TBP Balochi

کوہ ءَ نِشتگیں سنگتے ءِ نام ءَ

نبشتہ کار: بالاچ بلوچ

دی بلوچستان پوسٹ

من ءَ ھچ سما نہ بَیگ ءَ اِنت چے نبشتہ کنگی اِنت؟ شپ ءِ ساھت 10 اَنت، تھاریں شپ ءُ من نشتگاں وتی گوانکو ءَ گالٹک کنگ ءَ آں۔

ننداں ، ننداں مناں بارے واھو نیائی وزی ہماں سنگتاںی باروا سوچاں کہ یک وخت ءِ بیث کہ ہماں سنگت شف روش مار گوں اورا بیث اثاں او بلوچ مخلوق ءِ بیوسی سر نشت وزی سیاسی خیال درشان کھزسش ، بلوچ راج ءَ غلامی آ شہ کشغ خاتر ءَ مرشی ہماں سنگت وزی یک وش حال زند ءِ اشتو داثو ، کوہانی لافا لنگھڑیں لافا گوں نشتی انت ، او لیغاریں جر جاناں تش ، نازکیں دست ءُ پھاز ٹھیمہ بیثغنتش یک وختے ہماں بیث کے ہمے سنگتاں اسلام آباد ڈولیں شاہرانی لافا برینڈ ایں ہوٹل آ شُز ثنت ، او برینڈ ایں جر جان کھزثنت اش پر مرشی وزی راج ہماں درڈ ڈکھ و تکلیف ، بلوچ نیاڑی آنی اسلام آباد روڈ آنی سرا کھفغ ءُ ماثانی وزی گاریں چُکانی خاتر ءَ گریغ ءُ گُہارانی ہماں انڑزی گندغ برداشت نویثغ انت تش گُڈا ہمے سنگتا غلامی ءِ خلاف ءَ وزی کوہ ءَ نشتغ ایں براثانی گُرا شزو تُوپک ءِ کوفغ ءَ کُھزی
اے ہماں سنگت ءَ کہ ہمائی ذاتی زندگی ءَ ہچ شئے کمی نویثہ غلامی ءِ لافا ہر شئے است ثی پر ہماں سنگت ءِ سیاسی شعور ءُ غلامی ءَ گراونڈ آ نندغ ءَ نیشتہ ۔

مرشی ہماں سنگت ءَ نزیک یک سال بیغ والا ایں مئیں ہماں سنگت ءَ گوں ہچ حال حوال نیست ایں۔
مں بس ہمائی بابت ءَ سوچ اث کھناں کہ ہماں سنگت اے وخت یک کوہ ءِ چوٹی سر نِشتی بیث ، ریش و بوژ مزن بنت ای ، جر لیغار بنت ، انقلابی شیئر ءِ لکھغ بی یا گُشغ بیث ، ہمائی نزیخ ءَ آف ء کلی ایر بی ، تُوپک ءُ دوربین ایر بی ءُ وزی مہروان ءِ راج ءِ درڈ دل لاف بی ءُ ہمائی سوچ ءَ ہمے بی کہ دُژمن ءَ تھاں نوخیں طریقہ گوں دھک ءِ جھناں-

مڑدم گُشنت کہ زندغ ءِ مڑدم اے تعریف کھنغ جوان نئیں بلے مں گُشاں مئے اے سنگت سرا دنیا ءِ کلیں کتابانی تعریفاں لکھاں گُڑ دے ماں ہمے سنگت آ گوں انصاف کھز ن کھناں –

بس سنگت تھا ہر ہند ءِ بیئے سلامت باثے ، اللّٰہ باہوٹ باثے ، او مئے ڈولیں لغوریں مڑدمانی حوصلہ باثے ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچستان ءِ بنجاھی شھر شال ءَ ھوار وندر ءَ پوجی آپریشن، چہ ھزدار ءَ شش مردم زورانسری بیگواہ کنگ بیتگ انت-

گیشیں ھالانی رد ءَ بلوچستان ءِ بنجاھی شھر شال ءِ کوھی دمگاں مروچی سھب ءَ پاکستانی لشکر ءَ آپریشن بندات کتگ-

دمگی مردمانی رد ءَ چلتن ءُ آئی ءَ ھواریں کوھی دمگاں مروچی سھب ءَ آپریشن بندات کنگ بیتگ- ءُ اود ءَ بازیں جاھاں گن شپ ھیلی کاپٹرانی تیرگواری ءِ اھوال دیم ءَ اتکگ انت-

ھمے وڑ ءَ چہ ھزدار ءَ ھال انت پاکستانی لشکر ءَ چھاپہ ءِ وھد ءَ بازیں مردمے دزگیر کتگ ءُ ناشناسیں جاھے ءَ برتگ انت ۔

بلوچستان ءِ دمگ ھزدار ءَِ ھالانی رد ءَ گوستگیں شپ ءِ گڈی بھر ءَ پاکستانی لشکر ءَ چہ ڈاکٹر کالونی ءَ دکاندار سیف الرحمن ء مھمد یاکوب دزگیر کتگ ءُ ناشناسیں جاھے ءَ برتگ اَنت۔

پاکستانی لشکر ءَ چہ ھزدار ءَ دگہ شش مردم زورانسری ءَ بیگواہ کتگ اَنت کہ آھانی نام انگت ءَ پدر نہ بوتگ اَنت۔

ایشی ءَ ابید پاکستانی لشکر ءُ سی ٹی ڈی ءَ گوستگیں شپ ءَ بلوچستان ءِ دمگ لسبیلہ ءِ ھند وندر ءَ مزنیں کچے ءَ پٹ ءُ پول کتگ ءُ لوگ پہ لوگ پٹ ءُ پول ءِ وھد ءَ مھلوک ءِ سر ءَ زوراکی، لٹ ءُ پُل ءُ زوراکی ءِ اھوال دیم ءَ اتکگ اَنت۔

پاکستانی لشکر ءَ ھمے وھد ءَ بازیں مردم دزگیر کتگ ءُ گوں وت برتگ اَنت کہ چہ ایشی ءَ پد آ سرکاری رنگ ءَ پیش نہ بوتگ اَنت۔

