TBP Balochi

بلوچستان ءِ سمگ کیچ ءَ بمب تراکے ءَ پاکستانی لشکر ءَ جانی تاوانانی دیمپانی-

مروچی زامران ءِ ھند جابشان ءَ پاکستانی لشکر بمبتراکے ءَ ھما وھد ءَ نشانگ جوڑ کنگ بوتگ کہ آھانی پیادگیں لشکر دمگ ءَ دیم ءَ روگ ءَ بیتگ اَنت۔

تراک ءِ آسر ءَ لشکر ءَ جانی تاوان ءِ ھال ھست۔

زامران ءَ پیسر ءَ ھم پاکستانی لشکر بمب تراکاں نشانگ جوڑ کنگ بوتگ اَنت کہ آیانی زمہ واری بلوچ سلاہ بندیں آجوئی گلاں زرتگ انت۔

گوستگین روچاں بلوچ لبریشن آرمی ءَ پاکستانی لشکر ءِ سر ءَ جتاجتائیں بمب تراکانی ویڈیو شنگ کتگ اَنت کہ آھانی تہ ءَ زامران ءَ پاکستانی لشکر ءِ سر ءَ تراک ءَ نشانگ کنگ ءَ گندگ بیت انت۔

مرچیگیں اُرش ءِ زمہ واری انگت ءَ کس ءَ نہ زرتگ۔

بلوچستان ءِ دمگ کلات ءَ اُرشانی تہ ءَ پاکستانی لشکر ءَ مزنیں جانی تاوانے رس اتگ۔ دراجیں درگیری ءِ تہ ءَ اُرش کنوکاں لشکر ءِ گاڑی یے دست گپتگ ءُ دمگ ءِ جاور ھال انگت ءَ ناگیگ اَنت۔

مرچی سھب ءَ کلات ءِ دمگ اسکلکو ءَ پاکستانی لشکر ءِ پیادگیں کارندہانی سر ءَ سنگر گپتگین مردماں اُرش کتگ وھدے کہ آ دمگ ءَ فوجی آپریشن ءِ ھاترا دیم ءَ روگ ءَ اِت اَنت۔ ھال انت کہ اے اُرش ءِ آسر ءَ بازیں کارندہ بیران ءُ ٹپیگ بوتگ اَنت ءُ اُرش ءِ سوب ءَ لشکر پُشتکنزی اَنت۔

دمگی مردماں گوں ٹی بی پی ءَ گشتگ کہ بیتگیں اُرش ءَ پد پورسز ءَ یک رندے پد ءَ گاڑیانی ھواری ءَ دیم ءَ روگ ءِ کوشست کتگ، ایشی ءَ پد دراجیں جنگ ءُ چوپ بندات بوتگ۔ اُرش ءَ لشکر ءِ سئے گاڑی دیم پہ دیم اُرش ءِ آماچ بوتگ اَنت ءُ اُرش کنوکاں یک گاڑی یے گوں فوجی ساماناں دستیگ کتگ۔

اے گپ ءِ ھم ھال ھست کہ جنگ ءُ چوپ ءَ لشکر ءِ یک بکتربند گاڑی یے ءَ تاوان رس اتگ۔

دمگی مردمانی رد ءَ دمگ ءَ گن شپ ءِ ھیلی کاپٹر ءُ ڈرون ءِ شیلنگ ءُ بمبتراک ءِ ھال ھست کہ جتا جتائیں جاھاں نشانگ جوڑ کنگ بوتگ انت۔ واکداراں اے درگت ءَ انگت ءَ ھچ وڑیں ھال ءُ اھوال نہ داتگ۔

بلوچستان ءِ مستریں میڈیکل سنٹر سول ھسپتال شال ءَ ڈیوٹی ءِ وھد ءَ زالبولیں ڈاکٹر ءِ سر ءَ تیزاب ءِ ارش کنگ بوتگ کہ ایشی ءِ آسر ءَ ڈاکٹر ماہ نور ناصر سک ٹپیگ بوتگ۔

