TBP Balochi

بلوچستان ءِ دمگ بارکھان ءَ پاکستانی لشکر ءِ نیمگ ءَ کورکاری بمباری ءُ تیرگواری ءَ زالبول ءُ زھگاں ھوار بازیں مردم بیران ءُ ٹپیگ بوتگ اَنت۔

ھالانی رد ءَ ناشناسیں سلاہ بندیں مردمانی اُرش ءَ پاکستانی لشکر ءِ 12 کارندہ بیران بوتگ انت۔ اُرش ءَ پد پاکستانی لشکر ءَ دمگ ءَ مزنیں کچے ءَ آپریشن بندات کتگ ۔

دمگی مردم ءُ چمدیستگینانی گشگ ءِ رد ءَ پورسز ءِ نیمگ ءَ کتگیں بمباری ءَ زالبول ءُ چُک ھوار لس مردم نشانگ جوڑ بوتگ اَنت۔ اے کاروائی ءِ آسر ءَ کم چہ کم 12 مردم بیران ءُ 3 مردم سک ٹپی بوتگ اَنت۔

بیران بوتگیں مردمانی تہ ءَ علی ء سلطان اُمر (40 سال)، گلزار ءِ جنک بیبل اُمر (30 سال)، میر جان ء علی اُمر (2 سال)، بھنگان ءِ جنک سومری اُمر (35 سال)،بالاچ ء سبزو اُمر (70 سال)، شاری اُمر (22 سال)، بالاچ ءِ چُک رحمن (18 سال)، رحمان ء بالاچ اُمر (18 سال)، نائخو بنت جمالان اُمر(17) اللہ بخش ء بالاچ اُمر (6 سال)، سادو بنتِ بالاچ (13 سال)، ھاپو بنت بالاچ (8 سال) ءُ مھرنگ بنت بالاچ (2 سال)۔

ٹپیگانی تہ ءَ شیر ءِ جنک زر بی بی (55 سال)، بالاچ ءِ زھگ ھزار خان (9 سال) ءُ بالاچ ءِ جنک اسرار (15 سال) ھوار اَنت۔

دمگی مردماں اے ھم گْوشتگ کہ یک گاڑی یے ءِ تہ ءَ بازیں مردمانی سوتکگیں لاش گندگ بوتگ اَنت۔ البت اے درگت ءَ سرکاری تک ءَ راستی ءُ انکاری نہ بیتگ انت۔

بلے اے درگت ءَ واکدارانی لیکہ انگت ءَ پدر نہ بوتگ۔

بلوچستان ءِ دمگ ڈیرہ بگٹی ءِ سوئی شھر ءُ آئی ءِ کش ءُ گور ءِ دمگاں چہ زورانسری بیگواہ کنگ ءِ بازیں نوکیں کیس دیم ءَ اتکگ اَنت کہ اود ءَ پاکستانی لشکر ءُ کاؤنٹر ٹیررازم ڈیپارٹمنٹ ءِ نیمگ ءَ شھریانی دزگیر کنگ ءَ پد بیگواہ کنگ درچ گیش بوتگ انت۔

ھالانی رد ءَ چہ سوئی شھر ءَ دگہ سئے مردم زورانسری بیگواہ کنگ بوتگ انت کہ آھانی پجار نبی بخش ء مھوت بگٹی، نبی بخش پنام ءِ لایون ء بنا بگٹی ءُ عثاما پنام ءِ نادو ء نیک محمد بگٹی ءِ ناماں زانگ بیتگ انت۔ اے سئیں بگٹی ٹک ءِ ھبیبانی ٹک ءَ گوں سیادی دار اَنت۔ بنشون ءِ رد ءَ گوستگیں سئے روچانی تہ ءَ ھمے ٹک ءَ گوں سیادی داروکیں پنچ ورنا زورانسری ءَ بیگواہ کنگ بوتگ اَنت ھمے وڑ سوئی شھر ءَ ھشت مردم نشانگ جوڑ کنگ بوتگ اَنت۔