نمدی یے پہ کمانڈر شھناز ءَ

نبشتہ کار: بھران بلوچ

دی بلوچستان پوسٹ

دروت ءُ دُراہ بات ئے گُلیں شھناز، امید کناں کہ تو گوں یلیں ھمراھاں وش ءُ دُراہ ئے ھُدا ترا وش ءُ دُراہ بہ کنت، اے ساھت ءَ کہ من وتی کوٹے ءِ چراگ کور کُتگ ءُ تھنا نشتگاں شپ ءِ ساھت 11 اِنت بلوچستان ءِ وھد ءَ ، رمس 5/25/ 2026 اِنت، منی گور ءَ چو مُدامی وڑ ءَ جان سلامتی اِنت ءُ زند ءِ توامیں آسراتی ھَست اَنت، دَریں مُلکے ءُ دریں مُلک ءِ زندگی تو وت دیستگ چون اِنت ءُ اد ءَ انسان چے وڑ ءَ اَنت ، گُلیں شھناز ! پہ من ءَ بلکیں( نام ءِ شھناز) نوک بہ بیت ءُ من ترا مہ زاناں بلے بیا کہ ( نام ء شرگُل ) پہ من ءَ نوک نہ اِنت کہ بی ایس او آزاد ءَ تئی نام ھمے بوتگ ءُ من ترا ھمے نام ءِ سر ءَ زانتگ ءُ زانگ لوٹاں ءُ توار کنگ لوٹاں، گُلیں شرگُل! چہ بی ایس او آزاد ءَ وَ دیریں کہ من سستگاں بلے سالے یک رندے یا اناگھی گوں تو ھال ھوال بوتگ، ترا بلکیں یاد بیت کہ سالے ءَ ساری من گوں تو دُروت ءُ دراھباتی کُتگ اَت ءُ گِلّھے ھم کُتگ اَت کہ مرچاں ھال ھوالے ءَ ھم کپتگ ئے ءُ من پزیر ءِ شئیرے ءِ بندے نبشتہ کُتگ اَت کہ ( مارا چو دور مہ دے اِت کہ ما بے کار نہ اِیں) ھُدا بہ زانت کہ تو جواب ءَ چے نبشتہ کُتگ اَت، بلے من ھمے جیڑگ ءَ اِتاں کہ تو دَریں مُلکی ءَ ایش ءُ وشیں زندگی یے کنگ ءَ ئے پمیشکا چہ اے چیزاں وت ءَ دور داشتگ، گُلیں شَرگُل! اے ساھت ءَ کہ بی ایل اے ءَ تئی کلوہ ماں رسانکدر ءَ دیم داتگ اَت من ھمے ساھت ءَ چیزے چارگ ءُ وانگ ءَ تاں کہ اناگاہ ءَ تئی کلوہ اتک ءُ سر بوت، من تئی کلوہ پَچ کُت چاراں کہ تو گوں یلیں ھمراھاں ماں بلوچستان ءِ دلبند ءَ پہ دژمن ءَ کَھریں کلوھے دیم داتگ،تئی کلوہ ءِ چارگ ءُ گوشدارگ سرجم نہ اَت کہ من ءَ ڈنّ ءَ کسے ءَ پہ کارے ءَ توار جَت ءُ من پہ اشتاپی کار ھلاس کنگ ءَ پد اتکاں وتئی کوٹے ءَ کہ شپ بے وھد اَت ، من وتی کوٹے ءِ توامیں چراگ کور کُت اَنت ءُ تئی کلوہ پچ کُت ءُ سرجم ءَ چار اِت ءُ گوش داشت ، کلوہ ءِ چارگ ءَ پد من تھنا ھمے چیڑگ ءَ اِتاں کہ اے شیرزال کئے بیت کنت کہ چوش توامیں دُنیا ءِ دیم ءَ گوں دژمن ءَ ھم زبان اِنت، گوں ھمے جیڑگاں من رسانکدر ءَ باز پَٹّ ءُ لوٹ کُت کہ بلکیں یکّے ناں یکّے ءَ تئی بابت ءَ چیزے ایر کُتگ بلے رسانکدر ءَ تھنا تئی اَکس ءُ کلوہ اَت کہ سیاسی سنگتاں ایر کُتگ اَت ءُ تئی ستاہ ءَ کنگ ءَ اِتاں، بازیں پَٹ ءُ لوٹ ءَ پد کہ من ءَ ھچ دست نہ کپت گڑا من وتی مھروانیں سیاسی سنگتے ءَ گوں ھال کُت کہ بلکیں آئی ءِ کر ءَ چیزے دست بہ کپ اِیت تئی بابت ءَ بلے آ سنگت ءَ ھم ھمے گُشت کہ من نہ زاناں بلے شُمئے دمگ ءِ زالبولے چہ آواز ءُ انداز ءَ ھمے زانگ بیت، ھیر من ھمے جیڑگ ءَ اِتاں وتی دل ءَ کہ تو بیگواھیں استاد واحد کمبر ءِ لوگ ءَ گوں نزیکی کن ئے ءُ برے ھمے جیڑگ ءَ اِتاں کہ تو شھید جنرل استاد اسلم ءِ لوگ ءَ گوں نزیکی کن ئے گوں ھمے جیڑگاں چُش کہ شپ بے وھد اَت ءُ من ءَ ھم چو مدامی رنگ ءَ سُھب ءَ مھل ءَ وتی روزگار ءَ روگی اَت ءُ من وپتاں، سُھب کہ بیت من روزگار ءَ گوں دست گَٹ بوتاں واتری کہ لوگ ءَ اَتکاں نیم روچ اَت من پد ءَ رسانکدر ءَ چم شانکے دات چاراں کہ پاکستانی پروپیگنڈہ گروپ ءَ چو مُدامی رنگ ءَ تئی اکس ایر کُتگ ءُ ترا ایرجنگ ءَ اَنت بلے تئی بابت ءَ کس ءَ ھچ وڑیں (معلوماتی بیان) ایر نہ کُتگ اَت ، کمو دیراں پَد The Balochistan Post ءَ بیانے ایر کُتگ اَت تئی بابت ءَ نبشتہ اَت کہ تو بی ایس او آزاد ءِ باسکے بوتگ ئے ءُ ڈنّی ملک ءَ بزاں کہ اومان ءَ یک وشیں زندگی یے کنگ ءَ بوتگ ئے ءُ تمپ ءِ جاھمنند ئے تئی بُنیادی وانگ ءُ زانگ چہ تمپ ءَ بوتگ، بلے سرجم ءُ برجمیں( معلومات) نیست اَت تئی بابت ءَ،

