بلوچستان ءِ جتاجتائیں دمگاں پنجاب جھمنندے ءَ ھوار دو مردم بیران یکے ٹپی وھدے کہ پوج ءِ سر ءَ اُرش

بلوچستان ءِ جتاجتائیں دمگ پنجگور ءُ ھاران ءَ پنجاب جھمنندے ءَ ھوار دو مردم بیران یکے ٹپی بیتگ وھدے کہ پوج سر ءَ اُرش-

پنجگور ءِ دمگ کلگ ءَ ناشناسیں سلاہ بندیں مردمانی تیرگواری ءَ چہ یک مردمے بیران یک مردمے ٹپی بیتگ-

دمگی اِھوالکار ءِ رِد ءَ وئیل ءَ ٹپی بیتگین ءِ پجّار جلیل ءُ بیران بیتگین ءِ پجّار احمد نام ءَ چہ بیتگ-

دمگی اِھوالکار ءِ ٹاہ اِنت کہ بیران بیتگیں مردم ءِ سیادی سرکاری پلارمرزی سلاہ بندیں ٹولی ءَ چہ بیتگ، کہ آیاں دمگی ھساب ءَ ڈیتھ اسکواڈ گوش اَنت – اے ٹولیانی سر ءَ درکانودی کوش، زورانسری آوار جنی ءُ دگہ چاگردی سلّکاریاں ھمگرنچی بھتام جنگ بیت- اے ھم بھتام ھست کہ آیاں پاکستانی پوج ءِ نیمگ ءَ چہ کاروائی کنگ ءَ پُشت گون اِنت-

دومی نیمگ ءَ پنجگور ءِ دمگ بائی پاس ءَ پاکستانی پوج ءِ سر ءَ اُرش ءِ ھال اِنت- ھالانی رِد ءَ اُرش ءَ بازیں کارندھے بیران ءُ ٹپی بیتگ اَنت- بیران بیتگیں کارندہ ءِ پجّار نائیک توحید نام ءَ چہ بیتگ-

ھمے وڑ ھاران ءِ دمگ چہ پتکن ءَ دمگی انتزامیہ ءَ یک مردمے ءِ لاش دزکپتگ کہ آ کشتگ ءُ پد ءَ لاش دور داتگ-

انتزامیہ ءِ رِد ءَ چہ پتکن ءَ دزکپتگیں لاش ملتان ءِ جھمنند عتیق الرحمان ئیگ اِنت-

دمگی اِھوالکار ءِ رِد ءَ اے مرد گوستگیں روچاں پتکن ءِ ھند سر ءَ سلاہ بندیں مردماں ناکہ بندی ءِ میان ءَ دزگیر کتگ-