TBP Balochi

چہ تربت ءِ یونیورسٹی ءِ پُشت ءَ یک زالبولے ءِ لاش دزکپتگ کہ پولیس ءَ پہ پجار ءُ المی ئیں کانونی کارروائی ءِ ھاتر ءَ ٹیچنگ ھسپتال تربت ءَ سر کتگ۔

بنشون ءِ رد ءَ لاش ءِ پجار سوال محمد ءِ لوگ بانک 30 سالی ئیں ماہ گل ء عزیز ءِ نام ءَ بوتگ کہ آ کلگ سھرانی ءں جھمنند انت۔ ھاندان ءِ رد ءَ گوستگیں شپ ءَ ناشناسیں سلاہ بندیں مردماں گاڑی سواریں مردماں چہ لوگ ءَ زورانسری ءَ آوار جتگ۔

پولیس ءِ ردا زالبول ءِ لاش تربت یونیورسٹی ءِ پُشت ءَ دست کپتگ۔

دومی نیمگ ءَ دو روچ پیش کرکینی ءِ ماھیگ مارکیٹ ءِ نزیک ءَ ناشناسیں سلاہ بندیں مردمانی تیرگواری ءَ بیران بوتگیں ناشناسیں مردمے ءِ لاش ھم دزکپتگ کھول ءَ آئی ءِ رھوت نہ بوگ ءِ سبب ءَ امانتی کل ءُ کسارات کنگ بیتگ-

پولیس ءِ رد ءَ بیران بوتگیں مردم ءِ پجار انگت ءَ پدر نہ بوتگ ءُ لاش ءَ بازیں کلاکاں نادراھجاہ ءَ ایر کنگ بوتگ۔ چہ لوگ ءِ مردم یا کسے ءِ سیاد ءُ وارس ءِ دیم ءَ نہ آیگ ءَ پد لاش بے وارسی کل ءُ کسارات کنگ بیتگ-

بلوچستان ءِ تیابدپی شھر چہ گوادر ءَ سر بیتگیں ھالانی رد ءَ گوستگیں روچ ءَ یک مردمے چیریں ادارھانی کارندھاں آوار جنگ ءَ پد بیگواہ کتگ-

آوار جنگ بیتگیں مردم ءِ پجار اکرم ء حاجی مراد محمد جھمنند دشت شولیگ ءِ نام ءَ بیتگ-

دمگی مردمانی رد ءَ اکرم گوستگیں روچ ءَ گوادر بازار ءَ گاڑی سروس جاہ ءَ چیریں ادارھانی کارندھاں آوار جتگ ءُ برتگ-

زانگ بہ بیت بلوچستان ءَ زورانسری آوار جنیانی درچ یکشل ءَ برجاہ انت کہ اود ءَ مردم آوار جنگ ءُ بیگواہ کنگ بوگ ءَ انت چریشی ءِ پژدر ءَ انسانی ھکانی گلانی نیمگ ءَ یکشل ءَ اے دابیں وئیلانی گر ءُ دار کنگ ءَ زھر ءِ درشان دیم ءَ آیگ ءَ انت-

سلاہ بندیں مردماں گزا بند بالی پٹ ءِ کنٹرول کنگ ءَ پد ماڑی ءُ دگہ ساز ءُ سامان مانداشتگ انت-

گوستگیں روچ ءَ شال ءِ دمگ غزہ بند ءَ سلاہ بندیں مردماں ائیرپورٹ دستیگ کتگ ءُ اود ءَ جاڑیگیں سامان ءُ مشنریاں ھوار ماڑی مانداشتگ – دگہ جانی تاوانانی اھوال نہ بیتگ انت-

دمگی مردمانی رد ءَ اے کوھنین بالی پاٹ پاکستانی لشکر ءَ وھد وھد ءِ سر ءَ کامرد کتگ بلے سرجمی ءَ پچ نہ بیتگ-

ندر پہ شھید لال ھان نام ءَ

شائر :ھمّل مھر

دی بلوچستان پوسٹ

سوگات پہ ترا ساہ ءُ جان
سنبھیت گوں ھوناں کاھان
ھوار ءُ رکست انت لال ھان

روداناں دلبند ءَ تیر سنبوکیں
مست ءُ ملار انت ڈیھہ گنوکیں
واشک ءُ کنڈی ھان ءُ لال روکیں

پہ ڈیھہ آجوئی بلاناں ورنا
پہ ھوکاں تیر ءُ کماناں ورنا
بکشاں در ساھت ءَ جاناں ورنا

پہ وتن شھیدیں جلوہ براہ انت
کُلیں مزارانی جیڑگانی ھمراہ انت
مئے کشک ھر سنگت ءِ ساہ انت

رند ایراں پادانی دوست ءُ یارانی
تیر ءُ توپان گورتگ ھؤر بارانی
ھمؔل سنبھیت تیر ساز ءُ سازانی

