TBP Balochi

بلوچ لبریشن آرمی ءِ جارکش جیئند بلوچ ءَ رسانکدراں شنگ کتگیں درشان ءَ شنگ کتگیں درشان ءَ گوشتگ بی ایل اے ءِ سرمچاراں کلات، زھری، زامران ءُ دکی ءَ پنچ جتا جتائیں اُرشاں زورگریں پاکستانی پوج، دشمن ءِ کمکار ءُ پوج ءِ مڈی سر کنوکیں گاڑی نشانگ کتگ ءُ زورگر ءَ بازیں کچے ءَ تاوانانی دیمپان کتگ-

جارکش ءَ گوشتگ بلوچ لبریشن آرمی ءِ سرمچاران مروچی کلات ءَ سرخین ءُ نیچارہ ءِ میان ءَ زورگریں پاکستانی پوج ءِ پندی کارندہ ھما وھد ءَ ریموٹ کنٹرولڈ آئی ای ڈی ءِ نشانگ کتگ انت کہ آ دمگ ءَ پوجی آپریشن ءِ واستا پیشگامی ءَ بیتگ انت – تراک ءَ دشمن ءِ سَے کارندہ جاہ پہ جاہ ءَ مرتگ اَنت-

آئی ءَ گوشتگ سرمچارانی سنگر گپتگیں دومی ٹولی ءَ دشمن ءِ دگہ پندی کارندھانی سر ءَ وتکاریں سلاھاں گوں اُرش ، چریشی ءِ آسر ءَ دگہ چار مرتگ اَنت-

جارکش ءَ گوشتگ بلوچ لبریشن آرمی ءِ سرمچاراں سَے شمبے ءِ روچ ءَ زھری ءَ زورگریں پاکستانی پوج ءُ چیریں ادارھانی چاریگ شاھزیب ء مھمد ریاست جھمنند لاھور سلاہ بندیں اُرش ءَ کشتگ- اے مرد گنوکی پوشاکاں زھری ءُ کش ءُ گوری ھنداں چاریگری ءِ کار ءَ بیتگ –

آئی ءَ گوشتگ بی ایل اے ءِ انٹیلی جنس ونگ ‘زراب ’ ءَ ایشی ءِ سر ءُ پرانی سر ءَ نگاہ ایر کتگ انت ءُ آ زورگر ءِ کمکاری ءِ منانک دزکپتگ انت-

آئی ءَ دیم ءَ گوشتگ بی ایل اے ءِ سرمچاراں گوستگیں روچ ءَ زامران ءِ ھند نوانو ءَ زورگرین پاکستانی پوج ءِ واستا مڈی سرکنوکیں یک گاڑی یے ءِ سر ءَ اُرش کتگ ءُ گاڑی ناکارہ کتگ ءُ ڈرائیور سرپد کتگ ءُ یل داتگ-

بی ایل اے ءِ جارکش ءَ گوشتگ یک دگہ کاروائی یے بلوچ لبریشن آرمی ءِ سرمچاراں گوستگیں شپ ءَ دکی ءِ ھند جھالار ءَ زورگریں پوج ءِ چیردستی ءَ ھستیں وتگڑیں ڈیتھ اسکواڈ ءِ یک بنجلے ءِ سر ءَ مزنیں سلاھانی گون ءَ اُرش کتگ- اے سلاہ بندیں ٹولی اکبر ناصر ءِ سروکی ءَ برجاہ بیتگ کہ اے دمگ ءَ ناشرکاری ءِ بنجلے جوڑ کتگ-

آئی ءَ گوشتگ اے سلاہ بندیں ٹولی زورگریں پوج ءِ سروکی ءَ دکی ءَ مردمانی زمینانی سر ءَ زورگری ءُ کش ءُ گوراں دزی ءُ ملامگری ءَ دزمانجن بیتگ – بلوچ لبریشن آرمی اے گپ ءَ تچک کنت اِنت کہ زورگریں پوج ءِ کارندہ تچک ءَ مئے نشانگ ءَ انت ءُ ایشانی سر ءَ اُرش ترند کنگ بنت اِنت-

جیئند بلوچ ءَ گوشتگ اے اُرشانی زمک واریاں بلوچ لبریشن آرمی من ایت-

نودربرگل بلوچ اسٹوڈنٹس ایکشن کمیٹی ءِ جارکش ءَ گوشتگ کہ بلوچستان کتاب کاروان ءِ کتابی میڑہ ءَ مروچی نُھ روچ ایں کہ بولان ءِ جتا جتائیں ھند ءُ دمگاں برجاہ انت – مچ، سبی، ڈاڈر، ھاجی شھر ءَ پد مروچی باگ ناڑی ءَ کتابانی میڑہ جنگ بوتگ –

بساک ءِ رِد ءَ ورنا ءُ ماسٹراں ھوار ھر تک ءُ پھناتاں سیادی داروکیں مردم میڑہ ءَ بھر زورگ انت وتی وانگے ھاتر ءَ شریں وڑے ءَ کتاب زورگ انت –

آئی ءَ گوشتگ کہ بلوچستان ءِ دمگ نوشکی شال، ملیر، تونسہ، بارکھان، کوہلو، نصیر آباد ءِ ھنداں ھوار ایندگہ دمگاں میڑہ جوانیں وڑے ءَ سوبمندی ءَ گوں آسر بوتگ وھدیکہ ھاران، مستونگ، ڈی جی ھان، ھب، کراچی ءَ ھوار ایندگہ دمگاں کتابی میڑہ برجاہ انت –

