TBP Balochi

پاکستان پوج ءِ نیمگ ءَ چہ دمگ ءَ ٹینک ءُ بکتر بند گاڑیاں ھوار پیشگامی ءِ ھال اِنت-

بلوچستان ءِ دمگ قلعہ عبداللہ ءَ پاکستانی پوج ءِ نیمگ ءَ چہ مزنیں کچے ءَ پوجی آپریشن بندات کنگ ءِ ھال اِنت، اود ءَ ٹینکاں ءُ بکتر بند گاڑیاں ھوار پوج ءِ مزنیں کچے ءَ پیشگامی کنگ ءَ اِنت-

چہ دمگ ءَ سربیتگیں ھالانی رِد ءَ آپریشن ءَ ھزرانی کچ ءَ کارندہ بھر زیرگ ءَ اَنت ،بلے پاکستانی پوج ءُ ھکومت ءِ نیمگ ءَ چہ تنی وھدے قلعہ عبداللہ ءَ پوجی آپریشن بندات کنگ ءِ گپ دیم ءَ نیاورتگ-

قلعہ عبداللہ ءَ اے وھداں سلاہ بندانی پُرکاریاں ھالانی دیم ءَ اَتکگ، سلاہ بندیں مردماں یک پولیس چوکی شورواں مان کتگ تراکینتگ، وھدے کہ اشی ءَ ساری چہ پنجاب ءَ سیادی داروکیں پنچ مردم آوار جنگ ءَ پد یل کتگ بیتگ اَنت-

زانگ بہ بیت کہ گوستگیں روچ ءَ چہ بلوچستان ءِ جتاجتائیں دمگاں پاکستانی پوج ءِ نیمگ ءَ چہ آپریشن ءِ برجاھی ءِ ھال اِنت-

اے دمگاں دشت ،تربت ،مستونگ ،ھُزدار یُءُ ھرنائی ءَ ھوار اَنت ،ھالانی رد ءَ اے کاروائی ءَ تیرگواری ھیلی کاپٹر ،کواڈ کاپٹرز ،بکتر بند گاڑیاں ءُ توپ جنوک ھم کارمرز کنگ بیگ ءَ اِنت-

چہ ھزدار ءَ پاکستانی پوج ءِ جاڑیگیں کارندھے بلوچ آجوئی لوٹوکاں دزگیر کتگ۔

خضدار ءِ دمگ کرخ ءَ سی پیک ءِ راہ بلوچ آجوئی لوٹوکیں سلاہ بنداں گوستگیں روچ ءَ بازیں کلاکاں ناکہ بندی کتگ۔ ھمے وھد ءَ پاکستانی فوج ءِ جاڑیگیں کارندہ دزگیر کنگ بوتگ۔

دمگی مردماں دی بلوچستان پوسٹ ءَ گوں تران کنان ءَ گْوشتگ کہ پاکستان پوج (ایف سی)ءِ کارندہ نادر ء امداد حسین جھمنند گل بھٹ کرخ سلاہ بندیں مردماں دزگیر کتگ۔ اے کارندہ ھمے زوتاں پاس آؤٹ بیتگ بیچ نمبر 76 ءَ گون بوتگ وھدے کہ آئی ءَ پنجاب، ڈسٹرکٹ اٹک ٹریننگ سینٹر ءَ چہ تربیت زرتگ۔

انگت ءَ ھچ ادارہ ءَ اے کارندہ ءِ دزگیر کنگ ءِ زمہ واری نہ زرتگ۔ بلے گْوستگیں روچ ءَ بلوچ آجوئی لوٹوکیں مردماں گْوشگ بوتگیں دمگ بند کتگ ءُ سنیپ چیکنگ کتگ اَت کہ داں بازیں کلاکاں برجاہ بیتگ۔

