بلوچستان : دو جتاجتائیں دمگاں پاکستانی پوج ءِ سر ءَ اُرش جانی تاوان ءِ ھال اِنت

بلوچستان ءِ دو جتاجتائیں دمگ سوراب ءُ جیونی ءَ پاکستانی پوج ءَ جانی تاوان چست کنگ کپتگ-

گیشیں ھالانی رِد ءَ سوراب گدر ءِ ھند سر ءَ ٹوبو کراس ءَ پاکستانی پوج ءِ سر ءَ سلاہ بندیں مردماں اُرش کتگ بازیں کارندھے ءِ بیرانی ءِ ھال اِنت، وھدے کہ اُرش ءَ پد پوج ءِ یک گاڑی یے ھم تباہ بیتگ-

دمگی اِھوالکار ءِ رِد ءَ اُرش ءَ پد بیران بیتگیں کارندھانی لاش وئیلجاہ ءَ زمین سر ءَ کپتگ اَنت- لاشانی برگ ءِ ھاتر ءَ پوج ءِ یک ٹولی یے وھدے دمگ ءِ نیمگ ءَ شتگ گُڑا اے رودینی کراس ھند سر ءَ دگہ یک اُرشے ءِ دیمپانی کنگ کپتگ-

اِھوالکار ءِ گوشگ اِنت کہ دومی اُرش ءَ ھم پوج ءَ جانی تاوان چست کنگ کپتگ، بلے بیرانی ءِ کچ زانگ نہ بیتگ اَنت-

ھمے وڑ تیابدپی شھر گوادر ءِ دمگ جیونی ءَ پاکستانی چیریں ادارہ ایم آئی ءِ کارندھانی سر ءَ بمب تراکے بیتگ، تراک ءَ چار کارندھانی بیرانی ءِ ھال اِنت –

وئیل ءِ زمہ واری انگت ھچ گل ءَ نہ زرتگ اَنت-