TBP Balochi

بلوچ لبریشن آرمی ءَ “ بی ایل اے” ءَ ھمے ماہ ءِ 3 ستمبر ءَ پشین ءِ دمگ زیارت کراس ءَ پاکستانی لشکر ءُ یک بند ءُ ساچی شرکتے ءِ جاہ ءِ سر ءَ اُرشانی تامر آفیشل چینل ھکل ءَ شنگ کتگ-

تامر ءِ بندات ءِ ندارگ بی ایل اے ءِ تیزگامیں ٹولی ‘ فتح اسکواڈ’ ءِ سرمچار پوجی رھبندانی درچ ءَ گندگ بنت کہ چریشی ءَ فتح اسکواڈ ءِ سرمچار وتی پوشاکانی ھواری ءَ نوکیں سلاھانی گون ءَ گندگ بنت-

ھپت منٹ ءَ ھواریں تامر ءَ بلوچ لبریشن آرمی ءِ فتح اسکواڈ ءِ سرمچار مزنیں سلاہ ءُ راکتانی گون ءَ پاکستانی پوج ءِ کاروان ءَ نشانگ کنگ ءَ گندگ بنت- تامر ءَ مِروکیں پوجی کارندھاں ھم پیش دار انت-

گل ءِ رد ءَ 3 ستمبر ءَ زیارت کراس پشین ءَ فتح اسکواڈ ءَ پاکستانی پوج ءِ یک کاروانے نشانگ کتگ – اود ءَ قلعہ سیف اللہ اسکاؤٹس ءُ ایف سی 134 ونگ ءِ چار گاڑی اُرش ءِ زد ءَ اتکگ انت، چریشی ءَ یک پوجی ٹرکے ءَ ھوار دو گاڑی تچک ءَ تچک نشانگ ءَ تباہ بوتگ انت-

بی ایل اے ءِ رد ءَ اُرش ءَ پاکستانی لشکر ءِ 18 کارندہ مرتگ انت ءُ سرمچاراں درستیں سلاہ ءُ پوجی ساز ءُ سامان برتگ انت-

گل ءِ رد ءَ یک دومی ٹولی ءَ زیارت کراس ءَ ھوارین دمگ خانی بابا ءَ یک بند ءُ ساچی شرکتے ءِ کنٹرول کنگ ءُ اود ءَ جاڑیگیں گاڑیاں ھوار 14مزنیں مشینری تباہ کتگ انت- درشان ءِ رد ءَ دزگیر کتگیں کمپنی ءِ کارندہ گل ءِ پالیسیانی رد ءَ یل کتگ انت-

زانگ بہ بیت اے اُرش ءُ پوجی کارندھانی بیرانی ءِ ھال سرکاری ءُ پورسز ءِ تکاں ھم راست کنگ بوتگ-

بلوچستان ءِ جتاجتائیں دمگاں یکشل ءَ زورانسری آوار جنی دْرچ یکشل ءَ برجاہ ءَ اِنت وھدے کہ دو بیگواھیں ورنا یل کنگ بیتگ اَنت-

گیشیں ھالانی رِد ءَ پاکستانی پوج ھمے سال نُھ ستمبر ءَ زاکر ء عبدالرزاق جھمنند ھاجی شاہ علی ولیج، شرافی ءُ ھشت ستمبر ءَ جمیل اقبال ء اقبال، جھمنند دشت کیچ، چہ میڑانی ڈیم ءَ آوار جتگ ءُ بیگواہ کتگ-

ھمے وڑ ریاض احمد ء پشمبے صالح، جھمنند مند، کیچ ھمے سال پانزدہ اگست ءُ چہ فاضل چوک گوادر ءَ پاکستانی پوج ءَ آوار جتگ ءُ بیگواہ کتگ-

دومی نیمگ ءَ سیزدہ اگست 2026 ءَ چہ کیچ ءِ تھسیل تمپ ءِ ھند رودبُن ھوشک آباد ءَ آوار جنگ بیتگیں سھیل ء ناصر 03 ستمبر 2026 ءَ سے شمبے ءِ شپ ءَ یل بیتگ ءُ وتی لوگ ءَ سر بیتگ اَنت-

ھمے وڑ 23 اگست 2026 ءَ پاکستانی پوج ءِ دست ءَ آوار جنگ بیتگیں بختیار احمد ء عبدالسلام جھمنند نوشکی، ھپت ستمبر ءَ چہ شال ءَ یل بیتگ ءُ وتی لوگ ءَ سر بیتگ-

چاگی ءِ دمگ چھتر ءَ سلاھبنداں واپاری راہ بستگ ءُ سئے کاروباری گاڑی دستیگ کتگ انت ءُ ھمے دمگ ءَ تراک ءِ سبب ءَ کاروباری راہ ءِ سر ءَ یک پُھلے ھم تباہ بوتگ۔