دومی نیمگ ءَ سوئی ءِ پٹ فیڈر ءِ دمگ ءَ فرنٹیئر کور ءِ کارندھاں گلمیر ء بند علی بگ-ی دزگیر کتگ ءُ ناشناسیں جاھے ءَ برتگ کہ آئی ءِ بابت ءَ انگت ءَ ھچ وڑیں سرپدی دیگ نہ بوتگ۔

دیمترا 7 اپریل ءِ سھب ءَ سی ٹی ڈی ءِ کارندھاں سوئی ءِ محمد کالونی ءَ کریم ء رحیم بخش بگٹی زسر بیگواہ کتگ ءُ 9 اپریل 2026 ءَ صدیق ء نزر علی بگٹی ھم سی ٹی ڈی ءَ دزگیر کتگ ءُ بیگواہ کتگ کہ آ انگت ءَ بیگواہ انت۔

ھالانی رد ءَ ڈیرہ بگٹی ءَ پاکستانی لشکر ءِ نیمگ ءَ مزنیں کچے ءَ کریک ڈاؤن کنگ بوگ ءَ ایں کہ ایشی ءِ تہ ءَ 65 سالی زالبولے ھم نشانگ جوڑ کنگ بوتگ۔ اے جنین شاہل ممدازی بگٹی ءِ جنین اِنت ءُ ایف سی ءِ کارندھاں چہ پیرکوہ ٹاؤن ءَ دزگیر کتگ۔

ھمے کارروائی ءِ تہ ءَ دگہ 9 مردم چہ ڈیرہ بگٹی ٹاؤن ءَ سی ٹی ڈی ءَ زورانسری ءَ بیگواہ کتگ اَنت کہ آیانی پجار چوش اِنت:

ارباز ء اکرم خان بگٹی، قاسم علی ء لیمو خان ​​بگٹی، جبار خان ء حیات بگٹی، متین ء حیات بگٹی، سجاد ء بلال بگٹی، امین ء نور دین بگٹی، رھزان ء داد محمدبگٹی ءُ دین محمد ء رحیم بخش بگٹی ءُ دوست علی ء ملوک بگٹی ءِ ناماں بیتگ انت۔

بنشون ءِ گشگ انت کہ اے نوکیں کریک ڈاؤن گمانی رنگ ءَ دمگ ءَ تیل ءُ گیس ءِ شوھازگ ءِ منسوبھگانی رد ءَ کنگ بوگ ءَ انت کہ ایشی ءِ ھاتر ءَ گمانی فوجی آپریشن ءِ تیاری ھم گیش کنگ بوتگ انت۔

انسانی ھکانی گلاں بلوچستان ءَ زورانسری ءَ بیگواہ کنگ ءِ گیش بوھوکیں وئیلانی سر ءَ دلپدردی درشان کتگ ءُ اے کار ءَ را بنیاتی انسانی ھکانی مزنیں لگتمالی لیک اِتگ ءُ لوٹ کتگ کہ اے رھبند ءَ زوت بند کنگ بہ بیت۔

بلوچستان لبریشن پرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ سرمچاراں یازدہ اپریل 2026 ءَ آواران ءِ دمگ آھوری ءَ زورگریں پاکستانی پوج ءِ ھشت گاڑیانی ھمگرنچیں کاروان سنگر گپتگ ءُ نشانگ کتگ- سرمچاراں راکٹ لانچرز، اسنائپر رائفلز ءُ وتکاریں سلاھاں چہ کاروان ءِ اولی ءُ رند گاڑی یکیں وھد ءَ نشانگ کتگ دانکہ دُژمن ءِ سُر ءُ پُر داشت کُت بہ کن ایں- اے مزنیں اُرش ءَ دُژمن ءِ سے گاڑی ناکاراہ کتگ اَنت، چریشی ءِ سوب ءَ پنچ پوجی کارندہ جاہ پہ جاھی مرتگ ءُ چار سک ٹپی بیتگ اَنت-

