TBP Balochi

بلوچستان ءِ دمگ کیچ مند ءَ لوگانی سر ءَ سلاہ بندیں ٹولی ءِ بیڑ دو ورناہ بیگواہ ۔ دمگی مھلوک

دمگی مردماں دی بلوچستان پوسٹ ءَ گوں گوشتگ گوستگیں شپ ءِ سئے بج ءَ مند ءِ دمگ بلوچ آباد ءَ سرکاری کمک ءَ ھستیں سلاہ بندیں “ڈیتھ اسکواڈ” ٹولی ءِ کارمنداں عبدالواحد ءِ لوگ ءَ بیڑ برتگ زھگ ءُ زالبول کم شرپ کرتگ انت ءُ دو ورناہ زورانسری بیگواہ کتگ انت ۔

دمگی مردمانی رد ءَ زور بیگواہ کنگ بوتگیں ورنایانی تہ ءَ یکے حمود ء مھمد جان انت کہ یکرندے پیسرا لشکری کارمندانی دست ءَ بیگواہ کنگ بیتگ دومی ورناہ ءِ نام سلتان ء عثمان انت۔

زانگ بہ بیت بلوچستان ءَ سیاسی مھلوک ءِ گوشگ انت کہ سرکاری کمک ءَ جوڑ بیتگیں سلاہ بندیں گل ورنایانی آوار جنی ءُ دگہ ناشریاں دزمانجن انت ءُ مھلوک ءِ سر ءَ زوراکی کنگ ءَ کارمرد کنگ بوگ ءَ انت۔

بلوچستان ءِ جتا جتائیں جاھاں آپریشن ءِ نام ءَ سرکار مھلوک ءَ زورانسری لڈ ءُ بار ءَ لاچار کنگ ءَ انت کہ چریشی ءَ اود ءَ چہ بُن پیروکی زمین ءُ ھنکیناں مھلوک زبھر بوگ ءِ گمان انت۔

بلوچستان ءَ سلاہ بندیں گلانی ھلاپ ءَ کاروائیانی درچ ءَ اود ءَ جھمنندی مھلوک ءَ فوج اَچ وتی لوگ ءُ جاگھاں یل دیگ ءَ کڈنی کنگ ءَ انت ۔

بلوچستان دو جتا جتائیں جاھاں انی پاکستانی فوج ءَ مھلوک لڈ ءُ بار ءَ کڈنی کتگ انت کہ ایشانی تہ ءَ کلات ءُ پسنی ھوار انت۔

بلوچستان ءِ اُستانی سرکار ءَ شورپارود کلات ءَ 5 ھزار کھولاں داں سِی اکتوبر ءَ اَچ وتی ھنکیناں لڈ ءُ بار کنگ ءِ ھکم نامہ داتگ انت۔

اھوالاں ھمے پدر بیتگ کہ اے کھولاں کساس 30 ھزار مردم ھوار انت کہ آیاں ھزاروکی بنجلاں بر انت ، سروزیر بلوچستان سرفراز بگٹی ءَ اے لڈ ءُ بار ءِ سرجم ءَ منگ نامہ داتگ۔

ھمے درچ ءَ مھکمہ داکلہ ایڈیشنل چیف سیکریٹری مھمد ھمزہ شفقات ءَ گوشتگ داں 30 اکتوبر ءَ لڈ ءُ بار ھرکس ءَ نہ کت گڑا آ کھول ءِ ھلاپ ءَ انتزامیہ کاروائی کنت۔

سرکار ءِ واکداراں اے پدر کتگ شور پارود سرکار ءِ زمین انت اے دمگ ءَ سلاہ بندیں مردم جاڑیگ انت اے جاہ ءَ آپریشن کنگ بیت انت ءُ چریشی ءِ کھولاں بنجلاں برگ ءَ ایں۔

ھمے ڈول ءَ بلوچستان ءِ تیابدپی شھر پسنی ءَ ھم پاکستانی پوج ءَ بازیں کساسے ءَ مھلوک لڈ ءُ بار ءَ لاچار کتگ انت۔

پسنی شادی کور گورستانی ءُ تراتی ءَ مھلوک چہ لوگاں کش اتگ ءُ اود ءَ پوج پہ آپریشن ءَ بازیں کچے ءَ دیم ءَ جنزگ ءَ انت۔

اھولانی رد ءَ پوج ءَ مھلوک چہ لوگاں کش اتگ ءُ جتا جتائیں جاھاں برتگ انت کہ چریشی ءَ پد پوج دمگ ءَ دیم ءَ جنزگ ءَ انت۔

زانگ بہ بیت ایشی ءَ پیش سوبائی سرکار ءَ پاکستانی پوج ءِ ھکم ءِ سر ءَ نوشکی ءِ بازیں جاھانی ھالیگ کنگ ءِ ھکم داتگ انت کہ چریشی ءِ ھلاپ ءَ بازیں کچے ءَ شھریاں زھرشانی کتگ ات۔

ھمے وڑ ھمے سال ءِ اپریل ءِ ماہ ءَ پاکستانی پوج ءَ بلوچستان ءِ دمگ سوراب ءَ شھریاں لڈ ءُ بار کنگ ءِ ھکم داتگ ات۔ بلےشھریانی انکاری ءَ 25 ءَ گیش شھری گمانی لٹ ءُ کٹ کنگ ءَ پد دزگیر کنگ بیتگ ات انت ءُ پد ءَ ناشناسیں جاھاں برگ بیتگ ات انت۔

بلوچستان ءِ سیاسی ءُ چاگردی گلاں ھوار دمگی مردمانی نیمگ ءَ یکشل ءَ سوبائی سرکار ءِ اے دابیں گامگیجانی سر ءَ زھر ءِ درشانی کتگ بلے سرکار ءِ دل ءَ ھچ وڑیں رھم نیتکگ ۔

ساھتے گوں عدنانیں تلار ءَ

نبشتہ کار :ڈاکٹر وشین

اولی بھر

دی بلوچستان پوسٹ

جولائی ءِ گرمیں روچ اِت اَنت، لوار ءُ تبد ءِ زِبراکیں آسکَدگ برجاہ اَت۔ کوہ کہ دائم ءَ مُھکم اِت اَنت جولائی ءِ گرمیں روچاں گیش ترند ءُ ما کُلبر ءَ اوتاکے ءَ نندوک اتیں۔ بیگاہ ءِ ساھت اَت سنگتے ءَ واکی ٹاکی ءَ ھال کُت کہ ما نزّیک ایں چاھے پر کن اِت۔ ساھتے ءَ رند سنگت اتک ءُ سر بوت اَنت اے دگہ سنگتانی پجّی ءَ سبز ءُ لاگریں مردے ھم گون اَت گوں کہ آئی ءَ را ناسی ئیں گُد گْورا اَت ءُ سیاھیں بیگے بڈّ ءَ اَت۔

سنگت اتک ءُ نشت اَنت دروت ءُ دراھی بوت، گوں سنگتاں ھال پُرسی ءُ ھال اھوال بوت گپ ءُ تران برجاہ اِت اَنت کہ شھید المان ءَ سبزیں مرد ءَ را جُست کہ سنگت تئی نام کے اِنت۔

“تلار” سبزیں مرد ءَ پسّو دات
اے کوہ ءَ اولی رند اَت کہ من تلار دیستگ اَت چوناھا چد ءُ پیش تلار من شھر ءَ ھم زانتگ اَت بلے بس ھمنچک کہ اے مرد ءِ نام ادنان پکیر اِنت ءُ بس! دومی روچ ءَ کہ سُھب ءَ ما وابجاہ ءَ چہ پاد اتک ءُ دیوان جاہ ءَ اتک ایں گنداں ادنان پکیر پیسرا دیوان جاہ ءَ ساڑی اَت۔نزاناں ادنان ءِ گورا کجام زیبناکی ءُ چونیں مزاجے ھست اَت کہ ما گوں اولی گِندگ ءَ نزّیک بیان بیتیں۔بنداتی یک دو روچ ءَ انچش کم کم ءَ گپ ءُ تران، ھال پُرسی، کرے ءَ روگ ءُ سگریٹ ءِ کشّگ ءُ شیر وانی، کندگ ءُ مزاک ءُ ھمے میان ءَ ما کم کم ءَ نزّیک بیان اتیں۔کساس ھپتگے ءَ رند ما اندازہ بیست ءَ بُرز سنگت سپرے ءَ درکپت ایں ءُ اے سپر ءَ ادنان ھم ھوار اَت۔

دوزداہ بج ءِ ساھت اَت ما سپر ءِ سنگتاں وتی توپک، جاٹہ، چاگل ءُ اے دگہ الّمی ئیں سامان زُرت اَنت ءُ پہ سپر ءَ درکپت ایں۔ مگرب ءِ نزّیک ءَ ما جاگھے ءَ سر بوت ایں ءُ شپ ءَ ھمود ءَ جل اتیں ۔اے دگے روچ ءَ دیم ءَ پہ سپر ءِ ھاتر ءَ سے، چار سنگت لاگانی شوھاز ءَ شُتگ اِت اَنت، لھتے سنگت سامانانی چِن ءُ لانچ ءَ گوں دست گٹ اَت، مارا چاہ ءِ پیالھے دست ءَ اَت ءُ ما چاہ ورگ ءَ اِت ایں کہ “آوازے۔۔۔“ھو گرانی ءِ آوازے ھست اِنت۔ سنگتاں شِنگ بہ اِت” اے پدائی بھشتی اَت کہ آپریشن ھیروپ ٹو ءَ ماں پسنی ءَ پدائی اِش کُرت۔ مارا ھال دات ئِے کہ سنگتاں ڈرون اِنت ما کُل سنگت شِنگ بوت ایں ءُ من ءُ ادنان ءَ کہ چاہ ءِ پیالو مارا دست ءَ اَت زُرت ءُ نزّیکیں دازے ءَ پُترت ءُ چیر بوت ایں کساس سے ادار ءَ ڈرون چکّر اِت ءُ مارا پہ دیمی سپر ءِ روگ ءَ نہ اشت ئِے ما یک شپے انگت ھمد ءَ جل اِت ایں اے دگہ روچ ءَ بیگاہ ءَ ما سپر دوبر بندات کُت۔ءُ مگرب ءِ ساھت ءَ ما جاگھے ءَ سر بوت ایں ءُ شپ ءِ ودار ءَ داں ھمود ءَ داشت کہ مئے دیمتری سپر شپ ءِ سپرے اَت کہ مارا شپ ءَ سپر کنگی اَت پرچا کہ مارا روڑے ءَ گوزگی اَت کہ اے جاگہ ءَ روچ ءِ رژنائی ءَ روڑ ءَ گوزگ نہ بیت کہ مھلوک گند اِیت پمیشکا ما شپ ءِ ودار ءَ نندوک اِت ایں ءُ میزان میزان ءَ روچ گوزان اَت روچ ایر بُک اِت ءُ تھاری ءَ مانشانت بلے گاڑیانی دراجیں کتار انگت ءَ ھ برجاہ اَت کہ مارا گوزگ ءَ موہ اِش ندات۔

