TBP Balochi

چہ ڈیرہ غازی خان ءَ رس اتگیں ھالانی رد ءَ بلوچ اسٹوڈنٹس کونسل بھاول پور ءِ پیسریگیں چیئرمین ءُ اسلامیہ یونیورسٹی بھاولپور ءِ ایم فل پولیٹیکل سائنس ءِ نودربر زبیر بلوچ گوستگیں شپ ءَ پاکستانی لشکر ءَ چہ لوگ ءَ آوار جتگ ءُ بیگواہ کتگ-

اھوالانی رد ءَ زبیر بلوچ چہ ڈیرہ غازی خان ءَ وتی لوگ ءَ یک ءُ نیم ءِ نزیک ءَ دزگیر کنگ بوتگ ءُ ناشناسیں جاھے ءَ برگ بیتگ کہ ایشی ءَ پد آئی ءِ کھول ءَ آئی ءِ بابت ءَ ھچ وڑیں ھال ءُ اھوال دیگ نہ بیتگ۔

کھول ءَ زبیر بلوچ ءِ زوت یل دیگ ءِ لوٹ کتگ ءُ ترس ءِ درشانی کتگ کہ زبیر بلوچ آئین ءَ ابید بندی جاہ ءَ دارگ بوتگ۔ آیاں گوں انسانی ھکانی گل ءُ ھمگرنچیں واکاں دزبندی کتگ کہ زبیر بلوچ ءَ زوت چہ زوت دیم ءَ بیار اَنت۔

زانگ بہ بیت بلوچستان ءُ ایندگہ دمگاں چہ بلوچ نودربر زورانسری بیگواہ کنگ ءِ وئیلانی بابت ءَ پیسر ءَ ھم زھر ءِ درشان کنگ بیتگ اَنت۔

بلوچستان ءِ تیابدپی شھر گوادر ءِ ھند چہ جیونی ءَ رس اتگیں ھالانی رد ءَ گوستگیں شپ ءَ پاکستانی لشکر ءَ بیڑ برتگ ءُ دو بلوچ ورنا چہ لوگاں دزگیر کتگ ءُ ناشناسیں جاھے ءَ برتگ اَنت، چہ ایشی ءَ پد آ بیگواہ اَنت۔

بیگواھیں مردمانی پجار کوسر بازار ءِ نندوک ریاض سید ءُ سولان بازار ءِ نندوک جھانزیب ء جامل ءِ ناماں زانگ بیتگ انت ۔

دمگی مردمانی رد ءَ پوج ءَ شپ ءَ دوئیں لوگانی سر ءَ چھاپہ جتگ ءُ ورنا گوں وت برتگ اَنت۔

اے وئیل ءَ پد کھول سکا پریشان اَنت ءُ وتی نزیکیں مردمانی جان سلامتی ءِ ھاترا زوتیں گامگیج زورگ ءِ لوٹ ءَ کنگ ءَ اَنت۔

زانگ بہ بیت کہ بلوچستان ءَ زورانسری ءَ بیگواہ کنگ ءِ وئیلانی اھوال یکشل ءَ شنگ بوگ ءَ اَنت کہ ایشی ءِ سر ءَ انسانی ھکانی گلاں باز رند ءَ زھر ءِ درشانی کتگ۔

ڈیتھ اسکواڈ ءِ کارندھاں بلوچ آجوئی دوستیں سلاہ بندیں گلانی نام ءَ مھلوک ءَ ترس آماچ، شھریاں پجار کتگ انت۔

گیشیں ءِ رد ءَ گوستگیں روچ ءَ بلوچستان ءِ دمگ ھاران ءِ جتا جتائیں جاھاں پاکستانی لشکر ءِ چیر دستی ءَ کار کنوکیں لوکل ڈیتھ اسکواڈاں شھر ءِ تہ ءَ وت ءَ سلاہ بند کتگ ءُ دمگ ءِ نندوکیں مردم لٹ ءُ کٹ کتگ ءُ بیھار داتگ انت۔