بلوچ اسٹوڈنٹس ایکشن کمیٹی ءِ نیمگ ءَ نوکیں سال ءِ بنداتی ءَ بلوچستان کتاب کاروان ءِ نام ءَ جار جنگ بوتگیں کتابی میڑہ سرجمیں بلوچستان ءَ برجاہ انت وھدیکہ لھتے ھند ءُ دمگاں پولیس ءُ واکدارانی نیمگ ءَ مئے کتابی میڑہ اڈ دیوک وڑ وڑا ترسینگ ءُ بیھار دیگ بوتگ انت بلے اے کتابی میڑہ درسیں زانت دژمنی ءِ اڑانکاں سرگوز کنت ءُ برجاہ مان ایت –

بساک ءِ سکریٹری جنرل ءَ گوشتگ کہ بلوچستان کتاب کاروان ءِ نوکیں سالے بنداتی ءَ سرجمیں بلوچستان ءَ کتابی میڑہ اڈ دیگ بوتگ انت کہ اودا سیاست، سائنس، چاگرد، گوستانک، ٹیکنالوجی ءَ ھوار ایندگہ تکانی نھادی ایں کتاب یکجاہ کنگ بوتگ ءُ بلوچستان ءِ دوریں ھنداں اسٹال جنگ بوتگ بلے بدکسمتی ءِ ھمراھی ءَ نوکیں جھان ءِ بنکی آسراتیاں زبھریں بلوچستان ءُ آئی ءِ جھمننداں زانت ءِ سر کنگ ءِ واھشت ھم ریاستی ادارھاں وش نہ بیت انت – ءُ وتی زانت دژمنی پالیسیانی رِد ءَ کتابی میڑھانی درگان درگان کنگ ءِ ھاتر ءَ پولیس ءُ ایندگہ ریاستی ادارھانی دست ءَ مئے کتابی میڑھے اڈ دیوک ترسینگ بوگ ءَ انت –

ریاست ءِ نیمگ ءَ ماں نصیر آباد ءَ جنگ بوتگیں اسٹال ءِ زورانسری ھلاس کنگ ءِ ھاتر ءَ مزنیں کچے ءَ پولیس آرگ بوتگ ءُ کتابی میڑہ زورانسری تاکت ءِ زور ءَ ھلاس کنگ بوتگ ءُ ھمے وڈ سبی ءَ ھم کتابی میڑہ پولیس ءِ نیمگ ءَ ھلاس کنگ بوتگ ءُ بساک ءِ بنجاھی سنگتاں ھوار ایندگہ نودربر در کانودی دزگیر کنگ ءُ پروفالنگ ءُ ترسینگ بوتگ انت – ھمے وڑ ھاران ءَ ھم دمگی واکدارانی نیمگ ءَ فون کنگ بوتگ ءُ ترسینگ بوتگ انت – زیکیں روچ ءَ بارکھان ءَ کتابی میڑھے سر ءَ پولیس ءَ بیڑ برتگ ءُ میڑہ زورانسری ھلاس کتگ –

چوش کہ کتاب چاگرد ءَ تھاری ءَ کش ایت ءُ رژنائی ءِ نیمگ ءَ برگ ءِ جوانتریں شون انت- ھمے کتاب انت کہ چاگرد ءِ تہ ءِ سیاسی ءُ چاگردی بدلیانی جوانتریں سلاہ زانگ بیت – بلے ریاستی ادارھانی چہ کتاباں ترس چی ایں؟ بلے راستی ءَ اے اُرش کتابانی سر ءَ نہ انت بلکیں بلوچ ءِ زانت ء زانشت ءِ سر ءَ اُرش انت – چریشی ءَ ھمے پدر بیت کہ ریاست پہ زور بلوچ راج ءِ ھاتر ءَ زانت ءِ دروازگاں بند کنگ لوٹ ایت – یک نیمگے ما بچاریں سرجمیں بلوچستان ءِ پرائمری وانگجاھاں بگر تاں یونیورسٹی بند انت، کتاب جاہ ءِ نام نیست، لکانی کچ ءَ بلوچ وانگجاھاں چہ ڈن انت ـ ھمودا ما وتی وس ءُ واک ءَ زانت ءَ سرکنگ ءِ جھد ءَ کنگ ءَ ایں ھمیشی ءَ تاکت ءِ زور ءَ دارگ مئے درسانی زانشت ءِ سر ءَ اُرش انت ایشی ءِ بگیری ءَ گھگیری المی انت-

سبی ءِ دمگ لھڑی گھوڑی ھند سر ءَ پاکستانی پوج ءَ دمگ انگیر ءَ کتگ لوگانی سر ءَ بیڑبرتگ-

دمگی مردمانی رِد ءَ اے میان ءَ لوگانی سامان ءُ پس دلوت ءُ پرپٹ وتی ھمراھی ءَ برتگ اَنت بلے ھچ وڑیں دزگیری ءِ ھال دیم ءَ نیتکگ-

زانگ بہ بیت کہ بلوچستان ءِ کوھی میتگاں چہ بازیں رند ءُ دمگی مردماں شکایت کتگ کہ پاکستانی پوج ءَ جتاجتائیں وھد ءَ لشکر کشی ءِ میان ءَ آیانی پس دلوت ءُ گرانبھائیں سامان وتی ھمراھی ءَ برتگ اَنت گوں-

ڈپٹی کمشنر چاگی عطاء المنیم ءَ سرکاری کاردارانی سیاسی گلانی ءُ پارٹی مچی ءُ مراگش دگہ جاھاں بھر زیرگ ءُ پُرکایاں ھمگرنچ بیگ ءَ مھکمانہ کاروائی ءِ پرمان شنگ کنگ بیتگ-

زانگ بہ بیت کہ اے پرمان اے وھد ءَ شنگ کتگ وھدے دالبندین ءَ بلوچ چُکچینی ءِ یات روچ ءِ درگت ءَ چہ بیست پنچ جنوری ءَ یک راجی مچی یے برجم دارگ بیگ ءَ اِنت-