ما روڈ ءِ کش ءَ کسانیں بُوٹگے ءِ پُشت ءَ نندوک اِت ایں کساس دہ یا پانزدہ دمان ءَ پد روڑ ءَ کہ گاڑیانی کتار کمو کم ترّان بوت گڑا ما اشتاپ اشتاپ ءَ روڑ گوازینت ءُ آ دست بوت ایں ءُ وت ءَ چہ گاڑیانی لیٹاں اندیم کُت ءُ تچکی ءَ کور گپت ءُ روان اِت ایں چار پنچ کیلو میٹر ءِ روگ ءَ پد ما کسانیں دَمے ءَ پہ نشتیں۔

ما پہ دم ءَ نشتگ اِت ایں کہ اناگتی “مزنیں آوازے بوت” بزانکہ چوکی ءَ چہ پوج ءَ مارٹرے جَت۔ سنگتاں گوشت کہ انچش سَٹّی مارٹر جنگ ءَ اِنت ساھتے نہ گْوست کہ دگے مارٹرے مئے نزّیک ءَ کپت اے مارٹر ءِ آواز انچش مزن اَت کہ گوش ئے زاناں مئے پادانی بُن ءَ کپت۔ سنگت یکبرے پد ءَ شنگ بوت اَنت ءُ گام اِش ترندتر کُت اَنت تھار ماھی ءَ ما کپان ءُ پرشان، پُشت ءَ پشت کپان بس دیم پہ وتی منزل ءَ روان اِت ایں یازدہ بَج ءِ وھد ءَ سنگتاں آپسرے ءَ داشت ءُ نشت اَنت دَم اِش کُرت من چَوٹ کشّ اِت اَنت داں پاد تراول اَنت ادنان اتک ءُ منی کر ءَ نشت سگریٹے روک ئِے کُت ءُ من ءَ ھم سگریٹے دات ئِے ما دوئیں ھاموشی ءَ ھمد ءَ سِک ءِ دل ءَ تچک بوت ایں مارا انچش دمبرتگ اَت ءُ واب گینگ اتیں کہ سنگتے ءَ اناگتی گوشت؛ پادا اِت رواں کہ شپ ءِ دارگ ءِ جاگہ انگت دیم ءَ اِنت بلے چاگلاں ھمد ءَ آپ کن اِت کہ دیم ءَ آپ نیست اِنت چد ءَ چہ تکریبن نیم کلاک ءِ پَند ءَ پد ما شُت ءُ جاگھے ءَ داشت سنگتاں روچ ءَ پتکگیں نان چہ چادر ءَ کشّ اِت گوں ناہ ءُ کمّیں شیراں ءُ لھتیں ڈبّکاں سنگتاں دات ءُ ما وارت اَنت۔ نان ءِ ورگ ءَ پد من ھمے دمان ءَ سِنگے ءَ گوں وت ءَ تِکہ دات ءُ واب کپگ ءَ اِتاں کہ ھمنچک ءَ ادنان اتک ءُ من ءَ گوشت ئِے “بریں کرے ءَ سگریٹے کشّیں ءُ ھمود ءَ وپسیں” من وتی توپک زُرت ءُ گوں ادنان ءَ کمے گستا تر شُتاں شپ ءِ تھاری ءَ سپر ءِ کپگ ءُ پرشگ ءُ ژند پندیاں مارا دیوانی نہ کُتگ اَت کہ ما دمان ءِ دمان واب کپت ایں چوناھا من ادنان ءُ دگے دو سنگت ما مدام شپ ءَ نشتگ ءُ گپ ءُ تران ءُ دیوان کُرتگ بلے اے شپی ما کُل وھدیکہ ما واب ءَ چہ چم بوتک اَنت داں مئے چاریں نیمگاں بُرزیں، مُھر ءُ مزنیں کوہ اِت اَنت ۔“بچار زامُو ءَ!” سنگتے ءَ گوشت۔ھو یار زامُران ۔۔۔ما زامُران ءَ اِت ایں سُھب ءَ ماھلو اناواری ءَ ما سپر بندات کُت زامُو ءِ بُرزیں ڈَکّاں سر کپان اِت ایں جولائی ءِ ماہ ءِ سُھب ءِ سر ءَ کہ ما ڈکّاں سر کپان اِت ایں سُھب ءِ زیبائیں کوش ءَ مارا ملاراں کُتگ اَت ءُ تاھیر دیگ ءَ اَت۔ ھیر سپر برجاہ اَت ما دیم ءَ روان اِت ایں کساس دوازدہ بَج ءِ ساھت اَت کہ ما جاھے سر بوت ایں کہ دیم ءَ مزنیں کوھے اَت سک مزنیں کوھے ءُ نی روچ ءِ برانزانی گرمی ھم گیش کپتگ اَت ھمے کوہ ءِ جھل ءَ آبشارے ھست اَت مارا گُژن ءَ ھم پتاتگ اَت ءُ ما سک دمبرتگ اِت ایں گڑا ما ھمے آبشار ءَ جلّ اِت ایں۔سنگتاں ورگ ءِ جوڑ کنگ بندات کُت، کسّے گوں چاھے ءَ دستگٹ اَت، لھتے سنگت دار چنگ ءُ مُچ کنگ ءَ اَت ءُ ھمے میان ءَ من ادنان ءُ اے دگہ دوئیں سنگت آپ ءِ سر ءَ جان ءِ شودگ ءَ درکپت ایں جولائی ءِ گرمیں روچ بہ بنت ءُ زامو ءِ مزنیں گْورمانی سارتیں آپ، جان شودگ ءِ لزّت دو ھمنچک گیش بیت ما کہ آپ ءَ دور کت داں گنداں مئے سپرانی درائیں ژندی چیر ترّ اِت اَنت اے آبشار ءَ ما کمے ساھت ءَ داشت ورگ وارت، الکاپیں دمے کت، وپت ءُ آرامے کُرت سے یا چار بج ءِ نزّیک گْوراں ما ھمے بُرزیں کوہ ءَ لکپگ بندات کُت۔ لھتیں سنگتاں لاگ زُرت اَنت ءُ دیم ءَ بوت اَنت ما چاریں سنگت پُشت ءَ اِت ایں ءُ بُرزیں کوہ ءَ لکّپان اِت ایں کوہ انچش بُرز اَت کہ مارا پہ سر کپگ ءَ کساس چِل منٹ ءَ بُرز لگّ اِت ءُ چار ءُ پنچ جاہ ءَ نشت ءُ دم ھم کُرت دانکہ کوہ ءِ بُرز بُرزی سر ءِ ٹُلّ ءَ سر بوت ایں گوں سر بیگ ءَ ما گوں انچیں ندارگے ءَ دُچار کپت ایں کہ مئے ارواہ ئِے وشنود کُت: مئے دیم ءَ زامُو ءِ بھشتیں ندارگ اَت، روچ ایر بُکّگ ءَ دلمانگ اَت، سارتیں گواتے کشّگ ءَ اَت، کوہ ءِ بُرز ءَ سنگانی سر ءَ لھتیں نام لکّوک اِت اَنت کہ اے سنگتانی میان ءَ بازیں سنگتے شھید بوتگ اَت ءُ بازینے ھست ءُ ھیات اِت اَنت۔

اے ھما جاگہ اِنت کہ وھدے سنگت ھمے کوہ ءِ سر ٹُلّ ءَ کہ سر بوتگ اَنت گڑا آیاں ھمد ءَ وتی نام پہ یاتگاری نبشتہ کُرتگ اَنت من ءُ ادنان ءَ ھم سِنگے ءِ سر ءَ وتی نام کش ماں کش ءَ نبشتہ کُرت اَنت۔ “انی روچے ھم منی سر ھمود ءَ کپتگ اَت گوں بُرزیں کوہ ءِ سر کپگ ءَ من ءَ یاتانی امبارے ءَ گوں وت کُت ءُ اناگتی منی چم ھمے سِنگ ءَ کپت اَنت کہ اود ءَ ما وتی نام نبشتہ کُرتگ اِت اَنت ھر دوئیں نام ھما داب ءَ ھمود ءَ نبشتہ اِت اَنت بلے اے رندی کسّے ءِ کمّی ھست اَت من ءَ گُمان بوت کہ اگاں سِنگاں گپ کنگ بہ زانتیں داں آیاں الّم من ءَ جُست گپتگ اَت کہ تو وتی ھمبرائیں سنگت پرچا نیارتگ گوں من ھمنچک ابیتک ءُ ملور ترّ اِتگ اِتاں بس منی مجگ ءَ ادنان ءِ شیرے پشت کپتگ اَت کہ آ روچی ناکو ءَ ھمے جاگہ ءَ ونتگ اَت۔

اے جاگہ، اے موسم ءَ گوں مردماں
توار بیت، توار کیت، توار روت

اے مُچّی ءَ، اے جاگہ ءَ، اے تلّو ءَ
ھزار بیت، ھزار کیت، ھزار روت”

