TBP Balochi

سر بیتگین ھالانی رد ءَ بلوچستان ءِ بنجاھی شھر شال ءَ گوستگیں شپ ءَ ناشناسیں سلاہ بندیں مردماں پولیس تھانہ ءِ سر ءَ اُرش کتگ-

گیشیں اھوالانی رد ءَ شال ءِ دمگ ھزار گنجی ءَ شالکوٹ تھانہ ءِ سر ءَ ناشناسیں مردماں دزبمب چگل داتگ انت کہ چریشی ءَ بازیں تراکانی توار دمگ ءَ اشکنگ بیتگ انت ءُ گمان کنگ بوگ ءَ انت پولیس ءَ تاوانانی دیمپانی کنگ کپتگ-

دومی نیمگ ءَ پولیس ءِ رد ءَ شالکوٹ تھانہ ءِ سر ءَ ناشناسیں مردماں سَے دزبمب چگل داتگ انت-

پولیس ءِ رد ءَ تراکانی آسر ءَ یک پولیس کارندھے ءَ ھوار دو مردم ٹپی بیتگ انت-

پولیس ءِ رد ءَ ٹپی ئین مردم درمانی سول ھسپتال شال ءَ سرکنگ بیتگ انت ءُ اُرشکار تچگ ءُ روگ ءَ سوبمند بوتگ انت-

وئیل ءَ پد دمگ ءَ سیکیورٹی ترند کنھ بیتگ ءُ سرچ آپریشن بندات کنگ بیتگ-

بلوچستان اسمبلی ءِ اجلاس ءَ سر وزیر بلوچستان سرفرازبگٹی ءَ وتی ھیال درشان کُتگ ءُ گُشتگ کہ کلات، شورپارود ءِ کوھیں ھَند ءَ یک ھزار مردماں گوں ھوار آبادی ءَ چہ اود ءَ کشّگ ءُ دگہ جاہ ءَ آباد کنگ ءَ پد پوجی بَرّ ءُ برین کنگ ءِ اَمل بیت اِنت۔

آئی ءَ گْوشتگ کہ چہ 1970 ءَ بگر داں انوں شورپارود ءِ کوھاں بِھ یا ھجبر یاگی ئیں بُنجُل سرجم ءَ ھلاس نہ بوتگ اَنت

آئی ءِ گْوشگ ءِ رِد ءَ ھر کس ھمے گُش اِیت کہ گْوست ءَ اود ءَ ایمنی بوتگ، آھاناں اے ھم چارگ لوٹ اِیت کہ ایمنی ءِ وھد ءَ ھم جنگ ءِ تیاری برجا بوتگ اَنت۔ آئی ءَ گیش گْوشتگ کہ مستونگ ءِ ھَند ءَ ناشرکاراں سیکیورٹی لشکر ءِ سر ءَ اُرش کتگ۔

آئی ءَ گُشتگ کہ ناشرکاراں مئے مردم بے دردی ءَ شھید کُتگ اَنت۔

آئی ءِ گُشگ ءِ رِد ءَ باگانی بُرّگ ءَ چہ منی بیان ءِ متلب بس انچُش پیشداشتگ ھر کسی زاتی مڈیانی سر ءَ تیر گواری بہ بیت ردِعمل وَ بیت اِنت۔

آئی ءَ بُھتام جَتگ کہ باگانی پُشت ءَ ناشرکار اُرش کن اَنت، اِستان لوٹ اِیت کسی زاتی جائدادانی سر ءَ بہ بیت گڑا مارا ھال بدنت، نہ گُش اَنت گوں کسے ءِ باگ ءَ ناشرکار چیر اَنت ءُ مالک ءَ مالوم مہ بیت اگاں ھال مہ دی اِت گڑا شمارا سھولتکار پھم اِیں۔

ھیال کنگی انت مستونگ دگہ درائیں ھلک نوشکی ءِ کلی بٹو، کلی اھمدوال، کلی ھارونی ءُ داں کلی جورکین ءِ آبادی ءَ لشکری آپریشن ءِ درگت ءَ ادارُکی دو ماہ ءِ واستا ھالی کنگ ءِ پرمان داتگ۔

