TBP Balochi

بلوچستان ءِ جتاجتائیں دمگ پاکستان ءِ لشکر ءِ آپریشن ءِ زد ءَ اَنت۔ اے دمگانی تہ ءَ دشت، تربت، مستونگ، خضدار، ہرنائی ہوار انت۔ گن شپ ہیلی کاپٹر، کواڈ کاپٹر ءُ بکتر بندیں گاڑی ءُ توپ خانہ آپریشن ءِ بھر انت۔

تربت ءِ دمگ ناصر آباد ءُ کش ءُ گوراں ءَ پاکستانی لشکر ءَ مروچی سھب ءَ آپریشن بندات کتگ ءُ آبادی ءُ جنگل آپریشن ءِ زد ءَ اَنت۔ دمگی وسیلگ ءِ رد ءَ سلاہ بندیں گلانی باسک بزاں ڈیتھ اسکواڈ ھم اے آپریشن ءِ بھر اَنت۔

دومی نیمگ ءَ تمپ ءِ ھوت اباد، کوہاڈ، کلاہو ءُ کش ءُ گوری دمگاں گوستگیں روچ ءَ چہ آپریشن برجاہ اِنت۔ مرچی دومی روچ اِنت کہ دمگ ءَ مزنیں کساسے ءَ فورسز آپریشن ءَ گوں بندوک اَنت۔

دومی نیمگ ءَ کیچ ءِ دشت ، چیر کنچتی ءِ دمگاں پاکستانی لشکر ءِ آپریشن ءَ سلاہ بندیں مردمانی نشانگ جوڑ کتگ انت کہ ایشی ءِ آسر ءَ پنچ کارندہ بیران بوگ ءِ ھال انت بلے انگت ءَ اے گپ ءِ پدرائی چہ واکداراں نہ بوتگ ۔

ایشی ءَ ابید مستونگ ءِ دمگ دشت ءُ پنگو ءَ پاکستانی اُرد ءِ سداں کارندہ آپریشن ءَ گوں دزبند اَنت، بکتربندیں گاڑی ءُ کواڈ کاپٹر آپریشن ءِ بھر اَنت۔

رپورٹانی ردا کلیں آبادی چہ لشکر ءِ انگیر ءَ انت۔

دومی نیمگ ءَ پاکستانی فوج ءِ گن شپ ھیلی کاپٹراں خضدار ءِ دمگ پیر عمر ءُ کش ءُ گوراں جتا جتائیں جاھاں ترندیں تیرگواری کتگ بلے تاوان ءِ بابت ءَ انگت ءَ ھچ وڑیں ھال ءُ اھوال سر نہ بوتگ۔

ہرنائی ءِ شاھرگ ءُ کش ءُ گوری دمگاں پاکستانی لشکر ءِ سداں کارندہ ھم پیادگ ءُ گاڑیانی تہ ءَ دیم ءَ روگ ءَ گندگ بیتگ اَنت۔بکتربندیں گاڑی ءُ توپ خانہ ھم فورسز ءِ ھمراھی ءَ آپریشن ءِ بھر اَنت۔

دومی نیمگ ءَ قلات ءِ منگچر ءِ دمگ سورو ءَ روڈ کلیئرنس ءَ گوں بندوکیں فورسز ءِ کارندہ گمانی اسنائپر اُرش ءَ نشانگ جوڑ کنگ بوتگ اَنت کہ ایشی ءِ تہ ءَ یک کارندہ ءِ بیرانی ءِ ھال بوتگ۔

مستونگ ءِ دمگ گرگینہ ءُ کش ءُ گوری دمگاں پاکستانی فوج ءِ کاروان ءِ تہ ءَ ہواریں کارندہ ہم سلاہ بندیں اُرش ءِ تہ ءَ نشانگ جوڑ کنگ بوتگ انت۔

گوستگیں روچ ءَ قلعہ عبداللہ ءِ دمگ گلستان ءَ پنکی ءَ تراک ءِ تہ ءَ ناشناسیں مردماں لشکر ءِ یک ھالیگیں چوکی یے تباہ کتگ۔ وسیلگ ءِ رد ءَ اے چوکی ءَ چہ فورسز ءَ جتا جتائیں کارانی واستا کارمرز کنگ بوھگ ءَ ات۔

پاکستانی واکداراں انگت ءَ سرجمیں بلوچستان ءَ جنگی آپریشن ءِ بابت ءَ ھچ وڑیں ھال ءُ اھوال نہ داتگ ءُ ھچ وڑیں اُرشانی زمہ واری ھچ گل ءَ نہ زرتگ انت۔

دشت سالونک کنت ملگزاریں سراں

نبشتہ کار: چراگ نگوری

دی بلوچستان پوسٹ

سُھب ءِ سارتیں سمین کَشگ ءَ اَت ءُ روچ چہ کوھانی نیام ءَ درآیگ ءُ وتی زردیں گشان ءَ پیچان ءُ گرمیں برزاں کوھانی دامن ءَ یل دیان اَت۔من مَچ ءِ بُن ءَ کمبل پچ کتگ ءُ گوں سیاھیں چاھے ءِ گلائیش اِت آن ءُ بازیں سنگتے گوں تیّن ءَ نانانی پچگ ءَ گلائیش اَت، ءُ منی گور ءَ یک ءُ دو سنگت ھم نشتگ ءُ ما گپ ءُ کِسہ کنگ ءَ اتیں۔ کہ اناگتہ مئے اوتاک ءِ پشت ءَ بزانکہ کور ءِ بُرزی نیمگ ءَ دو سنگت دیم پہ مئے نیمگ ءَ پیداک اَت، یک برے دراھیں سنگتاں چم ھمے دوئیں سنگتاں سَک دات اَنت کہ اے چونین اَنت؟؟بلے سنگتے ءَ گشت کہ پلانی ءِ سنگت اَنت۔۔سنگت اتک اَنت ءُ مئے گور ءَ سر بیت اَنت چاہ ءُ آپ ءَ چہ پد منی دپ ءَ دراتک شما نیٹ گپتگ اگاں ناں شمارا نٹ ئِے چی ھال ءُ ھیوال گوں؟سنگتے بچکندت ءُ گشت پل ما نیٹ گپتگ زی بلے ما وت انگت ھال نہ چارتگ اَنت، تو ھال ھیوالاں وان مارا بگش گوں،سنگت ءَ وتی مبائل من دات ءُ آشوب ءِ گروپ پچ اَت۔

من گوں ھالاں سَر پُٹ ءُ وان اتاں ، پد ءَ بلوچ ءِ زمین ءِ ھالانی تہ ءَ چشیں ھال وَ مدامی مان اَت کہ پلاں ھنداں پلانی تیر سُپتگیں لاش کپتگ، ھمے وڑ ءَ مرچیگیں ھالانی تہ ءَ ھم باز لاشانی اکس شنگ ءُ تالاں اِت اَنت چوں دشت، پنجگور ،پروم ،تربت ،شال ،مستونگ، کراچی، جیونی ،پسنی،من وان ءُ اناگتہ منی چم یک تیروارتگیں ورناھے ءِ اکس ءَ کپت اَنت کہ پورو اے اکس ءَ منی دیدوک شرّی ءَ پَجّا آرگ ءَ اِت آں منی چم ھمے اکس ءَ سَک اِت اَنت زاناں منی کَش ءِ سگت ءَ من ءَ ملور ءَ دیست ءُ جست ئِے کت کہ اڑے ھیر اِنت تو ملوت بیت ئے؟؟اڑے ملگزار ءِ اکس نہ اِنت ؟ من گوں گیلوتگیں توار ءَ گشت ، سنگت ءَ چار اِت ءُ گشت ھو ھمیش اِنت ؟بلے چون کجام جنگ ءَ بیتگ؟ من جلدی جلدی سنگت جُست کت؟یار دگے کِسہ نیست بس لاش تربت ءِ نادراجاہ ایر اِنت۔ من گشاد گشاد ءَ گاٹ ھال کت کہ باریں شھر ءِ نزیک ءِ سنگتاں گوں ھالے بگر ءُ جُست اِش کن کہ لھتیں سنگتانی شھیدی ءِ ھال اِنت راستے؟ھالے راستے آں کہ من ملگزار تیر سُپتگیں جون ءِ اکس ءَ زانگ ءَ اِت آں بلے پورو من ءَ انگت باور بوگ ءَ نہ اَت، دمانے ءَ رند سنگت ءَ ھال کت کہ ھو راستے دو سنگت دشت ءَ جنگ بیتگ ، یکے ملگزار دومی سنگت زانگ بیگ ءَ نہ اَنت انگت۔۔