جارکش ءَ گوشتگ بی ایل ایف ءِ سرمچاراں یازدہ اپریل 2026 کیچ ءِ دمگ دشت کنچتی کراس ھند سر ءَ فرنٹئر کور (ایف سی) ءِ بمب ڈسپوزل اسکواڈ ءِ ٹولی ریموٹ کنٹرول آئی ای ڈی بمب (IED) تراک ءَ چہ نشانگ کتگ – اے کاروائی ءِ آسر ءَ بمب ڈسپوزل اسکواڈ ءِ گاڑی ءِ دیم ءِ بھر سرجمی ءَ تباہ بیتگ، چریشی ءِ آسر ءَ گاڑی ءَ سوار سے پوجی کارندہ جاہ پہ جاھی مرتگ اَنت-

جارکش ءَ گوشتگ ھمے روچ ءَ یازدہ اپریل 2026 ءَ بی ایل ایف ءِ شھری گوریلہ ٹولی ءَ شال ءِ دمگ پنجپائی ءَ شادینی ءِ ھند سر ءَ گمانی انٹیلی جنس ھالانی بُنیاد ءَ آپریشن کتگ – سادھیں پوشکانی تہ ءِ پولیس فورس ءِ سے کارندہ شھدگ سر ءَ ناکہ جتگ کہ دمگی ڈرائیوراں چہ زور زر گپتگ اِت – گل ءِ شھری گوریلہ ٹولی ءَ کاروائی کنان ءَ زر گرگ ءَ دلگوشیں اے کارندہ انگیر ءَ کتگ ءُ دزگیر کتگ اَنت- پٹ ءُ پول ءِ میان ءَ آیانی گور ءَ چہ سرکاری سلاہ ءُ گاڑی دستیگ کتگ اَنت- اشی ءَ پد دمگی بلوچ ءُ پشتون بیگ ءِ سوب ءَ چہ گل ءَ آ انسانی ھمدردی ءَ چہ سک کڈن کنگ ءَ پد یل داتگ اَنت-

جارکش ءَ گْوشتگ کہ سرمچاراں دوازدہ اپریل 2026 ءَ یک مھکمیں کاروائی ءِ میان ءَ چاگی ءِ دمگ امین آباد ءَ برجاہ پولیس چوکی ءِ سر ءَ اُرش کتگ ءُ آ سرجمی ءَ دستیگ کتگ – دستیگ ءَ پد چوکی ساڑی سرجمیں سرکاری سلاہ ءُ دگہ پوجی ساز ءُ سامان وتی دستیگ کتگ اَنت-

جارکش ءَ گْوشتگ سرمچاراں دوازدہ اپریل 2026 ءَ چاگی ءِ دمگ کرودُک ءَ برجاہ پولیس چوکی نشانگ- سرمچاراں چوکی ءِ سر ءَ اُرش کتگ ءُ آ وتی دستیگ کتگ ءُ اود ءَ ساڑی سرکاری سلاہ دستیگ کتگ اَنت-

جارکش ءَ گْوشتگ اے کاروائی ءِ دْرچ اِنت مئے سرمچاراں دمگ ءَ چہ گوزوکیں بُنجاھی شھدگ سر ءَ یک کلاکے ءَ تاں تُرندیں ناکہ بندی کتگ – ناکہ بندی ءِ میان ءَ شھدگ سر سرجمی ءَ پوجی کنٹرول برجاہ داشتگ دُژمن ءِ کجام ھما وڑیں سُر ءُ پُرانی دارگ ءِ ھاتر ءَ پٹ ءُ پول کتگ- وتی مول ءُ مراد ءِ سرجم کنگ ءَ پد سرمچاراں گپتگیں سلاھاں ھوار پہ سلامتی وتی اوتاکانی نیمگ ءَ شتگ اَنت-