سنگتاں ھمد ءَ کسانیں دَمے کُرت ءُ پد ءَ دوبر وتی منزل ءِ نیمگ ءَ جُنزان بوت اَنت ءُ ما ھم پُشت ءَ گون اِت ایں گوں سنگتانی درکپگ ءَ پد من ءُ ادنان کمے انگت ءَ ھم ھمود ءَ نشت ایں۔ وھدے زمین آجو بیت کوھاں نشتگیں سرمچار وتی میتگ ءَ رواں ھرکس وتی بچّاں مدّتے ءَ پد گِند اِیت ءُ گُلائیش کنت بلے ھما سرمچار کہ اے جنگ ءَ شھید بوتگ اَنت آیانی گِس باریں چون بنت؟ آ مات باریں اے ساھت ءَ چے جیڑگ ءَ بیت کہ وھدے کوھاں چہ سنگت کاینت بلے آئی ءِ بچ گون نہ اِنت۔۔۔زامُران ءِ روزردی دمانے اَت، سگریٹے مئے دست ءَ اَت کوہ ءِ بُرزیں بندے ءِ سر ءَ ما نندوک اِت ایں ادنان ءَ اناگتی جیڑت۔۔۔ڈاکٹر آ ساھت باریں چون باں یار؟

“ھو یار” ۔۔۔۔ من دگہ گیشیں گپ نہ جت، ما وتی توپک ءُ کلّی بڈّ ءَ کُرت اَنت ءُ رھادگ بوت ایں اوتاک کمے دور اَت ما شپ ءَ داں اوتاک ءَ سنگتانی کر ءَ سر بوت ایں نشت ایں آرام کُت ورگے وارت ءُ من ءُ ادنان ءَ کمبلے زُرت ءُ شُت ایں وپسگ ءَ سُھب ءَ کہ ما دیوان جاہ ءَ اتک ایں دیوان جاہ چہ سنگت ءَ پُرّ اَت دو روچ ءَ ما ھمد ءَ نشتیں ءُ سیمی روچ ءَ ما سینزدہ سنگت دیمتری سپر ءِ ھاتر ءَ چہ اوتاک ءَ درکپت ایں۔ مئے دیم ءَ دگہ دو روچ ءِ سپر ھست اَت ما گوں تروالیں پاداں میزّاں میزّان ءَ، کم کم ءَ پُشت ءَ روان اِت ایں۔“آوازے ھست ۔۔۔”“ھیلیانی آواز اِنت۔” اے ھدائی کُلمیرؔ اَت کہ دشت ءَ ھدائی اِش کُرت ما چہ ھیلیانی آواز ءَ شِنگ بوت ایں ءُ ساھتے ءَ پد ھیلیانی آواز گار بوت اَنت ما یکبرے پد ءَ سپر بندات کُت دو روچ ءَ پد ما جاھے سر بوت ایں کہ چداں چہ مئے اوتاک دُور نہ اَت بلے مارا دمبرتگ اَت ءُ ژند ءُ پند اِت ایں، مارا مئے تروالیں پاد دیمتر ءَ برگ ءَ نیلگ ءَ اِت اَنت ءُ شپ کپگ ءَ کموک پیشتر ما ھمد ءَ داشت۔۔۔۔ ما چو مدامی رنگ ءَ دیوان کُت ءُ من ءَ انگت ھم یات اِنت کہ اے دیوان ءَ ادنان ءَ وتی لچّہ” ابیتکیں لچّھے بلے” ونتگ اَت کہ ٹُکّرے جھل ءَ داتگ؛

نوں لچہ ءَ وتی چراگ کُشتگ اَنت
“ھمائیں تو ادا نہ ئے”
“دریچھاں دَرا نہ ئے”
ءُ دور ءُ نزیکّ ءَ نہ ئے”
“ھمائیں من ھم نشتگاں”
“مُدام گڈی لچہ ءِ من آھری سر ءَ “رساں
“ارادہ اِنت ترا گشاں”
“اے گڈی لچہ اِنت منی”
“بلے منی ءُ لچہ ءِ میان ءِ کشک تئی

“درامدی ءِ گیراں تَند پوش اِتگ”
“در اَتکگاں چِداں”
“نی من کہ لچہ ءِ گورا رواں”
“من ءَ گوش اِیت”
“ترا چہ گیش من ءَ تئی سینگ ءِ

“کلاش ءِ نَل ابیتک کنت”

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت۔

وزیر داکلہ بلوچستان ءُ کور کمانڈر ءِ تربت ءَ آیگ ءِ ھالانی پد ءَ شھر ءَ اناگتی سیکورٹی بند ءُ بست کنگ بوتگ ۔ شھر ءِ پترگی ءُ درآیگ ءِ راھانی سر ءَ سکیں چار ءُ گزاری کنگ بوہگ ءَ انت ءُ مسافر گاڑیانی پٹ ءُ پول کنگ بوہگ ءَ انت ءُ ٹریفک ءِ سر ءَ ھورت چاری کنگ بوہگ ءَ انت۔

بنشون ءِ رد ءَ بلوچستان ءِ سر وزیر ءِ اسپورٹس ءُ ورنائانئ کارانی مشیر مینا مجید ءِ برات اورنگزیب مجید ءِ بیگواھی ءِ جیڑہ ءِ سر ءَ مزنیں کچے ءَ دیوان برجم دارگ بوتگ کہ ایشی ءِ تہ ءَ آئی ءِ یل کنگے گمانی آپریشن ءُ دمگ ءِ سرجمیں سیکورٹی جاور ھالانی سر ءَ چار ءُ تپاسی کنگ بوتگ۔ اے دیوان ءَ آئی جی ایف سی ساؤتھ ءِ مزنیں کارندہ ءُ انٹیلی جنس ایجنسانی بھر زوری ءِ ھم ھال بوتگ۔

دمگی بنشونانی گوشگ انت کہ گند ءُ نند ءَ کور کمانڈر ءَ اورنگزیب مجید ءِ زوت ءُ ایمنیں جان سلامتی ءِ ھاتر ءَ سیادی داروکیں واکداراں سکیں کڈنی داتگ۔ اے درگت ءَ ھال ھست کہ سیمسر دمگاں مزنیں کچے ءَ آپریشن ءِ بندات کنگ ءِ پیشکش ءِ سر ءَ ھم ھیال ءُ لیکہ کنگ بوھگ ءَ اِنت۔

دومی نیمگ ءَ تربت شھر ءِ رؤگ ءُ درآھگ ءَ ھوار جتا جتائیں دگانی سر ءَ سیکورٹی ترند کنگ بیتگ ۔ ھالانی رد ءَ سرکاری کارندہ ھم کارگسانی روگ ءَ دارگ بوتگ اَنت کہ ایشی ءِ سبب ءَ وانگ ءُ زانگ ءِ کارگس، جان سلامتی ءِ کارگس، ڈپٹی کمشنر ءِ کارگس، کمشنر ءِ کارگس، بنجاہی سرکار ءُ فوڈ ڈیپارٹمنٹ ءِ کارمنداں ھوار وکیل ءُ مھلوک ءَ مشکلاتانی دیمپانی بوتگ۔ گشگ بیتگ کہ بازیں کارمند ءُ دگہ بازیں کارمند وتی کارگس ءُ آمیدگساں سر نہ بوتگ اَنت ءُ لھتے کارمند کہ پیسرا ھما جاہ ءَ بوتگ اَنت انگت ھما جاہ ءَ بند اَنت۔

یات دارگ بہ بیت کہ ھالانی رد ءَ گوستگیں چار شمبے ءِ روچ ءَ مینا مجید ءِ برات اورنگزیب مجید مند ءِ دمگ چہ بلوچ آباد ءَ سلاہ بندیں مردماں گوں سلاہ ءُ گاڑی ءَ برتگ ءُ ایشی ءَ پد آئی ءِ بابت ءَ ھچ وڑیں سرجمیں ھال دیم ءَ نہ اتکگ۔

ایشی ءَ ابید اژدری جاورانی رد ءَ پنجگور شھر ءِ بازار سرجم ءَ بند کنگ بوتگ اَنت ، ایشی ءِ سوب ءَ شھر ءِ کاروباری چست ءُ ایر مھتل بوتگ اَنت ءُ بازار ویران بوتگ اَنت ۔

شھر ءِ جتا جتائیں چوک ءُ در ءُ درآہگ ءِ راہ ءُ دراں مزنیں کساسے ءَ لشکر اوشتوک بوتگ اَنت ءُ ھمے وھد ءَ کہ ناگتی جاور ھال ءِ سبب ءَ لس مھلوک وتی لوگاں بند اَنت۔

رپورٹانی رد ءَ ملازمیں مردم وتی پجار کنگ ءَ پد کارگساں شُت کن اَنت ءُ وتی پجار ءِ پیش دارگ ءَ پد لوگ ءَ ھم شُت کن اَنت۔ بلے پنجگور ءِ جاور ھال ءِ بابت ءَ سرکاری کارندہاں ھچ وڑیں ھاسیں لیکہ دیم ءَ نہ داتگ۔

بلوچ ریپبلکن گارڈز ءِ جارکش دوستین بلوچ ءَ وتی شنگ کتگیں درشان ءَ گوشتگ سرمچاراں گوستگیں شپ ءَ بلوچستان ءِ دمگ کچھی سنی ءَ زورگریں پاکستانی لشکر ءِ مستریں کیمپ ءِ سر ءَ گوں کسان ءُ مزنیں سلاہاں اُرش کتگ۔ سرمچاراں نوکیں تھرمل اسکوپ کارمرز کتگ ءُ زورگیریں دژمن جانی ءُ مالی تاوان داتگ۔

جارکش ءَ گوشتگ مئے گل بی آر جی اے اُرش ءِ زمہ واری ءَ من ایت ءُ مئے اے وڑیں اُرش داں بلوچستان ءِ آجوئی ءَ برجاہ مان اَنت .