بنداتی ھالانی رد ءَ آئی ءِ جسم ءِ 70 درسد ءِ کساس ءَ سُتکگ ءُ آئی ءَ را زوتیں دوا ءُ درمان کمک کنگ بوھگ ءَ اِنت۔

پولیس ءِ بنشون ءِ رد ءَ اے وئیل ءَ ھواریں کتکار نادراھجاہ ءَ پرائیویٹ لفٹ آپریٹر ءِ بستار ءَ کار کنگ ءَ بوتگ۔ کتکار وئیل ءَ چہ پد ھما دمان ءَ تچگ ءَ پد پٹ ءُ پولی واکداراں نادراھجاہ ءِ سی سی ٹی وی فوٹیج زرتگ ءُ جتا جتائیں تکاں چہ پٹ ءُ پول برجاہ اِنت۔

وئیل ءَ پد ینگ ڈاکٹر ایسوسی ایشن بلوچستان ءَ تُرندیں لیکہ درشان کتگ ءُ زالبولیں ڈاکٹر ءِ سر ءَ اُرش ءِ تُرندی ءَ ایر جتگ۔ گل ءَ گشتگ کہ ڈاکٹر ءُ میڈیکل اسٹاپ ءِ رکھینگ ءِ ناکامی پدردی انت ءُ اے وئیل سیکورٹی بندوبست ءِ بابت ءَ مزنیں جست ءُ پرس ءِ چست کنت۔

وائی ​​ڈی اے بلوچستان ءَ چہ سرکار، جاندراھی تک ءُ پولیس واکداراں لوٹ کرتگ کہ اے اُرش ءَ ھواریں ملزم زوت دزگیر بہ کن اَنت ءُ کانود ءِ رد ءَ سکیں سزا بہ کن اَنت۔ تنظیم ءَ انسداد ناشرکاری ءِ کانود ءِ رد ءَ جرمدار ءِ ھلاپ ءَ کیس نبشتہ کنگ ءِ لوٹ کتگ ۔

ڈاکٹرانی نمائندہ گل ءَ ھال داتگ کہ اگاں 24 کلاک ءِ تہ ءَ جرمدار دزگیر کنگ نہ بیت گڑا سرجمیں بلوچستان ءَ طبی ھزمتانی بائیکاٹ ءَ ھوار زبردستیں زھرشانی ءِ گامگیجانی سر ءَ ھیال ءُ لیکہ کنگ بیت۔ وائی ​​ڈی اے ءِ گشگ انت کہ اے حکومت ءِ مستریں زمہ واری انت کہ آ زالبولیں ڈاکٹراں ھوار درستیں طبی کارندھاں یک ایمنیں چاگردے ءِ ھاترا دیم ءَ بیار ایت-

بلوچ ریپبلکن گارڈز ءِ جارکش دوستین بلوچ ءَ رسانکدر ءَ شنگ کتگیں بیانے ءَ گْوشتگ کہ گوستگیں شپ ءَ بلوچ ریپبلکن گارڈز ءِ سرمچاراں سندھ ءِ دمگ شکار پور ءَ چہ سوئی ءَ سندھ ءَ روکیں گیس ءِ پائپ لائن تراکناکیں شورواں ترکینتگ ءُ تباہ کتگ۔

آئی ءَ گْوشتگ: مئے گل بی آر جی اے اُرش ءِ زمہ واری ءَ من ایت ءُ اے وڑیں اُرش داں بلوچستان ءِ آجوئی ءَ برجاہ مان اَنت۔

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں چار جون 2026 ءِ سُھب ءَ گوادر ءِ دمگ کنٹانی ءَ ھور ءِ ھند سر ءَ کاروائی کنان ءَ چار پولیس کارندہ ھما وھد ءَ دزگیر کتگ اَنت وھدے آدمگی گاڑیاں چہ زر گرگ ءَ بیتگ اَنت- سرمچاراں کارمندانی کر ءَ یک کلانشنکوف گوں میگزین ءُ یک گاڑی یے دستیگ کتگ-