جارکش ءَ گْوشتگ گوستگیں روچ ءَ یازدہ اپریل 2026 ءَ سرمچاراں بارکھان ءِ دمگ تکھڑا ءَ برجاہ یک موباھل ٹاورے نشانگ کتگ- سرمچاراں ٹاور ءِ سسٹم تیرگواری کتگ ءُ ناکاراہ کتگ ءُ پد ءَ ٹاور ءِ بُنجاھی کنٹرول کمرہ ءُ مشینری مانداشتگ اَنت- اے ٹاور ءَ ناں تھنا دُژمن ءِ ھال اھوالی ءِ یک آسراتی یے بیتگ بلکیں چاریگی ءِ ھاتر ءَ ھم کارمرز کنگ ءَ بیتگ اَنت، کہ سرمچاراں سرجمی ءَ تباہ کتگ-

جارکش ءَ گوشتگ سرمچاراں ھشت اپریل 2026 ءَ جھاؤ ءِ دمگ کوٹو ءَ موباھل ٹاور ءِ سر ءَ اُرش کتگ – ٹاور ءِ مشینری ءُ جنریٹر کمرہ مانداشتگ ءُ سرجمی ءَ تباہ کتگ- دُژمن اے ٹاوراں چہ سرمچارانی سُر ءُ پُرانی سر ءَ نگاہ ایر کنگ ءِ بے سوبیں جُھدے کنگ ءَ اِنت ،بلے ما دُژمن ءِ اے سرجمیں پندلاں بے سوب کنگ ءِ سرجمی ءَ بودناکی دار ایں-

جارکش ءَ گوشتگ کہ گوستگیں ماہ ءَ پانزدہ مارچ ءَ سرمچاراں مشکے ءِ دمگ پروار بدڑو ءَ برجاہ موباھل ٹاور ءِ مشینری مانداشتگ ءُ تباہ کتگ اَنت- ٹاور ءِ گچین ءِ بھر نشانگ کتگ اَنت ءُ دُژمن ءِ ھال اھوالی نیٹ ورک اے ناگیگیں دمگ ءَ سرجمی ءَ بند بہ بیت-

گُڈی ءَ جارکش میجر گْوھرام بلوچ ءَ سرجمیں اُرشانی زمہ واری منّ اِتگ اَنت ءُ گوشتگ کہ ما تچک کنگ لوٹ ایں کہ زورگپتگیں بلوچستان ءِ شھدگ ءُ گلّیاں دُژمن ءِ ھرچ وڑیں سُر ءُ پر مئے نگاہ ءَ ایر اَنت ءُ ما کجام ھما وھد ءَ کجام جاہ ءَ اُرش کنگ ءِ بودناکی دار ایں-

بلوچستان ءِ دمگ سوراب ءَ گوستگیں شپ ءَ ایف سی ءُ پولیس ءَ دو ناشناسیں لاش کل کتگ انت-

گیشیں اھوالانی رد ءَ گوستگیں شپ ءَ دو ژانگولیں لاش ایف سی ءَ سوراب ءِ نادراہ جاہ ءَ سر کتگ انت –

دمگی مردمانی رد ءَ گوستگیں شپ ءَ دو لاشانی آرگ ءَ پد پولیس ءُ ایف سی ءَ لاش ھسپتال ءَ چِست کتگ ءُ ساھت سَے ءُ نیمگ ءَ سوراب ءِ کبرستان ءَ کل ءُ کسارات کتگ انت-

دمگی مردمانی رد ءَ لاشانی پجار ایف سی ءُ پولیس ءَ بہ کتگ انت ابید ءِ پجار ءَ کل ءُ کسارات کنگ بیتگ انت-

زانگ بہ بیت بلوچستان ءَ دراجیں وھدے ءَ اے دابیں وئیل دیم ءَ آیگ ءَ انت کہ اود ءَ بازیں لاش ابید ءِ پجار ءَ کل ءُ کسارات کنگ بوگ ءَ انت- دومی نیمگ ءَ انسانی ھکانی گلانی گوشگ انت کہ اے لاشانی توک ءَ گیشتریں مردم پیسر ءَ آوار جنگ ءُ بندیگ کنگ ءَ پد کشگ ءُ چگل دیگ بوگ ءَ انت –

