گوستگیں شپ ءَ پاکستانی فوج ءَ مند ءِ میتگ گوبرد ءَ بیڑ برتگ بازیں گس پٹ ءُ لوٹ کتگ اَنت چار مردم ورناہ زورانسری آوار جتگ ءُ گوں وت برتگ انت۔
دمگی اھوالانی رد ءَ دوشی شپ ءِ دو بج ءَ فوجی کارمنداں مزنیں کچے ءَ گوبرد ءَ بیڑ برتگ اول سر ءَ شکاری پیر مھمد ءِ گس ءَ بیڑ برتگ ءُ زھگ ءُ زالبولاں گوں کم شرپ کرتگ انت ءُ لوگانی پٹ ءُ لوٹ کنگ ءَ پد سمیر ءِ ناسر نامیں ورنایے آوارجتگ ءُ برتگ۔
ھمے رنگ ءَ ماسٹر ریپک ءِ گِس ءَ بیڑ ئِے برتگ لوگانی زر ءُ سھر ءُ ساماناں ھوار وسیم ءِ ستار آوار جتگ ءُ برتگ ۔
اھوالانی رد ءَ پدشتگ سوال مھمد ء سدیک ءِ گِس ءَ بیڑ ئِے برتگ چُک زالبول بیھار داتگ اَنت سوال مھمد ءِ دو چک آوار جتگ ءُ برتگ انت کہ آ سگیر ءِ سوال مھمد ءُ زھیر ءِ سوال مھمد ءِ نام ءَ زانگ بیتگ انت۔
دمگی مردمانی رد ءَ چد ءُ پیش گوستگیں سے شمبے ءَ مند بلوچ آباد ءَ سرکاری کمک ءَ ھستیں ٹولی ءَ بیڑ برتگ ءُ اود ءَ دو ورنا آوار جتگ ءُ برتگ انت کہ انگت بیگواہ انت۔