ایشی ءَ ابید کلات ءَ ھم یک پھلے تراکناکیں شورانی گون ءَ تباہ کنگ بیتگ-

انگت ءَ اے اُرشانی زمہ واری کس ءَ نہ زرتگ، البت گْوستگیں لھتیں روچانی تہ ءَ کلات ءُ چاگی ءَ اے وڑیں اُرشانی زمہ واری بلوچ لبریشن آرمی ءَ من اتگ انت۔

کچ ءُ کسانی رد ءَ اگست ءِ ماہ ءَ بلوچ لبریشن آرمی ءِ نیمگ ءَ سرجم ءَ 147 اُرش کنگ بوتگ انت کہ ایشانی تہ ءَ 70 اُرش دیم پہ دیم پاکستانی لشکر ءِ سر ءَ کنگ بوتگ اَنت وھدے کہ اے اُرشانی تہ ءَ 35 اُرش تراک ءِ ھوار اَنت۔

گوستگیں ماہ ءَ ’ زرکاری ناکہ بندی‘ ءِ چیر دستی ءَ بی ایل اے ءِ نیمگ ءَ 60 گاڑی نشانگ جوڑ کنگ بوتگ اَنت۔ اے وئیل شال ءُ کراچی روٹ ءِ سر ءَ بوتگ انت کہ ایشی ءِ تہ ءَ شال ءُ تپتان ءِ تجارتی راہ ھم ھوار انت وھدے کہ گل ءَ 32 جاہ ءَ ناکہ بندی کتگ-

خضدار پولیس ءِ بنشون ءِ رد ءَ نوا ءِ دمگ ءَ جنگل ءَ 18 سالی جنک ءِ لاش دست کپتگ کہ خضدار ٹیچنگ ہسپتال ءَ سر کتگ۔

پولیس ءَ گشتگ کہ جنک ءِ وارس ھزدار ٹیچنگ ہسپتال ءَ گوں رھوت بہ کن انت کہ لاش ءِ پجار ءُ دست گرگ بہ بیت۔

انگت ءَ پولیس ءِ نیمگ ءَ اے وئیل ءِ بابت ءَ دگہ ھچ وڑیں ھال ءُ اھوال شنگ نہ بوتگ۔

زانگ بہ بیت کہ پیسر ءَ گوستگیں لھتیں روچاں تربت ءِ شھر ءَ یک جنکے ءِ لٹ ءُ کٹ کنگ بوتگیں لاش دست کپتگ ات کہ ناشناسیں مردماں چہ وتی گس ءَ برتگ ات۔ لس مردمانی رد ءَ تربت ءَ جنک ءِ آوار جنگ ءُ کوش ءَ سرکاری کمک ءَ گوں سلاہ بندیں گلے ءِ دست مان بوتگ۔ بلے خضدار ءَ دست کپتگیں لاش ءِ پجار ءُ وئیل ءِ مول ءُ مراد انگت ءَ پدر نہ بوتگ اَنت۔

بلوچستان ءِ دمگ کلات ءَ پاکستانی لشکر ءِ کاروان ءِ سر ءَ شال کراچی ءِ شھدگ ءِ سر ءَ سلاہ بنداں اُرش کتگ-

گیشیں اھوالانی رد ءَ کلات ءِ دمگ مرجان ءَ شال کراچی شھدگ ءِ سر ءَ سلاہ بندیں مردماں پاکستانی لشکر ترندیں اُرشے ءِ نشانگ کتگ-

دمگی مردمانی رد ءَ کاروان ءِ سر ءَ تراکے ءَ پد ترندیں تیرگواری اشکنگ بیتگ انت-

اُرش ءِ درگت ءَ انگت ءَ واکداراں دگہ اھوال دیم ءَ نیاؤرتگ انت بلے دمگ ءَ بلوچ آجوئی لوٹوکیں سلاہ بندین گل پرکار انت –

یونائیٹڈ بلوچ آرمی ءِ جارکش مزار بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ مئے سرمچاراں مروچی سھب کساس نُھ ءِ نزیک ءَ ھرنائی ءِ دمگ سپین تنگی دلوجال ءِ ھند سر ءَ زورگریں پاکستانی آرمی ءِ دو گاڑیانی ھمگرنچیں کاروان وتکاریں سلاھاں چہ نشانگ کتگ-

مزار بلوچ ءِ رِد ءَ پوج ءِ کاروان ھما وھد ءَ سنگر گپتگ اُرش ءِ نشانگ کتگ وھدے آ لھتے وھداں ساری ھالیگ کتگیں وتی پوسٹانی نیمگ ءَ دوبر پیشگامی کنگ ءَ بیتگ اَنت-