دمگ ءِ نندوکیں مردمانی گشگ ءِ رد ءَ آیاں سلاہ بندیں مردمانی پجار کتگ انے کہ آ دمگی تک ءَ سرکاری کمک ءَ ڈیتھ اسکواڈ ءِ کار ءَ کنگ ءَ اَنت ءُ چاگردی برائیانی تہ ءَ ھم ھوار اَنت۔

شھریانی گوشگ انت کہ ھاران ءِ دمگ کلی سراوان ءَ سرکاری ھمایت کتگیں لشکر ءِ مردماں وت ءَ سرمچارانی دروشم ءَ پیش داشتگ ءُ اودا نادراھجاہ ءَ پترتگ ءُ کارمنداں زورانسری ءَ چہ کار بند کتگ ءُ نادراھجاہ بند کتگ ءُ ھمے رنگ ءَ نادراھجاہ ءِ پد ءَ پچ نہ کنگ ءِ بیھار داتگ انت۔

اے وئیل ءَ چہ لھتیں وھد ءَ پد لشکر ءَ ھم دمگ ءَ گشت کتگ وھدے کہ سلاہ بندیں مردم ھمراہ بوتگ اَنت۔

اے میان ءَ اے گل ءِ مردماں نوروز آباد روڈ، ساؤتھ سٹی ءِ پولیو ءِ ٹرانزٹ پوائنٹ ءِ کارندہ بیھار داتگ ءُ بسانی بند کنگ ءَ مساپر ءُ ڈرائیور ترسینگ ءِ جھد کتگ ءُ وت ءَ آجوئی دوستیں بلوچ سرمچار پیش داشتگ۔

زانگ بہ بیت کہ گوستگیں روچ ءَ ھمے ھند ءَ بلوچ آجوئی لوٹوکاں بیڑ ءِ تہ ءَ پاکستانی لشکر نشانگ جوڑ کتگ ایشی ءَ پد لشکر ءِ سر ءُ پرانی تہ ءَ گیشیں گیشی گندگ بوگ ءَ اِنت۔

مھلوک ءِ گشگ ءِ رد ءَ اے اُرشاں پد پاکستانی لشکر چہ دمگی ڈیتھ اسکواڈانی زور ءَ مردماں ترسینگ ءُ بلوچ آجوئی لوٹوکیں مردمانی ھلاپ ءَ شھر ءِ مردماں پروش دیگ ءِ کوشست ءَ کنگ ءَ اَنت۔

شال ءِ بی ایم سی نادراھجاہ ءَ پہ جاندراھی ءَ آرگ بیتگیں زندانی چہ نادراھجاہ ءَ تتکگ ، پولیس ءِ رد ءَ 5 کارندہ موَتّل کنگ بوتگ اَنت ۔

شال: پولیس ءِ گشگ انت کہ پٹواری تاج محمد الاج ءِ واستا چہ لورالائی جیل ءَ نادراھجاہ ءَ آرگ بوتگ۔

شال : ملزم تاج محمد کوش ءِ کیس ءَ دزگیر کنگ بوتگ ۔

سیکورٹی انچارج سب انسپکٹر منظور احمد ءَ ھوار 5 کارندہ وتی کارانی تہ ءَ لاپروائی ءِ سبب ءَ موَتل کنگ بوتگ اَنت۔

ڈی آئی جی لورالائی ءَ ایس پی ءِ سروکی ءَ انکوائری ٹیم جوڑ کتگ۔ وھدے کہ باروری پولیس اسٹیشن ءَ کارندھانی ھلاپ ءَ کیس درج کنگ بوتگ۔

چہ زندانی ءَ درکپتگیں زندانی ءِ ھلاپ ءَ کیس ھم نبشتہ کنگ بیتگ ءُ پٹ ءُ پول بندات کنگ بیتگ ۔

شال ءِ دمگ سریاب دگ سر ءَ سلاہ بندیں مردمانی تیرگواری ءَ سے مردم جاہ پہ جاھی بیران بیتگ اَنت وھدے کہ دو ٹپی بیتگ اَنت-

بیران بیتگیں مردمانی پجّار ھاروان ء میر جمیل مینگل، غفور ء وحید بخش ءُ نصیب اللہ نام ءَ چہ بیتگ اَنت- ٹپیانی تہ ءَ عبدالحفیظ ءُ میر جمیل ھوار اَنت، سول نادُراھجاہ شال ءَ برگ بیتگ اَنت-