جارکش ءَ گْوشتگ کہ سرمچاراں سے جون 2026 ءَ مند ءِ دمگ سورو ءَ پاکستانی پوج ءُ ایم آئی ءِ کارگس ءِ سر ءَ بازیں گرنیڈ لانچر گولھے آس داتگ کہ وتی نشانگ ءَ کپتگ اَنت- اے کاروائی ءِ آسر ءَ پوج ءَ جانی ءُ مالی تاوان چست کنگ کپتگ-

جارکش ءَ گْوشتگ کہ دگہ یک کاروائی یے سرمچاراں سے جون 2026 ءَ بلیدہ ءِ دمگ میناز ءَ پاکستانی پوج ءِ کاروان آئی ای ڈی بمب اُرش ءِ نشانگ کتگ چریشی ءِ آسر ءَ گاڑی ءَ سوار چار پوجی کارندہ مرتگ اَنت ءُ گاڑی سرجمی ءَ تباہ بوتگ-

جارکش ءَ گوشتگ دو جون 2026 ءَ نوشکی ءَ ریکوڈک منسوبہ ءَ چہ ھمگرنچ مڈی بروکیں گاڑیانی پھازوکیں پوج ءِ گاڑی سر ءَ آئی ای ڈی بمب تراک ءِ نشانگ کتگ چریشی ءِ آسر ءَ دو پوج ءِ کارمند مرتگ ءُ دو ٹپی بیتگ اَنت- اُرش ءَ پد دُژمنیں ریاستی پوج ءَ نزیکیں آبادیانی سر ءَ بیڑبرتگ لَس مھلوک لَٹ ءُ کُٹانی نشانگ کتگ ءُ مردمانی کُڈک مانداشتگ اَنت ءُ مال ءُ دلوت تاوان داتگ اَنت-

جارکش ءَ گْوشتگ کہ مئے سرمچاراں دگہ یک کاروائی یے 31 مئی 2026 ءَ کیچ ءِ دمگ شھرک ءَ ڈیم بازار ءِ ھند سر ءَ سی پیک دگ سر ءَ فرنٹیئر کور (ایپ سی) گاڑی آئی ای ڈی بمب اُرش ءِ نشانگ کتگ چریشی ءِ آسر ءَ پنچ ایپ سک کارندہ مرتگ ءُ سے ٹپی بیتگ اَنت وھدے کہ گاڑی سرجمی ءَ تباہ بوتگ-

جارکش ءَ گْوشتگ دگہ یک کاروائی ءَ سرمچاراں 31 مئی 2026 ءَ گوادر ءِ دمگ پشکان ءَ برجاہ پولیس چوکی ءِ سر ءَ اُرش کتگ آ وتی دستیگ کتگ- کاروائی ءِ میان ءَ سرمچاراں اود ءَ ساڑی پولیس کارندہ دزگیر کتگ اَنت چوکی ءَ ھستیں دو کلانشکوف ءُ دگہ پوجی ساز ءُ سامان وتی دستیگ کتگ اَنت-اشی ءَ پد پولیس کارندہ کڈن کنگ ءَ پد انسانی ہمدردی بُنیاد ءَ یل کتگ اَنت-

جارکش ءَ دیمتر ءَ گْوشتگ کہ مئے سرمچاراں 27 مئی 2026 ءَ کیچ دشت ءِ دمگ کنچتی ءَ ریاستی چاریگانی پُرکاریانی چار ءُ گوزاری ءَ شھدگ سر ءَ ناکہ بندی کتگ پٹ ءُ پول بندات کتگ- پٹ ءُ پول ءِ میان ءَ سرمچاراں عطاء اللہ ء عبدالواحد جھمنند دشت چوٹ پجّار کنگ ءَ پد دزگیر کتگ- جُست ءُ پُرس ءِ میان ءَ میاربار ءَ وتی کُتکاری منّ اِتگ اَنت کہ آ پوج ءِ واستا سرمچارانی چاریگی کنگ، دمگ ءَ گشت ءُ دُزی ڈُنگی وڑیں سلّکاریاں ھمگرنچ بیتگ- اشی ءَ اَبید آ دمگی مردماں زورانسری پوجی بُنجلاں برگ ءُ آیاں پوجی چریک جوڑ کنگ ءِ جُھد ھم کتگ- جُست ءُ پُرس ءِ میان آئی ءَ بازیں دگہ پوجی چاریگانی نام داتگ اَنت کہ پٹ ءُ پول ءَ پد جرم پدر بیگ ءَ زوت گُڈی آسر ءَ سر کمگ بیتگ-