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں بیانے ءَ گْوشتگ کہ بی ایل اے ءِ سرمچاراں یک ھاسیں ءُ نوکیں گامگیجے ءِ درچ ءَ گوادر ءِ دمگ جیونی ءِ زر ءَ پاکستانی لشکر ءِ گشت ءِ کشتی ءِ سر ءَ سلاہ بندیں اُرش ءِ نشانگ جوڑ کتگ۔ اے سوبمندیں زری آپریشن ءِ آسر ءَ کشتی ءِ سر ءَ سواریں سئے کارندہ مرتگ انت۔

آئی ءَ گْوشتگ: اے اُرش ءِ زمہ واری ءَ بلوچ لبریشن آرمی من ایت ۔ زمین ءَ پد زر ءَ دژمن ءِ ھلاپ ءَ آپریشن ءِ اے بندات بی ایل اے ءِ جنگی رھبند ءِ تہ ءَ یک نوکیں ءُ ھاسیں ردومے کہ ایشی ءِ مول ءُ مراد زری راہ ءُ درانی درچ ءَ بلوچ مڈّیانی لٹ ءُ پُل ءِ دارگ ءُ دژمن ءَ ھر نیمگ ءَ تاوان دیگ اِنت۔

جارکش ءَ گوشت کہ اے اُرش ءِ ھوالگ ءَ رسانکدر ءَ سرجمیں بیان شنگ کنگ بیت۔

گوھرام شھید بوتگ

نبشتہ کار: توکل بلوچ

دی بلوچستان پوسٹ

چوناھا وتی زمين مردُم ءَ سک دوست بيت پرچا کہ مات اِنت ءُ مات ءِ مھر دُنيا ءِ تہ ءَ هما پاک ءُ پلگار تریں مھر اِنت۔ مات ءِ مھر ءِ توک ءَ لالچ نيست، لَب ءُ مَلام نيست پميشکا زمين مات ءَ گوں تشبيہ ديگ بوتک۔ ھمے وڑ ءَ بلوچ چہ دُرستاں گيش وتی گُلزمین ءَ بندوک اِنت۔ گلزمین پہ بلوچاں ھما جاه اِنت کہ انسان وتی زِند ءَ درستيں چیزاں اولی سر ءَ بِندات كنت، اولى كدم ببت گوں چاگرد ءَ ھور بیت۔ سرجم ءِ بندات چہ گُلزمین ءَ بیت، پمیشکا بلوچ ھر کجا بروت بلے چہ وتی گُلزمین ءَ سِست نہ کنت۔

گوهرو وهدے كہ تئی ژانگولیں جون ديست منی دل چہ امروز ءَ شُت، منی دل ءَ كھر گندگ آتک من نزانتگ اے رمزان ءِ ماه ءَ من كُجام پيم ءَ گوازين آں. من هـيران بوتاں اگاں رمزان يک پاکیں ماهے گُڑا گوهرو چوں رُخصت بوت چہ امروز ءَ..؟ بلے پد ءَ كہ من جيڑ اِت جنگ ھچ نہ گِند اِیت ءُ پلوچ ءَ دانكہ زمين نيست گڑا بلوچ زندگ نہ اِنت۔ بگندئے زندگی سرجم ءَ دروگے۔ اد ءَ ھر مردُم چو دروگے ءَ لھتیں دروشم ءَ زِندگ اِنت۔ بلے تھنا ھما مردم پہ ابد زندگ بنت کہ آھانی مول ءُ مراد ھست۔ ءُ گوھرو ءِ مول ءُ مراد زاتی نہ بوتگ انت، اے پہ زمین ءَ بوتگ انت، ھمے زمین کہ مارا شپچراگیں روچ ءِ تہ ءَ ساھگ دنت ءُ مرچی تُنّیگ اِنت۔