اے ساھت گوں من برداشت بیگ ءَ نہ اَت، من وڑ وڑیں ھیالانی توک ءَ کپان ءُ پُرشان اِت آں ، پورو ملگزار ءِ کندگانی توار منی گوشانی توک ءَ سَر جنان اَت برے آئی ءِ مھروانی ءُ پد ءَ ھمے گپ کہ تو منی براتُک ئے۔۔ اے ساھت ءَ شھید ءِ کُلیں کندگ ،گپ ءُ مسکرا ءُ واب ءُ واھش، چو دپترے ءِ دروشم اَت ءُ منی دیم ءَ پَچ اَت ، من زانگ نہ اِت آں کہ آئی ءِ کجام گپ ءِ سر ءَ گیشتر بہ جیڑان ءُ آئی ءِ کجام واب ءُ واھشت ءَ سرجم بکناں کہ آئی ءَ مدام واب دیستگ کہ من رواں وتی ھنداں وتی ھلک ءِ مردماں چہ اے زورگیر ءِ پگر ءَ چہ در کنان ءُ آشوبی جھدکار جوڑ کناں کہ بِلِے وتی راجی آجوئی ءِ پِڑ ءَ جُھد کنان ءُ من مدام کلاگ زرتگ اَت تئی میتگ ءِ سرمچار یکے تو ئے تو بِمر ئے پد ءَ باریں کَسے کیت یا نہ ناں، آئی ءَ بچکند اِتگ ءُ گشتگ ھمے یکیں پد ءَ سَد بیت۔۔

ملگزار شے یے اَت ملنگے ءُ پہ زمین انچو شیدا اَت کہ چمانی تہ ءَ تھنا زمین زبان ءُ راج گندگ بیگ ءَ اَت ،دگہ چہ جھانی وشیانی نیمگ ءَ بھ نہ جیڑ اِت ئِے ءُ آ مدام جیڑگ ءَ اِت من کجا نہ کجا انچیں کارے بکناں کہ منی راجی جُھد ءَ گیشتر نَپ ءُ پائدگ برس اِیت ءُ من چشیں کارے مکناں چہ منی پہ سِلیں کار ءَ منی گَل ءُ جھد ءَ تاوان برَس اِیت،،ءُ مدام ورنایاں ٹوھینگ ءَ اَت کہ وتی تپنگ ءَ پھریز اِت چو نہ اِنت کہ شما راجی شھیدانی امانت ءَ داگہ بِہ لچین اِت ءُ شیھدانی امانت ھرابیں راھے ءَ کارمرز بہ بیت۔۔

ملگزار ءَ جھان ءِ سرجمیں گلام ءُ تنگدستیں راجانی راجدپتر وتنگ اِت اَنت یات اِت اَنت ئِے ءُ ھما راج کہ آیاں وتی گلام ءِ چونیں جنزے بنا کتگ ءُ جنگ کتگ ، پد ءَ ملگزار مدام وتی گپ ءُ باوستانی توک ءَ ھمے جنگی جنزانی درور داتگ اَنت کہ پلاں راج ءَ چون جنگ کتگ ءُ وتی راجی زمین رکینتگ ءُ پلاں راجی جنزاں اے نزوری کتگ ءُ پد ءَ آجنز اوشت ءِ آماچ بیتگ ، نی ما شما وتی راجی جنگ ءِ تہ ءَ چشیں نزوری مکنیں کہ پد ءَ راجی جُنز اوشت ءِ آماچ بہ بیت۔۔۔۔۔ملگزار پہ راجی زبان ءُ زمین ءِ رکینگ ءَ باز واب دیستگ اَت بلے چی کن ئے چیزے ءَ کہ بیگی اَت ،وَ بیت پد ءَ زمین اے پیسلہ ءَ وت کنت کہ من وتی کجام بچ ءَ کجام وھد ءَ وتی دلبند ءَ بُہ واپیناں۔30ستمبر 2026
ھون جونییں بلوچستان

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت۔

بلوچستان ءِ دمگ چہ کلات ءَ نوزدہ سالی ئیں نودربر لائبہ ستار ءِ زورانسری آوار جنی کیس دیم ءَ اَتکگ، کہ آ 29 مارچ 2026 ءِ شپ نُھ ءَ چہ کلات ءَ بیگواہ کنگ بیتگ-

بی وائی سی ءِ رِد ءَ لائبہ ء عبدالستار، ایف ایس سی ءِ نودربرے – دزکپتگیں ھالانی رِد ءَ آئی ءِ زورانسری آوار جنی زمہ واری ڈیتھ اسکواڈ نام گرگ بیتگ-

زانگ بہ بیت کہ بلوچستان ءَ” ڈیتھ اسکواڈ ” ھما ٹولی اِنت کہ آ گیشتریں وھداں لَس شھریاں، سیاسی کارکنوں، انسانی ھکانی کارکن یا گھگیر کنوکاں نشانگ کن اَنت-

راجدوستاں اے درگت ءَ گوش اَنت کہ اے ٹولی ناں تھنا ھکومتی ءُ پوجی ادارھاں پشت گون اِنت بلکیں پولیس ءُ دگہ کانودی ادارہ ھم اشانی ھلاپ ءَ کاروائی ءَ چہ پھریز کن اَنت-

کیچ ءِ تھسیل تمپ ءِ دمگ کوھاڈ ءَ پشمبے ءِ روچ ءَ پاکستانی پوج ءُ سلاہ بندیں مردمانی میان ءَ میڑ بیتگ، چریشی ءَ پوج ءَ جانی تاوان چست کنگ کپتگ-

میڑ ءِ میان ءَ یک مردمے بیران بیتگ، کہ آئی ءِ پجّار حمل ء نیک بخت، جھمنند دشت کسر نام ءَ چہ بیتگ-

اشی ءَ اَبید بلیدہ ءِ دمگ زومدان ءَ پاکستانی پوج ءِ کاروان ءَ پھاز دیوکیں کارمندانی سر ءَ سلاہ بنداں اُرش کتگ-

دمگی اِھوالکار ءِ رِد ءَ اے اُرش ءَ پوج کارمنداں جانی تاوان چست کنگ کپتگ-

بلے اے اُرشانی درگت ءَ چہ واکدار نیمگ ءَ ھچ وڑیں درشان نیتکگ-

اے دمگاں بلوچ آجوئی لوٹوکیں سلاہ بندیں گل پُرکار اَنت ءُ گوستانک ءَ پاکستانی پوج ءُ سرکاری ماڑی نشانگ کنگ بیتگ اَنت-