لشکر ءِ ھکمانی پرمان ھَندی آبادی ءَ ترندیں گپچل ءُ بے آسودگ ودی کُتگ۔

وھدے اے ساھتاں زھری دگہ پسنی شادی کور ءَ ھم ھَندی آبادی ءِ سر ءَ زورانسری ءَ لڈینگ بوتگ اَنت۔

سوراب ءَ پاکستانی برزی بمبگواریاں ٹپی بوتگیں جنینے ءَ بازیں روچاں پد ٹپانی درد نہ سگ اتگ ءُ بیران بیتگ-

گیشیں ھالانی رد ءَ سوراب ءِ دمگ گدر گوندان ءَ پاکستانی لشکر ءِ بمبگواری ءَ ٹپی بوتگیں بصیر احمد ء لوگ بانک بی بی سارہ ءَ ، بازیں روچاں پد وتی ٹپیانی درد نہ سگ اتگ ءُ بیران بوتگ ۔

یازدہ اگست ءِ شپ ءَ پاکستانی لشکر ءِ جیٹ جھازاں گدد گوندان ءَ بازیں لوگانی سر ءَ بمبگواری کتگ ءُ ایشی ءِ آسر ءَ بیست ءَ چہ گیش لس مردم ٹپی ءُ بیران بوتگ اَنت کہ آھانی تہ ءَ مزنیں کساسے ءَ جنین ءُ چُک ھم ھوار بوتگ انت۔

بازیں ٹپیگیں مردمانی انگت ءَ درمان کنگ بوھگ ءَ اِنت ءُ آیانی جاور ھال نگیگ انت۔

پاکستانی لشکر ءِ جارکش آئی ایس پی آر ءُ سرکاری کارندہاں سوراب ءَ فوجی بالی گرابانی بمبگواری ءِ ھال راست کتگ ءُ ٹاہ داتگ کہ آیانی نشانگ بلوچ سلاہ بندیں گلانی پناہ گاہ کتگ انت-

سوراب ءِ نندوکیں مردماں لشکری ​​بمبگواری ءِ ھلاپ ءَ کوئٹہ کراچی نیشنل ہائی وے ءِ سر ءَ زھرشانی کتگ ءُ انساپ ءِ لوٹ کتگ ءُ اے وھد ءَ بلوچ سیاسی ءُ انسانی ھکانی گلاں ھم اے وئیل ءِ پٹ ءُ پول ءِ لوٹ کرتگ۔

وزیر اعلیٰ ءُ وزیر داخلہ ءِ ھلاپ ءَ پریس کانفرنس کنگ ءِ پژدر ءَ پولیس ءِ ریٹائرڈ سرجن ڈاکٹر عائشہ فیض دزگیر کنگ بوتگ ۔

شال، ریٹائرڈ پولیس سرجن ڈاکٹر عائشہ فیض ءِ ھلاپ ءَ انسداد ناشرکاری ایکٹ ءِ رد ءَ سی ٹی ڈی پولیس تھانہ ءَ کیس درج کنگ بوتگ وھدے کہ پولیس بنشون ءِ رد ءَ سی ٹی ڈی ءَ آ دزگیر کتگ۔

پولیس بنشون ءِ رد ءَ شال پریس کلب ءَ بلوچستان ءِ سر وزیر میر سرفراز بگٹی ءُ صوبائی وزیر داخلہ ءِ ھلاپ ءَ برجم داشتگیں پریس کانفرنس ءِ رد ءَ ڈاکٹر عائشہ فیض ءِ ھلاپ ءَ کیس درج کنگ بوتگ۔

ڈاکٹر عائشہ فیض ءَ لھتیں روچ پیش یک پریس کانفرنسے ءِ تہ ءَ بلوچستان ءِ سرجمیں سیاسی جاور، آئی ءِ راجدپتری پشگرد ءُ انوگیں وئیلانی بابت ءَ وتی ھیال درشان کتگ انت۔

آئی ءَ بلوچ آجوئی ءِ زرمبشت ءِ تہ ءَ زالبولانی کرد ءِ بابت ءَ گپ جتگ ات۔ ایشی ءَ ابید آئی ءَ بلوچستان ءِ سر وزیر ءِ نیمگ ءَ مستونگ ءِ باگانی تہ ءَ آیوکیں زورانسری ءِ وئیلانی تہ ءَ بلڈوز کنگ ءِ بابت ءَ داتگیں بیان ءِ ھم ایر جتگ ات۔