او مئے گوھرو ! تئی ءُ گلزمين ءِ ميان ءَ انچيں بے دروريں سيادى یے هـست اِنت، كہ كرناں چہ ترا يكجاه كنت۔ تو ھما كردار ئے كہ آئى ءَ را نبشتہ كنگ، پھمگ يا کہ آئى ءَ را وانگ ءُ دربرگ ارزان نہ اِنت۔ تئى وڑیں كردارانی سر ءَ نبشتہ كنگ ءِ واست ءَ لبزانى يكجاه كنگ منى وڑیں كسانیں ءُ نابوديں مردمے ءِ دست ءِ كار نہ انت. دل گُش اِیت باز نبِشتہ بِہ کناں بلے من ءَ بِہ بگوش كہ تئی سر ءَ نِبشتہ كنگ ءِ هاتر ءَ منی دست هـمراه بوگ ءَ نہ انت۔ تو يک لس كردارے ءِ واهند نہ ئے بلكیں يک پگرے ءِ واهند ئے. يک انچيں پگرے كہ تئى چمانى تہ ءَ چو آس ءَ روک انت، تئى لبزانى تہ ءَ چو كارچ ءَ تيز ءُ تئى جھد ءِ تہ ءَ چو كوه ءَ مھكم اَت۔ اے جھد تئی هون ءِ رھبند جوڑ بوتگ۔ گوں ایشی ءَ تو جنزگ ءَ بوتگ ئے شھیدی تئی واب ءُ زات ءَ بوتگ ءُ انوں تئی نام گُلزمين ءِ شھيدنی نامانی تہ ءَ زندگ اِنت- تو شھید بوتگ ئے، بلے تئى پگر انگت زندگ اِنت، نہ مرتگ ئے، پرچا کہ تو ھما وھد ءَ كہ وتی گڑی ساه ءَ هم كُربان كنگ ءَ هِچ پُشت نہ كِنز ات ئے ءُ تو هون ریتک انت پہ ھمے گُلزمين ءَ۔

گوهـرام ءِ پگر، وپا ءُ مھر پہ وتى زمين ءَ مُدامى زِندگ اَت، مدام وتى شعور ءِ سر ءَ اَمل كُتگ۔ وھدے کہ اِسلام آباد ءَ زھرشانى بوتگ يا كم سنگتانى يكجاه كنگ بوتگ گڑا مارا ھمے واھند ءَ ديم ءُ دست كتگ اے ھمے مُخلصیں تب انت كہ تھنا گوں گُلزمين ءَ مھر ئِے كُتگ۔ بے مھر ءَ كَے اِنت كہ وتى ساه ءَ بكش ايت ءُ تراوليں ساهتاں گو همراہ بيت تئى بچكندگ کہ همُک ساهت ءَ تو پہ ما ندر كُتگ انت ءُ دُرست پشت كپتگ انت، اے دُرست زمانگی پيتى یے ءِ تہ ءَ كُبل انت ءُ چہ درستان دگہ ديمے ءَ انت۔

آشوب ءِ تہ ءَ وهدے يک سنگتے روت گڑا ھزاراں سر جوڑ كنت، مروچى يک گوھرامے شُتگ گڑا دگہ ھزاراں گوھرام جوڑ بوتگ، اے جنگ روچ پہ روچ تُرندتر بوان اِنت. آجوئى الم كَيت اِنت بہ گندئے اے آزاتى ءَ ما ديست كُت مہ كناں، بلے منى يک پدريچے الم ءَ اے آجوئى ءَ گِند اِيت۔ چوناھا مَرگ كس ءَ دوست نہ بيت، بلے گپ كہ گُلزمين ءِ كَيت گڑا مردم وتى زِند ءَ چہ سرگْوز انت ءُ مرگ ءَ پہ وشی امباز کن انت۔

وھدے ھمے سرڈگار ءِ سر ءَ ما زِند گوازينگ ءَ ایں اگاں اے سرڈگار آجو مہ بيت مئے زندمان گار بيت ءُ ما گوں اے سرڈگار ءَ ھوار بيگواه بئیں، اے سرڈگار مئے پجّار اِنت، مئے ايمان اِنت، مئے شرم ءُ ننگ اِنت، مئے هـستانک اِنت، اگاں ما جھان ءِ دلبند ءَ پجارگ بئیں گڑا ھمے سرڈگار ءُ آئی ءِ بچانى داتگیں ديمونيانى برورد اِنت۔

