TBP Balochi

شال ءِ دمگ سریاب دگ سر ءَ سلاہ بندیں مردمانی تیرگواری ءَ سے مردم جاہ پہ جاھی بیران بیتگ اَنت وھدے کہ دو ٹپی بیتگ اَنت-

بیران بیتگیں مردمانی پجّار ھاروان ء میر جمیل مینگل، غفور ء وحید بخش ءُ نصیب اللہ نام ءَ چہ بیتگ اَنت- ٹپیانی تہ ءَ عبدالحفیظ ءُ میر جمیل ھوار اَنت، سول نادُراھجاہ شال ءَ برگ بیتگ اَنت-

اِھوالکار ءِ رِد ءَ میر جمیل مینگل گاڑی ءِ سر ءَ آمیدگس ءَ پیشی ءَ چہ واتری ءَ اُرش کنگ بیتگ چریشی ءَ جمیل مینگل جند ٹپی بیتگ ءُ وھدے کہ آئی ءِ چُک ھاروان مینگل ءُ دگہ دو مردم بیران بیتگ اَنت-

تنی وھدے وئیل ءِ سوب زانگ نہ بیتگ-

بلوچستان ءِ دمگ کیچ ءِ بنجاھی شھر چہ تربت ءَ رس اتگیں ھالانی رد ءَ دوشمبے ءِ روچ ءَ پاکستانی لشکر ءِ تیز رپتاریں گاڑی ءَ تربت ءِ کمشنر روڈ ءَ چہ سڑک ءَ گوزوکیں زالبول حمیدہ ٹکرے جتھ ءُ ایشی ءِ آسر ءَ آ سک ٹپیگ بوتگ۔

ریسکیو ءِ ٹیماں ٹپیگیں جنین آدم ءَ را نادراھجاہ ءَ سر کنگ ءِ جھد کتگ بلے آئی ءَ وتی ٹپیانی درد نہ سگ اتگ بیران بوتگ۔

دومی نیمگ ءَ پاکستانی لشکر ءِ گشگ اِنت کہ زالبول ءَ سڑک ءَ چہ گوزگ ءِ وھد ءَ چارکائی نہ کتگ کہ ایشی ءِ سبب ءَ وئیل بوتگ۔ بلے بیران بوتگیں زالبول ءِ کھول ءِ مردماں اے وئیل ءِ تچکیں پٹ ءُ پول ءِ لوٹ کتگ۔

زانگ بہ بیت کہ اے اولی وئیل نہ انت ۔ چہ پیسریگیں بازیں وئیلاں پاکستانی لشکر ءِ تیز رپتاریں گاڑیانی نشانگ ءَ زھگ ءُ دگہ لس مردم بوتگ اَنت۔

بلوچ مھلوک ءِ نیمگ ءَ شکایت اتکگ انے پاکستانی لشکر ءِ گاڑی آبادی ءِ دمگ ءُ رَشیں شاھدگانی سر ءَ تیز رلتار ءَ رؤگ ءَ انت کہ ایشی ءِ سبب ءَ شھریاں بازیں رند ءَ تاوان رس اتگ انت۔

پاکستانی پوج ءَ لوگانی سر ءَ بیڑ ءِ میان ءَ پنچ مردم آوار جتگ ءُ ناشناسیں جاھے ءَ برتگ اَنت-

بلوچستان ءِ دمگ چہ پنجگور ءَ ھالانی رِد ءَ دوشمبے ءِ روچ ءَ پاکستانی پوج ءَ پنجگور پروم ءِ دمگ ھکیم بازار ءَ کاروائی ءِ میان ءَ پنچ مردم آوار جتگ ءُ ناشناسیں جاھے ءَ برتگ اَنت-

پاکستانی پوج ءِ دست ءَ آوار جنگ ءَ پد زورانسری آوار جنی ءِ نشانگ کنگ بیتگیں مردمانی پجّار سے برات صابر، شریف، شکیل ء غلام حسین، مختیار ء غلام رسول، حسین ء نثار، مولا بخش ء سخی داد نام ءَ چہ بیتگ اَنت-