گُلیں شَرگُل! من ترا اے گُشگ لوٹاں کہ اے بیان ءِ وانگ ءَ پد منی سَد رَگ ءِ تہ یک رگے ءَ ھم نہ جت کہ کمانڈر شھناز توئے، چُش کہ دیر اَت گوں تو ھال نہ بوتگ اَت منی ھیال چہ ترا سک دیر اَت، چہ اے (بیان) ءِ وانگ ءَ پد منی ھیال ھمے جُست ءَ چہ دل ءَ کنگ ءَ اَت کہ تو تمپ ءَ کئی مردُماں گوں نزیکی کن ئے، تمپ ءِ نام کہ گِرگ بیت گڑا دُرستاں چہ پیش بانُک کریمہ ءِ نام ھیال ءَ کئیت من ھمے جیڑگ ءَ اِتاں کہ تو بانُک کریمہ ءِ دور ءِ زالبولے ءِ چُش کہ تئی نزیکی گوں بی ایس او آزاد ءَ بوتگ، چہ اے جیڑگاں پَد من گوں وتئی جند ءَ کمو دزبند بوتاں کہ چیزے کار ھَست اَت من ءَ، ءُ من ءَ گوں منی ھما مھروانیں سیاسی سنگت ھال کنگ ءَ اَت اناگاہ ءَ آئی ءَ ھمے گپ جَت کہ کمانڈر شھناز ھمے سنگت اِنت کہ بی ایس او آزاد ءَ گوں تو ھمکار بوتگ-

گُلیں شرگُل! من گوں اے گپ ءِ اِش کنگ ءَ سک ھیران ءُ اَبکّہ بوتاں، من ءَ ھچ وڑ ءَ باور بوھگ ءَ نہ اَت کہ کمانڈر شھناز توئے ءُ من سنگت ءَ بار بار گُشگ ءَ اِتاں کہ اے آ سنگت نہ اِنت اے دگرے، پرچہ کہ آ وھد ءَ من گوں تو ھمکار بوتگاں تو چُش نہ بوتگ ئے-

گُلیں شرگُل! تو ھما سنگت بوتگ ئے کہ سرکل دیواناں تئی آواز در نہ یتکگ ترا انچوش لَج بوتگ گپ ءِ جنگ-

گُلیں شرگُل! منی باور نہ کنگ سبب تھنا ھمیش اَت کہ تو چون کوہ ءَ روئے زندگی کن ئے ءُ اود ءَ زالبولاں کمان کن ئے پرچا کہ ترا لوگے ھَست ترا چُک ھست ترا مردُم ھَست ترا یک وشیں زندے ءِ گوازینگ ءَ آسراتی ھَست تو اے (فیصلہ) ءَ چون زورت کن ئے، اے (فیصلہ) سکّا گران اِنت ھاس کار پہ زالبولے ءَ، کہ وتی سرجمیں زند ءِ وشیاں یل بہ کنت ءُ تھنا پہ وتی زمین ءَ وتی سر ءَ رھن بہ کنت ءُ آ انسان ءِ واستا وَ گیش کہ آئی ءَ ڈنّ ءَ وتئی زندگی گوازینتگ، ھَیر من ءَ اَنگت باور بوھگ ءَ نہ اَت من وتی توامیں زور جَت اَنت کہ وت ءَ باور بہ کناں اے توئے، کوھنیں کلوہ ھَست اِت اَنت تئی کہ اود ءَ تئی آواز ءَ گوش داراں بلکیں وت ءَ باور کُت بہ کناں بلے بدبھتی ءَ آ ھم دُرست کور بوتگ اِتاں، من اُشک ءُ ھیران اِتاں کہ وت ءَ چون باور بہ کناں، منی مھروانیں سنگت ءَ تئی نبشتہ کُتگیں ارٹیکل ھم منی سر ءَ دیم دات اَنت کہ سدو ءِ نام سر ءَ تو سنگ کُتگ اِتاں ارٹیکل وَ من زانتگ اَت کہ تئیگ اَنت بلے من ءَ اے باور کنگ ءَ نہ اَت کہ کمانڈر شھناز توئے،

گُلیں شرگُل! شپ سک بے وھد اَت من ءَ ھم سُھب ءَ کار ءَ روگی اَت بلے من سک بے تاھیر تاں من ءَ ھچ وڑ ءَ واب آھگ ءَ نہ اَت من تھنا ھمے جیڑگ ءَ تاں کہ کُجا چہ کے ءَ جُست بگراں تئی بابت ءَ کہ تو کُجائے اے ساھت ءَ ، بازیں جھد ءَ پد کہ من اناگاہ ءَ ھمے ھیال ءَ کپتاں کہ تو وتئی نزیکیں مردُمے ءِ گور منی بابت ءَ گپ جَتگ اَت ءُ آ مردُم منی سنگت اَت پرچا کہ اے سنگت ءَ مدّتے ءَ پیش منی کر ءَ ھبر کُتگ اَت کہ تو آئی ءِ کر ءَ منی بابت ءَ گپ جتگ کہ ما ھمکاریں سنگتیں بی ایس او آزاد ءَ، چُش کہ اے سنگت مدامی گوں من ھال ءُ ھوال توک ءَ اَت من سنگت ءَ کلوھے دیم دات دروت ءُ دُراھباتی ءَ چہ پَد من اے جُست کُت کہ ترا یاد بیت تو منی گور ءَ یک برے اے گپ جتگ کہ مردُمے ءَ تئی بابت ءَ منی گور ءَ ھبر کُتگ، سنگت ءَ جواب دات ھو من ءَ یاد اِنت ءُ اے مردُم کمانڈر شھناز اِنت کہ زیک آئی ءِ کلوھے ماں رسانکدر ءَ بی ایل اے ءَ شنگ کُتگ،
گُلیں شرگُل! نوں من ءَ باور بوت کمانڈر شھناز شرگُل اِنت، ھما شرگُل کہ گوں من ھمکار بوتگ، ھما شرگُل کہ رسانکدر ءَ( سدو ) نام ءَ چہ زانگ بوتگ-

گُلیں شرگُل! چہ اے چیز ءَ باور کنگ ءَ پد من ترا اے گُشگ لوٹاں کہ منی مرتگیں ارواہ ءِ تہ ءَ جانے ودی بوتگ (حوصلہ) ھے ودی بوتگ کہ من یک وھدے گوں ترا سیاسی (جدو جھد) ءَ ھَوار بوتگاں، من وتی تہ ءَ( فخر محسوس) کنگ ءَ آں-

گُلیں شرگُل! نمدی سک دراج روان اِنت چد ءُ گیش تئی وھد ءَ زیان نہ کناں گُڈسرا ھمے گُشاں کہ تئی نابودیں بھران ھما اِنت کہ درانڈیھ ءَ چہ لاپ ءِ شُد ءُ جند ءِ تُرس در نئیت ءُ تو شیززالے ءِ جاگہ ءَ چہ من ءَ گیش بوت ئے ترا تئی کمان تئی زمّہ واری مُراد بات ءُ بلوچ، بلوچی بلوچستان زندگ بات چہ کھریں لشکر ءِ زوراکیاں آجو بات-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