جارکش ءَ گوشتگ بی ایل ایپ ءِ نیمگ ءَ اے مرد باز رند ءَ کڈن کنگ بیتگ کہ آ اے وڑیں راجی دُژمنیں پُرکاریاں چہ دستکش بہ بیت آئی ءَ گل ءِ نیمگ ءَ چہ کڈنی سنجیدگی ءَ چہ زیرگ ءُ پوج ءِ واستا چاریگی ءِ دستکش بیگ جاہ ءَ دُژمن ءِ واستا وتی پُرکاری گیش تُرند کتگ اَنت- سرجمیں جرمانی جُست ءُ پُرس سرجم بیگ ءَ پد سرمچاراں 30 مئی ءَ دشت کھڈان ءِ ھند سر ءَ آ تیرگواری کتگ ءُ کشتگ اَنت-

جارکش ءَ گْوشتگ بلوچستان لبریشن فرنٹ گوادر، مند ،بلیدہ، نوشکی، شھرک ءُ دشت ءَ بیتگیں اے سرجمیں اُرشانی زمہ واری ءَ منّ اِیت-

بلوچستان ءِ جتاجتائیں دمگاں مزن شھدگانی سر ءَ بلوچ آجوئی لوٹوکیں مردمانی سلاہ بندانی کنٹرول ءَ انت کہ اود ءَ راہ بند ءِ ھمراھی ءَ گاڑی ءُ کنسٹرکشن کمپنی ءِ جاہ نشانگ جوڑ کنگ بوتگ انت۔

بیلہ ءُ اورناچ ءِ نیام ءَ ولہ پٹ ءَ مزنیں کساسے ءَ سلاہ بندیں مردماں شال ءُ کراچی ءِ مزن شھدگ ءِ سر ءَ ناکہ بندی کتگ ءُ سنیپ چیک کتگ وھدے کہ یک تعمیراتی کمپنی ءِ جاہ ءِ سر ءَ اُرش کنگ بوتگ ءُ بھاری مشینری ءَ ھوار گاڑی سوچگ ءُ تباہ کنگ بوتگ اَنت۔

دومی نیمگ ءَ چمالنگ کوھلو روڈ ءِ سر ءَ سلاہ بندیں مردماں شھدگ ءِ سر ءَ وتی کنٹرول کتگ ءُ کلاکانی کلاک سنیپ چیک کتگ۔ دومی نیمگ ءَ نوشکی ءَ احمد وال ءِ سر ءَ اُرش ءَ مادی باریں گاڑی نشانگ جوڑ کنگ بیتگ اَنت ۔

انگت ءَ اے اُرشانی زمہ واری کس ءَ نہ زرتگ انت۔ زانگ بہ بیت کہ بلوچ لبریشن آرمی ءِ مُدامی اُرش ءُ شاھدگانی سر ءَ کنٹرول ءِ جار ءِ پد ءَ سرجمیں بلوچستان ءَ شال ءُ تپتان روٹ ءَ ھوار مادی باریں گاڑیانی لوڈنگ پہ بے مھتلیں وھد ءَ بند کنگ بیتگ انت۔

بلوچ لبریشن آرمی ءِ میڈیا چینل ہکّل ءَ پاکستانی لشکر ءِ سر ءَ جتا جتائیں آئی ای ڈی اُرشانی ویڈیو شنگ کتگ اَنت۔

شنگ بیتگیں تامر ءَ چمالنگ ءَ پاکستانی لشکر ءِ میجر توصیف بھٹی تراک ءَ نشانگ کنگ ءَ ھوار شال، زامران، ھاران، نوشکی، دکی، سوراب ءُ سیاہ دیم ءَ پاکستانی پوج ءِ سر ءَ بیتگیں نُھ تراکانی ندارگ پیش دارگ بیتگ انت-