زانگ بہ بیت پیسر ءَ ھم پاکستان آرمی ءِ کارندہ بلوچ لبریشن آرمی ءِ نیمگ ءَ دزگیر کنگ ءِ وئیل دیم ءَ اتکگ اَنت۔ اے سال ءَ بی ایل اے ءِ آپریشن ہیروف دوم ءِ وھد ءَ خضدار ءِ دمگ اورناچ ءَ چہ ھم 8 فوج ءِ کارندہ دزگیر کنگ بوتگ اَنت۔

ھمے وڑ ءَ کیچ بلیدہ سوراپ ءَ سلاہ بندیں پاکستانی پوج ءِ واستا راشن بروکیں دو ٹرکانی سر ءَ تیرگواری کتگ ءُ چریشی ءَ ھردوکیں گاڑی ناکارہ بیتگ انت۔

اھوالانی رد ءَ تیرگواری ءَ پد ھردوکیں ٹرکانی ڈرائیور سلاہ بنداں گون وت برتگ انت۔

بلوچستان ءِ دمگ پنجگور ءَ گوستگیں شپ ءَ تسپ اسٹار چوک ءِ ھند ءَ سلاہ بندیں مردمانی نیمگ ءَ ناکہ بندی کنگ ءِ ھال رس اِتگ۔

دمگی مردمانی رد ءَ شپ ءِ 11بج ءَ بگر داں 2بج ءَ ناکہ بندی برجاہ بوتگ کہ ھمے وھد ءَ پاکستانی لشکر ءُ دمگی ڈیتھ اسکواڈ ءِ کارندہاں دمگ ءَ دیم ءَ روگ ءِ کوشست کتگ۔ ھمے وھد ءَ دوئیں نیمگاں یک ترندیں جنگ ءُ چوپے بوتگ کہ ایشی ءِ تہ ءَ جانی تاوانانی ھال دیم ءَ اتکگ اَنت۔

دمگی مردمانی رد ءَ تسپ اسٹار چوک ءَ سلاہ بندیں مردمانی ھست بوھگ ءُ ناکہ بندی ءِ وھد ءَ پاکستانی لشکر ءُ آھانی ھمراھی ءَ دمگی ڈیتھ اسکواڈ ءِ کارندہاں دیم ءَ روگ ءِ کوشست کتگ۔ ھمے وھد ءَ پد دوئیں نیمگاں چہ تیر گواری بندات بوتگ کہ یک ترندیں جنگ ءُ چوپے بوتگ۔

دمگی مردمانی گشگ اِنت کہ اے جنگ ءَ پاکستانی لشکر ءَ تاوان رس اتگ ءُ ھمے وھد ءَ بازیں دمگی ڈیتھ اسکواڈ ءِ کارندہ بیران ءُ ٹپیگ بوھگ ءِ ھال ھم ھست۔ بلے اے وئیل ءِ تہ ءَ بیران بوتگیں مردمانی کساس ءُ سرجمیں جانی تاوان ءِ راستیں کساس ءِ پدر کنگ نہ بوتگ انت۔

دمگی ھالانی رد ءَ ڈیتھ اسکواڈ ءِ سئے کارندہ کہ جنگ ءِ وھد ءَ ٹپی بوتگ اَنت پہ درمان کنگ ءَ نادراھجاہ ءَ سر کنگ بوتگ اَنت کہ آیانی پجار حمزہ، توسیف ءُ دیدگ انت۔

بلوچ ریپبپکن گارڈ ءِ جارکش دوستین بلوچ ءَ رسانکدر ءَ شنگ کتگیں درشان ءَ گوشتگ گوستگیں شپ ءَ بلوچ ریپبلکن گارڈ ءِ سرمچاراں بلوچستان ءِ دمگ سبی ءِ ھند دوسہ لاشاری ءَ ریل ءِ ٹریل تراکناکیں شورواں گوں نشانگ کتگ ۔

جارکش ءَ گشتگ تراک ءِ آسر ءَ ٹریک ءَ تاوان رس اتگ۔

جارکش دوستین بلوچ ءَ گوشتگ اے اُرش ءِ زمہ واری ءَ مئے گل بلوچ ریپبلکن گارڈ من ایت ءُ اے دابیں کاروائی بلوچستان ءِ آجوئی ءَ داں برجاہ بنت۔