زانگ بہ بیت کہ اے روچ ءِ درگت ءَ چہ ھکومت بلوچستان ءَ 144 جنگ ھمراھی ءَ ٹرانسپورٹر ھم اے روچ ءَ گاڑیاں نہ کشگ کڈن کتگ اَنت وھدے کہ دومی نیمگ ءَ سرجمیں بلوچستان ءَ اے روچ ءِ درگت ءَ چہ راج ءِ مزنیں کچے ءَ چن ءُ لانچ ءَ دلگوش اِنت-

بلوچستان ءِ جتاجتائیں دمگ شال، آواران ءُ بارکھان ءَ پاکستانی پوج ءَ زورانسری آوار جتگ ءُ بیگواہ کتگ اَنت-

گیشیں ھالانی رِد ءَ بلوچستان ءِ بُنجاھی شھر شال ءَ کلی کمبرانی ءَ پاکستانی پوج ءَ شپ ءِ دوازدہ ءَ بیڑبرتگ ءُ ابرار نامیں مردمے آوار جتگ ءُ بیگواہ کتگ-

ھمے وڑ آواران ءِ تھسیل مشکے ءَ شپ وھد ءَ پوج ءَ جتاجتائیں ھندانی سر ءَ بیڑبرتگ ءُ بازیں مردمے آوار جتگ ءُ پد آ یل داتگ ءُ دو مردم گوں وت برتگ اَنت-

آوار جنگ بیتگیں دوئیں مردمانی پجّار نبی داد ء ابراھیم جھمنند پیراندر آواران، محمود ء ذوالفقار جھمنند ملشبند مشکے نام ءَ چہ بیتگ اَنت-

ھمے گوشگ بیگ ءَ اِنت اے دوئیں پوج ءَ چہ مینی نامیں میتگے ءَ آوار جتگ اَنت وھدے کہ آ وتی سیادانی گور ءَ جلّ اِتگ اَنت-

دومی نیمگ ءَ پاکستانی پوج ءَ چاردہ ءَ روچ ساری بارکھان ءِ دمگ چہ رکنی ءَ یک مردمے آوار جتگ ءُ ناشناسیں جاھے ءَ برتگ کہ چریشی ءَ پد آ بیگواہ ءَ اِنت-

بیگواہ کنگ بیتگیں مردم ءِ پجّار عبدالصمد نام ءَ چہ بیتگ-

بیگواہ کنگ بیتگیں برات گوشگ اِنت کہ آ سیزدہ روچ ءَ ساری کاؤنٹر ٹیررازم ڈیپارنمنٹ ( سی ٹی ڈی ) ءَ بیگواہ کتگ-

آئی ءَ گوشتگ کہ اے منی واستا بے کساس ءُ تُرسناک ایں تجربہ اِنت سیزدہ روچ ءِ بے باوری جاور ، تُرس ءُ ودار ءَ گوستگ اَنت کہ منی برات کدی واتر کئیت-

آئی ءَ گْوشتگ کہ منی برات ءِ بیگواھی ءَ کھول ءِ زند ءَ یک ھالیگیں جاھے یل کتگ- ما سرجمیں انسان دوستیں گلاں چہ دزبندی کن آں کہ آ منی برات ءَ پہ سلامتی واتری ءِ ھاتر ءَ توار چست بہ کن اَنت ءُ شریں وڑے ءَ جُھد بہ کن اَنت-

کیتھارینابلوم ءِ گاریں اِزت

گدار(ناول)

ندکار :ھائنرش بول

رجانکار: شاھد اھمد

ھپتمی بھر

دی بلوچستان پوسٹ

اوتاک ءِ سجھیں جاگہ پٹ ءُ پول کُت۔ لھتے چیز پولیس ءَ وتی کبزہ ءَ زرت اَنت، ھاس کر ھما چیز کہ نبشتگیں شکل ءَ اِت اَنت۔ کیتھارینا بلوم ءَ ھمے گپ ءِ موکل دات کہ آ یک جنین پولیس آپسرے، کہ آئی ءِ نام پلیٹرز اَت، آئی ءِ بوگ ءَ جانشود ءَ بہ روت وتی گُد ءُ پُچاں مَٹ بہ کنت۔ بلے جانشود ءِ دروازگ کمو پَچی ءَ یل دات تاکہ دوئیں پولیس والا آئی ءِ سر ءَ وتی نَزر ءَ ایر بکن اَنت۔ چوناھا بوت کنت کہ آ دزگیر کنگ بہ بیت ھمے واست ءَ آئی ءَ را گُشگ بوت کہ وتی دستی بیگ، سُھر ءِ گُد، میکپانی سامان ءُ وانگ ءِ واست ءَ لھتے کتاب بہ زور اِیت۔ اے وھد ءَ آئی ءِ کر ءَ کہ کتاب اِت اَنت چہ آیاں چار مھر ءِ سرھالانی سر ءَ، سے جاسوسی گدار، یکے نپولین ءِ سر گوست ءُ دومی سویڈن ءِ باجن ”کرسٹینا“ ءِ زند ءِ اھوال ءُ جاور ءِ بابت ءَ اِت اَنت۔ ھما روچ ءَ آ یکشل ءَ زھرشانی کنگ ءُ گُشگ ءَ اَت کہ بلے پرچا؟ بلے پرچا؟ من کجام گناہ کتگ؟ چہ آئی ءَ پولیس جنین آپسر ءَ گُشت کہ لڈوگ گوٹن یک پیشہ ور گناھگارے، ءُ آئی ءَ بنک دکیٹی، کوش، ءُ بازیں گناھانی سر ءَ شک ھست اِنت۔