مرچی سھب ءَ مستونگ، شال ءُ کراچی ءِ مزن شھدگ ءِ سر ءَ شھر ءِ نزیک ءَ دو جتا جتائیں جاھاں چہ 6 ناشناسیں مردمانی لاش دزکپتگ انت۔

ایس ایچ او سٹی عبدالروف بلوچ ءِ چیردستی ءَ بازیں کلاکاں پد چِست کنگ ءُ اسپتال ءَ سر کنگ بوتگ انے ۔ پد ءَ لاش شال ءَ سر کنگ بوتگ اَنت۔

بلے یک رَندے پد ءَ لاش چہ شال ءَ آرگ بوتگ ءُ ھمے جاہ ءَ بنجاھی شھدگ ءِ سر ءَ ایر کنگ بیتگ اَنت ۔ لھتیں کلاک ءَ پد اے لاش زمباد گاڑی ءَ لڈگ بوتگ انت ءُ نامالومیں جاھے ءَ برگ بوتگ انت۔

لاشانی سر ءَ لٹ ءُ کٹانی نشان گندگ بیتگ انت۔ شک کنگ بوھگ ءَ اِنت کہ اے لاش زورانسری ءَ بیگواھیں بلوچانی اَنت کہ آ زنداناں بندیگ بیتگ اَنت کہ پاکستانی لشکر ءَ کُشتگ اَنت ءُ پہ ترس ءُ بیم ءِ شنگ کنگ ءَ راہ ءِ سر ءَ ایر کتگ اَنت۔ جون چہ مستونگ ءَ شال ءَ پد ءَ چہ شال ءَ آؤرتگ ءُ مستونگ ءَ چگل دیگ بوتگ انت۔

زانگ بہ بیت کہ اے سال ءَ بلوچستان ءَ اے وڑیں وئیلانی تہ ءَ گیشی بوتگ کہ داں انوگ ءَ جتاجتائیں جاھاں چہ درزنانی کچ ءَ لاش دزکتگ انت کہ چہ ایشی ءَ شھری تک ءُ پھناتاں زھر ءِ درشانی گندگ ءَ اتکگ انت-

کیچ ءِ تھسیل زامران بازیں آبادی پاکستانی پوج ءَ در کتگ اَنت-

دی بلوچستان نیوز ڈیسک ءَ سربیتگیں ھالانی رِد ءَ زامران ءِ دمگ چُر ءُ گیشتردان ءِ جھمنند چہ میتگاں گلّینتگ اَنت، وھدے کہ بازیں دمگاں تُرندیں سیکیورٹی ءُ سُر ءُ پُرانی سر پابندی جنگ ءِ سوب ءَ چہ دمگی آبادی وتی بُنکی دمگاں چہ لڑ ءُ بار کنگ اَنت-

یک دمگی مردمے ءَ دی بلوچستان پوسٹ ءَ را گوشتگ کہ پیسر ءَ مارا دو کلومیٹر ءَ دار اَنت، بلے لھتے ماہ بیت کہ ھرچ یک کلومیٹر ءِ سر ءَ تُرندیں پٹ ءُ پول ،لوگانی راشن ءُ مگرب ءَ پد نادُراھی ءِ دروشم ءَ بلیدہ ءَ تاں روگ ءِ موکل دیگ نہ بیت- لوگانی سر ءَ ڈرونانی چاروگی ءِ سوب ءَ چہ آیاں سک دلسیاھی ءِ دیمپانی، آوتی بُنکی لوگ ءُ زمین ءَ یل دیگ ءَ لاچار اَنت-

دمگی جھمننداں گوشتگ کہ زامران ءَ چہ لڈ ءُ بار ءِ شور آیانی واستا سک دردناک اِنت، بلے پوج ءِ نیمگ ءَ چہ آیاں بدتریں زوراکی ءِ دیمپانی اِنت- جھمننداں گوشتگ کہ اے جاور ھالاں آیاں دمگی نمائندگ ءَ گوں گپ کتگ، بلے آ بے وس گندگ آیگ ءَ اَنت-

بلوچستان ءِ دمگ جھل مگسی ءِ کوٹڑا بازار ءَ سرکاری آرام گس ءِ سر ءَ سلاہ بندیں مردماں اُرش کتگ، ماڑی سرجم ءَ تباہ کتگ-

بنداتی ھالانی رد ءَ جانی تاوان نہ بوتگ، بلے نوں رس اِتگیں ھالانی رد ءَ کوٹڑا بازار ءِ ریسٹ ھاؤس سلاہ بندیں مردمانی اُرش ءَ سرجم ءَ تباہ بوتگ۔

بنشون ءِ رد ءَ اُرش ءِ وھد ءَ راکٹ لانچر آس دیگ بوتگ انت کہ ایشی ءَ چہ ریسٹ ہاؤس ءِ ماڑی سرجم ءَ تباہ بوتگ۔