سلاہ بندیں مردماں مزنیں گاڑی مانداشتگ ءُ تباہ کتگ اَنت-

بلوچستان ءِ دمگ مستونگ ءُ ھاران ءَ سلاہ بندیں مردماں بُنجاھی شھدگانی سر ءَ ناکہ بندی جتگ گاڑی پٹ ءُ پول کتگ اَنت، وھدے کہ اے میان ءَ چار ٹرالر گاڑی مانداشتگ اَنت-

چہ مستونگ ءَ ھالانی رِد ءَ کردگاپ ءِ دمگ سلاہ بندیں مردماں ناکہ بندی ءِ میان ءَ چار ٹرالر مانداشتگ اَنت-

ھمے وڑ ھاران ءَ نوروز کلات ءِ ھند سر ءَ دو کلاکاں چہ شال – ھاران شھدگ سر ءَ سلاہ بندیں مردماں ناکہ بندی کتگ دستیگ کنگ ءَ پد گاڑی پٹ ءُ پول کتگ اَنت-

نوروز کلات، چہ ھاران ءَ سی کلومیٹر ءَ گستائی ءَ ھاران – شال شھدگ سر ءَ برجاہ ءَ اِنت، ءُ نوشکی ءُ شال ھاران ءَ چہ ھمگرنچ کنوکیں بُنجاھی شھدگ ءِ بیگ ءِ سوب ءَ گچینیں دمگ ءَ چہ زانگ بیت-

زانگ بہ بیت کہ اے دمگاں بلوچ آجوئی لوٹوکیں گل پُرکار اَنت ءُ اے وڑیں وئیلانی زمہ واری ءَ منّگ ءُ آیگ ءَ اَنت، بلے مروچی بیتگیں اے اُرشانی زمہ واری انگت ھچ گل ءَ نہ زرتگ اَنت-

شال ءَ یکشمبے ءِ سھب ءَ شٹل ٹرین ءِ سر ءَ ٹوھیں اُرشے کنگ بوتگ ات ۔ اُرش ءِ زمہ واری بی ایل اے ءَ من اتگ ات ۔ جارکش جیئند بلوچ ءَ گوشتگ کہ اے اُرش بی ایل اے مجید بریگیڈ ءِ جندندر بلال شاھوانی پنام ءِ سائیں ءَ کتگ ۔ بلوچ لبریشن آرمی ءِ نیمگ ءَ ریل ءُ ریل اسٹیشنانی سر ءَ بوتگیں اے سیمی مزنیں اُرش انت کہ پاکستان ءِ پوجی کارمند نشانگ کنگ بوتگ انت ۔

اُرش کدی ءُ کجا بوتگ ؟

اُرش یکشمبے ءِ سھب ءِ ادار ھشت ءِ نزیک ءَ ھما وھد ءَ بوتگ وھدیکہ سے بوگیانی شٹل ٹرین شال کینٹ ءَ در اتکگ ءُ دیم پہ ریل اسٹیشن ءَ روگ ءَ بوتگ ۔ تراک ریل اسٹیشن ءَ چہ لھتے گز دیر چمن پھاٹک ءِ نزیک ءَ بوتگ ۔ تراک ءَ ریل ءِ سے بوگی تباہ بوتگ انت وھدیکہ ائید ءِ وھد ءَ کارمندانی کچ ھم گیش بوتگ ۔

اُرش گچینی جاھے ءَ بوتگ ، اے دمگ ءَ کمے دور پاکستانی پوج فرنٹیر کور (ایپ سی ) ءِ میس ، لیویز ھیڈکوارٹر ، نیوی آفس ، بلوچستان سول سیکٹریٹ ، گورنر ھاوس ، ءُ چیف منسٹر ءِ کارگس ھمد ءَ انت ۔

ھما جاہ ءَ کہ ریل نشانگ کنگ بوتگ اے جاہ ءَ گورنر کارگس بس ھشت سد میٹر دیر انت وھدیکہ شال ءِ نگاہ دار تریں جاہ شال کینٹ ءَ پنچ سد میٹر دور انت ۔

اُرش چینچو ترند بوتگ؟

واکدارانی رد ءَ تراک ءِ ھاتر ءَ اسپیتیں ویگن گاڑی ءِ کارمرز کنگ بوتگ ، سیکیورٹی ءِ رد ءَ اُرش ءَ کساس 70 یا ھشتاد کلوگرام تراکناکیں شورو کارمرز کنگ بوتگ ، بلے پد ءَ ھم اے تراک ءِ تباھی ءَ ھمے اندازہ جنگ بیت اے اُرش ءَ ھزار کلو ءَ گیش تراکناکیں شورو کارمرز کنگ بوتگ ، تراک ھمنچو ترند بوتگ کہ ریل ءِ یک بوگی ءِ سرجم ءَ تباہ بوتگ ءُ باز پَٹے ءَ دیر کپتگ وھدیکہ ایندگہ دو بوگی ھم سک باز سانمند بوتگ انت ءُ ھمے جاہ ءَ کساس 10 پٹ ءِ کڈے جوڑ بوتگ ۔

بلوچ لبریشن آرمی ءِ نیمگ ءَ بوتگیں تراکاں ھاسکر مجید بریگیڈ ءِ کاراں کارمرز بوتگیں گاڑیاں مزنیں کچے ءَ تراکناکیں شورو لڈگ بیت ۔ ھمے سال ءَ 31 جنوری ءَ بی ایل اے ءِ آپریشن ھیروپ 2 ءِ وھد ءَ شال ءَ ھوار ایندگہ بازاراں ءَ چار اُرش کنگ بوتگ کہ گاڑی تراکناکیں شورواں چہ پُر بوتگ انت کہ آیانی تہ ءَ ھزار کیلو تراکناکیں شورو کارمرز کنگ بوتگ ۔ وھدیکہ بی ایل اے ءِ اے آپریشن ءِ میان دگ ءُ ریل اسٹیشن ءُ بنجاھی پھل ھم تراکاں چہ تباہ کنگ بوتگ انت ۔

ریل ءَ چینچو مردم سوار بوتگ ؟

سربوتگیں ھالانی رد ءَ ھر یک بوگی ءِ تہ ءَ کساس 90 یا نود ءُ پنچ مردم سوار بوتگ ءُ انی ائید ءِ وھد انت گڑا شٹل ریل ءِ تہ ءَ سواری گیشتر بنت ، سرجمی 336 مردم اے شٹل ٹرین ءَ سوار بوتگ کہ آیانی تہ ءَ 74 سلاہ بندیں کارمندانی گور ءَ 7 ھزار سے سد ءُ 20 تیر ءُ دگہ مڈی ھم بوتگ انت ۔