وتن ايوک ءَ سيمسرانى نام نہ انت، اے هما ساهانى امانت اِنت كہ شھيداں پہ مئے باندات ءِ واست ءَ داتگ انت. شھيد ريگزار ءِ تہ ءَ کل نہ بنت، آ راج ءِ زمير ءِ تہ ءَ زِندگ بنت. وھدے پہ وتن ءَ زمانگ سک گران بيت گڑا شھيدانى بہ توارى ءِ کربانى ءِ توار چہ درستاں گيشتر زبردستيں توار جوڑ بيت. آجوئى ءِ همک سُھب شھيدانى شپانى گواه اِنت-

ھما كہ وتی جان ءِ ديگ ءَ پہ هم سر جھل نہ كتگ آنت، آيوكیں پدریچ ءِ آجوئى ایشانى هونانى تہ ءَ اِنت. گُڑا ھمے درور ءَ اگاں چہ ھاک ءَ پُل شنگ بہ بنت گڑا اے اَجب نہ اِنت پرچا کہ بازيں گوهرام ءِ وڑیں بدن آنت ھاک ءِ تہ ءَ واب اِنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچستان ءِ تیابدپی شھر گوادر جیونی ءَ تیرگواری ءَ کوسٹ گارڈ ءِ سَے کارندہ بیران-

گیشیں اھوالانی رد ءَ جیونی ءَ تیاب ءَ ناشناسیں سلاہ بندیں مردماں تیرگواری کتگ – چریشی ءَ کوسٹ گارڈ ءِ سَے کارندہ بیران بیتگ انت-

واکداراں کوسٹ گارڈ ءِ سَے کارندھانی بیرانی ءِ ھال راست کتگ ءُ گوشتگ سلاہ بنداں زِر ءَ تیرگواری کتگ ءُ کوسٹ گارڈ ءِ سَے کارندہ بیران بیتگ انت-

تیرگواری ءَ بیران بیتگیں کارندھانی پجار نائک افضل، سپاھی جمیل ءُ سپاھی عمر ھوار انت –

تنی وھدی اے اُرش ءِ زمہ واری کس ءَ نہ زرتگ بلے گوستگیں ماہ ءَ ھمے دمگ ءَ بلوچ لبریشن آرمی ءَ چیک پوئنٹ ءَ یک اُرشے ءَ دو کارندھانی کوش ءُ آیانی سلاھانی دستیگ کنگ ءِ زمہ واری من اتگ ءُ تامر شنگ کتگ ات-

بلوچستان ءِ دمگ جھل مگسی ءَ لیویز پورس ءِ دو چوکیانی سر ءَ سلاہ بندانی اُرش ءُ کنٹرول ۔

جھل مگسی ءَ لانڈ ءُ سفراڑی ءَ لیویز فورس ءِ دو چوکی سلاہ بندیں مردماں کنٹرول کتگ ءُ کارندہ دزگیر کتگ اَنت ءُ کارندھانی سلاہ ءُ موٹر سائیکل پُل اتگ اَنت۔

دمگی مردمانی رد ءَ سلاہ بندیں مردمانی سیادی گوں بلوچ سلاہ بندیں آجوئی گل ءَ بوتگ کہ آیاں لیویز ءِ دوئیں پوسٹ کنٹرول کتگ اَنت ءُ دزگیریں مردماں گوں وت برگ ءَ بوتگ اَنت۔ دمگ ءِ نندوکیں مردمانی لوٹ ءِ رد ءَ یل کنگ بوتگ اَنت بلے آیاں کارندھانی سلاہ ءُ گاڑی گوں وت برتگ اَنت۔

زانگ بہ بیت کہ گوستگیں ماہ ءَ جھل مگسی ءَ کوٹرو پولیس اسٹیشن بلوچ لبریشن آرمی ءِ جنگ ء چوپاں پد کنٹرول کتگ ات، وھدیکہ پد ءَ ترندیں اُرشے ءَ دیم ءَ جنزوکیں لشکری ​​کاروان ءَ مزنیں تاوانے رس اتگ ات۔ اُرش ءِ آماچ بوتگیں پورسز ءِ سئے گاڑی ھاک ءُ پر بیتگ ءُ تباہ بوتگ انت۔

