پاکستانی لشکر ءَ ورنایے آوار جنگ ءَ پد ناشناسیں جاھے ءَ برتگ ات۔
ھالانی رد ءَ بلوچستان ءِ دمگ کیچ ءِ ھند تمپ کوھاڈ ءِ نندوکیں عدیل بلوچ سئے روچ پیسر چہ کوھاڈ بازار ءَ پاکستانی لشکر ءَ زورانسری ءَ بیگواہ کتگ ءُ آئی ءِ لاش مرچی سرنکن ءِ دمگ ءَ دزکپتگ۔
ھالانی رد ءَ گوستگیں روچاں پاکستانی لشکر ءُ ڈیتھ اسکواڈ ءَ کوھاڈ بازار ءَ بیڑ برتگ ءُ عدیل ءَ ہوار چار ورنا دزگیر کتگ ءُ بیگواہ کتگ انت۔ گْوستگیں شپ ءَ ھمے دمگ ءَ مشتاق ء ماسٹر صدیر ھم زورانسری ءَ آوار جتگ۔
بنشون ءِ رد ءَ شمبے ءِ روچ ءَ کوھاڈ ءَ کساسی پنچ ورنا زورانسری ءَ بیگواہ کنگ بوتگ اَنت کہ چہ آھاں عدیل ءِ لاش دزکپتگ۔
زانگ بہ بیت کہ گوستگیں روچ ءَ کیچ ءِ دمگ بُلیدہ ءَ زورانسری بیگواہ کنگ بوتگیں دو ورنا مھران بلوچ ء حاجی اکبر ءُ یاسر ء بلوچ خان ءِ لاش ھم دست کپتگ اَنت۔
بی وائی سی ءَ اے وئیل ءِ ھوالگ ءَ بیان شنگ کنان ءَ گْوشتگ کہ بلیدہ میناز ءِ نندوکیں حاجی اکبر ءِ چُک مہران 16 نومبر 2025 ءَ پاکستانی لشکر ءَ آئی ءِ لوگ ءِ سر ءَ اُرش ءِ وھد ءَ دزگیر کتگ ءُ فوجی کیمپ ءَ برتگ ءُ ایشی ءَ پد آ دیم ءَ آرگ نہ بیتگ۔
گل ءَ اے گپ ءِ پدرائی کتگ کہ ھمے دمگ ءِ بلوچ خان ءِ چُک 19 سالی نودربر یاسر 2 مارچ 2026 ءَ پاکستانی لشکر ءَ چہ آئی ءِ لوگ ءَ دزگیر کتگ ءُ پد ءَ آ بیگواہ بوتگ۔
زانگ بہ بیت کہ بلوچستان ءِ سیاسی ءُ انسانی ھکانی گلانی رد ءَ زورانسری بیگواھی ءِ آماچیں بازیں سد مردم کُشگ ءُ آیانی لاش چگل دیگ بوتگ اَنت ءُ انگت ءَ بازیں ھزار مردین ءُ جنین ءُ چُک بیگواہ اَنت۔
گلاں بلوچستان ءَ زوراکیں بیگواھی ءُ درکانودی کوشانرپورٹ ءَ اقوام متحدہ ءُ دگہ میان استمانی انسانی ھکانی گلاں پیش کنگ ءَ چہ پاکستان ءَ ھم پسو لوٹ اِتگ۔