وھدے کیتھارینا بلوم ءَ را یازدہ ءُ پانزدہ ءَ پٹ ءُ پول ءِ واست ءَ اوتاک ءِ تہ ءَ بُرت ئِے گڑا ھمے سوڑگ کُت کہ آئی ءَ را گوں سانکلاں بندگ مہ بیت، اگرچہ بائز مینے ءَ لوٹ اِتگ اَت کہ کیتھارینا بلوم سانکل کنگ بہ بیت بلے رَند ءَ آ وتی کمکار موئڈنگ ءُ جنین پولیس اپسر ءِ گُشگ ءَ پد کیتھارینا ءَ چہ سانکل ءَ بند ءُ بوج کنگ مہ بیت۔ اَنچوش کہ آ کارنول ءِ اولی روچ اَت، ھمے واست ءَ ھما بلڈنگ ءِ نشتگیں بازیں مردم کار نہ شُتگ اِت اَنت۔ آ ناچی مراگش ءَ، ناچ گانا، رنگ رنگیں لیب ءُ گوازیاں ھوار بوگ ءِ تیاری کنگ ءِ روگ ءَ اِت اَنت، ھمے واست ءَ ھما وھد ءَ ھما بلڈنگ ءِ نشتگیں سے درزن ءِ کساس ءَ نزیکیں مردم لابی ءِ لوگی گُد ءُ پُچّانی تہ ءَ اُوشتاتگ اِت اَنت۔ اکسکار شونر لپٹ ءِ بلکل نزیک ءَ اُوشاتگ۔ وھدے کیتھارینا بلوم بائز مینے ءُ موئڈنگ ءِ میان ءَ روگ ءَ بیت پولیس والاھانی ھمراھی ءَ ڈنّ ءَ کَیت ھمے موہ ءَ آئی ءَ دیم، پُشت، ءُ چہ دوئیں نیمگاں آئی ءِ باز اَکس گپت۔ ھمے وھد ءَ کیتھارینا بلوم اَنچیں جاوراں گوں دوچار اَت آئی ءِ ننگ، لَجّ ءُ نااُمیتی درست ھوار اِت اَنت۔ ھمے واست ءَ آئی ءَ وتی دیم چہ دستی بیگ ءَ چیر دات۔ ھمے جُھد ءُ کوشست ءَ دوئیں دست دستی بیگ اَت اَنت، دو کتاب، نبشتگیں ءُ میک اَپ ءِ سامان اے درست لونجانیں مید ءُ چہ کینگ ءَ سُھریں دیم ءِ ھمراھی ءَ گوں اکس ءَ در ءَ بوت۔ نیم ساھت ءَ پد آئی ءَ را گُشگ بوت کہ آئی ءِ ھک چے اَنت؟ آئی ءَ را اے ھم موہ دیگ بوت کہ آ دم ءَ بالا کُت بکنت۔ چہ آئی ءَ پد بائزے مینے، موئڑنگ، جنین پولیس اپسر پلیٹرز ءُ پبلک پراسکیوٹر کورٹن ءُ ھاش ءِ بوگ ءَ پٹ ءُ پول بندات بوت، اے درستیں پٹ ءُ پولی ریکارڑ کنگ بوت۔

”منی نام کیتھارینا بریٹ لوھ اِنت، بلوم منی ھاندانی نام اِنت، من 2 مارچ 1947 ءَ گیملس برؤش ءَ ودی بوتگاں، انچوش کہ دسٹرکٹ کوئر اِنت، منی پت ءِ نام پیٹر بلوم بوتگ۔ انچوش کہ پیشہ ءِ ھساب ءَ کان کنے اَت۔ آ 37 سال ءِ اُمر ءَ جگر ءِ نادراھی ءَ وھدے آ جنگ ءَ اتکگ اَت، مُرت۔ منی اُمر اے وھد ءَ 6 سال اَت۔ جنگ ءَ پد آئی ءَ سنگانی یک کانے ءَ کار بندات کُتگ اَت، بلے ھما وھد ءَ آ نمونیہ ءِ نادراھی ءِ تہ اَت۔ چہ آئی ءِ مرگ ءَ پد منی مات ءَ پینشن ءِ واست ءَ سک جَد ءُ جھد کُتگ اَت بلے ”ویلپیر“ اپسر ءُ کان ءِ باسکاں آئی ءِ منّگ نامگ نہ مَنّگ بوت۔ چہ ھراب مالی جاور ءِ سبب ءَ من کسان اُمری ءَ وتی لوگ ءِ کار بندات کُتگ اَت۔ پرچاکہ منی پت مدام نادراہ بوتگ، ھمے واست ءَ آئی ءَ پورائیں مُز نہ رَستگ اِت اَنت، منی مات ساپ کنوکیں جنینے ءِ بستار ءَ چنکیاس جاگھاں کار کُتگ اَت، وھدے من دربرجاہ ءَ وانگ ءَ اِت آں گڑا من ءَ اود ءَ ھچ جیڑہ نہ یتکگ اَت۔ بلے وانگ ءِ ھمراھی ءَ من لوگ ءِ کار ھم کنگی اِت اَنت، من تَھنا بس وتی لوگ ءِ کار نہ کُتگ اِت اَنت بلکیں ھمساھگ ءُ شھر ءِ جتا جتائیں لوگانی کار ءِ کنگ ءَ شُتگ اِت آں کہ اود نان ءِ پَچگ، ورگ ءِ گرادگ، آیانی پَھریزگ، جانورانی ھلار کنگ ءَ کُمک ھم کُتگ اَت، ایشی ءَ چہ پد کشارانی رون ءِ وھد ءَ ھم کار کُتگ اَت۔

1961ء ءَ وھدے من دربرجاہ یل دات گڑا منی دینی مات ایلزے وولٹرس ھائم ءَ من ءَ کوئر ءَ ماں گیبرس کشوکی ءَ کار ءَ لگائینت۔ اد ءَ من کدی کدی آئی ءِ اسٹور ءَ ھم کار کتگ اَت۔ منی دینی مات وولٹرس ھائم ءِ چہ مالی کمک ءِ سبب ءَ من اَنچو بودناک بوتاں کہ کوئر ءِ ”ھوم اکنامکس دربرجاہ ءَ شُت کُت کناں۔ اود ءَ منی دینی مات استادے ءِ بستار ءَ کار کنگ ءَ اَت۔ دربرجاہ ءِ چکاس ءَ من شریں لمبراں سوبین بوتاں۔