مرتگینانی درگت چونیں سرپدی ھست ؟

پاکستانی واکدارانی نیمگ ءَ تنی وھدی مرتگ ءُ زدگینانی درگت ءَ ھچ دیم ءَ نیارتگ بلے دومی نیمگ ءَ بی ایل اے ءِ جارکش جیئند بلوچ ءَ سرجمیں ھال شنگ کتگ ءُ گوشتگ کہ اُرش ءَ 82 پوجی کارمند مرتگ انت 121 زدگ بوتگ انت ۔ آئی ءَ اے ھم گوشتگ کہ مرتگ ءُ زدگینانی تہ ءَ پاکستانی پوج ءِ جی سی اوز ، سپاھی ، این سی اوز ، ءُ نوک برتی بوتگیں کارمند ھوار بوتگ انت ۔

بی ایل اے ءِ نیمگ ءَ نشانگ بوتگیں فوجی یونٹ ءِ سرجمیں ڈیٹا ھم شنگ کنگ بوتگ انت ۔

ارشکار کئے بوتگ ؟

ارشکار ءِ پچار 25 سالی ئیں بلال شاھوانی پنام ءِ سائین ءِ نام ءَ زانگ بوتگ کہ مجید بریگیڈ ءِ باسک ءِ بوتگ ءُ شال ءِ دمگ کلی سردہ ، سریاب ءِ جھمنند بوتگ ۔

بی ایل اے ءِ جارکش جیئند بلوچ ءِ رد ءَ بلال شاھوانی پنام ءِ سائیں سال 2020 ءَ بلوچ راجی آجوئی زرمبشت ءَ ھوار بوتگ ، پوجی پڑ ءَ جوانیں کارکردگی ءُ گلی رھبندانی پاسداری ءِ بنیاد ءَ سال 2022 وتی واھشت ءِ رد ءَ مجید بریگیڈ ءَ ھوار بوتگ ۔ آئی ءَ ناگاھو ، دشت کمبیلا ، شال ، ءُ کلات ءِ کوہ ءَ گوں پوج ءَ جنگ داتگ ءُ آ کمانداری ءِ اگدھے سر ءَ بوتگ ۔

جارکش ءَ گوشتگ کہ بلال شاھوانی ءَ چد ءُ پیسر آپریشن ھیروپ 1 ءِ وھد ءَ کلات ءُ ھیروپ دو ءَ شال ءِ ٹولی ءِ سروکی کتگ ۔

اے اُرش پرچا ارزشت دار زانگ بوگ ءَ انت ؟

اُرش شال ءِ نگاہ دار تریں جاھے ءَ کنگ بوتگ کہ اود ءَ پوجی پانگس ، ڈوٹی دیوکیں کارمند ءُ پھازگی کیمرھانی میان ءَ اے کنگ بوتگ ۔ گوستگیں دو سالانی میان ءَ شال ءِ ریل اسٹیشن ءُ جاپر ایکسپریس ھائی جیکنگ ءَ پوجی کارمندانی نشانگ کنگ ءَ پد اے وڑیں اَرش ءِ کنگ بوتگ ۔

ارش ءِ زمہ واری ھنچیں گلے ءَ من اتگ کہ اے ماھانی تہ ءَ آئی ءِ اُرشانی تہ ءَ گیشی اتکگ ۔ ھمے سال ءَ پاکستانی پوج ءَ سے سد بی ایل اے ءِ سنگتانی کوش ءِ ٹاہ داتگ ءُ اُشی ءَ پد ھمے گوشگ بوتگ کہ گل نزور تر اتگ بلے پد ءَ ھم گل ءِ نیمگ ءَ مارچ ءِ ماہ ءَ سرجمیں بلوچستان ءَ ترندیں اُرش کتگ وھدیکہ ھمے ماہ ءَ بنجاھی شھدگ بستگ انت ءُ آپریشن ھیروپ ءِ بس چار ماھے گوزگ ءَ پد شال ءَ اے وڑیں ترندی اُرشے کنگ بوتگ ۔

بلوچستان ءِ دمگ مند ءَ سر بیتگیں ھالانی رد ءَ مروچی شپ ءِ ادار نھ کشندہ ٹولی ءِ کارمنداں مند ءِ دمگ گواک ءَ ھدامرزی شکاری مراد جان ءِ گل مھمد ءِ گس ءِ دزبمب ءِ چگل داتگ ءُ شتگ انت ۔

ھمے گوشگ بوگ ءَ انت کشندہ ٹولی ءِ کارمند اسپیت رنگیں کرولا گاڑی ءَ سوار بوتگ گسانی پشتی نیمگ ءَ اشتاتگ ءُ بمب ءِ چگل داتگ ، تراک ءَ ھچ وڈیں جانی تاوان نہ بوتگ ۔

بنشون رد ءَ چدوپیسر باز رند ءَ پاکستانی پوج ءَ گس ءِ سر ءَ بیڑ برتگ ءُ زوراکی کتگ ، چک جنیں لٹ شاپ کتگ انت ، سے رند ءَ ھدامرزی ایں کماش شکاری جند ھم زورانسری آوار جتگ ءُ گوں وت برتگ پد ءَ یل داتگ ۔

زانگ بہ بیت اے دومی رند ایں کہ شکاری ءِ گس ءِ سر ءَ بمب ارش کنگ بوھگ ءَ پیسرا ھم یکرندے ارش کنگ بوتگ ۔

شال ءَ زمین ءِ جیڑہ ءِ سر ءَ تیرگواری ءِ آسر ءَ یک کھول ءِ پنچ مردم بیران بیتگ انت-

شال پولیس ءِ رد ءَ بنجاھی شھر ءِ سریاب ءِ ھند ءَ زمین ءِ جیڑہ ءِ سر ءَ تیرگواری ءِ وئیلے ءَ یکیں لوگ ءِ پنچ مردم مَرگ ءِ ارجان بیتگ انت-

تیرگواری ءِ وئیل سریاب ءِ ھند شاھوانی ءَ پیش اتکگ کہ اود ءَ تیرگواری کنوک یک لوگے ءَ پترتگ ءُ تیرگواری ءِ اش کتگ کہ چریشی ءِ آسر ءَ پت ءُ آئی ءِ سَے بچک ءُ یک جنکے جاہ پہ جاہ ءَ بیران بیتگ انت-

دومی نیمگ ءَ وئیل ءِ ھلاپ ءَ کھول ءَ بادینی پھل ءِ نزیک ءَ لاش ایر کتگ ءُ زھرشانی کنگ ءَ انت ءُ چریشی ءِ سبب ءَ روانی مھتل انت-

بلوچستان ءِ دمگ مند ءَ پاکستانی پوج ءَ بیڑ برتگ ءُ زوراکی کتگ ءُ زھگ ءُ زالبول لٹ ءُ کٹ کتگ انت-