پاکستانی پوج ءِ دست ءَ آوار جنگ بیتگیں مردم تنی وھدے دیم ءَ آرگ نہ بیتگ اَنت-

ھمے وڑ گوستگیں سال ءَ 26 دسمبر ءَ تیاب دپی شھر چہ گوادر ءَ زورانسری بیگواہ کنگ بیتگیں کیچ مند ءِ جھمنندیں عامر ء جاسم ولی داد، ءُ شش اپریل ءَ زورانسری آوار جنی ءِ نشانگ بیتگیں الیاس ء میداد یل کنگ بیتگ-

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءَ سرجمی ءَ ھمل میری ٹائم ڈیفنس فورس (Hammal Meritime Defence Force) ءِ جوڑ کنگ ءِ پیسلہ کتگ کہ آ بلوچ زر ءِ پھازگ ءَ بہ کنت۔ بی ایل اے ءِ اے نوکیں ھواریں فورس ءَ وتی اولی آپریشنل آپریشن ءِ بندات کنگ ءِ وھد ءَ مرچی دو شمبے 12 اپریل 2026 ءَ گوادر ءِ جیونی ءِ دمگ ’مل تیاب‘ ءَ سلاہ بندیں اُرش ءِ تہ ءَ زور گیریں پاکستانی بھریہءِ گشت ءِ کشتی ءَ را نشانگ جوڑ کتگ۔ کشتی ءِ سر ءَ نائیک افضل، سپاھی جمیل ءُ سپاھی عمر جاہ ءَ بیران بوتگ انت۔ آپریشن ءَ پد مئے سرمچار وتی مھکمیں جاھاں سر بوتگ اَنت۔

آئی ءَ گوشتگ بلوچ لبریشن آرمی اے گپ ءَ پدر کنگ لوٹ ایت کہ بلوچ راجی آجوئی تھریک نوں یک انچیں پڑے ءَ اتکگ کہ اود ءَ بلوچستان ءِ زمین ءِ ھمرائی ءَ آئی ءِ دریائی سیمسر پہ دژمن ءَ یک مَرگی راھے ءِ نشانگے سابت بنت۔ زور گیریں پاکستان ءُ آئی ءِ لُٹ ءُبپلی شریکاں سالانی سال اِنت کہ بلوچ ءِ زر ءَ ناجائزیں وڑے ءَ نیلام کنگ ءَ اَنت کہ اود ءَ مئے دریاوردانی لاپ جنی برجاہ اِنت ءُ زر ءَ فوجی چھاونی جوڑ کنگ بوتگ اَنت۔ ھمل میری ٹائم ڈیفنس ءِ جوڑ کنگ مئے راجی بھریہ ءِ بندات اِنت کہ آ بلوچ ءِ زور ءِ لٹ ءُ پُل ءِ بند کنگ ءِ ھاترا ھر وھد ءَ جاڑیگ بیت، دژمن ءِ زری سر ءُ پراں نگاہ ایر کنت ءُ زیردستیں زر ءِ پھزداری ءَ کنت۔