داں انگت ء سلاہ بندیں گل ءَ اے وئیل ءِ ژمہ واری نہ زرتگ۔ زانگ بہ بیت کہ اے سال ءِ مارچ ءِ بنداتی ماہ ءَ بلوچ لبریشن آرمی ءَ جھل مگسی ءَ پاکستانی لشکر ءِ کاروان نشانگ جوڑ کتگ ات، وھدیکہ آئی ءَ بندش ءُ سرکاری مڈیانی سر ءَ اُرشانی زمہ واری ھم وتی سر ءَ زرتگ ات انت۔

مستونگ، شال کراچی مزن شھدگ ءِ سر ءَ شھر ءِ نزیک ءَ دو جتا جتائیں جاھاں چہ 6 ناشناسیں مردمانی لاش دزکپتگ انت۔

لاش شھر ءِ ایس ایچ او عبدالروف بلوچ ءِ چیردستی ءَ ھسپتال ءَ سر کنگ بوتگ انت۔

ھالانی رد ءَ مستونگ شھر ءِ نزیک ءَ شال کراچی نیشنل ہائی وے ءِ سر ءَ ڈی سی ہاؤس ءِ نزیک ءَ یک لاشے دزکپتگ، ھمے وڑ دگہ پنچ لاش دتو موڑ ءَ دزکپتگ انت۔ دتو موڑ ءَ دست کپتگیں درستیں پنچیں لاش بازیں کلاکاں سڑک ءِ کش ءَ ایر بیتگ انت۔

بنشون ءِ رد ءَ ایمبولینس لاشاں نادراھجاہ ءَ سر کنگ ءِ وھد ءَ سر نہ بوتگ کہ ایشی ءِ سبب ءَ لاش بازیں وھدے ءَ سڑک ءِ کش ءَ کپتگ بیتگ اَنت۔

بلے شھر ءِ ایس ایچ او عبدالروف بلوچ ءَ چیردستی ءَ لاش چِست کتگ ءُ پہ پجار ءُ المی ئیں کانونی کارروائی ءَ نادراھجاہ ءَ سر کتگ انت۔

بنداتی ھالانی رد ءَ اے لاش بازیں روچیگ ءُ آھانی سر ءَ لٹ ءُ کُٹانی نشان گندگ بوتگ انت۔

شک اِنت کہ ناشناسیں مردم دگہ جاہے ءَ چہ آرگ ءُ مزن شھدگ ءِ کش ءَ ایر کنگ بوتگ اَنت بلے اے وئیل ءِ راستیں سبب ءُ بیران بوتگیں مردمانی پجار انگت ءَ پدر نہ بوتگ انت۔

شمبے ءِ روچ ءَ لسبیلہ کوسٹل ھائی وے ءِ سر ءَ پٹرولنگ ءَ دزبندیں پاکستانی لشکر ءِ یک بکتر بندیں گاڑی ءِ تیرگواری ءِ نشانگ کتگ-

دمگی اھوالانی رد ءَ تیرگواری ءِ آسر ءَ دو پوجی کارندہ بیران ءُ دو زدگ بیتگ انت-

وئیل ءِ بابت ءَ داں انگت ءَ لشکریانی نیمگ ءَ دگہ گپ دیم ءَ نیتکگ انت-

زانگ بہ بیت ھمے سال ءِ جولائی ماہ ءَ لسبیلہ کراچی،شال ءِ بنجاھی شھدگ ءِ سر ءَ بلوچ لبریشن آرمی ءِ یک اُرشے ءَ پاکستانی لشکر ءِ ھبدہ کارندہ بیران بیتگ ات انت- بلے داں انگت ءَ اے اُرش ءِ زمہ واری کس ءَ نہ زرتگ-

سر بیتگین ھالانی رد ءَ بلوچستان ءِ بنجاھی شھر شال ءَ گوستگیں شپ ءَ ناشناسیں سلاہ بندیں مردماں پولیس تھانہ ءِ سر ءَ اُرش کتگ-

گیشیں اھوالانی رد ءَ شال ءِ دمگ ھزار گنجی ءَ شالکوٹ تھانہ ءِ سر ءَ ناشناسیں مردماں دزبمب چگل داتگ انت کہ چریشی ءَ بازیں تراکانی توار دمگ ءَ اشکنگ بیتگ انت ءُ گمان کنگ بوگ ءَ انت پولیس ءَ تاوانانی دیمپانی کنگ کپتگ-

دومی نیمگ ءَ پولیس ءِ رد ءَ شالکوٹ تھانہ ءِ سر ءَ ناشناسیں مردماں سَے دزبمب چگل داتگ انت-

پولیس ءِ رد ءَ تراکانی آسر ءَ یک پولیس کارندھے ءَ ھوار دو مردم ٹپی بیتگ انت-

پولیس ءِ رد ءَ ٹپی ئین مردم درمانی سول ھسپتال شال ءَ سرکنگ بیتگ انت ءُ اُرشکار تچگ ءُ روگ ءَ سوبمند بوتگ انت-

وئیل ءَ پد دمگ ءَ سیکیورٹی ترند کنھ بیتگ ءُ سرچ آپریشن بندات کنگ بیتگ-