گیشین ھالانی رد ءَ دوشی شپ ءِ ادار سے ءَ پاکستانی پوج ءَ مند ءِ دمگ گیاب ءَ بیڑ برتگ ءُ زوراکی کتگ ءُ مردمانی گرانھادی مڈی پل اتگ انت ۔

دمگی اھوالانی رد ءَ پاکستانی پوج ءَ نمیرانیں ناکو ابراھیم ء داداللہ ، انور ، مھمد جان ءَ ھوار دگہ بازیں مردمانی گساں بیڑ برتگ ءُ زوراکی کنان ءَ چک ءُ جنین بیھار داتگ انت ءُ چہ گسانی تہ ءَ موبائیل ، مردمانی پجار کارڈ ءُ دگہ گران نھادیں مڈی گوں وت برتگ انت ۔

واکدارانی نیمگ ءَ اے درگت ءَ دگہ اھوال دیم ءَ نیتکگ انت ءُ بلے تنی وھدی ھچ وڑیں مردم ءِ گرگ ءِ ھال نیست ۔

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ مروچی سھب ءَ بی ایل اے ءِ جند ندری یونٹ مجید برگیڈ ءُ انٹلی جنس ونگ زراب ءَ شال مھکمیں ءُ ترندیں اُرشے کتگ ۔ اےجند ندری اُرش چمن پاٹک ءِ نزیک ءَ زورگریں پاکستانی پوج ءِ کارمندانی بروکیں شٹل ریل ءِ سر ءَ کنگ بوتگ ۔ اے ترندیں اُرش ءَ زورگریں پوج ءِ 82 کارمند مرتگ ءُ 121 ءَ گیش زدگ بوتگ انت ۔ زدگ ءُ مرتگیں کارمندانی تہ ءَ پاکستانی پوج ءِ جی سی اوز ( نان کمیشنڈ افسرز) سپاھیگ ءُ نوک برتی بوتگیں پوجی ریکروٹس ھوار بوتگ انت ۔ مرتگ ءُ زدگ بوتگینانی تہ ءَ چار فرنٹیر فورس رجمنٹ ، 10 بلوچ رجمنٹ ، 25 بلوچ رجمنٹ ، ای ایم ای سنٹر ، انفنٹری اسکول ، 31 کیولری ، 2 پنجاپ رجمنٹ ، 80 فیلڈ آرٹلری ، 50 سگنلز ، 63 میڈیم آرٹلری رجمنٹ ءُ 54 میڈیم آرٹلری رجمنٹ ءِ کارمند ھوار بوتگ انت۔ اے مشن بی ایل اے ءِ دلیریں کماندار بلال شاہوانی ءَ گوں مزنیں دلیری ءُ بودناکی ءَ سرجم کتگ ۔ بلوچ لبریشن آرمی ایشی ءِ زمہ واری ءَ من ایت ۔

جارکش ءَ گوشتگ کہ اے سوبمندیں آپریشن دژمن ءِ لشکر ءِ نوکیں ءُ رازداریں سپری پروٹوکول ءِ سر ءَ ٹوھیں ارش ئےکہ آئی ءَ 11 مارچ 2025 ءَ جعفر ایکسپریس ءِ ہائی جیکنگ ءُ 9 نومبر 2025 ءِ مجید بریگیڈ ءِ جندندری رفیق بزنجو ءِ نیمگ ءَ شال ریل اسٹیشن ءِ سر ءَ بوتگیں اُرش ءَ پد رازداری ءَ گوں دیم ءَ برتگ ۔ 9 نومبر ءِ اُرش ءَ دژمن ءِ روایتی پھازگی ڈھانچہ نزور کتگ کہ ایشی ءَ پد زورگریں پاکستانی لشکر ءَ وتی فوجی کارمند سرمچارانی دست ءَ رکھینگ ءِ ھاتر ءَ سرکاری ریل ءَ چہ فوجی کارمندانی برگ ءُ آرگ ءِ وڑ ءُ ڈول مٹ کتگ ۔ ھمے ترس ءَ چہ آئی ءَ جعفر ایکسپریس ءِ روگ ءَ چہ لھتیں کلاک ساری شپ ءِ تھاری ءَ کوئٹہ کینٹ ءِ مزنیں سیکورٹی زون ءِ تہ ءَ چار ءُ پنچ ھاسیں ریل ءِ بوگی کشگ بوتگ اَنت۔ سُھب ءَ رکستی ءُ نوکیں پوسٹ بوتگیں فوجی کارندہ کینٹ ءِ سیکورٹی باڑ ءِ تہ ءَ اے بوگیان سوار بوتگ اَنت ، ایشی ءَ پد اے بوگی یک جتاھیں انجنے ءِ وسیلگ ءَ فوجی شٹل ٹرین ءَ بدل کنگ بوتگ ءُ جاپر ایکسپریس ءِ رھادگ بوھگ ءَ چہ نیم کلاک پیسر ریل اسٹیشن آرگ بوتگ ۔ دژمن ءَ اے گمان کتگ کہ کینٹ ءِ اندری ڈھانچہ ءِ کارمرز کنگ ءَ چہ سرمچاراں رک ایت کنت-

اے رازداریں سپری بندوبست ءِ ھمراھی ءَ دژمن ءِ لشکر ءَ کینٹ ءَ بگر داں ریل اسٹیشن ءَ سرجمیں ٹریک ءِ دوئیں نیمگاں یک مزنیں سیکورٹی دیولے جوڑ کنگ بندات کتگ کہ اے فوجی شٹل ٹرین ءِ راہ ءَ را زمینی بارود ءُ درائیں ھترہ آں چہ رکھینگ بہ بیت، دانکہ ھرچ ٹیکنالوجی ءِ رد ءَ بے سوب بہ بیت ۔ چہ ایشی ءَ ابید اے شٹل ٹرین ءِ روگ ءِ وھد ءَ سیکورٹی اسکارٹ ءَ را دل یکیمی کنگ ءِ ھاترا ٹرین ءِ آیگ ءَ پیسر ھر روچ کوئلا پھاٹک ءُ پشین اسٹاپ ءِ پھل ءَ فوج ءِ کیو آر ایف (کوئک ریسپانس فورس) ءَ مزنیں سلاھانی گوما ہائی الرٹ کنگ بوتگ ءُ ٹرین ءِ آیگ ءَ پیسر چمن پھاٹک ءِ پوجی پانگس ءِ پیادگیں کارمنداں اے جاہ سرجمی ءَ انگر کتگ ۔ انگر ءِ اے درستیں گامگیج اے گپ ءِ گواھی ءَ دئینت کہ زوراکیں لشکر چہ روایتی ایمنی ءِ دراتکگ ءُ نوں دپاھی پوزیشن ءَ اتکگ۔