ہکل میڈیا ءِ نیمگ ءَ شنگ بوتگیں ویڈیو ءَ گندگ بیت کہ گوستگیں ماہ ءَ چمالنگ ءَ بوتگیں تراک ءَ پاک فوج ءِ مزنیں افسر میجر توصیف بھٹی ءِ گاڑی سرجم ءَ تباہ بوتگ ءُ دگہ گاڑی یے سلاہ بندیں اُرش ءَ نشانگ جوڑ کنگ بوتگ۔ بی ایل اے ءِ جارکش جیئند بلوچ ءِ رد ءَ اے آپریشن ’زراب‘ ءِ انٹیلی جنس ءِ ھالانی بنیاد ءَ کنگ بوتگ۔

شال ءِ دمگ پنجپائی ءَ پاکستانی اُرد ءِ دو گاڑیاں نشانگ جوڑ کنگ ءِ ندارگ ھم پیش دارگ بوتگ اَنت کہ ایشی ءِ تہ ءَ کارندہاں سی ٹی ڈی ءِ چار کارندھانی بیرانی ءُ شش ٹپی بوھگ ءِ پدرائی کتگ۔

مئی ءَ زمران ءَ پاکستانی لشکر ءِ پیادگیں لشکر ءِ سر ءَ تباہ کنوکیں آئی ای ڈی اُرش ءِ ویڈیو ھم ھوار کنگ بوتگ کہ ایشی ءِ تہ ءَ پاکستانی لشکر ءِ یک سپاھیگے چہ دیم پہ دیمیں تراک ءَ لگگ ءَ پد بازیں پاداں کپگ ءَ گندگ بیت۔

ایشانی ھوار ویڈیوانی تہ ءَ خاران ءَ بمب ءِ ناکارہ کنوکیں اسکواڈ ءِ باسک ءِ کُشگ، دکی ءَ کارندھانی سر ءَ تراک، کانک ءِ مستریں شاھدگ ءِ سر ءَ پُھل ءِ تباہ کنگ، نوشکی ءَ فورسز ءِ پوسٹ ءِ تباہ کنگ ءُ سوراب ءِ مستریں شاھدگ ءِ سر ءَ بکتربندیں گاڑی ءِ تباہ کنگ گندگ بیت۔

ویڈیو ءِ گڈی بھر ءَ زمران ءِ دمگ ساہ دیم ءَ پاکستانی لشکر ءِ سر ءَ تراک ءِ ندارگ ھوار اَنت کہ ایشی ءِ تہ ءَ گندگ بیت کہ فورسز بمب ڈسپوزل اسکواڈ ءُ دگہ دو گاڑی چہ اود ءَ گوزگ ءَ اَنت، چہ ایشی ءَ پیسر کہ تراک ءِ تہ ءَ سیمی گاڑی نشانگ جوڑ کنگ بیت۔

بلوچستان ءِ دمگ پنجگور ءَ پاکستانی لشکر ءَ شش مردمانی جَنگ ءِ ٹاہ داتگ-

پاکستانی پوج ءِ بنشون ءِ رد ءَ آئی ءَ چیریں ھالانی رد ءَ کاروائی کتگ ءُ شش سلاہ بندیں مردم جَتگ انت-

بنشون ءِ رد ءَ جنگ بیتگیں مردمانی گور ءَ سلاہ، بارود ءُ دگہ جنگی ساز ءُ سامان دزکپتگ انت-

دمگی اھوالانی رد ءَ پاکستانی پوج ءَ شش لاش پنجگور ھسپتال ءَ سر کتگ انت-

لس اھوالاں تنی وھدی جنگ بیتگیں مردمانی بارو ءَ دگہ راستیں اھوال دیم ءَ نیتکگ انت-

زانگ بہ بیت پنجگور ءَ ھوار بلوچستان ءِ بازیں جاھاں پاکستانی پوج ءِ آپریشن برجاہ انت ءُ گوستگیں دو روچ پیش پوج ءَ ھبدہ مردمانی جَنگ ءِ ٹاہ داتگ ات-