آئی ءَ گوشتگ بی ایل اے ءَ گچینی رنگ ءَ اے نیول یونٹ ءِ نام بلوچ گھگیری ءِ مزن نامیں سَر ھمل جیئند بلوچ ءِ نام ءَ داتگ۔ ھمل جیئند بلوچ راجدپتر ءِ مزن کردیں بچ اِنت کہ آئی ءَ شانزدہمی کرن ءَ آ دور ءِ نوکیں پرتگالی نوآبادیاتی ءِ ھلاپ ءَ زر ءِ پھزداری ءِ بُن ھشت ایر کتگ ءُ وتی جنگی سنچ ءَ گوں دری زورگیر شکست داتگ انت۔ ھمل جیئند ءِ کرد بلوچ راجی یات ءَ شرپ ءُ شام ءُ زر ءِ پھزداری ءِ ابدمانیں چیدگی رنگ ءَ نکش کنگ بوتگ۔ آئی ءَ اے گپ منینتگ کہ زور ءَ چہ زرباری نوآبادیاتی نزام ءِ ھلاپ ءَ مدام راجی تب ءُ گوریلا ءِ گامگیج سوبمند بنت۔ بی ایل اے ءَ اے نام پہ وتی اے جزم ءِ پد ءَ پدر کنگ ءَ گچین کتگ کہ مئے انوگیں گھگیری اے نامداریں راجدپتری میراس ءِ درچ اِنت۔ انچو کہ ھمل جیئند ءَ پرتگیزیانی وتگڑیں زور ءِ سر ماں ھاکاں سک داتگ ھمے پیم ھمل میری ٹائم ڈیفنس فورس ھم مرچیگیں زورگیراں چہ بلوچ ءِ زر ءَ درکنگ ءَ اِنت۔

جیئند بلوچ ءَ گوشتگ بلوچ لبریشن آرمی دژمن ءَ ھال دنت کہ نوں مئے لشکری ​پتر مزن بوتگ کوہ ءُ شھراں بندوک نہ اِنت بلکیں ما دژمن ءَ جُھلانکیں زر ءِ تہ ءَ نشانگ جوڑ کنگ ءِ سرجمیں ڈبو زرتگ ءُ آئی ءِ بھری مال ءُ مڈی ھم نشانگی ءَ ھوار اَنت۔ مئے اے جنگ گوں سرجمیں زور ءَ برجاہ مان اِیت داں دژمن ءِ سرجمی ءَ کشگ ءُ آزات ءُ وت واجھیں بلوچ ریاست ءِ سرجمی ءَ برجاہ مان انت-

بلوچ ریپبلکن گارڈز ءِ جارکش دوستین بلوچ ءَ رسانکدر ءَ شنگ کتگیں بیانے ءَ گْوشتگ کہ مرچی بلوچ ریپبلکن گارڈز ءِ سرمچاراں بلوچستان ءِ دمگ کچھی ءِ سنی ھند ءَ پاکستانی لشکر ءِ نیمگ ءَ چیر کنگ بوتگیں سرویلنس کیمرہ نشانگ جوڑ کتگ ءُ تباہ کتگ اَنت۔

آئی ءَ گْوشتگ: مئے گل بی آر جی اے اُرش ءِ زمہ واری ءَ من ایت ءُ داں بلوچستان ءِ آجوئی ءَ اے وڑیں اُرش برجاہ مان اَنت۔

بلوچستان ءِ دمگ بارکھان ءَ پاکستانی لشکر ءِ نیمگ ءَ کورکاری بمباری ءُ تیرگواری ءَ زالبول ءُ زھگاں ھوار بازیں مردم بیران ءُ ٹپیگ بوتگ اَنت۔

ھالانی رد ءَ ناشناسیں سلاہ بندیں مردمانی اُرش ءَ پاکستانی لشکر ءِ 12 کارندہ بیران بوتگ انت۔ اُرش ءَ پد پاکستانی لشکر ءَ دمگ ءَ مزنیں کچے ءَ آپریشن بندات کتگ ۔

دمگی مردم ءُ چمدیستگینانی گشگ ءِ رد ءَ پورسز ءِ نیمگ ءَ کتگیں بمباری ءَ زالبول ءُ چُک ھوار لس مردم نشانگ جوڑ بوتگ اَنت۔ اے کاروائی ءِ آسر ءَ کم چہ کم 12 مردم بیران ءُ 3 مردم سک ٹپی بوتگ اَنت۔

بیران بوتگیں مردمانی تہ ءَ علی ء سلطان اُمر (40 سال)، گلزار ءِ جنک بیبل اُمر (30 سال)، میر جان ء علی اُمر (2 سال)، بھنگان ءِ جنک سومری اُمر (35 سال)،بالاچ ء سبزو اُمر (70 سال)، شاری اُمر (22 سال)، بالاچ ءِ چُک رحمن (18 سال)، رحمان ء بالاچ اُمر (18 سال)، نائخو بنت جمالان اُمر(17) اللہ بخش ء بالاچ اُمر (6 سال)، سادو بنتِ بالاچ (13 سال)، ھاپو بنت بالاچ (8 سال) ءُ مھرنگ بنت بالاچ (2 سال)۔