کیچ ءِ دمگ بلیدہ سلوئی کور ءَ لٹ ءُ کٹ کتگیں دو مردمانی لاش دزکپتگ انت۔

لاشانی پجار بیگواھیں یاسر ء بلوچ خان ءُ مھران ء حاجی اکبر ءِ ناماں بوتگ انت۔

یات بہ بیت یاسر ھمے سال ءِ مارچ، ءُ مھران گوستگیں سال ءِ نومبر ءَ پاکستانی لشکر ءِ دزگیر کنگ ءَ پد زور بیگواہ کنگ بوتگ انت۔ مرچی دوئیں مردمانی لاش دزکپتگ انت۔

زانگ بہ بیت کہ بلوچستان ءِ جتائیں دمگاں چہ لاشانی دزکپگ برجاہ اِنت۔ اے لاشانی گیشتریں بھر بے پجار ءَ کل ءُ کسارات کنگ بنت ءُ بازیں لاش زوراکی ءَ بیگواہ بوتگیں مردمانی ناماں کنگ بنت۔

بلوچ لبریشن آرمی ءِ جارکش جیئند بلوچ ءَ رسانکدراں شنگ کتگیں درشان ءَ گوشتگ سرمچاراں چہ 9 اکتوبر 2026 ءَ بگر داں 20 اکتوبر 2026 ءَ بلوچستان ءِ جتا جتائیں دمگاں 12 روچانی تہ ءَ ترندیں اُرش 34 کاروائی کتگ انت۔ اے اُرشانی تہ ءَ زورگیریں لشکر ءِ 14 کارندہ ءُ 9 فوجی انٹیلی جنس ءُ ’’ڈیتھ اسکواڈ‘‘ ءِ کارندہ مرتگ اَنت ءُ ’’زرکاری ناکہ بندی‘‘ ءِ گل ءِ پالیشی ءِ چیر دستی ءَ ھاسیں شاھدگانی سر ءَ ھواریں کنٹرول ءُ سنیپ چیکنگ ءِ امل سوبمندیں رنگے ءَ برجاہ بوتگ۔ اے کارروائیانی تہ ءَ سرمچاراں زورگیریں لشکر ءِ یک جاڑیگیں کارندھے ھم دزگیر کتگ۔ بی ایل اے ءِ شش سرمچار گوں زورگیریں لشکر ءَ جتا جتائیں پڑاں دیم پہ دیم جنگ ءَ بہادری ءَ جنگ کتگ ءُ نمیران بوتگ انت۔

جارکش ءَ گوشتگ 9 اکتوبر ءَ تربت ءِ دمگ ناصر آباد ءَ سرمچاراں سلاہ بندیں اُرشے ءَ زورگیریں پاکستانی لشکر ءُ ‘ڈیتھ اسکواڈ’ ءِ باسک نشانگ جوڑ کتگ اَنت کہ ایشی ءِ آسر ءَ ڈیتھ اسکواڈ ءِ یک کارندھے جاہ پہ جاہ ءَ مرتگ۔

جارکش ءَ گوشتگ 13 اکتوبر ءَ ہرنائی ءِ دمگ شاہرگ ءِ سجو ءِ جاہ ءَ سرمچاراں زورگریں پاکستانی فوج ءِ گاڑی ءَ را آئی ای ڈی ءِ تراک ءَ نشانگ جوڑ کتگ کہ ایشی ءِ آسر ءَ دژمن ءِ سئے کارندہ جاہ ءَ مرتگ ءُ چار سک ٹپی بوتگ اَنت ءُ فوجی گاڑی سرجم ءَ تباہ بوتگ۔ ھمے روچ ءَ چاگی ءِ دمگ دالبندین ءِ کرودک ءِ جاہ ءَ سرمچاراں شال ءُ تفتان ءِ تجارتی راہ ءِ سر ءَ دو تجارتی گاڑی گپتگ ءُ یک گاڑی یے سوتکگ ءُ ناکارہ کتگ۔

جارکش ءَ گوشتگ 14 اکتوبر ءَ مستونگ ءِ دشت بابا ءِ جاہ ءَ سرمچاراں زورگیریں پاکستانی لشکر نشانگ جوڑ کتگ کہ آ دیم ءَ روگ ءِ جھد ءَ بیتگ انت۔ اے ناگتی اُرش ءَ دژمن ءِ دو کارندہ مرتگ اَنت وھدے کہ آیانی دو گاڑیاں مزنیں تاوانے رس اتگ۔ دومی نیمگ ءَ خضدار ءَ سمبا پل ءِ نزیک ءَ سرمچاراں زورگیریں پاکستانی لشکر ءِ کاروان ءُ کاروباری گاڑیانی سر ءَ تْرانیں سلاھبندیں اُرش کُتگ ءُ دژمن ءَ مزنیں کساسے ءَ جانی ءُ مالی تاوانے رس اتگ۔

ھمے روچ ءَ خاران ءِ دمگ خوکاپ ءِ نندوک ءُ زورگریں لشکر دو گچینی کارندہ بہادر خان ء پیر مھمد مردان شبی ءُ صابر ء نادر ءُ مرگ ءِ سزا داتگ اَنت۔ دوئیں چاریگاں جست ءُ پرس ءِ وھد ءَ من اتگ کہ آ گوں ’’ڈیتھ اسکواڈ‘‘ ءَ ھمگرنچ بوتگ انت ءُ زورگیریں لشکر ءِ ایجنٹ ءِ بستار ءَ کار کنگ ءَ بوتگ انت۔ آیاں گیشتر من اتگ کہ زورگیریں لشکر ءِ گشگ ءِ رد ءَ آہاں دمگ ءَ ٹریکنگ چپس سر کتگ ءُ دمگ ءَ برجاھیں فوجی کارروائی ءُ فوجی زوراکی ءِ وھد ءَ زورگیریں لشکر ءِ آسراتی ءِ تہ ءَ آ تچک ءَ ھوار بوتگ انت۔

جارکش ءَ گوشتگ 15 اکتوبر ءَ بلیدہ ءِ دمگ زومدان ءَ سرمچاراں سلاہ بندیں اُرشے ءَ زورگیریں لشکر ءِ پیادگیں سپاھیگ نشانگ جوڑ کتگ اَنت کہ آ پہ لشکری ​​کاروانانی پھزداری ءِ ھاترا دیم ءَ روگ ءَ بوتگ اَنت۔ اے اُرش ءَ زورگیریں لشکر ءِ یک سپاھیگے مرتگ ءُ یکے ٹپیگ بوتگ۔ ھمے روچ ءَ سرمچاراں نوشکی بازار ءَ سلاہ بندیں اُرشے ءَ پاکستانی لشکر ءِ دگہ یک ھاسیں کارندہے پنھل کُشتگ۔ اے کارندہ دکاندار ءِ دروشم ءَ زورگیریں فوج ءَ را انٹیلی جنس ءُ سرپدی دیگ ءَ بوتگ۔

ھمے وڑ ءَ قلعہ عبداللہ ءَ پنکی چوکی سرمچاراں تراکناکیں شورواں سرجم ءَ تباہ کتگ۔ پد ءَ سرمچاراں چاگی ءِ دمگ یکمچ ءِ پولیس تھانہ دستیگ کتگ ءُ تراک ءَ گوں تباہ کتگ ءُ ہمے وھد ءَ یکمچ بازار ءَ ایریں سرجمیں چاریگی کیمرہ تیرگواری کتگ ءُ تباہ کتگ انت۔

جارکش ءَ گوشتگ 16 اکتوبر ءَ کیچ ءِ دمگ دشت چیری کنچتی ءَ سرمچاراں دیم ءَ روگ ءِ جھد کنوکیں زورگیریں لشکر ءِ کارندہانی سربستگ ءُ اُرش کےگ ءُ ایشی ءِ آسر ءَ زورگیریں لشکر ءِ سئے کارندہ جاہ پہ جاہ ءَ مرتگ ءُ دو ٹپیگ بوتگ اَنت۔ دومی نیمگ ءَ سرمچاراں قلات ءِ دمگ منگچر ءِ سورو ءَ اسنائپر ءِ اُرش ءَ زورگیریں لشکر ءِ یک سپاھیگے کشتگ ءُ مستونگ ءِ گرگینہ گریڈ اسٹیشن ءِ نزیک ءَ بی ایل اے ءِ اسنائپر ءَ زورگیریں لشکر ءِ مچیں سپاھیگاں چہ یک کارندھے نشانگ کتگ۔

ھمے روچ ءَ خاران ءِ دمگ پتکن ءَ سرمچاراں پنجاب ءِ شھر ملتان ءِ نندوکیں زورگیریں لشکر ءِ فوجی انٹیلی جنس کارندہ عتیق رحمان مرگ ءِ سزا داتگ۔ اے کارندہ گوستگیں روچاں شاھدگ ءِ سر ءَ ناکہ بندی ءِ وھد ءَ دزگیر کنگ بوتگ کہ ایشی ءَ چہ چیریں الیکٹرانک ڈیوائسز ءُ دگہ رھوتی ءِ سامان دزکپتگ بوتگ انت۔ چہ ایشی ءَ ابید چہ بارکھان ءَ دزگیر بوتگیں زورگریں لشکر ءِ کارندہ شیرباز ء عبدالرحمان کھتران مرگ ءِ سزا ھم داتگ۔ اے ایجنٹ ءَ جست ءُ پرس ءِ وھد ءَ من اتگ ات کہ آ گوں زورگیریں فوج ءِ کرنل یونس ءَ تچک ءَ رھوت ءَ بوتگ ءُ آئی ءَ را دمگ ءَ یک چاریگری ءِ کار داتگ۔ آئی ءَ من اتگ کہ آ دمگی دکاندارانی بابت ءَ زورگیریں لشکر ءَ را سرپدی دیگ ءَ ابید دمگ ءِ چار مردمانی زوراکی ءَ بیگواہ کنگ ءَ ھم ھوار بوتگ۔

چہ ایشی ءَ ابید سرمچاراں لسبیلہ ءِ دمگ ماہی پیر ءَ کاروائی ءِ وھد ءَ پولیس ءِ کارندھانی گاڑی ءُُ سرجمیں سلاہ دستیگ کتگ اَنت۔ گل ءِ پالیسی ءِ رد ءَ پولیس سرپد کنگ ءَ پد یلہ کنگ بوتگ اَنت بلے پد ءَ وھدے کہ زورگیریں لشکر ءَ دمگ ءَ دیم ءَ روگ ءِ جھد کتگ گڑا سرمچاراں آھانی سر ءَ اُرش کتگ ءُ مزنیں تاوانے داتگ انت۔