بلوچ ریپبلکن گارڈز ءِ جارکش دوستین بلوچ ءَ رسانکدر ءَ شنگ کتگیں یک بیانے ءِ تہ ءَ گْوشتگ کہ مرچی سھب ءِ پنچ ءَ بگر داں ھپت ءَ بلوچستان ءِ دمگ سبی ءِ گند مٹھڑی ءَ بلوچ ریپبلکن گارڈ ءِ سرمچاراں مزنیں شاھدگ بند کتگ ءُ گاڑی سرجمیں پٹ ءُ پول کتگ انت۔

جارکش ءِ رد ءَ ھمے وھد ءَ زورگیریں پاکستانی لشکر ءَ دیم ءَ روگ ءِ کوشست کتگ، سرمچاراں وھد ءِ سر ءَ پسو داتگ ءُ لشکر ءِ سر ءَ اُرش کتگ۔ یک ترندیں جنگ ءُ چوپے برجاہ بوتگ ، زورگیریں دژمن ءِ 6 فوجی کارندہ جاہ ءَ بیران بوتگ اَنت وھدے کہ بازیں کارندہ ٹپیگ بوتگ اَنت ۔

دوستین بلوچ ءِ گْوشگ اِنت کہ دومی نیمگ ءَ اود ءَ سرمچاراں پولیس پوسٹے ءِ سر ءَ اُرش کُتگ، پولیس ءِ کارندہ ترس ءُ بیم ءَ تکگ اَنت، سرمچاراں پوسٹ کنٹرول کُتگ، سرجمیں سامان، موٹر سائیکل زرتگ ءُ پوسٹ مانداشتگ۔

جارکش ءَ گوشت کہ اے جزمیں مشن ءِ سرجم کنگ ءِ وھد ءَ گل ءِ یک دلیریں سرمچار شھید اصغر ء عبدالحمید جھمنند کچھی دژمن ءِ دیم ءَ جنگ کنان ءَ وتی جان ندر کتگ۔

آئی ءَ گوشت کہ آئی ءِ اے مزنیں کُربانی ءُ ابدمانیں کُربانی بلوچستان ءِ آجوئی ءِ راجدپتر ءَ سھر چکیں لبزاں گوں نبشتہ کنگ بیت۔ شہید اصغر جان ءَ 2025 ءَ بی آر جی ءَ ہوار بوتگ، شہید اصغر جان سک دلیریں سرمچارے بوتگ۔

آئی ءَ دیمترا گْوشتگ کہ آئی ءَ بلوچ راجی آجوئی جنگ ءَ وتی کرد جوانیں وڑے ءَ پیلو کتگ ءُ بلوچستان ءِ کچھی ڈھاڈر، سنی، بولان، سبی ءِ وڑیں دراھیں دمگاں زورگیریں دژمن ءَ را پروش داتگ۔

بی آر جی ءِ جارکش ءَ گْوشتگ کہ بلوچ ریپبلکن گارڈ وتی شھیدانی ھیال ءُ لیکہ ءُ فلسفہ ءِ سر ءَ سدک بوھگ ءِ وھد ءَ بلوچ راج ءَ را دلجمی دنت کہ شھیدانی ھون ھچبر بے سوب نہ بنت ءُ اے جنگ گوں سرجمیں زور ءُ پھریزی رھبند ءَ سرجمیں دیماں جنگ بیت داں بلوچ ءِ آجوئی ءُ بلوچیستان ءِ جوڑ کنگ۔

دوستین بلوچ ءَ گڈی ءَ گُشت کہ مئے گل بی آر جی اے اُرشانی زمہ واری ءَ من ایت ءُ شھید اصغر جان ءَ سھریں سلام پیش کنت مئے اے وڑیں آپریشن داں بلوچستان ءِ سرجمیں آجوئی ءَ برجاہ مان اَنت۔

وطن ءِ اندر ءَ جلاوطنی

نبشتہ کار : شبیر بلوچ

(بساک ءِ گوستگیں سرکماش)

دی بلوچستان پوسٹ

انچش کہ بلوچستان سرکار ءِ نیمگ ءَ بلوچستان ءِ جتاجتائیں جاگھانی زورانسری لڈ ءُ بار ءِ جار ءِ نوٹیفیکیشن شنک کنگ بوتگ ات۔ اے نوٹیفیکیشن اسل ءَ سرکار ءِ پالیسیاں گوں ھوار گوستگیں وھد ءِ ھما کہ ریاست ءِ منصوبگ انت کہ بلوچ ءَ را بلوچستان ءِ تہ ءَ اقلیت ءِ تہ ءَ مٹ کنگ۔ سٹلر کالونیلزم ءِ بنیاد ءَ بلوچستان ءِ جتاجتائیں ھند ءُ دمگاں دری مہلوک ءَ را آباد کنگ۔ اے اسل ءَ چہ گوست ءَ 70 ءِ دہک ءَ بھٹو ءِ سرکار ءِ منصوبہ انت۔ کہ ھاس بلوچستان ءِ کوسٹل بلٹ ءَ ھالی بہ کنت ءُ دری راجاں آباد بہ کنت ءُ بلوچ ءَ بلوچ ءِ جند ءِ ڈیھ ءِ تہ ءَ جلاوطنی ءِ زند ءِ گوزینگ ءَ مجبور بہ کنت۔

مرچی جاور اد ءَ اتکگ انت کہ مرچی بلوچ وتی سرڈگار ءِ سر ءَ آئی ءِ واستا زند گوازینگ سک گران بوگ ء انت۔ ءُ من بلوچ راج ءَ را ھمے گشین کہ بلوچ ءِ راجدپتر، بلوچ ءِ یاد داشت بلوچ ءَ را ھمے سبک ءَ دے انت کہ بلوچ ءَ گشتگ کہ من وتی سرڈگار ءِ یک انچے ءَ چہ ھم پُشت نہ کنزاں۔ بلوچانی بتل انچو مہکم انت بندپتری ھساب ءَ کہ بلوچ ءِ گور ءَ زمین ءِ بھا کنگ ایب انت۔ اگاں کسے پہ شدیکی، بزگی، نادراہی ءُ مجبوری ءَ وتی زمین ءَ بھا بہ کنت گڑا بلوچ گُش انت کہ اے مردم بھہ آباد نہ بیت کہ آئی وتی مادریں وطن ءِ سودا کتگ، مادریں وطن ءِ زر وارتگ انت۔

