بلوچستان لبریشن فرنٹ ءِ جارکش میجر گوھرام بلوچ ءَ شنگ کتگیں درشان ءَ گوشتگ درزنانی پوجی ءُ انٹیلی جنس کارندہ کشتگ انت، لٹ ءُ پلی منسوبگانی بنجل، پوج ءُ فرنٹئر کور ءِ چوکی تباہ کتگ انت ، آپریشن الماس وتی گچین کتگیں جاہ ءَ سوبمند بوگ ءَ پد آسر کتگ۔
جارکش ءَ گوشتگ بلوچستان لبریشن فرنٹ ءَ 22 اکتوبر ءَ گوادر ءُ کر ءُ کشاں بندات بوتگیں گوستانکی آپریشن الماس دراجکش ءُ ترندیں میڑاں پد وتی درسیں گچین کتگیں اسٹریجک، پوجی ءُ مالی نشانگانی سوبین بوگ ءَ پد سرجم ءَ ھلاس کتگ۔
میجر گوھرام بلوچ ءَ گوشتگ کہ بلوچستان لبریشن فرنٹ ءِ جند ندریں سرمچاراں پرنٹئر ورکش آرگنائزیشن ءِ مزنیں بنجل نشانگ کتگ ءُ ھاس گوادر ءُ مکران ءِ لٹ ءُ پلی شوربندیانی بنجاہ تباہ کتگ اَنت ءُ جھان ءَ را تچک ءَ کلوہ داتگ کہ بلوچ راج ءِ منشا ءَ ابید بلوچستان ءَ لٹ ءُ پلی شوربندی ھچ وڑ ءَ پھریز نہ بنت۔ ایپ ڈبلیو او ءِ مزنیں بنجل ءِ انٹر سروس انٹلیجنس ( آئی ایس آئی )ءُ ملٹری انٹلیجنس ءِ کارگس مئے جندندریں سرمچاراں نشانگ کتگ اَنت ءُ مزنیں سروگاناں ھوار باز کارمند ھمے ارشاں کشتگ انت۔ آپریشن الماس ءِ میان ءَ زورگریں پوج ءِ درسیں پسھی اُرش، بکتربند گاڑیانی دیم ءَ آھگ ءِ کوشست ءُ کمکی کاروان جند دریں سرمچاراں نہ تھنا بے سوب کتگ اَنت، بلکیں پد کنز کنگ ءَ لاچار کتگ اَنت ءُ بنجل ءِ سر ءَ وتی سرجم ءَ دستیگی داں بیست ادار ءَ برجاہ داشتگ۔
جارکش ءَ گوشتگ کہ سدو آپریشنل بٹالین آپریشن الماس ءِ میان ءَ جند ندریں سرمچارانی نہ ترسی کاروائی ءِ میان ءَ ملٹری انٹلی جنس( ایم آئی ) ءِ سروگان، اسپیشل سروسز گروپ ( ایس ایس جی ) ءِ کارمند ءُ ریگولر پوج ءِ درزنانی کچ ءَ کارمند مرتگ۔ چہ ایشی ءَ ابید دژمن ءِ مزنیں بنجل، چوکی، پترگی بیرکس ءُ انتزامیہ کارگس گوں اُرشانی رد ءَ سرجم ءَ تباہ کتگ، زورگریں پوج ءِ باز بکتربند گاڑی ءُ چاریگی ڈرون ءُ کواڈکاپٹرانی سر ءَ تیرگواری کتگ ءُ اُرشاں تباہ کتگ اَنت۔
آئی ءَ گوشتگ کہ آپریشن الماس ءِ میان ءَ زورگریں دژمن ءَ را مدام گوں دیدگ ءَ پد سدو آپریشنل بٹالین ءِ جند ندیں سرمچاراں داں گڈی تیر ءِ پلسپہ ءَ کار کتگ ءُ وت ءَ پہ آجوئی ءِ راہ ءَ کربان کتگ ءُ بلوچ راجی گوستانک ءَ نہ ترسی ءِ یک نوکیں درسے گیش کتگ۔اے گوستانکی جنگ ءَ جند ندریں سرمچار ھالد پنام ءِ زامر، بلقیس دیدگ پنام ءِ الماس، ھمید اللہ پنام ءِ بادل، شکیل پنام ءِ سھراب، مجیب زیب پنام ءِ آپتاب، ناسر علی پنام ءِ نودان، مجاھد مھر پنام ءِ سگار زامرانی ءَ شھیدی ءِ نام کٹ اتگ ءُ آپریشن ءِ سوبین کنگ ءَ وتی کرد پیلو کتگ۔
میجر گوھرام بلوچ ءَ وتی درشان ءِ گڈی ءَ گوشتگ کہ بلوچستان لبریشن فرنٹ اے سوبمندیں آپریشن ءِ میان ءَ دژمن ءَ بوتگیں جانی ءُ مالی تاوانانی گڈی، سرجمیں کچ ءُ کساساں زورت رسانکدر ءَ شنگ کنگ بنت۔