ھمے روچ ءَ پنجگور ءِ دمگ کلگ ءَ سرمچاراں ڈیتھ اسکواڈ ءِ سروک احمد ءِ سر بستگ ءُ نشانگ جوڑ کتگ ءُ آئی ءِ یک ھمراھے ھما جاہ ءَ کُشتگ ءُ دومی ٹپیگ بوتگ۔

جارکش ءَ گوشتگ 17 اکتوبر ءَ چاگی ءِ دمگ دالبندین ءَ سرمچاراں شال ءُ تفتان ءِ تجارتی شاھدگ ءِ سرا کرودک ءِ جاہ ءَ سئے تجارتی گاڑی دستیگ کتگ انت۔ ھمے روچ ءَ زورگیریں لشکر ءَ ھزدار ءِ دمگ باغبانہ ءَ مزنیں کچے ءَ اُرش کت ءُ گن شپ ءِ ھیلی کاپٹراں کمکے گون بیرگ ءُ سرمچاراں جتا جتائیں جاھاں دیم ءَ روگ ءَ لشکر ءِ ھلاپ ءَ پسھی داتگ ءُ آھاں مزنیں کساسے ءَ جانی ءُ مالی داتگ انت۔

جارکش ءَ گوشتگ 18 اکتوبر ءَ خاران ءِ دمگ دالی ءَ سرمچاراں زورگیریں لشکر ءِ دیم ءَ روگ ءِ جہد ءَ سلاہ بندیں اُرشے ءَ نشانگ جوڑ کتگ۔ اے اُرش ءَ یک کارمندے جاہ ءَ مرتگ ءُ یکے ٹپیگ بوتگ۔ دومی نیمگ ءَ خضدار ءِ دمگ کرخ ءَ سی پیک ءِ روٹ ءِ سر ءَ سرمچاراں سرجمیں کنٹرول کتگ ءُ سئے کلاک ءَ سنیپ چیکنگ ءِ امل برجاہ داشتگ۔ھمے وھد ءَ زورگیریں لشکر ءِ رسد ءُ سامان ءِ برگ ءِ گاڑی گوں آئی ءِ ساماناں دزگیر کنگ بوتگ ءُ زورگیریں لشکر ءِ یک کارمندیں کارندہے امداد حسین ءِ چُک نادر علی (کرخ، گل بھٹ ءِ نندوک) دزگیر کنگ بوتگ۔ اے اہلکار ءَ جنوری 2026 ءَ زورگیریں فوج ءَ ہوار بوتگ ءُ مارچ 2026 ءَ پنجاب ءِ شہر اٹک ءَ چہ فوجی تربیت زرتگ۔بنداتی جست ءُ پرس ءِ وھد ءَ نادر ءَ گشتگ کہ تربیت ءِ سرجم کنگ ءَ پد آئی ءَ پنچ ماہ ءَ میس ءَ کار کتگ۔ اگدہ دار ءِ گیشیں جست ءُ پرس برجاہ انت ءُ گڈی پیسلہ بلوچ راجی آمیدگس کنگ بیت ۔

دیمترا سرمچاراں زورگیریں لشکر ءِ دو ھال رسانی کنوک سلطان احمد ءِ چُک فھیم ءُ محمد بخش ءِ چُک مجید (خیر پور، سندھ ءِ نندوک) کہ پیسر ءَ چہ زرد ءِ دمگ ءَ دزگیر کنگ بوتگ اَنت، واشک ءِ ارماگئے ءِ دمگ ءَ مرگ ءِ سزا داتگ انت۔ جست ءُ پرس ءِ وھد ءَ دوئیں کارندہاں من اتگ کہ آ خاران ءُ کش ءُ گور ءِ دمگاں چہ وتی دروشم ءَ زورگیریں لشکر ءِ ھاتر ءَ ھال رسانی ءُ آسراتی ءِ بستار ءَ پرکاریں کرد پیلو کنگ ءَ اَنت۔

دوشمبے ءِ شپ ءَ سرمچاراں پنجگور ءِ تسپ ءِ دمگ ءَ اسٹار چوک ءِ سر ءَ سرجمیں کنٹرول زرتگ ءُ چار کلاک ءَ اسنیپ چیک کتگ۔ھمے وھد ءَ سامان ءِ سواریں دو گاڑی دست کپتگ وھدے کہ یک مشکوکیں مردمے دزگیر کنگ بوتگ۔ پد ءَ وھدے کہ زورگیریں پاکستانی لشکر ءُ ڈیتھ اسکواڈ ءِ مردماں اے دمگ ءَ دیم ءَ روگ ءِ جھد کتگ گڑا نوکیں سلاہاں گوں سلاہ بندیں سرمچاراں آھانی سر ءَ سک باز اُرش کتگ کہ ایشی ءِ تہ ءَ زورگیریں لشکر ءُ ڈیتھ اسکواڈ ءِ بازیں کارندہ مرتگ ءُ ٹپی بوتگ اَنت۔

جارکش ءَ گوشتگ 20 اکتوبر ءَ سوراب ءِ ھاجیکہ ءِ دمگ ءَ آئی ای ڈی ءِ تراک ءَ زورگیریں پاکستانی لشکر ءِ بمب ڈسپوزل ٹیم ءِ پیادگیں سپاھیگ نشانگ جوڑ کتگ اَنت کہ ایشی ءِ تہ ءَ یک کارندھے جاہ ءَ مرتگ۔ دومی نیمگ ءَ چاگی ءِ دمگ نوکچاہ ءَ زورگیریں لشکر ءِ کاروان ءِ گاڑی سرمچاراں گوں بمب تراک ءَ تراک کتگ کہ ایشی ءِ آسر ءَ یک لارندھے مرتگ ءُ کم چہ کم سئے سک ٹپیگ بوتگ اَنت۔ پد ءَ سرمچاراں نوشکی ءِ تدیز ءِ جاہ ءَ دو کلاک ءَ گیش سرجمیں ناکہ بندی جوڑ کنان ءَ سنیپ چیکنگ برجاہ داشتگ کہ ایشی ءِ تہ ءَ مسافر کوچ ءَ چہ زورگیر لشکر ءِ ھاترا زورگ بوھوکیں راشن دستیگ کتگ انت وھدے کہ کوچ ڈرائیور سرپدی دیگ ءَ پد یلہ داتگ ات۔

ایشی ءَ چہ پیسر 18 ستمبر ءَ چاگی ءِ دمگ سیاہ چنگ ءَ زورگیریں پاکستانی لشکر ءُ بی ایل اے ءِ سرمچارانی نیام ءَ ترندیں جنگ ءُ چوپ بوتگ کہ ایشی ءِ تہ ءَ زورگیریں لشکر ءِ بازیں کارندہ مرتگ ءُ ٹپیگ بوتگ اَنت وھدے کہ اے جنگ ءُ چوپانی تہ ءَ بی ایل اے ءِ زانتکاریں سرمچار اسھاک شوکت پنام ءِ میران گوں بھادری ءَ جنگ کنان ءَ نمیران بیتگ۔

جارکش ءَ گوشتگ 19 ستمبر ءَ پنجگور ، پروم ءَ زورگیریں پاکستانی لشکر ءُ سرمچارانی نیام ءَ دراجیں ءُ ھونیگیں جنگے بوتگ۔ اے جنگ ءُ چوپ ءَ زورگیریں لشکر ءِ چار سپاھیگ مرتگ ءُ بازیں ٹپیگ بوتگ ءُ یک لشکری ​​گاڑی یے تباہ بوتگ۔ اے جنگ ءَ بی ایل اے ءِ چار سرمچار علی پنام ءِ سلمان، اختیار پنام ءِ فرید، ثنا اللہ پنام ءِ شے مرید ءُ سہیل پنام ءِ ابسار ءَ دلیری ءَ جنگ کنان ءَ نمیران بیتگ انت۔

ایشی ءَ چہ پیسر زیارت کراس ءَ زورگیریں لشکر ءِ کواڈ کاپٹر اُرش ءَ سک ٹپی بوتگیں سنگت امان اللہ مینگل پنام ءِ میرک سک ٹپیگ بوتگ ءُ 8اگست ءَ وتی ٹپانی سبب ءَ نمیران بوتگ۔

بلوچ لبریشن آرمی ءِ پھازگی ءِ راہ ءَ شھید بیتگیں برزشانیں سرمچار شھید اسحاق شوکت پنام ءِ میران، شہید علی پنام ءِ سلمان، شہید اختیار پنام ءِ فرید، شہید ثنا اللہ پنام ءِ شے مرید، شہید سہیل پنام ءِ ابسار ءُ شہید امان اللہ مینگل پنام ءِ میرک ءَ بے دروریں کربانیاں سھر چکیں دروت ندر کنت ۔ اے دراہیں شہیدانی پاکیں ہون بلوچ راجی پجار، ناموس ءُ گُڈّی آجوئی ءِ بے مَرگیں مانزمان اِنت۔

شھیدانی اے مزنیں کربانی ہما پکری ءُ جنگی درچ منانک انت کہ بلوچستان ءِ ہمک سنگر ءَ روشنائی دیگ ءَ انت۔ بی ایل اے اے بہادریں شہیدانی رژنائیں ھیال ءُ لیکہانی رندگیری ءَ گوں مھکمیں رنگے ءَ برجاہ دارگ ءِ کھول ءَ کنت۔ آئی ءِ سرڈگار ءَ زورگیریں لشکر ءِ سرجمی ءَ تباہ کنگ ءُ آزات ءُ وت واجہیں بلوچستان ءِ جوڑ کنگ اے درستیں شھیدانی مشن ءِ گُڈّی سرجمی بیت ءُ اے سلاھبندیں جُنز گوں ھمےترندی ءُ زور ءَ برجاہ مان اِیت داں منزل ءِ سر بوگ ءَ برجاہ مان ایت۔

اُستانی وزیر داکلہ ضیا لانگو ءَ گشتگ کہ ناشرکاری ڈیھ ءِ بوج انت ءُ ایشی ءِ ھلاسی ءِ ھاتر ءَ فورسز ءِ مھکم کنگ ءُ گیچنی قانون سازی ءِ زلورت انت۔ بلوچستان ھکومت ناشرکاری ءِ ھلاپ ءَ آپریشن ءِ واستا فورسز ءِ لوٹانی درستیں وسائل پجارینگ ءَ انت۔