اِھوالکار ءِ رِد ءَ میر جمیل مینگل گاڑی ءِ سر ءَ آمیدگس ءَ پیشی ءَ چہ واتری ءَ اُرش کنگ بیتگ چریشی ءَ جمیل مینگل جند ٹپی بیتگ ءُ وھدے کہ آئی ءِ چُک ھاروان مینگل ءُ دگہ دو مردم بیران بیتگ اَنت-

تنی وھدے وئیل ءِ سوب زانگ نہ بیتگ-

بلوچستان ءِ دمگ کیچ ءِ بنجاھی شھر چہ تربت ءَ رس اتگیں ھالانی رد ءَ دوشمبے ءِ روچ ءَ پاکستانی لشکر ءِ تیز رپتاریں گاڑی ءَ تربت ءِ کمشنر روڈ ءَ چہ سڑک ءَ گوزوکیں زالبول حمیدہ ٹکرے جتھ ءُ ایشی ءِ آسر ءَ آ سک ٹپیگ بوتگ۔

ریسکیو ءِ ٹیماں ٹپیگیں جنین آدم ءَ را نادراھجاہ ءَ سر کنگ ءِ جھد کتگ بلے آئی ءَ وتی ٹپیانی درد نہ سگ اتگ بیران بوتگ۔

دومی نیمگ ءَ پاکستانی لشکر ءِ گشگ اِنت کہ زالبول ءَ سڑک ءَ چہ گوزگ ءِ وھد ءَ چارکائی نہ کتگ کہ ایشی ءِ سبب ءَ وئیل بوتگ۔ بلے بیران بوتگیں زالبول ءِ کھول ءِ مردماں اے وئیل ءِ تچکیں پٹ ءُ پول ءِ لوٹ کتگ۔

زانگ بہ بیت کہ اے اولی وئیل نہ انت ۔ چہ پیسریگیں بازیں وئیلاں پاکستانی لشکر ءِ تیز رپتاریں گاڑیانی نشانگ ءَ زھگ ءُ دگہ لس مردم بوتگ اَنت۔

بلوچ مھلوک ءِ نیمگ ءَ شکایت اتکگ انے پاکستانی لشکر ءِ گاڑی آبادی ءِ دمگ ءُ رَشیں شاھدگانی سر ءَ تیز رلتار ءَ رؤگ ءَ انت کہ ایشی ءِ سبب ءَ شھریاں بازیں رند ءَ تاوان رس اتگ انت۔

پاکستانی پوج ءَ لوگانی سر ءَ بیڑ ءِ میان ءَ پنچ مردم آوار جتگ ءُ ناشناسیں جاھے ءَ برتگ اَنت-

بلوچستان ءِ دمگ چہ پنجگور ءَ ھالانی رِد ءَ دوشمبے ءِ روچ ءَ پاکستانی پوج ءَ پنجگور پروم ءِ دمگ ھکیم بازار ءَ کاروائی ءِ میان ءَ پنچ مردم آوار جتگ ءُ ناشناسیں جاھے ءَ برتگ اَنت-

پاکستانی پوج ءِ دست ءَ آوار جنگ ءَ پد زورانسری آوار جنی ءِ نشانگ کنگ بیتگیں مردمانی پجّار سے برات صابر، شریف، شکیل ء غلام حسین، مختیار ء غلام رسول، حسین ء نثار، مولا بخش ء سخی داد نام ءَ چہ بیتگ اَنت-

پاکستانی پوج ءِ دست ءَ آوار جنگ بیتگیں مردم تنی وھدے دیم ءَ آرگ نہ بیتگ اَنت-

ھمے وڑ گوستگیں سال ءَ 26 دسمبر ءَ تیاب دپی شھر چہ گوادر ءَ زورانسری بیگواہ کنگ بیتگیں کیچ مند ءِ جھمنندیں عامر ء جاسم ولی داد، ءُ شش اپریل ءَ زورانسری آوار جنی ءِ نشانگ بیتگیں الیاس ء میداد یل کنگ بیتگ-