چہ کراچی ءَ زورانسری بیگواھی ءِ آماچیں بلوچ شائر حبیبہ پیر جان ءِ جنک ءَ ویڈیو بیانے شنگ کتگ ءُ گْوشتگ کہ آئی ءِ مات ریاستی لشکر ءَ آوار جتگ ءُ گوں وت برتگ، چہ ایشی ءَ پد آ انگت ءَ دیم ءَ آرگ نہ بوتگ۔

بیگواھیں بلوچ زالبولیں شاءر ءِ جنک ءِ گْوشگ اِنت کہ آئی ءِ مات ءِ زورانسری بیگواھی ءَ پد مُدام فورسز ءِ کارندہ آئی ءِ لوگ ءَ آیگ ءَ اَنت ءُ آئی ءِ موبائل ءُ دگہ زاتی ساماناں ھم پلگ ءَ اَنت۔

آئی ءَ گوشتگ کہ آئی ءِ مات ءِ زورانسری بیگواہ کنگ ءَ ھواریں ریاستی کارندہ آئی ءُ آئی ءِ کھول ءَ را تنگ کنگ ءَ اَنت۔

آئی ءَ گیش گوشتگ کہ ریاست جعلی اکاؤنٹ ءُ ناشناسیں رسانکدرانی درچ ءَ آئی ءِ مات ءِ بابت ءَ جتا جتائیں جعلی ھال شنگ کنگ ءَ اِنت۔ آئی ءِ گشگ ءِ رد ءَ آئی ءِ مات پیسر ءَ ھم سرکاری ادارگاں آوار جتگ۔

بلوچی زبان ءِ شاعر حبیبہ پیر جان 25 مئی 2026 ءِ شپ ءَ پاکستانی لشکر ءَ آوار جتگ ءُ آئی ءِ لوگ ءِ نزیک ءَ گلشان مزدور ، سیمی سٹریٹ ، بلدیہ ٹاؤن ، نیول کالونی ءَ سر بوتگ ءُ آ چہ لوگ ءَ آوار جتگ ءُ لوگ ءِ سامان پرشت ءُ پروش کنگ بیتگ انت ۔

بلوچ شاعر حبیبہ پیر جان ایشی ءَ پیسر 22 مئی 2022 ءَ دزگیر کنگ بوتگ بلے سئے روچ ءَ پد یلہ کنگ بوتگ۔

کھول ءَ حبیبہ پیر جان ءِ زوت یل کنگ ءِ لوٹ کتگ ءُ گشتگ آ قانون ءِ رد ءَ آمیدگس ءَ پیش کنگ بہ بیت یا زوت یلہ کنگ بہ بیت۔

گوادر ءِ تیاب دپی دمگ کنٹانی ءِ ھند ھور ءَ سلاہ بندیں مردمانی نیمگ ءَ چہ چار پولیس کارندھاں آوار جتگ ءُ وتی ھمراھی ءَ برتگ اَنت-

دمگی اِھوالکار ءِ رِد ءَ وئیل ھما وھد ءَ بیتگ وھدے پولیس کارندہ ھمکروچی ھساب ءَ ڈیوٹی ءِ سر ءَ دمگ ءَ ساڑی بیتگ اَنت- اِھوالکار ءِ گوشگ اِنت کہ سلاہ بندیں مردماں کارندہ انگیر ءَ کتگ ءُ آیاں گھگیری ءِ موہ ندیگ ءَ بید گپتگ اَنت- اشی ءَ پد سلاہ بندیں مردماں پولیس کارندھانی کارمرزی سرکاری سلاہ ءُ گاڑی ھم دستیگ اَنت-

اِھوالکار ءِ رِد ءَ چاریں کارندہ سلاہ بندیں مردم وتی ھمراھی ءَ ناشناسیں جاھے ءَ برتگ اَنت-

بلے وئیل سرکاری ھساب ءَ آیانی پجّار نہ بیتگ اَنت نانکہ اے وئیل ءِ زمہ واری دگہ گلے ءَ منّ اِتگ-