مرچی بلوچستان ءِ چہ جتاجتائیں ھند ءُ دمگاں بلوچ مھلوک زورانسری اود ءَ در کنگ بوگ ءَ انت۔ اے تہنا زینانی منتقلی یا یک جاہے ءَ چہ دومی جاہ ءَ روگ نہ انت۔ اے کل مئے یاد داشت، مئے زند اے کلیں رو انت، دنز گِر انت ءُ گار بنت۔ اگاں ما بلوچ راج اے جیڑہ ءَ را یک ھندی، میتگی جیڑہے بزوریں آؤکیں وھد ءَ جاور انچو تنگ بنت کہ بلوچ ءَ بوت کنت وتی سرزمین ءَ پہ کبرے ھم نصیب مہ بیت کہ وت ءَ را ھمود ءَ کل بہ کنت۔ گڑا بلوچ راج ھمے چیز ءِ سر ءَ تپاک بہ کنت کہ بلوچ ءَ اگاں یک چیزے زندگ دار ایت ، آ بلوچستان انت۔ چو کہ تاکتوراں مدام ھمے گُشتگ کہ مارا بلوچ نہ لوٹ ایت بلوچستان لوٹ ایت، بلوچ چکچینی ءِ ھما کہ تیز گامیں سلسہ کہ بندات بوتگ انت۔ 2000 ءَ پد کہ انوگ ءَ دان یکشل ءَ برجاہ انت۔ ما ھمے سرپد بئیں کہ بلوچ چکچینی ءَ بلکیں سگیت کت بہ کنت، بلوچ ءِ دل ءُ سینگ انچو بُرز انت کہ بلوچ پہ مرگ ءَ یا خواریاں سگیت کت کنت۔ نوں سر اتکگ کہ بلوچ سرزمین ءِ سر ءَ۔ زورآور بلوچ ءِ زمین سر ءَ حملہ آور انت، اے حملہ آوری تہنا یک ھندے ءِ زورانسی لڈ ءُ بار نہ انت۔ اے کلیں یاد داشتانی کشگ انت۔ اے کلیں ھما یاد ءُ مہر کہ مردماں وتی ھند ءُ ڈگاراں گوازینتگ۔ اگاں ما اے چیز ءَ ھندی ھساب ءَ بچاریں گڑا مئے واستا بلاہیں المیہ ءُ بلاہیں وبا یے بیت۔ انچو کہ انوں ریاست جتاجتائیں یونٹ ءُ صوبہانی منصوبہ بندی کنگ ءَ انت، گڑا ھمے صوبہانی جوڑ کنگ ءِ تہ ءَ بلوچ ءِ نام ءَ ھم گار کنگ ءَ انت۔ ھمائی ءَ کہ ما بلوچستان گشیں، جتاجتائیں اسٹرکچر ءِ تہ ءَ آرگ ءَ انت۔ اے زورانسری لڈ ءُ بار اسل ءَ بھٹو ءِ سرکار ءَ بگر داں سی پیک ءِ دیمروئی ءِ نام ءِ سر ءَ بلوچستان ءِ جتاجتائیں ھندانی تہ ءَ زور مردم کشگ بوتگ انت۔ مشکے مئے دیم ءَ مسالے کہ زلزلی بیت انت گڑا استان گشیت کہ من اد ءَ مھلوک ءَ را کمک کنگ ءَ آیگ ءَ آں، اد ءَ جاور ھراب انت مارا تاکت کارمرز کنگ لوٹیت۔ اسل ءَ سیکورٹی ءِِ جیڑہ، جاورھالانی سوب ءَ نہ انت، ریاست ھما میگا سرمایہ کاری کہ کنگ ءَ انت، آئی ءِ واستا بلوچ ءِ جند سر ءِ درد یے۔ اگاں مرچی سیکورٹی ءِ سوب ءَ ریاست کہ مردماں کشگ لوٹگ ءَ انت، اے آئی ءِ نا اہلی انت بلے اشی ءَ ھم بلوچ ءِ سر ءَ زور دیگ ءَ انت، گڑا بیا ات بلوچ راج، اشی ءَ تہنا قلات ءِ جیڑہ مہ زور ایت، یا تہنا زہری ءِ مردمانی جیڑہ مہ زور ایت، یا کوسٹل ءِ نیمگ ءَ شادی کور ءِ ، سر دشت ءِ جیڑہ مہ زورایت، یا دگہ ھما کوچگ ھست انت، آیانی جیڑہ مہ زور ایت۔ تہنا ڈیرہ بگٹی ءُ کوہ ءِ سلیمان ءِ جاورھالاں بہ چاریت۔ کہ ریاست اود ءَ امیچنو زورانسری آپریشن کنت، مہلوک ءَ جنت، بارت، ٹارچر کنت، مرچی یک سرجمیں آبدی یے مئے در پہ دری ءِ زند گوازینگ ءَ انت۔ اے نوں مئے بلوچ راج ءِ سر ءَ انت کہ ما یک نوٹیفیکیشن یے ءَ وتی ھما بندپتری زمین ءَ چہ دستبردار بئیں یا ما اوشت ایں، اے مئے سر ءَبلاہیں سوالے، ۔

بلوچ وتی درد واری ءَ یکجاہ انت، مہلوک برگ بوتگ، جنگ بوتگ انت، کشگ بوتگ انت گڑا مشترکہ درد ءِ فلسفہ بوتگ کہ مارا یکجاہ کتگ ئِے گڑا بیا ات زورانسری لڈ ءُ بار ءِ سر ءَ روڈانی سر ءَ در بیا ایں، ما بہ نندیں ، یک دومی ءَ سرپدی بہ دئیں کہ اے انوگیں منصوبہ بندی تیار کنگ بوگ ءَ انت، اے سک ءَ ترسناکیں چیزے، اشی ءِ باندا سکیں ترسناکیں سان بلوچ مہلوک ءِ سر ءَ کپ انت، اے مئے زمین ءِ سر ءَ مئے یاد داشت انت، مئے زند انت، ھما کہ مئے پس ءُ پیروکانی کبر انت، آ درست رونت، بے وس مہ بئیت، یک دومی ءَ گوں ھم کوپگ بہ بئیت، بلے اے جیڑۃ ءَ را ھم یک راجی جیڑہے بزوریت۔ اے کسانیں جیڑہے نہ انت کہ آئی ءِ سر ءَ یک تبکے ءِ مردم سوال چست بہ کن انت۔