ھمے وڑ ءَ مستونگ ءَ ھواریں دمگ دشت کمبیلا ءَ سلاہ بندیں مردماں پاکستانی پوج اُرشے ءِ نشانگ کتگ چریشی ءِ آسر ءَ پوج ءَ جانی تاوانانی چِست کنگ کپتگ-

اھوالانی رد ءَ چریشی ءَ پیسر سلاہ بندیں مردماں بنجاھی شھدگ بستگ بیتگ-

پاکستانی پوج ءَ یک شھری یے آوار جتگ ءُ بیگواہ کتگ-

زورانسری آوار جنی ءِ نشانگ بیتگیں شھری ءِ کھول رِد ءَ نُھ اپریل 2026 ءَ پاکستانی پوج ءَ واحد بلوچ ء کریم بخش، جھمنند شاپک ڈانڈل آوار جنگ ءَ پد بیگواہ کتگ-

کھول ءِ گوشگ اِنت کہ واحد بلوچ ءِ سیادی کیچ ءِ دمگ ڈانڈل شاپک ءَ اِنت- آ چہ بُنجاھی بازار تربت ءَ پاکستانی پوج ءَ آوار جتگ ءُ وتی ھمراھی ءَ برتگ، چریشی ءَ پد آ دیم ءَ آرگ نہ بیتگ-

کھول ءِ واکدار ءَ انسانی ھکانی گلاں چہ دزبندی کتگ کہ آ اے وئیل گامگیج بہ زور اَنت ءُ واحد بلوچ زوت یل کنگ ءِ دلجمی بدے اَنت-

بلوچستان ءِ دو جتاجتائیں دمگ آواران ءُ کیچ ءَ پاکستانی پوج ءِ کارمندانی سر ءَ اُرش کنگ بوتگ-

گیشیں ھالانی رِد ءَ بلوچستان ءِ دمگ آواران ءَ شمبے ءِ روچ ءَ پاکستانی لشکر ءِ کاروان ءِ سر ءَ سلاہ بندانی اُرش ءِ ھال سر بیتگ ءُ جانی تاوان ءِ ھال-

دمگی اِھوالکار ءِ رِد ءَ اے وئیل آواران ءِ دمگ آھوری ءَ بیتگ، اود ءَ پاکستانی پوج ءِ ھشت گاڑیانی ھمگرنچیں کاروان سُر ءُ پُر ء بیتگ-

ھالانی رِد ءَ سلاہ بنداں پیسر ءَ سنگر گپتگ ءُ نندوک بیتگ اَنت ءُ کاروان نزیک ءَ سر ءَ بیتگ اُرش کتگ-

اُرش ءِ وھد ءَ سلاہ بنداں وتکاریں سلاہ کارمرز کتگ چریشی ءِ آسر ءَ بازیں کارندھے بیران ءُ ٹپی بیتگ اَنت- بلے سرکاری نیمگ ءَ بیرانیانی کچ پدر کنگ نہ بیتگ اَنت نانکہ اُرش ءِ تُرندی زانگ بیتگ-

ھمے وڑ کیچ ءِ دمگ دشت کنچتی کراس ءَ پاکستانی پوج بمب اُرش ءِ نشانگ کنگ بیتگ-

ھالانی رِد ءَ تراک ھما وھد ءَ کنگ بیتگ وھدے فرنٹیئر کور (ایف سی) بمب ڈسپوزل ٹولی پٹ ءُ پول ءَ دلگوش بوتگ اَنت-

تراک ٹولی ءِ نزیک ءَ کنگ بیتگ، چریشی ءِ آسر ءَ جانی تاوان ھال اِنت-

تنی وھدے دوئیں اُرشانی زمہ واری ھچ گل ءَ نہ زرتگ اَنت-