صوبائی وزیر داکلہ ضیا لانگو، بلوچستان ءِ سر وزیر ءِ کمکار شاہد رند ءُ ایڈیشنل چیف سیکرٹری داخلہ حمزہ شفقت ءَ شال ءَ یکجائی پریس کانفرنس کتگ ات، ایشی ءِ تہ ءَ ناشرکاری ءِ ھلاپ ءَ ھکومت ءِ گامگیج ءُ صوبہ ءِ جاور ھالانی بابت ءَ سرجمیں بریپنگ دیگ بوتگ انت۔

ایڈیشنل چیف سیکرٹری داخلہ حمزہ شفقت ءَ گوشتگ کہ گوستگیں دو سالانی تہ ءَ بلوچستان سرکار ءَ ناشرکاری ءِ ھلاسی ءِ واستا بازیں گامگیج چست کتگ انت۔ھمے وھد ءِ تہ ءَ ناشرکاری ءِ ھلاپ ءَ 18 نوکیں کانود منگ بوتگ اَنت وھدیکہ 17 نوکیں محکمہ جوڑ کنگ بوتگ اَنت۔ آئی ءِ رد ءَ نیشنل ایکشن پلان ءُ انسداد ناشرکاری ءَ ھوار جتاجتائیں پڑانی تہ ءَ ھم کار برجاہ اِنت۔

حمزہ شفقت ءَ گوشتگ کہ بلوچستان ءَ چیریں آمید گس جوڑ کنگ بوتگ، وھدیکہ سیف سٹی منسوبگ، فرانزک ایجنسی، کوئٹہ سیکورٹی بورڈ ءُ نوکیں کیمرہ ایر کنگ ءَ ھوار جتاجتائیں منسوبگانی سر ءَ کار بوھگ ءَ انت۔ آئی ءَ گوشتگ کہ صوبائی ھکومت ءَ ناشرکاری ءِ ھلاپ ءَ گامگیجانی واستا 14ارب کلدار سرمایہ کاری کتگ۔

آئی ءَ گیش کرتگ کہ اے استان ءَ جتا جتائیں رنگ ءَ 60 ہزار ءَ چہ گیش آپریشن کنگ بوتگ انت وھدے کہ یک لک ءَ چہ گیش پناہ گزین وتی وتن ءَ واتر کنگ بوتگ انت۔ شاھدگانی ایمنی ءِ گھتری ءِ واستا ھم گامگیج زورگ بوھگ ءَ انت ءُ آیوکیں سئے چار ماہ ءَ کوئٹہ کراچی ءُ کوئٹہ تفتان شاھدگانی ایمنی ءِ نشان کنگ بوتگ انت۔

صوبائی وزیر داخلہ ضیاء لانگو ءَ جمیعت علماء اسلام ءِ سروک مولانا فضل الرحمن ءِ بیانانی ایر جنی کتگ ءُ گمراہ کنوکیں بیان لیک اتگ۔ ناشرکاری ءِ ھلاسی ءِ واستا سیکورٹی فورسز ءِ مھکم کنگ المی اِنت ءُ ایشی ءِ واستا صوبائی ھکومت ھمک رنگ ءَ کمک کنگ ءَ اِنت۔

زیا لانگو ءَ گشتگ اگاں خیبر پختونخوا ءَ ناشرکاری ءِ ھلاپ ءَ ہمے وڑیں گامگیج چست کنگ بوتیں گڑا اود ءَ ایمرجنسی ءِ جاور نہ بوتگ ات ۔

اے موہ ءِ سر ءَ بلوچستان ءِ بنجاھی وزیر برائے اھوالکاری ءِ کمکار شاہد رند ءَ گوشتگ کہ بلوچستان ءَ ناشرکاری ءِ ھلاپ ءَ جوڑ بوتگیں کانود صوبائی اسمبلی ءِ ھوار کابینہ ءِ نیمگ ءَ ھم منگ بوتگ اَنت۔ آئی ءِ رد ءَ بلوچستان ءِ سر وزیر ءَ اپوزیشن بھیل ءَ زرتگ ءُ کانود جوڑ کتگ۔

خیبر پختونخوا ءِ جاور ھالانی بابت ءَ گپ جنان ءَ شاہد رند ءَ گوشتگ کہ ایمرجنسی ءِ درگت ءَ خیبر پختونخوا ءِ سر وزیر ءِ نیمگ ءَ اسلام آباد ءِ نیمگ ءَ مارچ کنگ ءِ کوشست ھم سبب ھست اَنت، وھدیکہ بلوچستان ءَ سر وزیر ءَ اے وڑیں مارچ ءِ بابت ءَ گپ نہ جتگ۔

پریس کانفرنس ءِ وہد ءَ بلوچستان ءِ تہی کارانی وزیر ءَ مینا مجید ءِ برات ءِ آوار جنگ ءِ ھال ءِ ھم گپ جتگ۔

ھالانی رِد ءَ ناشناسیں سلای بندیں مردماں اورنگزیب ء مجید آئی ءِ وتی جند بُنکی میتگ بلوچ ْآباد ءَ تُپنگ زور ءَ وتی ھمراھی ءَ برتگ گوں، پولیس ءِ درشان دیم ءَ نیتکگ-

بلوچستان اسمبلی ءِ باسک ءُ سروزیر بلوچستان ءِ مشیر گوازی مینا مجید ءِ کستریں برات اورنگزیب مجید چہ مند ءَ دو موٹر سائیکل سواروں چار سلاہ بندیں مردماں آوار جتگ-

ھالانی رِد ءَ ناشناسییں سلاہ بندیں مردماں اورنگزیب مجید آئی ءِ بُنکی میتگ چہ مند بلوچ آباد ءَ موٹر سائیکل سر ءَ تُپنگ زور ءَ وتی ھمراھی ءَ برتگ چریشی ءَ پد آئی ءِ درگت ءَ ھچ وڑیں ھال نیست-

وئیل ءِ گیشیں ھال دیم ءَ نیتکگ، پولیس ءَ تنی وھدے وئیل ءِ راست ءُ رد نہ کتگ-

غمخوارھیات ءُ دومی زمانگ

نبشتہ کار: برزکوھی

رجانکار: مھروان کمبر

دی بلوچستان پوسٹ

نوشکی ءَ دو زمانگ پِرتران انت۔ یکے ھما کہ سرکاری سالدر ءَ چھاپ ءُ شنگ بیت، کہ ھود ءَ ماہ وتی ترامانی ھساب ءَ وھد ءُ پاساں کاینت موکل(چھٹی) وتی رُوچان بنت، کارگس سُھب ءَ پچ ءُ بیگاہ ءَ بند بنت ءُ ھمک نوکیں سال ءَ دیوالانی دیم ءَ کوھنیں سالدر دیر کنگ بنت ءُ نوکیں لِچّینگ بنت۔ دومی زمانگ زمین ءِ تہ ءَ چو آپ ءَ شیپ گران اِنت، اَمینچو جُھل کہ آئی ءَ ھِچ چیز کَچ ءُ کیل کُت نہ کنت ءُ اَمینچو نزیک کہ ھمک مردم ءِ پاد ءُ کدم آئی ءِ سر ءَ کپ انت۔

اے دومی سالدر ءَ سالانی نام نیست، بس ویلانی وسیلہ ءَ چہ وھد گیشینگ بیت۔ پلانی ءِ چِست کنگ ءِ سیمی موسم، پلانی ءِ کُنٹ(لاش) ءِ دست کپگ ءِ پیسری زمستان، ھما شپ ءَ چہ رَند ءِ بھار وھدے دمکاں اولی براں لشکری کارمند دیراں اُوشتات اَنت، ھما اُستاد ءِ مرگ ءَ چہ پد ءِ اولی رمزان۔ شھر ءِ پیرمرد ھمے زمانگ ءَ پیری ءَ سر بنت ءُ مات ھمیشی ءِ تہ ءَ وتی بچّانی واتری ءِ ھساب ءَ دار اَنت۔ سرکاری وھد دیم ءَ جُنز ایت، بلے راج ءِ وھد جاھے نہ جاھے ءَ اُوشت یِ آماچ بیت، گُش ئے آئی ءِ روانی ءِ سر ءَ یکے ءَ میھ (کِیل) جتگ۔

مھمد ھان ھمے دَور ءُ زمانگ ءِ مردمے اَت۔ آ گموار(غمخوار) ءِ نام ءَ زانگ ءُ پجّارگ بوت۔ بِہ گندے مئے تہ ءَ کس ءَ اے نہ جیڑ اِتگ اَت کہ یک مردمے پہ وت اَنچیں نامے پرچا گچین کنت کہ آئی ءِ تہ ءَ دومی مردمانی گم ءُ رَنجانی گرانیں بار ءِ زورگ ءِ کول ءُ کرار چیر بہ بنت؟ اُمر ءِ ھمراھی ءَ نام ءِ گرانیں بار ھم گیش بوھان بیت۔ ورناھی ءِ زمانگ ءَ آ نام بس پنام بیت، بلے پد ءَ کم کم ءَ آ مردم ءِ پَجّار جوڑ بیت، آئی ءِ تب ءُ میل ءَ کپ ایت، آئی ءِ گچین ءِ دیم ءَ اڑاند جوڑ بیت، پد ءَ یکروچے ھمے سما کپ ایت کہ انسان ءَ نام پر نہ کُتگ، بلکیں نام ءَ انسان وتی مانا ءِ ھساب ءَ سینگار اِتگ۔ غمخوار ءِ گون ءَ ھم اَنچوش بوت۔ آ دومی ءِ رَنجانی سر ءَ شیر گشوکیں شائرے نہ اَت، بلکیں آ وت یک اَنچیں دردے ءِ توار جوڑ بوتگ اَت کہ آ درد مُچ بلوچ ءِ درد اَت۔ مئے گور ءَ گم تھنا یک مردمے ءِ نہ بنت۔ یک لوگے ءِ موتک دومی لوگ ءَ سر بوھگ ءَ پیسر آ راجی یاداشت ءِ بھر جوڑ بنت۔ یک ماتے ءِ ودار ھزاراں ماتانی زُبان ءَ وتی ھم دپیں مانا ءَ شوھاز اَنت۔ برے برے کُشگ چہ کُشتگیں مردماں مستر بیت۔