1966ء ءَ بگر داں 1967 ءَ من یک کنڈر گارٹن ءَ”ھاوس کیپر“ ءِ بستار کار کُت وھدے آ اوپٹر برؤش ءَ ”کوئشلر“ کارجاہ ئیگ اَت۔ ایشی ءَ پد اوپٹر برؤش ءَ ڈاکٹر کلوٹن ءِ گور ءَ لوگی کارانی بستار کار کُت، اد ءَ من کساس یک سالے ءَ بوتاں پرچاکہ ڈاکٹر کلوٹن مدام منی سر ءَ برانز گپتگ اَت اَنچوش کہ آئی ءِ جند ءِ جنین ءَ دوست اَت ءُ ناں کہ من ءَ۔

1968ء من وھدے لھتے ھپتگانی واست ءَ بے روزگار بوتاں گڑا من لوگ ءَ وتی مات ءِ کمگ بندات کت، کدی کدی من گیملس برؤش ءِ دستی باسک ءِ میٹنگاں ءُ آیانی باؤلنگ سیشن ءِ واست ءَ ھم کار کُتگ اِت اَنت۔ ھما وھد ءِ گپ اِنت منی مستریں برات کرٹ ءَ منی گند ءُ نند گوں چہ ولیم بریٹ ءَ کُتگ اَت وھدے کہ آ یک گُد ءِ کمپنی ءَ کار ءَ اَت۔ لھتے ماھاں پد منی گوں آئی ءَ سور بوت۔ سور ءَ پد ما گیملس برؤش ءَ نِشت اِیں۔ ھپتگ ءِ موکلاں وھدے اود ءَ چکرگ ءَ اتک اَنت گڑا من گلوک ءِ ھوٹل ءِ بورچی ءَ کار کُتگ اَت، کدی کدی کاؤنڑ ءِ ویٹرس ءِ بستار۔ شش ماہ ءَ پد من وتی مرد اوپار نہ بوت چہ آئی ءَبیزار بوتاں، آئی ءِ بابت ءَ، من ءَ گیش روگی نہ اِنت، وتی مرد ءِ یل کنگ ءَ پد شَھر ءَ اتکاں، من سَون وَ بوتاں۔ بلے آمیدگس ءَ من ءَ چمیشکا بُھتام جَت کہ من وت وتی وشی ءَ مرد یل دات۔ ھمے واست ءَ چہ دوبر من وتی ھاندانی نام زُرت۔

شھر ءِ آیگ ءَ بندات ءَ، من مِس وولٹرس ھائم ءِ گور نشت آں۔
چہ آیاں لھتے ھپتگاں پد من ءَ ماں مسٹر پھزن ءِ گور ءَ، وھدے کہ آ یک ھسابدارے اَت، ھاوس کیپر ءِ بستار ءَ من ءَ کار رست۔

مسٹر پھزن ءَ من ءَ اے موہ دات کہ من شبینہ دربرجاہ ءَ من وتی گیشیں وانگ ءُ زانگ ءَ گپت کُت بکناں اَنچوش من ھاوس کیپر ءِ کورس ءِ سرجم کنگ ءَ پد ایشی ءِ سند گپت۔ چکاس ءِ سوبین کنگ ءَ پد ھم من آئی ءِ کر ءَ کار کُت۔ آ یک مزنیں مھروان ءُ دل والا مردے اَت۔ 1969ء ءَ مسٹر پھزن ءَ ھما وھد ءَ دزگیر ئِے کُرت وھدے کہ مزن مزنیں کاروباری کمپنیانی ٹکس ءِ دزی ءَ گون بوتگ اَت۔ آئی ءِ دزگیری ءِ سبب ایش اَت کہ آ ھما کمپنیاں واست ءَ کار کنگ ءَ اَت، وتی دزگیری ءِ وھد ءَ آئی ءَ من ءَ یک کاگدے دات کہ چمیشی ءِ تہ ءَ منی سے ماہ ءِ پگار اِت اَنت، ھمے درگت ءَ من ءَ گُشت ئِے کہ من آئی ءِ لوگ ءِ ھیالداری ءَ بکناں پرچا کہ آئی ءَ اُمیت اَت کہ زوت واتر بئیت لوگ ءَ۔ انچوش کہ دومی روچ ءَ من ھم آئی ءِ کر ءَ کار کُت۔ منی کارانی تہ ءَ آئی ءِ لوگ ءُ باگ ءِ سپائی ءِ ھمراھی ءَ آئی ءِ گُد ءُ پُچانی شودگ ھم گون اِت اَنت۔ من مسٹر پھزن ءِ واست ءَ ساپیں پُچ ءُ ورگ زندان ءَ بُرتگ اِت اَنت۔ ھاس کر ھما پیٹر کہ وھدے من گیبر کساب ءِ گور ءَ دربرتگ اَت۔ وھدے آئی ءِ کارگس بند کنگ بوتگ ءُ آئی لوگ ھم کبزہ کنگ بوتگ اَت، گڑا من ءَ آ جاگہ یل دیگ بوت۔ مسٹر پیزن ءِ دروگ سازی ءِ بُھتام سابت کنگ بوتگ اَت۔ آئی ءَ سزا بوت، ءُ آ زندان ءَ شُت۔

من آئی ءِ چارگ کدی کدی شُتگ اِت آں۔ اگرچہ من آئی ءَ را دو ماہ ءِ پگار واپس کنگی اَت۔ بلے اے بابت ءَ منی ھچ گوش نہ داشت، ءُ زر واپس کنگ ءَ چہ انکار کُت ئِے۔ زوتاں چہ زوت من ءَ داکتر بلورنا ءِ گور ءَ کار رست چہ آئی ءَ مسٹر پیزن ءِ گور ءَ دیستگ اَت۔

