ءَ نہ زرتگ اَنت-