ٹپیگانی تہ ءَ شیر ءِ جنک زر بی بی (55 سال)، بالاچ ءِ زھگ ھزار خان (9 سال) ءُ بالاچ ءِ جنک اسرار (15 سال) ھوار اَنت۔

دمگی مردماں اے ھم گْوشتگ کہ یک گاڑی یے ءِ تہ ءَ بازیں مردمانی سوتکگیں لاش گندگ بوتگ اَنت۔ البت اے درگت ءَ سرکاری تک ءَ راستی ءُ انکاری نہ بیتگ انت۔

بلے اے درگت ءَ واکدارانی لیکہ انگت ءَ پدر نہ بوتگ۔

بلوچستان ءِ دمگ ڈیرہ بگٹی ءِ سوئی شھر ءُ آئی ءِ کش ءُ گور ءِ دمگاں چہ زورانسری بیگواہ کنگ ءِ بازیں نوکیں کیس دیم ءَ اتکگ اَنت کہ اود ءَ پاکستانی لشکر ءُ کاؤنٹر ٹیررازم ڈیپارٹمنٹ ءِ نیمگ ءَ شھریانی دزگیر کنگ ءَ پد بیگواہ کنگ درچ گیش بوتگ انت۔

ھالانی رد ءَ چہ سوئی شھر ءَ دگہ سئے مردم زورانسری بیگواہ کنگ بوتگ انت کہ آھانی پجار نبی بخش ء مھوت بگٹی، نبی بخش پنام ءِ لایون ء بنا بگٹی ءُ عثاما پنام ءِ نادو ء نیک محمد بگٹی ءِ ناماں زانگ بیتگ انت۔ اے سئیں بگٹی ٹک ءِ ھبیبانی ٹک ءَ گوں سیادی دار اَنت۔ بنشون ءِ رد ءَ گوستگیں سئے روچانی تہ ءَ ھمے ٹک ءَ گوں سیادی داروکیں پنچ ورنا زورانسری ءَ بیگواہ کنگ بوتگ اَنت ھمے وڑ سوئی شھر ءَ ھشت مردم نشانگ جوڑ کنگ بوتگ اَنت۔

دومی نیمگ ءَ سوئی ءِ پٹ فیڈر ءِ دمگ ءَ فرنٹیئر کور ءِ کارندھاں گلمیر ء بند علی بگ-ی دزگیر کتگ ءُ ناشناسیں جاھے ءَ برتگ کہ آئی ءِ بابت ءَ انگت ءَ ھچ وڑیں سرپدی دیگ نہ بوتگ۔

دیمترا 7 اپریل ءِ سھب ءَ سی ٹی ڈی ءِ کارندھاں سوئی ءِ محمد کالونی ءَ کریم ء رحیم بخش بگٹی زسر بیگواہ کتگ ءُ 9 اپریل 2026 ءَ صدیق ء نزر علی بگٹی ھم سی ٹی ڈی ءَ دزگیر کتگ ءُ بیگواہ کتگ کہ آ انگت ءَ بیگواہ انت۔

ھالانی رد ءَ ڈیرہ بگٹی ءَ پاکستانی لشکر ءِ نیمگ ءَ مزنیں کچے ءَ کریک ڈاؤن کنگ بوگ ءَ ایں کہ ایشی ءِ تہ ءَ 65 سالی زالبولے ھم نشانگ جوڑ کنگ بوتگ۔ اے جنین شاہل ممدازی بگٹی ءِ جنین اِنت ءُ ایف سی ءِ کارندھاں چہ پیرکوہ ٹاؤن ءَ دزگیر کتگ۔