اے مزہبی مردمانی واستا یک جیڑہے بہ بیت، پارلیمانی مردامنی واستا جیڑہے بہ بیت، پگری ھساب ءَ زمین ءَ در کنگ ءِ سرپدی ءَ وتی مردماں بہ دینت، ھما کہ نودربر انت، آیاں دینا ونتگ، آیاں فلسطین وتنگ, آیاں کشمیر دیستگ آیاں دیستگ کہ دنیا ءِ تہا هما راجاں وتی زمین یل داتگ آ مرچی چوں در پہ دریں زندے گوازینگاں آ بیا آں همیشی ءَ وتی مردماں سرپد بہ کن اَنت, هما کہ استاد اِنت, آ وتی نودربراں سرپد بہ کن اَنت, کہ مرچی فلسطین ءِ مهلوک پناہ گیزیں کیمپانی تہا چونیں در پہ دریں ءُ بزگیں زندے گوازینگاں- گڑا مرچی بلوچ راج اے جیڑہ ئے سرا مشترکہ وتی درد ءِ احساس ءَ گوں در بہ کپیت, اے جیڑہ تهنا گپ ءُ باوست یا کہ نندگ ءُ موتک آرگ ءَ چہ شر نہ بیت اِنت- همینچو زوتاں اے احساس ءُ شعور مئے تہا پیداک بیت همینچو گیش ما وتی زمین ءَ رکینت کُت کنیں- اے جیڑہ سرجمیں بلوچ راج ءِ جیڑہ اِنت هر هما مردمے هم جیڑہ اِنت کہ بوت کنت آیانی هلاکہ ئے تہا اے جبری منتقلی کیس نئیتکگ- بلئے آئی ءَ سما بہ بیت کہ اے جیڑہ منی سرا هم کپیت- زمین کہ شُت گڑا هچ نہ مانیت ءُ مرچی اے وئیل تهنا سکیورٹی ئے نام دئیگ بوگ ءَ اِنت یا کہ هما پروجیکٹ اَنت در اسل اِدا یونٹ سازی کنگ بوگ ءَ اِنت آ یونٹ سازی بلوچ ءِ سرا حملہ آور بیتگ نو بلوچستان ءِ سرا ه. حملہ آور بئیگ اِنت- گڑا بیا اِت همے پکر ءُ همے پلسپہ ءَ وتی دل ءُ باتن ءِ تہا جاگہ بہ دئیں- بلوچ پہ یک اِنچے ء چہ وتی زمین ءَ پُشت نہ کنزیت گڑا بلوچ پُشت نہ رؤت اِنت- ما زانیں آ زورآور اِنت آئی ءَ را تُپنگے گون, آئی ءَ را بلائیں تاکتے گون اِنت, آئی ءَ ٹینکے گون اِنت آ مارا بوت کنت اَنچو هالی ئیں دستاں مارا لٹ دنت, کشیت ایں- بلئے باندا آؤکیں پدریچ مارا اے گپ ءِ سرا یات مہ کنت کہ یک نوٹیفیکیشنے ءَ چے بلوچ ءَ وتی زمین, وتی ڈگار, وتی مادریں وتن یل داتگ وتی وتن ءِ تہا پدا جلاوتنی ئے زند گوازینتگ- مرچی کہ هما تیاب دپ ءِ مردماں ما همے پیگام دئیں کہ اے جیڑہ ءَ چہ پُشت مہ کِنز اِت بہ اوشت اِت, لٹ چوناها ما ورگیں, بزگی ما چوناها دیستگ- اگاں ما مرچی همے سما کنیں کہ ما اے زورآور دیم ءَ انچو بے وس اِنت کہ ما لڈ ءُ بار کنیں گڑا اِدا چہ مئے جیڑہ هلاس نہ باں ادا چہ مئے جیڑہ, مئے جنجال, مئے بزگی ءُ واری, ءُ هما کہ آیاں ما زمینی هُدا جوڑ کتگ گڑا همایانی روان داتگیں کیامت کئیت اِنت- گڑا بیائے اے کیامت ءَ چہ ساری وتی اِزتے, وتی نپسے, وتی مادریں وتن ءِ واستا بہ اوشت ایں, اے مادریں وتن هرچ هما بلوچ ئیگ اِنت کہ آ بلوچستان ءَ زندگ اِنت, هرچ هما بلوچ پرزندے سرا اخلاقی, نظریاتی, پگری, شعوری مزہبی پرز اِنت کہ آ اے ساهت ءَ وتی مردمانی واستا بہ اوشت ایت- اَنچو کہ ما بیگوائی ءِ واستا یکجاہ اوشتاتگیں لاش کپتگ بوتگ اَنت ما وتی مردم یل نہ داتگ اَنت گڑا مرچی همے مردم بے آسراها زند گوازینگ اَنت-

بوت کنت هُدا ءِ نیمگ ءَ چہ کزائے بئیتکیں ما لڈ ءُ بار بہ کُتیں گڑا پدا ما وتی ڈگار اتک کُتگ اَت- بلئے چُش نہ اِنت مارا سرجم ءَ هما ڈگار ءَ چہ کَشگ بئیگ اِنت۔ اگاں اے چیز اَنچو نارمل بہ بنت گڑا آؤکیں وهد ءَ بلوچستان بیت بلئے آئی نام جتاجتائیں نامے بیت ءُ آئی تہا انسان کہ نندوک بنت آ بلوچ نہ بنت- ما همے گُشگ لوٹیں کہ روڈانی سر ءَ در بیا اِت یکے دومی ءِ گوما اوشتوک بہ بئیت- هما سنگت کہ میڈیائے تہا, هما سنگت کہ نبشتہ کنگ زان اَنت, هما مردم کہ کیس ءَ را چوں یک قومی جیڑئے سرپد بنت اے گڑا کُلیں هما مردمانی سر ءَ پرز اِنت- هما مردم کہ اے جیڑہ ءَ وتی سرے درد نہ زور اَنت, وتی جنجال نہ زور اَنت گڑا آ تهنا یک هلاکئے نہ بلکیں آ مادریں زمین ءَ گوں نا انساپی کنگ اَنت ءُ مادتیں وتن ءِ پرز همک جهدکارے, هرچ هما باسمائیں انسانے سرا اِنت- ءُ ما همے گُش اِنت اے جبری انقلا کہ بئیگ اِنت اِشی سرا وتی مهکمی ءَ گوں بہ اوشت اِت, توانمردی ءُ بهادری
ءَ گوں بہ دیم ءَ بیا اِت- مردم وتارا بے وس مہ کن اَنت- هما راج دنیائے تہا سفائے هستی ءَ گار بوتگ اَنت آہاں زُلم ءِ دیم ءَ وتارا بے وس سما کُرتگ- مارا مئے زمین چکاسگ انت کہ مئے تہا چنچو هِمت ءُ هاٹیگ, بودشت ءُ دانائی هست اِنت کہ ما وتی زمین ءَ گوں وپا بہ کنیں۔

اگاں نہ کُت گڑا آؤکیں وهد ءَ مئے قبر هم گار بنت گڑا هرچے کہ بئیگ اِنت آئی واستا وتارا زهنی هوالہ ءَ, پکری هوالہ ءَ, شعوری هوالہ ءَ, قربانی دئیگ ءِ هوالہ ءَ وتارا کلئیر بہ کن اِت اگاں نہ گڑا اے وئیل مئے واستا سکیں بلائیں یک اَنچیں راجی کرائیسیز ءِ جوڈ بیت گڑا تهنا آؤکیں نسل مارا همے گپ ءَ یات کنت کہ آیاں بلوچستان ءِ درد ءَ را وتی تہا جاگہ دات نہ کُرتگ گڑا آوکیں نسل ءَ واستا ما همے کمزوریں سوچانی تہا زِندگ مہ بئیں-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت۔

جنگانی میرانیں سئود

نبشتہ کار :شاہ آپ بلوچ

دی بلوچستان پوسٹ

اے کاروان ءَ گوں کہ ما پند بُران ءُ روان ایں۔اے کاروان ءِ اندر ءَ ما باز وشی، گم ءُ گُرست دیستگ۔گم انچیں چیزے کہ انسان ءَ ھر وھد ءَ گون اِنت، انسان ءَ ھم بید ء گم ءَ نہ بیت ۔

درد انچیں ھمراھے، انسان ءِ اوپار ءَ کُدین اِیت، سگ ءُ اوپار ءَ نزور کنت ۔وشی یک کسانیں ساھتے ءَ مردم ءَ گل ءُ شات ءِ جمبراں سر ءَ ساھیل کنت۔پد ءَ انسان جیڑگانی دریچھاں گوں سر ءُ چیر اِنت ۔ بلے اے کاروان ءِ مساپر ءَ گرنچے بند داتگ، اوپار کش اِتگ، دراھیں پند ءِ تراولانی ٹپ ءُ ھنیاں آشنا اِنت، چوش آدینکے ءَ دیم ءَ زاھر اِنت۔ بانداتیں نوبتانی بُنجاھی نشان، وتن شھیدانی دوسد سالیں پندے توکل کُتگ، دمبرگ ءِ نام نہ زانتگ، پیش ءُ پد ئِے کسہ ئِے نکش اَنت پہ زمین ندریگ ءَ نبشتہ بنت ۔تَمَردانی جنزگ ءِ پند مارشتاں سکین دے اَنت، آیوکیں پدریچ ءِ ھاتری سوگات کنگی اَنت واھشت گھیں بلے کُھتیگیں ھبر ھمیش اِنت۔ آ روچ پد ءَ واتر نہ بنت ءُ نیا اَنت۔

