وڈھ ءِ وئیل زوراکیانی دَرْچ انت- ٹی بی پی شونگال

وڈھ ءِ وئیل زوراکیانی دَرْچ انت

ٹی بی پی شونگال

بلوچستان ءِ دمگ ھزدار ءِ ھند وڈھ، کلی یار محمد سونارو ءَ 10 ستمبر ءِ شپ ءِ کساس 10 بج ءَ پاکستانی پورسز ءَ یک آروسی لوگے ءِ سر ءَ تچک ءَ تچک تیرگواری کتگ ءُ چار مردم کشتگ انت ءُ زالبولاں ھوار بازیں مردم ٹپیگ کتگ انت- وئیل ءِ ھلاپ ءَ بیران بیتگیں مردمانی کھولاں لاشانی ھواری ءَ کراچی ءِ شھدگ ءِ سر ءَ نندانک داتگ ءُ زھرشانی یاداشت کنائینتگ –

اے بلوچستان ءَ اے دابیں وئیلانی نا اولی وئیل انت نہ کہ اے یک دمگے ءَ بس بیتگ- اگاں بس ھمے ءُ گوستگیں ماہ ءَ پیش اتکگیں وئیلانی بارو ءُ چار ٹپاسی بہ بیت گڑا کلات، مستونگ، نوشکی، سوراب ءُ بلوچستان ءِ دگہ دمگاں اے دابیں وئیل پیش اتکگ انت کہ اود ءَ پاکستانی لشکر ءَ لس مھلوک ءِ سر ءَ تچک ءَ تیرگواری ، یا ڈرون، ہیلی کاپٹر ءُ جنگی بالیگانی زور ءَ نشانگ کتگ انت-

اے درستیں وئیل یک جھلانک ءُ یکشلیں جاورھالے ءِ نشانی ءَ کنگ ءَ انت- وڈھ ءَ یک آروسی لوگے ءِ سر ءَ تیرگواری بہ بیت یا لس آبادی ءِ سر ءَ برزی کاروائی ءِ زور ءَ نشانگ کنگ، وڑ ءُ پئیم جتا بنت بلے آسر یک انت،کوش، ٹپیگ، تباہ بوتگیں کھول ءُ ترس ءِ ساھگ ءَ زندگی کنگ انت-

اے جاورھال بلوچ نسل کشی ءِ یک دراج کشیں درْچے ءِ بھر انت، ایشی ءِ دیمپانی ءَ بلوچ راج گوستگیں بازیں دھکاں کنگ ءُ پیداک انت- وھد ءِ ھمراھی ءَ زوراکیانی چھر ءُ دروشم مٹ بیان انت بلے سان ءُ آسر ءِ میان ءَ ھچ دگری نیست انت-

پاکستان ءِ نیمگ ءَ بلوچستان ءَ تاکت ءِ زور ءَ ریاستی رِٹ ءِ برجم کنگ ءِ جھد بوگ ءَ انت کہ ریاست وتی ھستیں پالیسی ءُ زوراکی ءِ زور ءَ وتی جاڑیگ بوگ ءِ برجم کنگ ءِ گڈی جھد ءَ انت – گوستانک ءِ پریچ ایش انت کہ تاکت ءِ زور ءَ گڈگیر کتگیں توار ھچ بر ھلاس نہ بنت، آ تاکت ءِ ھواری ءَ گیش ترند ءُ توان ءِ ھمراھی ءَ زرمبشت کن انت-