ھمے کارروائی ءِ تہ ءَ دگہ 9 مردم چہ ڈیرہ بگٹی ٹاؤن ءَ سی ٹی ڈی ءَ زورانسری ءَ بیگواہ کتگ اَنت کہ آیانی پجار چوش اِنت:

ارباز ء اکرم خان بگٹی، قاسم علی ء لیمو خان ​​بگٹی، جبار خان ء حیات بگٹی، متین ء حیات بگٹی، سجاد ء بلال بگٹی، امین ء نور دین بگٹی، رھزان ء داد محمدبگٹی ءُ دین محمد ء رحیم بخش بگٹی ءُ دوست علی ء ملوک بگٹی ءِ ناماں بیتگ انت۔

بنشون ءِ گشگ انت کہ اے نوکیں کریک ڈاؤن گمانی رنگ ءَ دمگ ءَ تیل ءُ گیس ءِ شوھازگ ءِ منسوبھگانی رد ءَ کنگ بوگ ءَ انت کہ ایشی ءِ ھاتر ءَ گمانی فوجی آپریشن ءِ تیاری ھم گیش کنگ بوتگ انت۔

انسانی ھکانی گلاں بلوچستان ءَ زورانسری ءَ بیگواہ کنگ ءِ گیش بوھوکیں وئیلانی سر ءَ دلپدردی درشان کتگ ءُ اے کار ءَ را بنیاتی انسانی ھکانی مزنیں لگتمالی لیک اِتگ ءُ لوٹ کتگ کہ اے رھبند ءَ زوت بند کنگ بہ بیت۔

بلوچستان لبریشن پرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ سرمچاراں یازدہ اپریل 2026 ءَ آواران ءِ دمگ آھوری ءَ زورگریں پاکستانی پوج ءِ ھشت گاڑیانی ھمگرنچیں کاروان سنگر گپتگ ءُ نشانگ کتگ- سرمچاراں راکٹ لانچرز، اسنائپر رائفلز ءُ وتکاریں سلاھاں چہ کاروان ءِ اولی ءُ رند گاڑی یکیں وھد ءَ نشانگ کتگ دانکہ دُژمن ءِ سُر ءُ پُر داشت کُت بہ کن ایں- اے مزنیں اُرش ءَ دُژمن ءِ سے گاڑی ناکاراہ کتگ اَنت، چریشی ءِ سوب ءَ پنچ پوجی کارندہ جاہ پہ جاھی مرتگ ءُ چار سک ٹپی بیتگ اَنت-

جارکش ءَ گوشتگ بی ایل ایف ءِ سرمچاراں یازدہ اپریل 2026 کیچ ءِ دمگ دشت کنچتی کراس ھند سر ءَ فرنٹئر کور (ایف سی) ءِ بمب ڈسپوزل اسکواڈ ءِ ٹولی ریموٹ کنٹرول آئی ای ڈی بمب (IED) تراک ءَ چہ نشانگ کتگ – اے کاروائی ءِ آسر ءَ بمب ڈسپوزل اسکواڈ ءِ گاڑی ءِ دیم ءِ بھر سرجمی ءَ تباہ بیتگ، چریشی ءِ آسر ءَ گاڑی ءَ سوار سے پوجی کارندہ جاہ پہ جاھی مرتگ اَنت-

جارکش ءَ گوشتگ ھمے روچ ءَ یازدہ اپریل 2026 ءَ بی ایل ایف ءِ شھری گوریلہ ٹولی ءَ شال ءِ دمگ پنجپائی ءَ شادینی ءِ ھند سر ءَ گمانی انٹیلی جنس ھالانی بُنیاد ءَ آپریشن کتگ – سادھیں پوشکانی تہ ءِ پولیس فورس ءِ سے کارندہ شھدگ سر ءَ ناکہ جتگ کہ دمگی ڈرائیوراں چہ زور زر گپتگ اِت – گل ءِ شھری گوریلہ ٹولی ءَ کاروائی کنان ءَ زر گرگ ءَ دلگوشیں اے کارندہ انگیر ءَ کتگ ءُ دزگیر کتگ اَنت- پٹ ءُ پول ءِ میان ءَ آیانی گور ءَ چہ سرکاری سلاہ ءُ گاڑی دستیگ کتگ اَنت- اشی ءَ پد دمگی بلوچ ءُ پشتون بیگ ءِ سوب ءَ چہ گل ءَ آ انسانی ھمدردی ءَ چہ سک کڈن کنگ ءَ پد یل داتگ اَنت-