ساؤتھ سائڈ ءَ کہ نوکیں لوگ جوڑ اِت اَنت، بلورنا ءِ کھول چموداں جھمنند اِت اَنت۔ اگرچہ آئی ءَ وتی لوگ ءَ من ءَ اوتاکے ءِ سوگات کُتگ اَت بلے من ھمے واست ءَ انکاری کُت کہ من آزات ءُ وتواجھی ءِ نندگ لوٹ اِتگ اَت۔ منی واھگ اَت کہ من وتی کیریر ءَ چہ وتی مرزی ءَ جوڑ کُت بکناں۔ داکتر ءُ آئی ءِ لوگی منی سر ءَ باز مھروان اِت اَنت۔ مسز بلورنا، کہ یک ماڑی جوڑ کنوکیں کارجاھ ءِ باسکے اَت۔ آئی ءَ من ءَ ” ایلکینٹ ایور سائڈ ریزیڈنس“ ءَ یک اپارٹمنٹ ءِ زورگ ءَ کمک کُت۔ داکتر بلورنا ءُ مسز بلورنا بحثیت وکیل ءُ انجنیر ھمے پروجیکٹ ءَ زانوگر اِت اَنت ھمے واست ءَ من ءُ داکتربلورنا ءَ ھشتمی منزل ءَ دو پَلنگ ءِ اوتاک، کچن ءُ باتھ ءِ اپارٹمنٹ ءِ نھاد ءَ گیشّینگ ءَ اِت اَنت۔ داں ھما وھد ءَ ھپت ھزار مارک یکجاہ کُتگ اَت۔ باکی سی ھزار مارک چہ بنک ءَ داکتر ءُ مسز بلورنا ءِ زمانت ءَ رستگ اَت۔ ھمے وڑ ءَ من اے اپارٹمنٹ بھا زُرت۔

1970ء ءِ بندات ءَ، من ھمود ءَ لَڈ اِت ءُ شُت آں۔ منی ماہ ءِ پگار یازدہ سد مارک جوڑ بوتگ اَت، بلورنا والا ءِ وردن ءُ وراک ءِ آئی ءَ چمیشی ءَ چہ ھچ نیم نہ کُت، بلکیں روگ ءَ چہ ساری مسز بلورنا ءَ شپ ءِ واست ءَ من ءَ وردن ءُ وراک دات ءُ ھمے داب ءَ وش اکلاکی ءِ گوم ءَ شُت ءُ ھمے کابل بوتاں کہ زوت وتی واماں دات کُت بکناں۔

داں چار سال ءَ من بلورنا ھاندان ءِ لوگ ءِ سرجمی ءَ انچارج اِت آں۔ منی کار ءِ وھد سُھب ءِ ھپت ءَ بگر داں بیگا ءِ چار ءُ نیم ءَ بوتگ اَت۔ ھمے ساھت ءَ من لوگ ءِ سپائی ءُ باپاری کُت، ءُ روگ ءَ چہ ساری شپ ءِ ورگ سرجمی ءَ جاڑی کُتگ اِت اَنت، گُد ءُ پُچانی شودگ ءِ زمہ واری گون اَت۔ چار ءُ نیم ءَ بگر داں پنچ ءُ نیم ءَ وتی اپارٹمنٹ ءَ سپائی کُت۔ چہ ایشی ءَ پد ساھت ءُ نیم ءُ دو ساھت ءَ پیپرنز ءِ لوگ ءَ پیریں کماش ءُ بَلُک ءِ کارانی کمک داتگ اَت۔ چہ اے دوئیں لوگانی من ءَ شمبے ءُ یکشمبے ءِ روچاں کارانی گیشیں زر اوں رستگ اَت۔ چہ ایشی ءَ پد بے کاریں وھد رستگ اَت گڑا چہ ایشاں من کلوپٹ کیٹرنگ سروس ءَ ماں کار داوتانی، پارٹیانی، ءُ سورانی سر ءَ کار سمبال اِت اَنت، اگاں زلورت بوت کچن ءَ یا ویٹرس ءِ داب ءَ کار کُتگ اَت۔ انچوش کہ کارگس انکم ٹیکس ءِ واست ءَ سیلپ امپلائڈے اِت آں۔ ھمے واست ءَ ٹیکس ءُ انشورنس ءِ زر من وت داتگ اِت اَنت۔ اے درستیں کار داکتر بلورنا ءِ آپس والا ءَ ابید پیس ءِ کُتگ اِت اَنت۔

1972 ءِ موسم بھار ءَ منی کر ءَ پوکس ویگن ھست اِنت وھدے کہ کلوپٹ ءِ یک ملازمے ءَ مناسب کیمت ءَ من ءَ بھا کُتگ اَت ئِے۔ ھمیشی ءِ سبب ءَ منی پریشانی کم بوت اَنت پرچا کہ چہ پبلک ٹرانسپورٹ ءَ جتائیں جاگھانی روگ پہ منی واست ءَ مشکل ءُ دمبرگی بوتگ اَت۔ موٹل بوگ ءِ سبب ءَ منی واست ءَ آسانی بوت کہ من اے وش اتکی ءُ پارٹیانی واست کار کُت بکناں کہ آ چہ دوریں جاگھاں بوتگ اِت اَنت۔

گوادر ءِ دمگ اورماڑہ ءَ یک مردمے سلاہ بندیں ٹولی ءَ آوار جنگ ءَ پد بیگواہ کرتگ-

آوار جنگ بیتگیں مردم ءِ پجار مطاھر ء مھمد اسلم جھمنند آواران تیرتیج ءِ نام ءَ زانگ بیتگ-

کھول ءِ مردماں ٹی بی پی ءَ گوں گوشتگ مطاھر دو روچ پیش اورماڑہ ءَ ڈیتھ اسکواڈ ءِ کارندھاں آوار جتگ ءُ بیگواہ کرتگ-