بلوچستان ءِ دمگ زیارت ءُ کیچ ءِ دمگ دشتک ءَ ڈرون اُرشانی آسر ءَ سے مردم بیران بیتگ اَنت وھدے کہ دگہ دو سک ٹپی بیتگ اَنت-

ھالانی رِد ءَ زیارت ءِ دمگ انزرگی ءَ یک ڈرون اُرشے ءِ آسر ءَ یک شپانکے بیران وھدے دو مردم سک ٹپی بیتگ اَنت-

دمگی مردمانی رِد ءَ بیران بیتگیں شپانک ءِ لاش تنی وھدے کوہ ءَ کپتگ ءُ آئی ءِ چست کنگ ھاتر ءَ انتزامیہ نیمگ ءَ چہ ھچ وڑیں گامگیج زیرگ نہ بیتگ-

دومی نیمگ ءَ کیچ ءِ ھند دشتک ءَ سیمسر ءَ پاکستانی پوج ءِ ڈرون اُرش ءَ دو شھری بیران بیتگ اَنت- ھالانی رِد ءَ یک ڈرون اُرشے ءِ نشانگ کتگ، چریشی ءِ آسر ءَ دو مردم بیران بیتگ اَنت-

بیران بیتگیں مردم ءِ پجّار شاہ جان ء داد محمد، جھمنند دشت پیروتگ، ءُ صمد جان ء محمد، جھمنند دشت گوھرگ دپ نام ءَ چہ بیتگ اَنت-

تمپ ءِ کوہاڈ ءَ گوستگیں شپ ءَ پاکستانی لشکر ءَ لوگانی سر ءَ اُرش کتگ ءُ سھر، موٹر سائیکل ءُ دگہ ارزشت داریں چیز برتگ اَنت ءُ یک دکانے پرشت ءُ پروش کنگ بیتگ ءُ سامان برگ بوتگ انت۔

دمگی ھالانی رد ءَ گوستگیں شپ ءَ پاکستانی لشکر ءَ دمگ ءِ جتا جتائیں لوگانی سر ءَ اُرش کتگ ءُ چہ اود ءَ لوگانی سامان، سھر، موٹر سائیکل ءُ دگہ ارزشتی ایں سامان برتگ اَنت۔

دمگ ءِ یک دکانے ھم لٹ ءُ پُل ءُ پرشت ءُ پروش ءِ نشانگ جوڑ کنگ بوتگ کہ چہ اود ءَ ارزشت داریں چیزانی برگ ءِ ھال اِنت۔

دمگی ھالانی رد ءَ بیڑ ءِ وھد ءَ چار مردم دزگیر کنگ بوتگ ءُ بیگواہ ھم ھال داتگ کہ آھانی پجار بلال ء ھنیپ ، سابت ء ٹاپی ، ایوب ءِ مروان ء ایوب ءُ عدیل ء کیوم ءِ ناماں زانگ بوتگ اَنت۔

آئی ایس پی آر ءَ شادی کور ءَ فوجی گاڑی ءِ سر ءَ اُرش ءِ وھد ءَ میجر وجاھت وحید ءِ بیرانی ءِ پدرائی کتگ۔ ارش ءِ زمہ واری بلوچ لبریشن آرمی ءَ من اتگ ات۔

پاکستان فوج ءِ جارکش ءِ نیمگ ءَ چہ شنگ بوتگیں بیان ءِ رد ءَ زلہ قلات ءِ جتک آباد ءِ دمگ ءَ فورسز ءَ انٹیلی جنس ءِ بنیاد ءَ آپریشن کتگ۔ بیان ءِ تہ ءَ گْوشگ بیتگ کہ ”آپریشن ءِ وھد ءَ تیرگواری ءِ پد ءَ چار سلاہ بندیں مردم بیران بوتگ اَنت۔چہ آیانی دست ءَ مزنیں کساسے ءَ سلاہ ءُ گولہ بارود ھم دست کپتگ انت۔“