دوبر ھما ترانگانی تہ ءَ مردم مین بیت ءُ کپ اِیت، یک گُشتنے گوں ساز ءِ ھَمراھی ءَ الھان بیت، ھما ساعت ءِ مُزا سرجم کنت ءُ دیم ءَ جنزانی ھاٹیگ ءَ توانا کنت۔ موتک ءِ ھمراہ بیت ھمبلانی۔ برے کھنک ءِ زید ءَ، برے چمروکیں شان ءَ، ءُ برے ھما کشکاں کہ ما دوست ھمراہ بیتگیں۔ھمسپر مولمی ءِ مونجاں بیت، وھدیکہ ما کُلبر ءِ تلاں گردان بہ ایں ، زامران ءِ تستگیں ڈکانی پند ءَ جناں، سئود جان ءِ ھمراھی ءِ یات گون بنت ۔

سئود جان جھد ءِ رنگ اَت، جنگ ءِ نہ تُرسیں مَل مِڑوک دژمن تُری گوں ھزارانی ھساب ءَ بہ بیت، گوں ٹینک ءُ بَکتر بنداں بلے سئود ءَ آئی ءِ سر ءَ ارش ءِ راھے شوھاز کُت ،سئود دلیپ شکاری ءِ شاگرداں چہ یکے بوتگ، بازیں جنگے چہ شکاری ءَ در بُرتگ ئِے ۔ یک جنگجوئیں جاگھے سر بوتگ ، وت ھر وھد ءَ جنگی ھالتاں ساجو بوتگ، نوک باھندیں جنگولاں پہ سکینے بیتگ۔

جنگ لیب ءِ داب ءَ داشتگ ئِے ۔ دژمن ءَ ھم بازیں جاگھاں رنگ رنگیں شکست داتگ، زمین پھازانی ھَمراھی ءَ سئود ءَ ھم جنگ داب داب ءَ دیستگ۔جنگ ھما چیز اِنت کہ انسان جنگ ءِ پڑ ءَ بازیں چیزے دربارت ءُ وتی اندر ءَ زاھر کنت، جنگ ھم پیشدار اِیت، کجام انسان کجام ھد ءَ آپ ءَ اِنت۔ جنگ زانت ءَ گیشین اِیت ءُ سما دنت مردم ءَ، جنگ سسا ءِ دامن اِنت کہ آجوئی ءِ مساپر مومن اَنت، پہ راج ءَ بزرگ تبیں مردم اَنت ۔ بلوچ ءِ بانداتی ءِ مسام ءِ رند پداں روان اَنت، منزلی ءِ دنز ءُ مُجانی پلگارگ ءِ شُبین اَنت۔ جنگولانی ارواہ مانایے دار اَنت، زمین ندریگیں سر کندیل اَنت۔ راج ءِ اوستانی مرکباں سوار اَنت۔ تُن ءُ گژن ءِ ھمراھی ءَ ھید ءُ ھونانی سوگند ءِ پد ءَ جنگولاں راج ءُ زمین سمبھینتگ ءُ پہ ڈولے ھر جنگولے وتی یک ابدمانیں کردے راج ءَ سوگات اِنت کرد ءِ بُن ھشتیں پڑ ءَ سئود جان ءِ وتی جُتائیں کردے کہ جنگ ءِ ھر تَک ءُ پھنات ءَ سرپد اَت، توکل ءُ ھاٹیگ ءِ ھدابُندیں سئود شھزانتی ءِ پگرانی پراہ ءُ شاھگانی ءِ سوھوئیں تبانی زرینگ ءَ بلد اَت۔

سئود جان ءِ داتگیں مھراں ڈوک پروشتگ اَنت ملما کرتگ اَنت، دپ ءِ گُشتن ءِ دانکاں ٹھلانی بُندر مٹینتگ اَنت۔ گواچِنی ءَ کشک سینگار اِتگ اَنت سنگراں اوپار بکشاتگ اَنت ۔ کُھتیگیں ھبر ھمیش اِنت کہ دوستیگیں ھمبلے، جھد کارے چہ مارا سست، جسمانی ھوالہ ءَ جُتا بوت بلے ما ھمے کشک ءَ راھی ایں، آئی ءِ پگر ءِ شھرگ آشوب ءِ چیدگ اِنت۔

گُلزمین ءِ پراہ ءُ شاھگانی ءَ مارشتاں رنگے داتگ ۔ یاتانی بکچہ ئِے مئے بڈ ءَ اِنت زمستانی شپاں تَرانگ ئِے پرین ئے سارتی ءَ ودار ءِ سپر من گوں دوست ءِ ھم نیادی ءَ گوازینتگ نھنگ ءِ برپیں دل ءَ، آ شپ سک سارت اَت، ما گوش ئے سرجم ءَ برپ جوڑ بیت ایں، زندگی ءِ نپس کسھانی اجب رنگے مئے ھمراہ اِنت، برے برے درشان بنت جنگولیں سئود تئی جنگانی اجب کسہ اَنت مئے ھمراھی ءَ۔وکائی سینگ ءَ لگوریں دژمن کونڈ موش پرمائینتگ تو دوست تمپ ءِ نُگرھیں بدن ءِ سر ءَ ایراَنت تئی جنگانی دروشم کُلبر ءِ کوش پتا اِیت، تئی یاتاں مزن بند نویس اِیت۔ زپتیں زھیراں تو گوں مگیمی لیک اَنت، چون ھیروپ ءَ ایر داتگ، ولگوج کُتگ دژمن ءِ ھر سنگر۔ تئی جنگانی کجام مسال ءَ بیاراں تئی نہ تُرسی ءِ مسال ایر اَنت اد ءَ دژمن ءِ نپسیات تو شریں وڑی ءَ پھم اِتگ تو زانتگ جنگ چون کنگی اِنت ما جنگ کنیں کجام پُوزیشن ءَ بیت دژمن، بےوار چون کنگ کپ اِیت، مارا دوران ءِ جنگ ءَ برے مارا پیسلہ زورگ کپ اِیت ،انچیں دژمنے سلاہ ءُ سامانی برگ ءُ جنگ ءِ ترینگ جنگولانی سر ءَ اِنت کہ چنچو شیوار ءُ چالاک اِنت۔ تو اے ھیالاں وتی املی دروشمے داتگ ءُ پیشداشتگ۔ تئی تران ھم ھمے بیتگ وھدیکہ پش گیجگی نہ اِنت وھد امل ءِ پیداوری اِنت، ابید چہ امل ءَ ما ھچ دیم ءَ جنز اِت نہ کنیں، تئی جنگی رپک ءُ ھُنرانی شازانتی ءِ بودناکیانی درور باز اِنت۔ترا چہ پد تئی نوک باھندیں شاگرداں دربرتگ، تئی کردار ءِ دروشم تو پہ دوستاں استادی ءِ داب ءَ بیتگ ئے، سھبانی بام ءِ رند پداں کپتگیں ئے۔

ھر وھد ءَ نوکیں ورنایاں زھنی، جنگی ھوالہ سر ءُ سوج ءِ میدان ءَ املی دروشم ءَ آرتگ ءُ پیش داشتگ اَنت۔ جنگ چے پیمءَ کنگ بیت، گیشتر وھد رس اِتگ زھنی تربیت ھم جھد کارانی کُتگ۔ جنگ ءِ تہ ءَ چے پیمیں مشکلات دیم ءَ کیت تو اے دراھیں سر ءُ سوج نوک بروتانی دیم ءَ ایر کرتگ اَنت چوں کرآن ءِ دروشم ءَ ریاست مئے لس محلوک ءَ تنگ چے ھد ءَ تا کنت ایشانی دیما دارگ ءِ واستا مئے رپک ءُ ھُنر چے بہ بنت مئے کار ارزان چون بنت دژمن چے ھد ءَ تاکتوریں ما آئی ءَ کجام رپک ءُ ھنرانی سر ءَ وران بہ کنیں دژمن پروش بوارت ءُ ما سوب مند بہ باں۔ راجی جھد ءِ دیمھونی ارزشت چی یے، کومی مول ءُ مرادانی ھاتر ءَ مارا چنچو ھد ءَ دیمھونی واستا تیار بیگی اِنت۔