جارکش ءَ گْوشتگ کہ سرمچاراں دوازدہ اپریل 2026 ءَ یک مھکمیں کاروائی ءِ میان ءَ چاگی ءِ دمگ امین آباد ءَ برجاہ پولیس چوکی ءِ سر ءَ اُرش کتگ ءُ آ سرجمی ءَ دستیگ کتگ – دستیگ ءَ پد چوکی ساڑی سرجمیں سرکاری سلاہ ءُ دگہ پوجی ساز ءُ سامان وتی دستیگ کتگ اَنت-

جارکش ءَ گْوشتگ سرمچاراں دوازدہ اپریل 2026 ءَ چاگی ءِ دمگ کرودُک ءَ برجاہ پولیس چوکی نشانگ- سرمچاراں چوکی ءِ سر ءَ اُرش کتگ ءُ آ وتی دستیگ کتگ ءُ اود ءَ ساڑی سرکاری سلاہ دستیگ کتگ اَنت-

جارکش ءَ گْوشتگ اے کاروائی ءِ دْرچ اِنت مئے سرمچاراں دمگ ءَ چہ گوزوکیں بُنجاھی شھدگ سر ءَ یک کلاکے ءَ تاں تُرندیں ناکہ بندی کتگ – ناکہ بندی ءِ میان ءَ شھدگ سر سرجمی ءَ پوجی کنٹرول برجاہ داشتگ دُژمن ءِ کجام ھما وڑیں سُر ءُ پُرانی دارگ ءِ ھاتر ءَ پٹ ءُ پول کتگ- وتی مول ءُ مراد ءِ سرجم کنگ ءَ پد سرمچاراں گپتگیں سلاھاں ھوار پہ سلامتی وتی اوتاکانی نیمگ ءَ شتگ اَنت-

جارکش ءَ گْوشتگ گوستگیں روچ ءَ یازدہ اپریل 2026 ءَ سرمچاراں بارکھان ءِ دمگ تکھڑا ءَ برجاہ یک موباھل ٹاورے نشانگ کتگ- سرمچاراں ٹاور ءِ سسٹم تیرگواری کتگ ءُ ناکاراہ کتگ ءُ پد ءَ ٹاور ءِ بُنجاھی کنٹرول کمرہ ءُ مشینری مانداشتگ اَنت- اے ٹاور ءَ ناں تھنا دُژمن ءِ ھال اھوالی ءِ یک آسراتی یے بیتگ بلکیں چاریگی ءِ ھاتر ءَ ھم کارمرز کنگ ءَ بیتگ اَنت، کہ سرمچاراں سرجمی ءَ تباہ کتگ-

جارکش ءَ گوشتگ سرمچاراں ھشت اپریل 2026 ءَ جھاؤ ءِ دمگ کوٹو ءَ موباھل ٹاور ءِ سر ءَ اُرش کتگ – ٹاور ءِ مشینری ءُ جنریٹر کمرہ مانداشتگ ءُ سرجمی ءَ تباہ کتگ- دُژمن اے ٹاوراں چہ سرمچارانی سُر ءُ پُرانی سر ءَ نگاہ ایر کنگ ءِ بے سوبیں جُھدے کنگ ءَ اِنت ،بلے ما دُژمن ءِ اے سرجمیں پندلاں بے سوب کنگ ءِ سرجمی ءَ بودناکی دار ایں-