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءَ سرجمی ءَ ھمل میری ٹائم ڈیفنس فورس (Hammal Meritime Defence Force) ءِ جوڑ کنگ ءِ پیسلہ کتگ کہ آ بلوچ زر ءِ پھازگ ءَ بہ کنت۔ بی ایل اے ءِ اے نوکیں ھواریں فورس ءَ وتی اولی آپریشنل آپریشن ءِ بندات کنگ ءِ وھد ءَ مرچی دو شمبے 12 اپریل 2026 ءَ گوادر ءِ جیونی ءِ دمگ ’مل تیاب‘ ءَ سلاہ بندیں اُرش ءِ تہ ءَ زور گیریں پاکستانی بھریہءِ گشت ءِ کشتی ءَ را نشانگ جوڑ کتگ۔ کشتی ءِ سر ءَ نائیک افضل، سپاھی جمیل ءُ سپاھی عمر جاہ ءَ بیران بوتگ انت۔ آپریشن ءَ پد مئے سرمچار وتی مھکمیں جاھاں سر بوتگ اَنت۔

آئی ءَ گوشتگ بلوچ لبریشن آرمی اے گپ ءَ پدر کنگ لوٹ ایت کہ بلوچ راجی آجوئی تھریک نوں یک انچیں پڑے ءَ اتکگ کہ اود ءَ بلوچستان ءِ زمین ءِ ھمرائی ءَ آئی ءِ دریائی سیمسر پہ دژمن ءَ یک مَرگی راھے ءِ نشانگے سابت بنت۔ زور گیریں پاکستان ءُ آئی ءِ لُٹ ءُبپلی شریکاں سالانی سال اِنت کہ بلوچ ءِ زر ءَ ناجائزیں وڑے ءَ نیلام کنگ ءَ اَنت کہ اود ءَ مئے دریاوردانی لاپ جنی برجاہ اِنت ءُ زر ءَ فوجی چھاونی جوڑ کنگ بوتگ اَنت۔ ھمل میری ٹائم ڈیفنس ءِ جوڑ کنگ مئے راجی بھریہ ءِ بندات اِنت کہ آ بلوچ ءِ زور ءِ لٹ ءُ پُل ءِ بند کنگ ءِ ھاترا ھر وھد ءَ جاڑیگ بیت، دژمن ءِ زری سر ءُ پراں نگاہ ایر کنت ءُ زیردستیں زر ءِ پھزداری ءَ کنت۔

آئی ءَ گوشتگ بی ایل اے ءَ گچینی رنگ ءَ اے نیول یونٹ ءِ نام بلوچ گھگیری ءِ مزن نامیں سَر ھمل جیئند بلوچ ءِ نام ءَ داتگ۔ ھمل جیئند بلوچ راجدپتر ءِ مزن کردیں بچ اِنت کہ آئی ءَ شانزدہمی کرن ءَ آ دور ءِ نوکیں پرتگالی نوآبادیاتی ءِ ھلاپ ءَ زر ءِ پھزداری ءِ بُن ھشت ایر کتگ ءُ وتی جنگی سنچ ءَ گوں دری زورگیر شکست داتگ انت۔ ھمل جیئند ءِ کرد بلوچ راجی یات ءَ شرپ ءُ شام ءُ زر ءِ پھزداری ءِ ابدمانیں چیدگی رنگ ءَ نکش کنگ بوتگ۔ آئی ءَ اے گپ منینتگ کہ زور ءَ چہ زرباری نوآبادیاتی نزام ءِ ھلاپ ءَ مدام راجی تب ءُ گوریلا ءِ گامگیج سوبمند بنت۔ بی ایل اے ءَ اے نام پہ وتی اے جزم ءِ پد ءَ پدر کنگ ءَ گچین کتگ کہ مئے انوگیں گھگیری اے نامداریں راجدپتری میراس ءِ درچ اِنت۔ انچو کہ ھمل جیئند ءَ پرتگیزیانی وتگڑیں زور ءِ سر ماں ھاکاں سک داتگ ھمے پیم ھمل میری ٹائم ڈیفنس فورس ھم مرچیگیں زورگیراں چہ بلوچ ءِ زر ءَ درکنگ ءَ اِنت۔