سئود جان ھر وھد گوں ورنایاں ھمے پیم تران کنان اَت۔آیوکیں ھالاتانی بارو ءَ ساجو کنان اَت شاگرداں سئود جان ترا چہ پد ھمے ورناھاں وتی اندر ءَ شاہ زانتی یے پیداک کُتگ۔ اے آشوب ءِ درور توئے دوست تئ مھنتانی برورد اَنت تئی کشتگیں پُلاں بر کتگ مرچی تئی کُرتگیں کارانی ستایے دامن نہ جک اِیت ۔ تئی داستان نبشتہ بنت راجی گویاکانی تاکدیماں پہ درور جنگانی میران ئے وڑ ءَ تو وتی امر ءِ گیشتریں بھر راجی جھد ءَ داتگ تئی کُربانیانی ستا نہ بیت کچ ءُ کساس ھر وھد ءَ ترا کہ دیستگ گوں تنزیمی کاراں گلاھیش ئے ، وھد نہ رس اِتگ ترا کموک ایمن بہ نند ئے، راجی کارانی دیمپان بوتگ ئے، راج ءَ پہ اوست ءُ امیت ءِ بلندیں چراگ ءِ مانزمان اِت ئے۔

تئی ھمت ءُ مھنت ءَ سلام اِنت، سئود ترا چہ پد تئی جھد ورنایاں کوپگاں زرتگ، پہ منزل راھی اَنت، تو ابدمان ئے، پہ زمین ءِ شھیدانی لڑ ءَ گوں تو ھوار ئے، ابدمان ئے۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت۔

چاگی ءِ دمگ یک مچ ءَ ناشناسیں مردماں تراک ءِ آسر ءَ پولیس تھانہ تباہ کتگ۔

پولیس ءِ بنشون ءِ رد ءَ سھب ءِ چار ءِ نزیک ءَ سلاہ بندیں مردماں تھانہ ءِ سر ءَ کنٹرول کتگ ءُ مزنیں تراکناکیں شورواں گوں چہ تھانہ تباہ کتگ۔ تراک ءِ آسر ءَ تھانہ ءِ ماڑی سرجم ءَ تباہ بوتگ بلے ھچ وڑیں جانی تاوان نہ بوتگ۔

دومی نیمگ ءَ یک مچ بازار ءَ بازیں کیمرہ سلاھبندیں مردماں تیرگواری ھم کتگ ءُ تباہ کتگ اَنت۔

انگت ءَ اے اُرشانی زمہ واری کس ءَ نہ زرتگ انت بلے چاگی ءَ بلوچ سلاھ بندیں آجوئی گل پرکار اَنت۔

اے دمگ ءَ بلوچ لبریشن آرمی ءَ ’’زرکاری بندش‘‘ ءِ چیر دستی ءَ شال ءُ تفتان ءِ تجارتی شاھدگ ءِ سر ءَ بازیں کارروائیانی تہ ءَ پاکستان ءِ لشکر ءَ ھوار تجارتی گاڑی نشانگ جوڑ کتگ اَنت۔

شھید تابش وسیم زهری کہ آئی ءِ نَد ءَ آئی ءِ وجود ءَ را بیمناک کتگ ات

نبشتہ کار: زرنود بلوچ

رجانکار: زانِش بلوچ

دی بلوچستان پوسٹ

لھتے شائر ایوک ءَ شائری نہ کن اَنت، بلکیں وتی اھد ءِ گواھی ءَ نبشتہ کن اَنت لھتے نَد ایوک ءَ کاگد ءِ سر ءَ رھادگ نہ بنت، بلکیں ھاموشی ءِ سینگ ءِ سر ءَ لکیرے کش اَنت تابیش ھم انچیں شائرے اَت زھری ءِ سرزمین ءَ چہ چست بوھوکیں توارے کہ آئی ءِ گالانی تہ ءَ وتن ءِ مھر آجوئی ءِ واب گھگیری ءِ روح ءُ آشوب ءِ جزبگ اَت۔

آئی ءِ شائری ءِ تہ ءَ نَپرت ءُ کینگ نیست اَت آئی ءِ تہ ءَ درد اَت گاریں براتانی یات اَت بے لوگیں ماتانی ارس اِت اَنت ءُ ٹپی ئیں وتن ءِ گریوگ اَت آئی ءَ نبشتہ کتگ اَت کہ ما بے لوگ ایں ءُ مئے برات بیگواہ اَنت اے گپ انچو زوراک اِت اَنت کہ سگّ ءُ اوپار کنگ نہ بوت اَنت۔

ھمے شپ ءَ تابیش وسیم چست کنگ بوت یک سالے ءُ نیم ءَ گیش گمنامیں زنداناں بند کنگ بوت آئی ءَ را ٹارچر کنگ بوتگ اَت ءُ گُڈسر ءَ دروگیں میڑے ءَ شھید کنگ بوت۔

تابیش وسیم ءِ جرم تھنا شائری بوتگ آئی ءِ گپ ایٹم بمب نہ بوتگ اَنت کیمیائی سلاہ نہ بوتگ اَنت، بلے اے گپاں ریاست ءَ را ٹپّ جت پرچا کہ نَد ءَ تپنگ ٹُوک کتگ اَت آئی ءِ شائری ھما درستیں بیگواھیں بلوچ راشد ذاکر زاھد، شبیر آیات، دین مھمد ءِ توارے جوڑ بوتگ اَت آ ھم ھاموش کنگ بوت۔

یک کسانیں بلے سکیں گھتریں لیکھے مرچی ھم آئی ءِ کردار ءُ پگر ءِ اکس ءَ پیش دارگ ءَ اِنت۔منی نَد منی وجود ءَ ھترہ ءَ اِنت

اے ایوک ءَ یک گالردے نہ اَت، بلکیں آؤکیں وھد ءِ تجزیہ اَت یک شائرے کہ آئی ءَ زانتگ اَت کہ آئی ءِ گپ سادگیں گپ نہ اَنت آ جُست جوڑ بوت کن اَنت توار جوڑ بوت کن اَنت ءُ بے تواری ءِ ھلاپ ءَ اوشتات کن اَنت۔

بلے پہ تابیش ءَ مرگ آئی ءِ نَد ءِ آسر نہ اَت آئی ءِ وجود ھلاس بوت بلے آئی ءِ گپ ھست اِت اَنت۔آئی ءِ توار پچ گرگ بوت بلے آئی ءِ شائری ھست اِت اَنت۔آئی ءِ نَد ھاموش بوت بلے آئی ءِ نبشتگیں گال مروچی ھم جُست چست کن اَنت۔ءُ بوت کنت کہ ھمے ھاتر ءَ آئی ءِ آ لیکہ مرچی چہ پیسر ءَ گیشتر بزانت دار اِیت۔منی نَد منی وجود ءِ ھترہ اِنت۔پرچا کہ راجدپتر شاھد اِنت۔

نَد ءَ گار کنگ ءِ جھد ءَ کنت بلے نَد ءَ چہ پیداکیں ھیال ءَ نہ کنت،شائر ھاموش کنگ بیت کنت بلے آئی ءِ شائری ھاموش کنگ نہ بیت۔