آیانی گوشگ انت کہ مطاھر ءِ آوار جنگ ءَ پد آئی ءِ درگت ءَ ھچ وڑیں اھوال نیست انت-

بلوچستان ءَ سیاسی پاٹیانی گوشگ انت کہ ڈیتھ اسکواڈ پاکستانی چیریں ادارھاں جوڑ کرتگ اود ءَ آ لس ورنایانی آوار جنی، چاگرد ءَ سلکاری ءُ دگہ دگہ کار ھرابیاں دزمانجنی ءِ بھتام آئی ءِ سر ءَ جنگ بوگ ءَ انت-

اقوام متھدہ ءِ گچینی کار کنوکیں ٹولی ءَ بلوچ یکجھتی کمیٹی ءِ رھشون ڈاکٹر ماھرنگ بلوچ ءِ ترسینگ، بیھار، آئی ءِ سر ءَ تر ءُ گرد ءِ بندش ءُ وتگڑیں الزامانی ارزی ءِ درگت ءَ پہ پاکستان ءِ سرکار ءَ گچینی نمدی ءِ نبشتہ کتگ –

وائس پی کے ءِ رِد ءَ اے گچینی نمدی اقوام متھدہ ءِ ورکنگ گروپ ءِ نیمگ ءَ دیم دیگ بوتگ – اے کارکنوکیں ٹولی ءِ تہ ءَ زورانسری آوار جنیانی ھلاس کنگ ءِ گچینی نمائندگاں ھوار ایندگہ انسانی ھکانی پدجنوکیں گچینی نمائندگ ھوار انت –

اے نمدی ءِ تہ ءَ پاکستانی سرکار دلگوش گور کنگ بوتگ کہ ماھرنگ بلوچ انسانی ھکانی پھازوک ءُ بلوچ یکجھتی کمیٹی ءِ رھشون انت کہ ریاست ءِ پاکستان ءِ تہ ءَ بلوچانی سر ءَ زوراکی ءُ ھاسکر زورانسری آوار جنیانی درگت ءَ جوڑ کنگ بوتگ ءُ انسانی ھکانی زرمبشتے-

ماھرنگ بلوچ انسانی ھکانی کارانی ھاتر ءَ TIME 100 ءِ نیکسٹ لسٹ مراگش ءَ بھر زورگ ءَ پہ نیویارک ءَ رؤگ ءَ بوتگ بلے امیگریشن ءَ آ جھاز ءِ سوار بوگ ءَ نہ اشتگ ءُ سوب ھم نہ گوشتگ –

ھالانی رِد ءَ بالی پٹ ءَ درآیگ ءَ پد ھما دمان ءَ پیسری بالی پٹ ءِ دگ ءِ سر ءَ سندھ پولیس ءِ اپسرانی یک ٹولی ءَ آئی ءِ گاڑی داشتگ – پولیس ءَ ڈاکٹر ماھرنگ ءُ آئی ءِ ھمراھیں ایندگہ انسانی ھکانی باسک لٹ شاپ کتگ انت ءُ بد ءُ رِد کتگ انت – پولیس ءَ ڈاکٹر ماھرنگ ءِ پاسپورٹ ءُ آئی ءِ گوانکو درکانودی پچ گپتگ انت ءُ گاڑی ءِ چاپی ھم پچ گپتگ انت – چریشی ءِ سوب ءَ انسانی ھکانی زالبولیں باسک سرجمیں شپ ءَ دگ ءِ سر ءَ اشتاتگ انت –

نمدی ءِ نبشتہ کنوک ءِ رِد ءَ اے وئیل ءَ پد آدینگ ءِ روچ ءَ بزاں 11 اکتوبر 2024 ءَ قائدآباد ملیر ءِ پولیس ءِ نیمگ ءَ ارزی ءِ نبشتہ کنگ بوتگ کہ آئی ءِ تہ ءَ ھمے ٹاہ دیگ بوتگ کہ ماھرنگ بلوچ دمگ ءِ تہ ءَ ناشری کنگ ءَ انت –

ارزی ءِ تہ ءَ وتگڑیں ناشرکاری ءِ ایکٹ سیکشن ھپت ءِ ھمراھی ءَ باگی، وڑ وڑیں سلاہ سلاہ زورگ ءُ پَساد کنگ، درکانودی اسمبلی، ٹولیانی میان ءَ دژمنی دگہ نبشتہ انت – ارزی ءِ تہ ءَ نبشتہ کنگ بوتگ کہ ماھرنگ بلوچ بازیں سلاہ بندیں ٹولیاں ھوار بوتگ ءُ ملک دژمنی کار کنگ ءَ بوتگ –

ورکنگ گروپ ءَ اے گپ ھم دیم ءَ آؤرتگ کہ جولائی 2024 ءَ ماں گوادر ءَ بلوچ راجی مُچی ءَ پد ڈاکٹر ماھرنگ ءِ سر ءَ کوش ءِ الزام ھم جنگ بوتگ – بھتام جنگ بیت کہ پھازگی لشکر ءَ یک کسھے جوڑ کتگ ءُ ٹاہ داتگ کہ ماھرنگ ءِ رھشونی ءَ درنگاز کنوکاں یک پوجی یے کُشتگ بلے راستی ءَ پوج ءَ ایمنیں زھرشانی کنوکانی سر ءَ تیرگواری کتگ ءُ چریشی ءَ چار مردم بیران بوتگ ءُ دوازدہ ءَ گیش زدگ بوتگ انت –

نمدی ءِ تہ ءَ گوشگ بوتگ کہ اے وتگڑیں بھتام انت ایشانی مول ءُ مراد ماھرنگ بلوچ ءَ وتی پُرایمنیں ءُ جائزیں کارانی کنگ ءَ دارگ انت –