آئی ایس پی آر ءَ بیان ءَ گوشتگ کہ پاکستانی اُرد ءَ گوادر ءِ تحصیل ءِ شادی کور ءِ دمگ ءَ کلیئرنس آپریشن ءِ یک سلسلگے بندات کتگ۔

بیان ءَ اے گپ ءِ پدرائی کتگ کہ اے وھد ءَ لاہور ءِ 34 سالی میجر وجاہت وحید ءِ سروکی ءَ دیم ءَ روگ ءَ بوتگیں فورسز ءِ یک ٹیمے ءَ را دستی تراکناکیں چیز ءِ نشانگ جوڑ کنگ بوتگ۔

بلے پاکستانی لشکر ءَ ایوک ءَ اے اُرش ءَ میجر وجاہت وحید ءِ بیرانی ءِ پدرائی کتگ۔

زانگ بہ بیت کہ بلوچستان ءِ دمگ گوادر ءِ پسنی تھسیل ءِ دمگ شادی کور ءَ گوستگیں روچ ءَ پاکستانی فوج ءِ گاڑی ءِ بمب تراک ءَ نشانگ جوڑ کنگ بوتگ۔

گْوشگ بیتگیں اُرش ءِ زمہ واری بلوچ آجوئی ءِ سلاہ بندیں گل بلوچ لبریشن آرمی ”بی ایل اے“ ءَ من اتگ۔

گل ءِ جارکش جیئند بلوچ ءِ رد ءَ بی ایل اے ءِ ھاسیں فورس ’اسپیشل ٹیکٹیکل آپریشن اسکواڈ‘ ’’STOS‘‘ ءَزورگیریں پاکستانی لشکر ءِ سئے گاڑیانی کاروان ءِ یک گاڑی یے نشانگ جوڑ کتگ ءُ سرجم ءَ تباہ کتگ ۔

جیئند بلوچ ءِ رد ءَ تراک ءِ آسر ءَ گاڑی ءَ سوار میجر وجاھت وحید ءَ ھوار زورگیریں پاکستانی لشکر ءِ 7 کارندہ ھما جاہ ءَ مرتگ اَنت۔

جارکش ءَ گیش کرتگ کہ بلوچ لبریشن آرمی اُرش ءِ زمہ واری ءَ من ایت، آئی ءِ گْوشگ ءِ رد ءَ گل ءِ کارروائی گوں گیشتریں ترندی ءَ برجاہ بنت داں یک آجوئیں ءُ وت واجہیں بلوچستان ءِ جوڑ کنگ ءُ زورگیریں لشکر ءِ سرجمی ءَ درکپگ ءَ۔

بلوچستان ءِ جتاجتائیں دمگ مستونگ ءُ گوادر ءَ دو مردم زورانسری آوار جنی ءِ ھال اِنت، وھدے کہ چہ مستونگ ءُ کیچ ءَ سیادی داروکیں دو بیگواھیں مردم یل کنگ بیتگ اَنت-

سربیتگیں ھالانی رِد ءَ مستونگ ءِ دمگ جنگل کراس ءَ دوازدہ اکتوبر 2026 ءِ شپ کساس یک ءَ پاکستانی پوج (ایف سی) ءَ لوگ سر ءَ بیڑبرتگ 26 سالی ئیں محمد آصف ء لعل محمد آوار جنگ ءَ پد ناشناسیں جاھے ءَ برتگ- محمد آصف یک گیرجے ءِ مکینکے ءُ جنگل کراس مستونگ ءِ جھمنندیں-

دومی وئیل گوادر ءِ دمگ چہ پسنی ءَ وارڈ نمبر ھپت ءَ 19 سالی ئیں نودربر رحیم لال ء لعل بخش 27 جون 2026 ءِ شپ کساس یک ءَ چہ لوگ ءَ پاکستانی چیریں ادارہ (ایم آئی، آئی ایس آئی) ءُ پوج ءِ کارندھاں آوار جنگ ءَ پد ناشناسیں جاھے ءَ برتگ-