جیئند بلوچ ءَ گوشتگ بلوچ لبریشن آرمی دژمن ءَ ھال دنت کہ نوں مئے لشکری ​پتر مزن بوتگ کوہ ءُ شھراں بندوک نہ اِنت بلکیں ما دژمن ءَ جُھلانکیں زر ءِ تہ ءَ نشانگ جوڑ کنگ ءِ سرجمیں ڈبو زرتگ ءُ آئی ءِ بھری مال ءُ مڈی ھم نشانگی ءَ ھوار اَنت۔ مئے اے جنگ گوں سرجمیں زور ءَ برجاہ مان اِیت داں دژمن ءِ سرجمی ءَ کشگ ءُ آزات ءُ وت واجھیں بلوچ ریاست ءِ سرجمی ءَ برجاہ مان انت-

بلوچ ریپبلکن گارڈز ءِ جارکش دوستین بلوچ ءَ رسانکدر ءَ شنگ کتگیں بیانے ءَ گْوشتگ کہ مرچی بلوچ ریپبلکن گارڈز ءِ سرمچاراں بلوچستان ءِ دمگ کچھی ءِ سنی ھند ءَ پاکستانی لشکر ءِ نیمگ ءَ چیر کنگ بوتگیں سرویلنس کیمرہ نشانگ جوڑ کتگ ءُ تباہ کتگ اَنت۔

آئی ءَ گْوشتگ: مئے گل بی آر جی اے اُرش ءِ زمہ واری ءَ من ایت ءُ داں بلوچستان ءِ آجوئی ءَ اے وڑیں اُرش برجاہ مان اَنت۔

بلوچستان ءِ دمگ بارکھان ءَ پاکستانی لشکر ءِ نیمگ ءَ کورکاری بمباری ءُ تیرگواری ءَ زالبول ءُ زھگاں ھوار بازیں مردم بیران ءُ ٹپیگ بوتگ اَنت۔

ھالانی رد ءَ ناشناسیں سلاہ بندیں مردمانی اُرش ءَ پاکستانی لشکر ءِ 12 کارندہ بیران بوتگ انت۔ اُرش ءَ پد پاکستانی لشکر ءَ دمگ ءَ مزنیں کچے ءَ آپریشن بندات کتگ ۔

دمگی مردم ءُ چمدیستگینانی گشگ ءِ رد ءَ پورسز ءِ نیمگ ءَ کتگیں بمباری ءَ زالبول ءُ چُک ھوار لس مردم نشانگ جوڑ بوتگ اَنت۔ اے کاروائی ءِ آسر ءَ کم چہ کم 12 مردم بیران ءُ 3 مردم سک ٹپی بوتگ اَنت۔

بیران بوتگیں مردمانی تہ ءَ علی ء سلطان اُمر (40 سال)، گلزار ءِ جنک بیبل اُمر (30 سال)، میر جان ء علی اُمر (2 سال)، بھنگان ءِ جنک سومری اُمر (35 سال)،بالاچ ء سبزو اُمر (70 سال)، شاری اُمر (22 سال)، بالاچ ءِ چُک رحمن (18 سال)، رحمان ء بالاچ اُمر (18 سال)، نائخو بنت جمالان اُمر(17) اللہ بخش ء بالاچ اُمر (6 سال)، سادو بنتِ بالاچ (13 سال)، ھاپو بنت بالاچ (8 سال) ءُ مھرنگ بنت بالاچ (2 سال)۔

ٹپیگانی تہ ءَ شیر ءِ جنک زر بی بی (55 سال)، بالاچ ءِ زھگ ھزار خان (9 سال) ءُ بالاچ ءِ جنک اسرار (15 سال) ھوار اَنت۔

دمگی مردماں اے ھم گْوشتگ کہ یک گاڑی یے ءِ تہ ءَ بازیں مردمانی سوتکگیں لاش گندگ بوتگ اَنت۔ البت اے درگت ءَ سرکاری تک ءَ راستی ءُ انکاری نہ بیتگ انت۔

بلے اے درگت ءَ واکدارانی لیکہ انگت ءَ پدر نہ بوتگ۔