نمدی ءِ تہ ءَ گوشگ بوتگ کہ ماھرنگ بلوچ نومبر ءُ دسمبر 2023 ءِ بلوچ لانگ مارچ ءِ سریں مردمانی رم ءَ ھواریں ءُ جولائی 2024 ءَ بلوچ راجی مُچی ءِ تہ ءَ ھم آئی ءَ وتی کرد پیلو کتگ – آئی ءَ وتی ایمنیں کارانی کنگ ءِ سوب ءَ ترندیں کاروائیانی دیمپانی کنگ کپتگ – ماھرنگ بلوچ ءِ جان ءُ آزاتی ءَ سک باز ترس ھست انت –

نمدی ءِ تہ ءَ ماھرنگ بلوچ ءِ ترسینگ ءُ بیھار دیگ ءِ سر ءَ بژن درشان کنگ بوتگ ءُ اے گپ ھم دیم ءَ آرگ بوتگ کہ ریاست چرے کاراں ھیالانی درشان کنگ ءِ آزاتی، ایمنیں زھرشانی ءُ مچی، انجمن، رازداری ءُ کھولی زند ءِ ھکانی بگیری بوتگ – نمدی ءَ نبشتہ کنگ بوتگ کہ ھنچوش سما کنگ بیت کہ اے بلوچستان ءَ انسانی ھکانی پھازوکانی بگیری ءَ ترسینگ ءِ بھرے – ورکنگ گروپ ءَ چہ سرکار ءَ لوٹ کتگ کہ اے شکانی پسو ءَ بہ دنت –

راج نیمگ ءَ چہ کوہ سر ءَ نبشتہ کنگ بیتگیں ‘بخیرٹ ماہ رنگ ءِ چیدگ ’ ناشناسیں مردماں ’ شپ ءِ وھد ءَ لُڑینتگ انت-

دالبندین ءِ دمگ چارسر ءَ ڈاکٹر ماہ رنگ بلوچ ءَ را وش آتک کنگ ءِ ھاتر ءَ یک جوانیں وڑے ءَ راج ءَ ڈوک مچ کتگ وتی مھر ءِ درشان کتگ-

دمگ ءِ مردماں ھزارانی ڈوک مچ کتگ ءُ براھوئی زبان ءَ ‘بخیرٹ ماہ رنگ ’( خوش آمدید ماہ رنگ) کوہ ءِ سر ءَ نبشتہ کتگ ڈاکٹر ماہ رنگ بلوچ‘ دالبندین راجی مچی ’ ءَ آیگ واستا مھر درشان کتگ-

بلے شپ ءِ بے وھدی ءَ ناشناسیں مردماں ماہ رنگ بلوچ ءِ نام دیر کنگ بیتگ-

یک دمگی مردمے ءَ ٹی بی پی ءِ نمائندگ ءَ گوں تران کنان ءَ گوشتگ کہ درست زان انت کہ ماہ رنگ بلوچ ءَ چہ کے تُرس اِیت ءَ اے کار کئی بیت کن اَنت-

زانگ بہ بیت بلوچ یکجھتی کمیٹی ءَ بیست ءُ پنچ جنوری ءَ بلوچ چُکچینی درگت ءَ چہ دالبندین ءَ راجی مچی برجم دارگ بیگ ءَ اِنت- اے درگت ءَ چہ سرجمیں بلوچستان ءَ آگاھی مھم برجم دارگ بیگ ءَ اِنت-

دومی نیمگ ءَ دالبندین ءَ ھوار چاگی ءِ راج ڈاکٹر ماہ رنگ ءَ تامُر ءُ دگہ دروشماں وش آتک کنگ ءَ وتی مھراں درشان کنگ ءَ اَنت-

دالبندین ءِ واکداراں ٹرانسپورٹراں یک ھپتگے ءَ تاں گاڑیانی نہ کشگ ءِ کڈنی داتگ اَنت-

بلوچ یکجھتی کمیٹی ءِ نیمگ ءَ چہ بیست ءُ پنچ جنوری ءَ بلوچ چُکچینی ءِ روچ ءِ یات ءَ دالبندین ءَ راجی مچی برجم دارگ ءِ چن ءَ لانچ برجاہ ءَ اَنت اے درگت ءَ چہ جتاجتائیں دمگاں آگاھی مھم برجم دارگ ءَ اَنت-

دومی نیمگ ءَ واکدار مچی ءَ بے سوب کنگ ءِ ھاتر ءَ پُرکار اَنت- چہ دالبندین ءَ اِھوالکار ءَ ٹی بی پی ءَ گْوشتگ کہ ٹرانسپورٹراں پابند کنگ بیگ ءَ اَنت کہ آ یک ھپتگے ءَ تاں وتی گاڑیاں مہ کش اَنت-

آیانی گْوشگ اِنت کہ اے درگت ءَ واکدار ءَ یک نبشتھی ھساب ءَ ٹرانسپورٹرانی واھند ءُ کارگس ءَ نبشتھی کڈن کتگ اَنت-

بلے واکدارانی نیمگ ءَ چہ اے رد کنگ یا پدر کنگ نہ بیتگ-

زانگ بہ بیت گوستگیں سال ءَ بلوچ یکجھتی کمیٹی ءَ گوادر ءَ ‘ بلوچ راجی مچی ‘ ( راجی مچی) ءِ برجم دارگ بیتگ اَت اے میان ءَ سرجمیں بلوچستان ءَ زھرشانی کنوک پوج ءِ نیمگ ءَ چہ لَٹ ءُ کُٹ کنگ بیتگ اَنت مچی ءَ ھواریں مردمانی سر ءَ تچکی ءَ تیرگواری کنگ بیتگ چریشی ءَ جتاجتائیں دمگاں زھرشانی کنوک بیران بیتگ اَنت-

زانگ بیگ ءَ اِنت کہ دالبندین مچی ءَ ایرموش کنگ ءِ ھاتر ءَ ھم واکدار پُرکار بیتگ اَنت-