ھمے وڑ مستونگ ءِ جھمنند ممتاز بلوچ ء سلطان محمد کہ پنچ جون 2026 ءَ زورانسری بیگواہ بیتگ، 16 اکتوبر ءَ چہ شال ءَ یل کنگ بیتگ-

ھمے وڑ کیچ ءِ دمگ بالگتر ءِ جھمنندیں عبدالغفار ء حسین ھم یل کنگ بیتگ- آ 09 اکتوبر 2026 ءَ پاکستانی پوج ءَ آوار جنگ ءَ پد بیگواہ کتگ اَت – ھالانی رِد ءَ آ 15 اکتوبر ءَ لسبیلہ ءِ دمگ چہ اوتھل ءَ یل کنگ بیتگ-

اے دوئیں افسر چہ خضدار ءَ شال ءَ روگ ءِ وھد ءَ ناکہ بندی ءِ وھد ءَ آوار جنگ بوتگ اَنت ۔

بلوچستان ءِ دمگ کلات ءِ ھند چہ رودینجو ءَ آوار جنگ بوتگیں ایم سی بی بینک خضدار ریجن ءِ دو افسر سلامتی ءَ یل کنگ بوتگ انت ءُ وتی لوگاں سر بوتگ انت۔

گیشیں ھالانی رد ءَ ایم سی بی بینک خضدار ءِ دمگی آپریشن ءِ دمگی سروک حاجی لشکر خان بنگلزئی ءُ دمگی سروک سیلز خالد گچکی 2 اکتوبر 2026 ءَ چہ خضدار ءَ شال ءَ روگ ءِ وھد ءَ ناشناسیں سلاہ بندیں مردماں آوار جتگ انت۔

دوئیں آفسران ڈرائیور دومی روچ ءَ ھزدار ءَ یل کنگ بوتگ قنت بلے دوئیں آفسران یل بوھگ ءِ بابت ءَ ھچ وڑیں ھال ءُ اھوال سر نہ بیتگ۔

مرچی ھر دوئیں آفسر یل بیتگ ءُ وتی لوگاں سلامتی ءَ سر بوتگ اَنت۔

خضدار ءِ نزیک ءَ سلاہ بندیں مردماں سی پیک ءِ شاھدگ بستگ ءُ گاڑیانی پٹ ءُ پول کتگ انت۔

بلوچستان ءِ دمگ خضدار ءِ تحصیل کرخ ءَ ھالانی رد ءَ سی پیک ءِ شاھدگ کرخ ءَ سلاہ بندیں مردماں بند کتگ کہ داں بازیں کلاکاں برجاہ بوتگ۔

ھالانی رد ءَ ھمے وھد ءَ سلاہ بندیں مردماں پاکستانی لشکر ءِ کیمپ ءَ سامان ءِ سپلائی کنوکیں گاڑی یے گوں ڈرائیور ءَ دستیگ کتگ۔

یات بہ بیت کہ گوستگیں شپ ءَ خضدار ءِ دمگ نال ءَ سلاہ بندیں مردماں یک نجی کمپنی ءِ جاہ ءَ اُرش کتگ ءُ کمپنی ءِ واھند ءِ زھگ ءُ 19 کارمند دزگیر کنگ ءَ پد گوں وت برتگ اَنت کہ آ انگت ءَ یل نہ بوتگ اَنت۔

بلوچ آجوئی دوستیں سلاہ بندیں گل خضدار ءَ پرکار اَنت ءُ پاکستانی لشکر ءِ سر ءَ اُرش کنگ ءَ اَنت ایشانی تہ ءَ ناکہ بندی ھم ھوار بوتگ اَنت بلے انگت ءَ ھچ گل ءَ اے وئیلانی زمہ واری نہ زرتگ۔