زیردستی ءِ تُرسناکیں شری ھمیش اِنت کہ یک مردمے کُشگ ءِ درد ءَ مُچانکی درد جوڑ بنت۔غمخوار ءَ دربرجاہ (کالج) ءَ وانینت، کتاب نبشتہ کُت، رجانکاری کُت، لبزانکی گلاں گوں ھمکاری کُت۔ اے درست راست اَنت، بلے ما دیراں چہ پد سرپد بوتیں کہ آ دگہ کارے ھم کنگ ءَ اِنت۔
آ وھد ءُ زمانگے جوڑ کنگ ءَ اَت۔

اِیردستی ءِ زمانگ ءَ درستاں چہ پیسر یک راجے ءِ گوستانک ءُ آیوکیں پدریچ ءِ میان ءَ سیادی ھلاس کنگ بیت۔ زُبان ءِ لَھتیں گال ءُ گُشتن گار ءُ بیگواہ کنگ بنت۔ کتاب دسترس ءَ چہ ڈن بنت، نوکیں چھر ءُ شُبین ودی نہ بنت ءُ راجدپتر ءِ لَھتیں بھر اَنچو گار کنگ بنت کہ آیوکیں پدریچ ءَ اے سما نہ کپیت کہ آئی ءِ گوستانک ءِ لَھتیں در بیگواہ کنگ بیتگ اَنت غمخوار ھیات گوستانک ءِ ھمے ھالیگیں جاھانی پُر کنگ ءَ مُدام بے تاھیر اَت۔ آئی ءَ مُدام گشتگ اَت کہ ماتی زُبان ءِ پٹ ءُ میدان ھالیگ اَنت ءُ پہ آیوکیں پدریچ ءَ اے میدان ھالیگ کنگی نہ اِنت۔

آئی ءِ کوٹی من ءَ ھما جاھے وڑ ءَ یات کیت کہ ھود ءَ کتاب وانگ نہ بنت، بلکیں کم کم ءَ مڈّی جوڑ بنت۔ کاگدانی سر ءَ نوشکی ءِ دنز ءُ گُبار اِیر نند اَنت، دنزانی سر ءَ لنککانی بوسگ، بوسگانی تہ ءَ دگہ یک زمانگے ءِ گرمی۔ برے برے ھمے ھیَال کیت کہ کوھنیں کتاب تھنا کاگدانی گرنچ نہ بنت بلکیں وتی وانوکانی دست، ساہ، تھنائیں شپ ءُ آیانی وسوسانی بُنجاہ بنت۔

گموار(غمخوار) ءِ ٹیبل ءِ سر ءَ اِیریں کتاباں باریں چینچو بے تواریں یات ءُ مارشت وتی تھانگ ءَ جاہ داتگ اِت انت۔ کوٹی ءَ ڈن زورگیریں ریاست وتی سیمسر، پانگس، بُنجل ءُ لشکریانی لڑاں گوں دلگوش اَت ءُ کوٹی ءِ تہ ءَ یک مردمے وتی زُبان ءِ ناسرجمیں جھان ءَ سرجم کنگ ءِ جُھد ءَ اَت۔ گندگ ءَ اے مُکابلہ برابر نہ اَت۔ یک نیمگے ادارہ، سلاہ، کارگس، کانود، لڑ ءُ وردی۔ دومی نیمگ ءَ یک ٹیبلے، چندے کتاب ءُ یک اَنچیں مردمے کہ گالانی کمی ءَ پریشان اِنت۔

بلے گوستانک مُدام ٹوھیں چیزاں کسانیں چیزانی دیم ءَ ارزشت نہ دنت۔ بازیں ٹوھیں مُلک وھد ءِ گورگندانی دیم ءَ پُروشت ءُ پروشانی آماچ بیتگ اَنت ءُ پَجّار نہ بیتگیں کوٹیانی تہ ءَ نبشتہ بیتگیں رِد نبشتہ کار ءِ بیرانی ءَ چہ پد ھم زندگ بوتگ اَنت۔

براھوئی زُبان ءَ نبشتہ کنگ پہ غمخوار ءَ تھنا ماتی زُبان ءِ گون ءَ مھر ءِ درشان نہ اَت۔ آ یک اَنچیں دُنیایے ءَ براھوئی زُبان ءِ دیم ءَ برگ ءِ جُھد ءَ اَت کہ ھود ءَ مردماں کسان کسانیں زُبان گوست ءِ مُجاں اندیم بوھگ ءَ دیستگ اَنت۔ اِشانی تہ ءَ گیدی کسہ بیت کن اَنت بلے نوکیں پگر ناں، سوت بیت کن اَنت ءُ شھزانتی نہ، موتک بیت کن اَنت بلے شرگداری بیت نہ کن اَنت۔ بگندے غمخوار ءِ ھمک رَجانک ھمے لیکہ ءِ پسّو اَت کہ براھوئی کسانیں زُبانے۔ آ دومی زُبانانی ھیال ءُ جیڑگاں تھنا براھوئی زُبان ءَ دیگ ءَ نہ اَت، بلکیں آ براھوئی زُبان ءِ پَراہ ءُ شاھیگانی ءِ یاتاں گیجگ ءَ اَت۔

بلے وھد ءِ ھمراھی ءَ آئی ءِ نام زورگیریں ریاست ءِ جوڑ کُتگیں لڑانی تہ ءَ ھوار بوت۔ بازیں لڑاں یک جُتاھیں بوھے ھوار بیت۔ ھما مردماں وتی نام اے لڑانی تہ ءَ نہ دیستگ اَنت، آ اِشی ءَ تھنا یک کاگدے سرپد بنت۔ بلے یک مردمے وتی نام ءَ گوں وتی چمّاں ھمے لڑانی تہ ءَ بہ گند ایت کہ یک سرکاری کارگس ءِ تہ ءَ آئی ءِ جُست ءَ اَبید جوڑ کنگ بوتگ گُڑا آ نام ءِ مانا ءُ متلب مٹ بنت۔ پد ءَ آ نام گوانک جنگ ءِ کار ءَ نہ دنت، بلکیں آئی ءِ سر ءَ نگاہ اِیر کنگ ءِ سوب جوڑ بیت۔ غمخوار ھم ھمے لڑانی تہ ءَ ھوار کنگ بوت۔ آئی ءِ کارجاہ مٹ کنگ بوت۔ آئی ءِ سر ءَ نگاہ اِیر کنگ بوت۔ آئی ءَ زانتگ اَت کہ ریاست آئی ءَ وانگ ءَ اِنت، بلے اے وڑ ناں یک وانوکے وتی ادیب ءَ بہ وان ایت، پمیشکا برے برے آئی ءَ دگہ نامانی سر ءَ نبشتہ کُت۔ من بلاھیں مُدتے ءَ پنّام ءِ اِیرکنگ ءَ وتی رکینگ ءِ توجیل سرپد بوتگ اِتاں، پد ءَ من ھمے مار اِت کہ زیردستی ءِ زمانگ ءَ کلمی نام ءِ کسہ چد ءُ گیش تورناک اِنت۔ یک انسانے ءَ وتی چپ ءُ چاگرد ءَ بازیں چیریں کِشک جوڑ کنگ پکار بیت۔

آ وتی تھانگ ءَ یک اَنچیں شھرے جوڑ کنت کہ آئی ءِ یک دروازگے ءِ پُشت ءَ مھمدھان، دومی ءِ غمخوار، ءُ سیمی ءِ پُشت ءَ دگہ یک نامے چیر دَنت، بلے اے درستیں نامانی پُشت ءَ جیڑگ ءُ مارگانی دنیا ءَ سپر کنوکیں انسان یکے کہ آ بے تواری ءَ جتا جتاھیں پجّارانی میان ءَ سپر کنت۔بگندے زورگیر ءَ ھما نام پکار اَت، بلے آئی ءِ پِگر ءُ ھیال بازیں نامانی میان ءَ وتی کِشک گچین کُتگ اَت۔ برے آئی ءِ نبشتانک دگہ نامے ءِ سر ءَ شنگ بوت اَنت برے آزمانک، بلے آئی ءِ باتن ءِ ھاک ھما اَت۔ مردم وتی دزرند ءَ چہ یاگی بیت کنت بلے وتی ھیال ءُ مارشتاں چہ یاگی بوت نہ کنت۔ من اے ھبر ءَ آئی ءِ مستریں ستاہ سرپد باں، پرچا کہ مئے اَھد ءُ زمانگ ءَ وتی راج ءِ گون ءَ سیادی ءِ سندگ نزوری گُشگ نہ بیت بلکیں زندگ بوھگ ءَ ھژدری لیکگ بیت۔ انسان وتی زانت ءُ زانگ ءَ اَمینچو ساپ ءُ پلگار کُت کنت کہ راج ءِ ھُونانی ترمپ آئی ءِ سر ءَ مہ کپ اَنت۔ آ گُشت کنت کہ سیاست بدبوداریں چیزے، لبزانک سیاست ءَ چہ بُرزتریں، من بس زیباھی ءَ اِزم ءِ پوشاک ءَ گور ءَ دیاں۔ اے وڑیں مردم لبزانک ءُ اِزم ءَ پہ وت جوانیں پناھگاھے سرپد بنت۔ آ اے پناہ گاھے تہ ءَ نند اَنت ءُ زیباھی ءِ گپ ءَ کن انت بلے اے گُشت نہ کن اَنت کہ راج ءِ سر ءَ چے وڑیں زُوراکی بوھگ ءَ اِنت، کئی تیر سُپتگیں جون چار راھے ءِ سر ءَ کپتگ غمخوار ءَ لبزانک سیاسی اوگام ءُ پروپگنڈہ جوڑ نہ کُت، بلے آئی ءَ لبزانک ءِ تہ ءَ راستی چیر دات ھم نہ کُت۔ بگندے ھمے آئی ءِ پِگری ردوم اَت۔ آئی ءِ گور ءَ راجی زمہ واری اوگامانی دروشم ءَ ناں بلکیں کارانی دروشم ءَ زاھر بوت۔