جارکش ءَ گوشتگ کہ بی ایل اے ءِ انٹیلی جنس ونگ زراب ءَ اے سرجمیں بدل بوتگیں سیکورٹی نیٹ ورک، ٹائم شیڈول ءُ دژمن ءِ رازداریں تھی اھوالکاری ءِ راز کش اتگ انت ۔ اے آپریشن بی ایل اے ءِ انٹیلی جنس ءِ برزتری ءِ اکس اِنت کہ زراب ءَ زوراکیں لشکر ءِ ایمن تریں فوجی زون ءُ پیسلہ کنوکیں ادارھانی تہ ءَ وت ءَ سر کتگ ۔ اے آپریشن چہ فوجی سائنس ءُ وھد ءِ رد ءَ انچیں زانتکاری ءِ گوم ءَ جوڑ کنگ بوتگ کہ اگاں ایشی ءِ شوربندی ءِ تہ ءَ پنچ منٹ ءَ ھم دیم یا پُشت ءَ بہ بوتیں گڑا دژمن ءِ لشکر ءِ نشانگ کنگ نہ بوتگ ات۔ زراب ءِ نیمگ ءَ داتگیں چیریں رازاں پد کماندار بلال شاہوانی پنام سائیں ءَ سرجمیں فوجی ءُ سیکورٹی بندش سوبمندی گوازینتگ انت ءُ سُھب ءِ ھشت ءَ ، وھدے کہ اے فوجی ریل ءَ کوئلہ در اتکگ چمن پھاٹک ءَ سر بوتگ گڑا آئی ءَ ٹوھیں جندندری اُرشے کتگ ءُ دژمن ءِ بٹاک زیرزمین کتگ انت ۔ ریل ءِ تہ ءَ 336 زورگیریں فوج ءِ کارمند سوار بوتگ انت ءُ اے اُرش ءِ آسر ءَ 74 نوکیں سلاہ بندیں فوج ءِ دپاھی نیٹ ورک ، 7320 گولہ بارود ءُ دگہ درستیں فوجی سامان سیکنڈانی تہ بے کار بوتگ انت۔

آئی ءَ گوشتگ کہ پاکستانی لشکر یک رندے پد ءَ وتی زاھریں انٹیلی جنس ءِ ناکامی، بزدلی ءُ چیردیگ ءِ ھاتر ءَ روایتی دروگ ءُ پروپیگنڈا ءِ سر ءَ زور دیگ ءَ اِنت۔ سرکاری رسانکدر ءُ آئی ءِ سرکاری جارکش بے سوبیں جھد ءَ اَنت کہ وتی وپاداریں کارمندانی مرگ ءَ لس مردم پیش بہ دار اَنت ءُ جھان ءِ دیم ءَ مظلومیت ءِ پیشدارگ ءِ بے سوبیں جھدے کنگ ءَ انت ۔ بی ایل اے اے دروگیں بیانیہ ءَ گوں وتی سرجمیں سیاسی ءُ اخلاقی زور ءَ رد کنت۔ اے یک ناقابل تردیدیں گپے کہ نشانگ کنگ بوتگیں ریل یک لس مردمی گاڑی یے نہ بوتگ بلکیں یک ھاسیں شٹلے بوتگ کہ ایشی ءِ تہ ءَ کینٹ ءِ بندش جتگیں دمگ ءَ چہ ایوک ءَ فوجی کارمند اتکگ انت کہ ایشی ءِ تہ ءَ لس مردم روگ وتی جاہ اے روٹ ءِ نزیک روگ ءَ ھم کس نہ اشتگ ، ریاست وتی لشکر ءِ تاوان ءَ لس مردماں گوں ھمگرنچ کنگ اے گپ ءِ پدریں سبوت اِنت کہ زور گیریں لشکر ءَ نوں بلوچ سرمچارانی دیم ءَ دارگ ءِ فوجی ءُ نپسیاتی ھمت سرجم ءَ گار کتگ، ءُ وتی زوال بوؤکیں ھوسلہ ءِ رکّینگ ءِ ھاترا راستی ءِ رد کنگ ءَ لاچار اِنت۔

جارکش ءَ گوشتگ کہ بلوچ آجوئی لشکر یک مھکمیں ، زانشتی راجی لشکر یے کہ میان استمانی جنگی کانود ءِ رھبندانی سر ءَ انت ءُ بازاری یا بے جنگولانی سر ءَ اُرش ءَ وتی پالیسی ءِ بگیری ءِ لیک ایت۔ مئے مول ءُ مراد کوریں ماجراجویی یے نہ اِنت بلکیں پہ وتی سرڈگار ءِ آجوئی ءَ یک زمہ وار ءُ رھبندی جنگ اِنت۔ مئے فوجی ٹارگٹ ھاسیں ءُ سیاسی رد ءَ جائز اَنت کہ ایشی ءِ تہ ءَ ایوک ءَ زور گیریں لشکر، آئی ءِ چیریں ادارگ، زوراکی کنوکیں نوآبادیاتی واکدار، زمین ءِ گداریں “ڈیت ءِ اسکواڈ” ءُ لٹ ءُ پلی پروجیکٹ ھوار اَنت کہ بلوچ ءِ وسیلگاں لٹ ءُ کُٹ کن اَنت۔ ھمے سوب انت اے سوبمندیں آپریشن ءَ یکشمبے ءِ روچ ءَ زانت ءُ زانگ ءَ گچین کنگ بوتگ ات، دانکہ آ وھد ءَ بازاریانی تر ءُ تاب کم بوتگ ات۔