جارکش ءِ رِد ءَ اُرش ءِ آسر ءَ سے کارندہ جاہ پہ جاھی مرتگ ءُ بازین ئِے کارندہ ٹپی بیتگ اَنت اُرش ءَ پد دوئیں نیمگاں تُرندیں میڑ بندات بیتگ، کہ کساس یک کلاکے ءَ تاں برجاہ بیتگ چریشی ءَ پد پوجی کاروان ءَ پشتکنزی کتگ ءُ واتر شتگ اَنت-

جارکش ءَ گْوشتگ کہ یو بی اے ءِ جارکش دیمتر ءَ گْوشتگ کہ اے اُرش ءِ زمہ واری ءَ مئے گل یو بی اے منّ اِیت، مئے اے وڑیں اُرش بلوچستان ءِ وتواجھی ءَ تاں برجاہ بنت-

سلاہ بندیں مردماں مردماں چیک پوسٹ دستیگ کتگ ءُ کارندہ دزگیر کتگ انت-

بلوچستان ءِ دمگ چاگی ءِ ھند دالبندین ءَ ناشناسیں سلاہ بندیں مردماں تالاران ءِ چیک پوسٹ ءِ سر ءَ اُرش کتگ ءُ چیک پوسٹ ءِ کوٹی ءُ ماڑی سوتجگ ءُ سرکاری سلاہ ءُ گاڑی ھم برتگ انت۔

دالبندین پولیس ءِ کارندہانی رد ءَ اے وئیل چار شمبے ءِ روچ ءَ سھب ءِ سئے ءُ نیم ءَ بوتگ کہ اودا 18 ءَ بگر داں بیست ناشناسیں سلاہ بندیں مردماں دالبندین ءِ گوریچانی روکپت ءَ نزیک ءَ 65 کلومیٹر دور تالاران ءِ چیک پوسٹ نشانگ جوڑ کتگ۔

پولیس ءِ رد ءَ سلاہ بندیں مردماں چیک پوسٹ ءِ کوٹی ءُ ماڑیانی تہ ءَ پٹرول ریتکگ ءُ سوتکگ انت ۔ سلاہ بندیں مردماں اود ءُ جاڑیگیں کارندہ دزگیر کتگ انت ءُ پد ءَ یلہ داتگ انت۔

انگت ءَ ھچ کس ءَ زمہ واری نہ زرتگ-

پاکستانی لشکر ءَ چہ شال ءَ ورنایے آوار جنگ ءَ پد بیگواہ کتگ-

بلوچستان ءِ بنجاھی شھر شال ءَ گوستگیں شپ ءَ پاکستانی لشکر سی ٹی ڈی ءَ یک لوگے ءَ بیڑ برتگ ءُ یک ورنایے آوار جتگ –

شال ءِ دمگ کلی شابو ءَ گوستگیں شپ ءِ ساھت چار ءَ پاکستانی لشکر ءَ یک لوگے ءَ بیڑ برتگ ءُ گل زیب ء محمد عظیم لانگو دزگیر کتگ ءُ ناشناسیں جاھے ءَ برتگ- آوار جنگ بیتگین ورنا مزدوری ءَ وتی زند ءَ گوازینگ ءَ بیتگ-

دمگی مردمانی رد ءَ گل زیب ایشی ءَ پیش ھم زورانسری آوار جنی ءِ آماچ بیتگ-

واکداراں داں انگت ءَ اے درگت ءَ دگہ گپ پیش نہ کتگ انت-

بلوچستان ءِ دمگ کیچ ءِ ھند ھوت آباد ءَ گوستگیں شپ ءَ ناشناسیں مردماں یک لوگے ءِ سر ءَ دزبمبے چگل داتگ ءُ پد ءَ تیرگواری کتگ- چریشی ءَ لوگ ءَ جاڑیگیں دلوتاں تاوان رس اتگ ءُ بازیں پسے مرتگ انت-

دمگی مردمانی رد ءَ اُرشکاراں لوگ ءِ سر ءَ دو دزبمب چگل داتگ ءُ پد ءَ تیرگواری کتگ – دمگی مردمانی رد ءَ اُرشکارانی سیادی سرکاری پلامرزی ءَ ھستیں گل ڈیتھ اسکواڈ ءَ انت-

دومی نیمگ ءَ دمگی مردمانی رد ءَ مروچی سھب ءَ ھمے دمگ ءل پوجی آپریشن ھم برجاہ انت-

دمگی مردمانی رد ءَ گوستگیں روچاں ھمے دابیں وئیلے ھیر آباد ءَ ھم پیش اتکگ کہ اود ءَ یک لوگے بمب اُرشے ءِ نشانگ کنگ بیتگ-