جارکش ءَ گوشتگ کہ گوستگیں ماہ ءَ پانزدہ مارچ ءَ سرمچاراں مشکے ءِ دمگ پروار بدڑو ءَ برجاہ موباھل ٹاور ءِ مشینری مانداشتگ ءُ تباہ کتگ اَنت- ٹاور ءِ گچین ءِ بھر نشانگ کتگ اَنت ءُ دُژمن ءِ ھال اھوالی نیٹ ورک اے ناگیگیں دمگ ءَ سرجمی ءَ بند بہ بیت-

گُڈی ءَ جارکش میجر گْوھرام بلوچ ءَ سرجمیں اُرشانی زمہ واری منّ اِتگ اَنت ءُ گوشتگ کہ ما تچک کنگ لوٹ ایں کہ زورگپتگیں بلوچستان ءِ شھدگ ءُ گلّیاں دُژمن ءِ ھرچ وڑیں سُر ءُ پر مئے نگاہ ءَ ایر اَنت ءُ ما کجام ھما وھد ءَ کجام جاہ ءَ اُرش کنگ ءِ بودناکی دار ایں-

بلوچستان ءِ دمگ سوراب ءَ گوستگیں شپ ءَ ایف سی ءُ پولیس ءَ دو ناشناسیں لاش کل کتگ انت-

گیشیں اھوالانی رد ءَ گوستگیں شپ ءَ دو ژانگولیں لاش ایف سی ءَ سوراب ءِ نادراہ جاہ ءَ سر کتگ انت –

دمگی مردمانی رد ءَ گوستگیں شپ ءَ دو لاشانی آرگ ءَ پد پولیس ءُ ایف سی ءَ لاش ھسپتال ءَ چِست کتگ ءُ ساھت سَے ءُ نیمگ ءَ سوراب ءِ کبرستان ءَ کل ءُ کسارات کتگ انت-

دمگی مردمانی رد ءَ لاشانی پجار ایف سی ءُ پولیس ءَ بہ کتگ انت ابید ءِ پجار ءَ کل ءُ کسارات کنگ بیتگ انت-

زانگ بہ بیت بلوچستان ءَ دراجیں وھدے ءَ اے دابیں وئیل دیم ءَ آیگ ءَ انت کہ اود ءَ بازیں لاش ابید ءِ پجار ءَ کل ءُ کسارات کنگ بوگ ءَ انت- دومی نیمگ ءَ انسانی ھکانی گلانی گوشگ انت کہ اے لاشانی توک ءَ گیشتریں مردم پیسر ءَ آوار جنگ ءُ بندیگ کنگ ءَ پد کشگ ءُ چگل دیگ بوگ ءَ انت –

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں بیانے ءَ گْوشتگ کہ بی ایل اے ءِ سرمچاراں یک ھاسیں ءُ نوکیں گامگیجے ءِ درچ ءَ گوادر ءِ دمگ جیونی ءِ زر ءَ پاکستانی لشکر ءِ گشت ءِ کشتی ءِ سر ءَ سلاہ بندیں اُرش ءِ نشانگ جوڑ کتگ۔ اے سوبمندیں زری آپریشن ءِ آسر ءَ کشتی ءِ سر ءَ سواریں سئے کارندہ مرتگ انت۔

آئی ءَ گْوشتگ: اے اُرش ءِ زمہ واری ءَ بلوچ لبریشن آرمی من ایت ۔ زمین ءَ پد زر ءَ دژمن ءِ ھلاپ ءَ آپریشن ءِ اے بندات بی ایل اے ءِ جنگی رھبند ءِ تہ ءَ یک نوکیں ءُ ھاسیں ردومے کہ ایشی ءِ مول ءُ مراد زری راہ ءُ درانی درچ ءَ بلوچ مڈّیانی لٹ ءُ پُل ءِ دارگ ءُ دژمن ءَ ھر نیمگ ءَ تاوان دیگ اِنت۔

جارکش ءَ گوشت کہ اے اُرش ءِ ھوالگ ءَ رسانکدر ءَ سرجمیں بیان شنگ کنگ بیت۔