جارکش ءَ گوشتگ کہ بلوچ لبریشن آرمی ءِ پھالیں ، تجربہ کار ءُ فیلڈ کمانڈرے ءِ پہ کربانی ءِ مشن ءَ پیش کنگ بی ایل اے ءِ ادارہ جاتی ردوم ءُ پگری برزتری ءِ پدریں سبوت انت۔ اے پیسلہ ءَ چہ زانگ بیت کہ بلوچ راجی گھگیری نوں چہ روایتی گوریلا رھبند ءِ سیمسراں سک دیم ءَ شتگ ءُ یک نوکیں، سائنسی ءُ رھبندیں جنگی ڈھانچے ءِ تہ ءَ بدل بوتگ کہ اود ءَ گل ءِ کماندار جِندی نَر ءُ مادی کردار ءُ زند ءِ سر ءَ مچانکی راجی مول ءُ مراداں بنداتی دے انت۔ بلال شاہوانی ءِ اے گامگیج راجدپتر ءِ تہ ءَ راجانی سیاسی ءُ فوجی جھد ءِ یک جھانی رھبندے ءِ دروشم ءَ زندگ مانیت کہ اے گپ ءَ سابت کنت کہ زوراکیں ریاست ءِ نوک تریں مادی نیٹ ورک ءِ دیم ءَ دارگ ایوک ءَ گوں گھتریں پگری راہ ءُ رھبند، انٹیلی جنس ءِ رسائی ءُ ابدی دیمھونی ءَ بوت کنت ۔ بیست ءُ پنچ سال ءِ امر ءَ کہ آئی ءَ دشت ءُ کومبیلا ءِ سنگراں بازیں وھدے ءَ فوجی کمانڈ زرتگ ءُ آپریشن ھیروپ یک دومی ءَ کلات ءُ شال ءِ دمگاں پیشگام ءُ رھشونی کتگ گڑا آئی ءِ اے گڈی گچین ءَ زرمبشت ءَ را مدامی پگری زور داتگ۔ بی ایل اے ءِ مرچیگیں سوبمندیں ءُ گواستانکی جنگ ءَ چو روچ ءَ پدر کتگ کہ پاکستان ءِ زور گیریں ریاست ءِ نیمگ ءَ بلوچ سرڈگار ءِ سر ءَ ھرچ وڑیں بُرزیں دیوال ایر کنگ بہ بنت یا سیکورٹی پروٹوکول ءِ تہ ءَ بدلی بہ بنت بلے اے بلوچ راجی لشکر ءِ جزم ءَ رکّینت نہ کنت۔ بی ایل اے کماندار بلال شاہوانی پنام ءِ سائیں ءَ را اے راجدپتری سوبمندی ءُ راج ءِ سر ءَ گوں فخر ءَ بُرز کنگ ءِ ھاتر ءَ یات کنت۔ مئے اے مھکمیں ، رھبند ءُ پکری جنگ گوں سرجمیں ترندی ءَ برجاہ مانیت داں بلوچ سرڈگار ءِ آجوئی ءَ ۔

بلوچستان ءُ سندھ ءَ گیس پائپ لائین ءُ پاکستانی پوج ءِ سر ءَ بیتگیں اُرشانی زمہ واری بی آر جی ءُ بی آر اے ءَ منّ اِتگ اَنت-

بلوچ ریپبلکن آرمی ءِ جارکش سرباز بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ ڈیرہ بگٹی ءَ لَس آبادی ءِ سر ءَ پاکستانی پوج ءِ لشکر کشی دومی روچ ءَ ھم برجاہ ءَ اِنت، اود ءَ بے میاریں مردمانی لوگانی سر ءَ تُرندیں بمباری کنگ بیگ ءَ اِنت، وھدے کہ بی آر اے سرمچاراں پاکستانی پوج ءِ شوربندیانی سر ءَ جتاجتائیں دمگاں اُرشانی نشانگ کتگ اَنت-

جارکش ءَ گوشتگ کہ گوستگیں شپ ءَ چہ سوئی ءَ کراچی ءَ رؤکیں 36 انچ گیس پائپ لائن سوئی گوپٹ ءِ ھند سر ءَ تراک ءَ چہ تباہ کتگ، چریشی ءَ پد گیس لائن ءَ آس چست بیتگ ءُ سپلائی سرجمی ءَ بند بیتگ – وھدے کہ گوپٹ ءِ ھمے ھند سر ءَ گیس پائپ لائن سر ءَ ساڑی ایف سی کارندہ سنگر گپتگ اُرش ءِ نشانگ کتگ، چریشی ءِ آسر ءَ سے کارندہ جاہ پہ جاھی مرتگ اَنت ءُ دگہ دو ٹپی بیتگ اَنت-

جارکش ءَ گوشتگ کہ سوئی رنگ دگ سر ءَ مندر کالونی ءِ نزیک ءَ ایپ سی ءِ گشت سر ءَ سنگر گپتگ وتکاریں سلاھاں چہ اُرش کتگ، چریشی ءِ آسر ءَ پنچ کارندہ مرتگ ءُ دو سک ٹپی بیتگ اَنت-

جارکش ءَ گوشتگ کہ سوئی شھر ءَ توتا کالونی ءِ ھند سر ءَ ویل نمبر 27 ءَ چہ پلانٹ ءَ رؤکیں 16 انچ ءِ گیس پائپ لائن تراک ءَ چہ تباہ کتگ، چریشی ءَ پد ویل ءَ چہ پلانٹ گیس سپلائی بند بیتگ-

جارکش ءَ گوشتگ کہ مروچی نیمروچ ءِ وھد ءَ سوئی جھٹ پٹ دگ ءِ ناکہ بندی ءَ سی ٹی ڈی ءِ دو کارمند دزگیر کتگ اَنت، آیانی جست ءُ پُرس برجاہ ءَ اِنت- کارندھانی نام مراد الی ء محمد بخش ءُ پرویز ء محمد سلع اَنت-دزگیریں کارندھانی سیادی بگٹی ٹک ءِ ھیژوانی شاک ءِ گورانی ٹکر ءَ اِنت-

جارکش ءَ گوشتگ بیگاہ ءِ وھد ءَ ایف سی ءِ یک کاروانے دزگیر سی ٹی ڈی کارندہ یل کنگ ءِ ھاتر ءَ پیشگامی کتگ، آ سوئی جھٹ بٹ دگ سر ءَ کچی پل ءِ نزیک ءَ بی آر اے ءَ سرمچاراں سنگر گپتگ ءُ اُرش ءِ نشانگ کتگ، چریشی ءِ آسر ءَ مزنیں کچے ءَ کارمند مرتگ ءُ ٹپی بیگ ءِ ھال سر بیتگ-

جارکش ءَ گوشتگ کہ پاکستانی پوج ءِ زوراکی ءُ آئی ایس آئی ءِ زرگری ءِ ھلاپ ءَ کاروائی جوانیں وڑے ءَ برجاہ بنت-

ھمے وڑ بلوچ ریپبلکن گارڈز ءِ جارکش دوستین بلوچ ءَ وتی درشان ءَ گوشتگ کہ سندج ءِ ھند کشمور ءِ نزیک ءَ شاھوانی ءَ چہ سوئی ءَ کراچی ءَ روکیں گیس پائپ لائن گوں تراکناکیں شورھاں تباہ کتگ۔

دوستین بلوچ ءَ درشان ءِ گڈی ءَ اُرش ءِ زمہ واری من اتگ ءُ گوشتگ کہ مئے اے وڑیں کاروائی داں بلوچستانءِ آجوئی ءَ برجاہ بنت۔