تابیش ءِ زند کسان اَت بلے گپ ئِے کسان نہ اِت اَنت۔آئی ءِ سپر ھلاس بوتگ اَت بلے آئی ءِ شائری ءِ سپر برجاہ اِنت۔آئی ءِ توار ھاموش کنگ بوت بلے مروچی ھم آئی ءِ لچہ وانگ بوت کن اَنت۔

ءُ بوت کنت پہ یک شائرے ءَ چہ ایشی ءِ مستریں زند نیست ناں کہ آئی ءِ گپ چہ آئی ءِ روگ ءَ پد ھم زندگ اَنت تابش شتگ بلےآئی ءِ نَد ءَ یک جُستے پشت ءَ یلہ داتگ ءُ لھتیں جُست گوں وھد ءَ ھلاس نہ بنت بلکیں ھر آیُوکیں پدریچ ءِ دیم ءَ پد ءَ ودی بنت۔

ھما گَھگیری آجوئی ءُ آشوب ءِ ھما ارواہ کہ آئی ءِ شائری ءِ تہ ءَ گونجگ ءَ اَت آئی ءِ سیاسی جھد ءِ تہ ءَ ھم زاھر اَت آئی ءَ نَد وتی سلاہ ءُ نودربرانی سیاسی جُھد وتی ھیالانی درانگازگ ءِ پلیٹ پارم لیک اِتگ۔

تابش ءِ (شخصیت) ءِ یک ھاسیں تبے آئی ءِ نودربری سیاست ءِ سر ءَ دلگوش اَت آ ھما ورناھانی تہ ءَ ات کہ آھانی گمان اَت کہ شھدربرجاہ ءُ اِلمی ادارہ ایوک ءَ کتاب وانگ ءِ جاہ نہ اِنت بلکیں سسا ءُ سما جُست ءُ پُرس ءُ ھوری پگر ءِ جوڑ بوگ ءِ بُنجاہ اِنت۔ ھم پہ آئی ءَ نودربر ءِ سیاست ایوک ءَ یک گَلی کارے یا یک پجّارے ءِ نام نہ بوتگ اے وتی چاگرد ءِ جیڑھاں سرپد بوگ ءِ راہ اَت وتی ھمراھیں نودربرانی توار بوگ ءُ وتی ھیالاں اَملی زند ءَ پیش دارگ ءِ راہ اَت آئی ءِ سیاست ءَ شَیر ءِ دل بوتگ ءُ آئی ءِ شائری ءَ سیاسی دروشم ءَ بوتگ آئی ءَ ھما چیز کہ وتی شائری ءِ تہ ءَ درشان کتگ اَنت کہ آئی ءَ وتی ھمے پگر سیاسی سما ءِ تہ ءَ زندگ داشتگ آئی ءِ نَد ءَ جُست چست کُت اَنت ءُ آئی ءِ سیاسی اَزم ءَ آ جُست ءُ پُرس مُچانکی گپ ءُ تران ءِ بھر جوڑ کُت اَنت۔

تابیش ءِ گَھگیری شائری ءَ اگاں مردم ھورتی ءَ بہ وان ایت گڑا سرپد بیت کہ اے تھنا جزبگانی درشان نہ بوتگ بلکیں آئی ءِ کَش ءُ گور ءِ جاوراں سرپد بوگ ءِ جھد بوتگ۔ آئی ءِ گپاں آجوئی ءِ واھگ زُلم ءُ زوراکی ءِ جُست ءُ پُرس ءُ وتی پجّار ءُ وتن ءِ سر ءَ اَزم ءِ درشانی کتگ ھمے پگری اِستان ءَ آئی ءَ را نودربر سیاست ءِ نیمگ ءَ ھم بُرت کہ اود ءَ ورنائیں پدریچ وتی باندات ءِ بابت ءَ جُست چست کنت۔

آئی ءَ ھما ورناھانی نمائندگی کتگ کہ آ بوت کنت کہ چپ ءُ چاگرد ءَ آسانیں راہ لیک اَنت بلے الّمی نہ اِنت کہ آ وتی وتی بہ بنت۔ تابش ءِ ھاتر ءَ جُست ءُ پُرس جیڑگ نبشتہ کنگ ءُ گپ جنگ آئی ءِ سما ءِ بھر اِت اَنت۔ آئی ءِ نَد ءَ ورنائیں مازوانی تہ ءَ جُست ءُ پُرس پیداک کنگ ءِ تاکت بوتگ ءُ آئی ءِ سیاست ءَ گوں بندوکیں ھمے گپ ءِ نشانی بوتگ۔ آئی ءَ وتی ھیال ءُ لیکہ چاگردی زند ءَ گندگ لوٹ اِتگ اَنت ناں کہ آ وتی ھیالاں چہ تاکاں مِھدود بہ کن اَنت۔

تابش ءِ کسہ ایوک ءَ شائر ءُ نودربر سیاسی کارکن ءِ کسہ نہ اِنت بلکیں یک انچیں ھاندانے ءِ کسہ اِنت کہ آئی ءَ وتی چمّانی دیم ءَ یک دوستیں مردمے ءِ برگ ءُ پد ءَ ھما ھال ءِ دروشم ءَ پد ءَ واتر کنگ بوتگ کہ ھچ پت، مات گْوھار ءُ کھول ءَ گوں آسانی ءَ برداشت نہ کنت۔

گُش اَنت کہ تابش نادْراھیں پت ءِ دیم ءَ چِست کنگ بوتگ۔ یک نادْراھیں پتے ءِ واستا چِد ءُ مستریں بے وسی دگہ کُجام اِنت کہ آئی ءِ چمانی دیم ءَ چہ آئی چُک جِتا کنگ بوتگ کہ آ آئی ءَ داشت کُت مہ کنت اے ساھت ءَ پہ نادراھیں پت ءِ دل ءَ چے گوستگ، بلے آ چہ آئی ءَ رکّ اِت نہ کنت۔ بوت کنت ایشی ءِ اندازاہ ءَ ھما مردم کت کنت کہ آئی ءَ وتی چمّانی دیم ءَ وتی جگر ءِ یک ٹکرے چہ وت جِتا بوگ ءَ دیستگ۔ یک پتے ءَ وتی چُک وتی چمّانی دیم ءَ زندگ ءَ روگ ءَ دیست ءُ پد ءَ ھمے چُک انچیں جاور ءَ رست کہ پت ءِ ھیال ءَ ھم ناکابلِ برداشت اِنت۔ ھمے درگت ءَ آئی ءِ ناکو زھگ لیاکت وسیم ءِ چست کنگ ءِ کسہ ھم دیم ءَ کیت۔ آئی ءَ را کساس دو سال ءَ پد یلہ کنگ بوتگ اَت۔ یکیں کھول ءِ دو نوجوانانی کش ءُ گور ءَ چشیں واکھانی ساھگ پہ اے ھاندانانی واستا چینچُک گران بیت ءُ چے پیم سنگین بوتگ بوت کنت،ایشی ءَ بس یک ھبرے ءُ سرھالے ءِ سر ءَ بندوک کنگ ممکن نہ انت۔ لیاکت وسیم وتی یل بوگ ءَ پد ھم نہ ترس اِت بلکیں آ ھوار بوت ءُ اے زالمیں ریاست ءَ پیش داشت ئِے کہ مارا ھما وڑ ءَ کہ لوٹ ایت زندان ءَ بند ءُ ترسینت کنت بلے بلوچ چہ ھمایاں نہ اِنت کہ پُشت ءَ کپ اِیت ءُ لیاکت وسیم ءَ 2 ماہ ءَ وتی جان ندر کت ءُ وت ءَ پہ ابد ابدمان ئِے کُت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت۔