آ وانینگ ءَ اَت، نبشتہ کنگ ءَ اَت، رجانک کنگ ءَ اَت، براھوئی زُبان ءِ تہ ءَ نوکیں ھیال، چھر ءُ شُبین ودی کنان اَت، لبزانکی ادارہ جوڑ کنگ ءُ پہ آیوکیں پدریچ ءَ زانت ءُ زانگ ءِ نوکیں راہ ءُ دراں پچ کنان اَت۔ بِگندے آئی ءَ زانتگ اَت کہ آجوئی تھنا سیاسی تاکت ءِ نام نہ اِنت بلکیں وتی زُبان، دودمان، راجدپتر ءُ وتی پجّار ءِ زندگ کنگ ءِ اوں نام اِنت۔ پمیشکا آئی ءِ کرد تھنا ادب ءِ تہ ءَ بندوک نہ اَت بلکیں وتی راج ءِ باندات ءِ جوڑشت ءَ ھم بھر زیرگ ءَ اَت۔ راجانی جوڑشت آ رُوچ ءَ چہ بندات نہ بیت کہ آئی ءِ ریاست جوڑ بیت، بلکیں اے اَمل ھما وھد ءَ بندات بیت وھدے مردم وتی زُبان ءَ زندگ کن اَنت، وتی گوستانک ءَ یات کن اَنت، وتی پگر ءُ ھیالاں دیم ءَ بر اَنت ءُ نوکیں پدریچ ءَ وتی پجّار ءِ سما ءَ دینت۔ یک ریاستے ءِ جوڑ بوگ آجوئی ءِ اولی پدیانک اِنت بلے راجانی جوڑشت اِشی ءَ چہ پیسر بندات بیت۔

پد ءَ مئی ءِ ھما رُوچ آتک۔

مئے دومی زمانگ ءِ سالدر ءَ اے رُوچ ءِ نام 16 مئی دو ھزار بیست ءُ شش اِنت۔سرکاری سالدر ءَ آ بس یک رَمسے اَت، مئے وھد ءِ تہ ءَ یک جُھلیں کنڈے۔کلی مینگل ءِ نزیک ءَ تیراں توار کُت ءُ محمد ھان زمین ءِ دلبند ءَ کپت۔ بلوچ راج اے ویل ءَ یک جُتاھیں ویلے سرپد نہ بیت، بلکیں اے ھما ویلانی بھر اِنت کہ دیر اِنت مئے سر ءَ ساھیل ءُ ساچان اَنت۔ بس نام مٹ ءُ سٹ بنت۔اے ویل ءَ پد مئے تہ ءَ بلاھیں تُرسے ودی بوت۔ غمخوار شھید بوت، کہ مئے گور ءَ اِزت ءُ اِھترام ءِ مستریں جاہ اِنت، بلے باز براں شھادت انسان ءِ پش کپتگیں زندگی ءَ گوں وت بارت۔ آ اکسانی تہ ءَ پش کپ ایت مرگ آئی ءِ سرجمیں زندگی ءِ کسہ جوڑ بیت۔ من نہ لُوٹ آں کہ ما غمخوار ءَ ھما جاوراں یات بہ کن اِیں کہ ھما دمان ءَ آ زمین ءِ دلبند ءَ کپتگ اَت۔ کُشندہ ءَ یکیں دمان ءَ آ مرگ ءِ امبازاں واپینت۔ من نہ لُوٹاں کہ ما آئی ءِ مرگ ءَ گیر بیاریں۔من دوبر آئی ءَ ٹیبل ءِ سر ءَ نندگ ءُ کار کنگ ءَ گندگ لُوٹ آں۔من غمخوار ءَ کتابانی جُھلانکیاں اِیر کپگ ءُ وتی دوستانی دیوان ءَ نندگ ءُ زُبان ءِ ھالی ئیں جاھانی پُر نہ بوھگ ءِ گلہ کنگ ءَ گندگ لُوٹ آں. یک شھیدے ءَ بس آئی ءِ مرگ ءِ ساھتاں یات کنگ ءِ متلب کُشندہ ءَ آئی ءِ زندگی ءِ مستر ءُ کستر جوڑ کنگ اِنت۔ پمیشکا مرگ ءَ چہ پد غمخوار پہ ما گیش مانگیشتگ۔ آ یک مردمے ءِ دروشم ءَ پش نہ کپتگ، بلے اے ھم نہ گُشاں کہ آ ھیالے جوڑ بیتگ، پرچا کہ اے رِد سک ارزان اِنت۔ ھیال مُرتگیں مردمے کمی ءَ سرجم کُت نہ کنت۔ کتاب مردم ءِ دستانی گرمی ءَ آورت نہ کنت۔ کُشگ ءِ مستریں زوراکی ھمیش اِنت کہ آ انسان ءَ ھلاس نہ کنت بلکیں آئی ءِ دیستگیں بانداتے واباں ھم ھلاس کنت۔ ما ھما کتاباں ھساب کُت کن اِیں کہ غمخوار ءَ نبشتہ کُتگ اَنت، بلے ما اے زانت نہ کن اِیں اگاں آ ھپتاد سال ءَ زندگ بیت اِیں گُڑا آئی ءَ چِنچو کتاب نبشتہ کُتگ اَت۔ ما آئی ءِ انوگیں شاگرداں زانت کن اِیں، بلے ھما ورناھاں زانت نہ کن اِیں کہ آ 2031 ءَ دُچار کپگی اَت ءُ آئی ءَ ادیب ءِ جوڑ بوھگی اَت۔

برے برے جیڑاں کہ زورگیرے واھشت مردمانی کُشگ نہ اِنت بلکیں نوکیں راہ ءُ درانی بند کنگ اِنت۔ ھما کندیلیں سرانی کچ کم کنگی اِنت کہ راج آیاں چہ رَنگ زور ایت۔ ادیب پمیشکا ھترناک بنت کہ آ نوکیں کِشکانی ڈس ءَ دینت۔آئی ءِ یات کنگ ءِ متلب موتک آرگ نہ اِنت بلکیں وت ءَ ھمے سوال کنگی اِنت کہ ھما ھالی ئیں جاھانی نشان غمخوار ءَ داتگ اَنت ما چِنچو پُر کُتگ۔ ما شھیداں گوں باز مھر کن اِیں، بلے برے برے ما بس آیانی ناماں یات کن اِیں آیانی کاراں شموش اِیں۔ نام ءِ یات کنگ ارزان اِنت بلے ھما کارانی ٹھینگ سک گران اِنت کہ آئی ءَ تچ ءُ تاگ کُتگ۔ غمخوار ءِ یات کنگ ءِ متلب بگندے اے نہ اِنت کہ ما ھمک سال آئی ءِ اکسانی دیم ءَ کندیلاں روک بہ کن اِیں۔ بلکیں اِشی ءِ اسل مکسد اِش اِنت کہ ما ھما کتاباں نبشتہ بہ کن اِیں کہ انگت براھوئی زُبان ءِ تہ ءَ نبشتہ کنگ نہ بوتگ اَنت۔ ھما زانشتی چھر ءُ شُبین ودی بہ کن اِیں کہ براھوئی لبزانک ءِ تہ ءَ نیست اَنت، ءُ اَنچیں وانندہ جوڑ بہ کن اِیں کہ آ وتی زُبان ءِ سر ءَ پھر بہ بند اَنت۔

غمخوار ءَ چہ پد نوشکی ءَ دومی زمانگ بندات بیتگ۔ سرکاری سالدر باز رند ءَ مٹ بوتگ، بلے راجانی سالدر اِنچو زوت مٹ نہ بنت۔ بازیں رمس کرناں چہ مردمانی دل ءَ زندگ مان اَنت۔ برے برے یک شھیدے ءِ شھادت ءِ رُوچ سرجمیں پدریچے ءِ اُمر ءَ چہ دراجتر بیت۔ بلے غمخوار ءِ یات کنگ ءِ مانا اِش نہ اِنت کہ ما مُدام آئی ءِ رَپتن ءِ مُوتکاں بیار اِیں۔غمخوار یک اَنچیں اِنسانے اَت کہ آ ھالی ئیں جاھاں پُر کنگ ءِ کوشست ءَ اَت۔ آ کتاب، زُبان ءُ زانت ءَ چہ اے جاھاں پُر کنگ لوٹگ ءَ اَت۔ بگندے اِشی ءَ چہ پد زندگ بوگ ءِ بس ھمے یکیں راہ پش کپتگ کہ ما آئی ءِ شھادت ءَ موتک میاریں بلکیں آئی ءِ کمّی ءَ زانت، کتاب، زُبان ءُ سسا ءُ سما گوں سرجم بہ کن اِیں۔ وتی آھوکیں پدریچ ءَ ھمے سما ءَ بدی اِیں کہ وتی گوست ءَ بہ وان آں، وت ءَ پجّا بیاران ءُ وتی باندات ءَ رُژن ءَ بکن اَنت۔پد ءَ بگندے دومی زمانگ ءَ یک نوکیں اَھدے بندات بہ بیت۔ ھما رُوچ ءَ یک ورناھے وتی کتاب ءِ اولی تاکدیم ءَ وتی اسلی نام ءَ نبشتہ بکنت ءُ آ وتی نام چیر دیگ مہ لُوٹ اِیت۔ آ وتی ماتی زُبان ءَ وتی سرڈگار، وتی گوستانک ءُ وتی باندات ءِ بارو ءَ نبشتہ کنت ءُ لڑانی تہ ءَ آئی ءِ نام پمیشکا ھوار نہ بیت کہ آئی ءَ وتی مردم وتی نام ءَ چہ گوانک جتگ اَنت۔ بگندے آجوئی ءِ درستاں چہ زیبا تریں متلب ھمیش اِنت کہ مردم ءَ وتی نام، وتی زُبان ءُ وتی یات چیر دیگ نہ لُوٹ اَنت۔

ھما رُوچ ءَ غمخوار پد ءَ یات کیت، بگندے شھیدے ءِ دروشم ءَ ناں بلکیں یک کتاب دوست ءُ زُبان دوستے ءِ دروشم ءَ یات کیت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت۔