بلوچستان ءِ دو جتاجتائیں دمگاں دو زوربیگواھیں مردمانی لاش دزکپتگ اَنت

بلوچستان ءِ دمگ کیچ ءُ پسنی ءَ پاکستانی پوج ءِ دست ءَ آوار جنگ بیتگیں دو بیگواھیں مردمانی لاش دزکپتگ اَنت-

دمگی اِھوالکار ءِ رِد ءَ لاش ءِ پجّار حسین ء جمعہ نام ءَ چہ بیتگ کہ یک ماھے ءَ ساری پاکستانی پوج ءِ دست ءَ زورانسری بیگواہ کنگ بیتگ-

کھول ءِ رِد ءَ حسین پوج ءَ 03 ستمبر 2026 ءَ تمپ ءِ دمگ چہ آزیان ءَ زبیر بلوچ ء کریم داد ءُ کمبر بلوچ ء نزر ھمراھی ءَ آوار جتگ ءُ بیگواہ ءُ یک ماھے ءَ زورانسری آوار جنی ءِ نشانگ ءَ پد مروچی حسین ءِ لاش دور داتگ، کھول ءِ رِد ءَ آ کشتگ ءُ لاش دور داتگ-

وھدے یکیں کھول ءَ چہ سیادی داروکیں تمپ ءِ جھننندیں زبیر بلوچ ءُ کمبر بلوچ انگت بیگواہ اَنت-

ھمے وڑ گوادر ءِ دمگ چہ پسنی ءَ مروچی دمگی انتزامیہ ءَ یک لاشے دزکپتگ، کہ آ کشگ ءَ پد دور داتگ – لاش ءِ پجّار دمگی اسکول ءِ ٹیچرے بیتگ-

کھول ءُ پسنی ءِ پولیس رِد ءَ چہ پسنی ءَ دزکپتگیں لاش ءِ پجّار اربی ءِ استاد پرویز ء مزار نام ءَ چہ بیتگ کہ آئی ءِ بُنکی ھنکین کیچ ءِ دمگ چہ پیدارک ءَ بیتگ ءُ آ گورنمنٹ ھائی اسکول ببرشور ءَ ٹیچر بیتگ-

اِھوالکار ءِ رِد ءَ ماسٹر پرویز مزار گوستگیں روچ ءَ پاکستانی پوج ءَ آئی ءِ کھول ءَ وتی ھمراھی ءَ برتگ چریشی ءَ پد آئی ءِ درگت ءَ ھچ وڑیں ھال دز نہ کپتگ-

ماسٹر پرویز مزار ءِ لاش دزکپگ ءَ پد آئی ءِ کھول ءَ دیگ بیتگ-

زانگ بہ بیت ھمے یکیں ھپتگ ءِ توک ءَ بلوچستان ءِ جتاجتائیں دمگاں 29 مردمانی لاش دزکپتگ اَنت کہ آیانی تہ ءَ پنجگور ءَ پنچ، ڈیرہ بگٹی ءَ شش، ھرنائی ءَ دوازدہ ، سوراب ءُ کلات ءَ چار لاش ءُ پسنی، مند ءَ دو لاش دزکپتگ اَنت-