پولیس بنشوم ءِ گشگ انت کہ ڈاکٹر عائشہ فیض ءِ ھلاپ ءَ انسداد ناشرکاری ایکٹ ءِ جتا جتائیں بندانی رد ءَ کیس درج کنگ بوتگ بلے کیس ءِ تہ ءَ ھواریں بند، دزگیری ءِ سبب ءُ کانونی کارروائی ءِ دگہ گیشیں ھال انگت ءَ پدر نہ بوتگ انت۔

چہ ڈیرہ غازی خان ءِ میتگ کالا ءَ چہ سیادی داروک عمار بلوچ زورانسری آوار جنی ءِ نشانگ کتگ-

ھمراھیں نودربر ءِ رِد ءَ عمار بلوچ گوستگیں شپ ءَ کساس 12:30 ءِ لاھور ءَ پاکستانی پوج ءَ آوار جتگ چریشی ءَ پد آ بیگواہ ءَ اِنت-

عمار بلوچ چہ پنجاب یونیورسٹی لاھور ءَ بی ایس ءِ ڈگری گپتگ، وھدے کہ آئی ءَ چہ چین ءَ ایم فل زانشت سرجم کتگ-

آئی ءِ ھمراھیں نودبرر ءَ یک درشانے ءِ تہ ءَ گْوشتگ کہ سرجمیں زانتکار ءُ انسان دوست ءُ ایمنی واھگداریں مردماں چہ دزبندی کتگ کہ آ عمار بلوچ ءِ توار جوڑ بہ بنت، آئی ءِ زورانسری آوار جنی ءِ سر ءَ بے توار مہ بنت ءُ آئی ءِ زوت یل کنگ ءِ ھاتر ءَ توار چست بہ کن اَنت-

نودربراں لوٹ کتگ کہ عمار بلوچ ءَ زوت یل بہ کن اِت، آئی ءِ کھول ءَ آئی ءِ درگت ءَ سرپدی بدے اَنت ءُ اگاں آئی ءِ سر ءَ کجام وڑیں بھتام جنگ بیتگ گُڑا آ کانودی رِد ءَ آمیدگس ءَ دیم ءَ پیش بہ کن اَنت-

بلوچ ریپبلکن گارڈ ءِ جارکش دوستین بلوچ ءَ رسانکدراں شنگ کتگیں درشان ءَ گوشتگ مروچی سھب ءِ ساھت پنچ ءَ بلوچ ریپبلکن گارڈ ءِ سرمچاراں بلوچستان ءِ دمگ کَچھی ءِ باگ شهر دستیگ کتگ ءُ زورگریں پاکستانی لشکر ءِ کیمپ ءِ چاریں نیمگ انگیر کتگ ءُ کسان ءُ مزنیں سلاھانی گون ءَ اُرش کتگ۔ اے اُرش ءِ آسر ءَ زورگریں دشمن ءِ 5 کارندہ کشتگ انت ءُ بازیں زدگ بیتگ انت ءُ ھمے وڑ ءَ دشمن ءِ دو کواڈ کاپٹر جتگ ءُ دور داتگ انت-

آئی ءَ گوشتگ بی آر جی سرمچاراں سٹی پولیس تھانہ ءِ سر ءَ اُرش کتگ ۔ اے اُرش ءِ آسر ءَ پولیس ءَ جانی ءُ مالی تاوان رس اتگ۔ سرمچاراں صدر پولیس تھانہ، نادرا کارگس، اسسٹنٹ کمشنر ءِ کارگس، نیشنل بینک ءُ دگہ سرکاری ماڑی دستیگ کتگ انت ماڑی سوتکگ ءُ ساز ءُ سامان برتگ انت۔

گیشتر آئی ءَ گوشتگ اے اُرش ءِ آسر ءَ دشمن ترس آماچ بیتگ ءُ لس آبادی ءِ سر ءَ تیرگواری کتگ ءُ مھلوک ٹپی کتگ – آپریشن ءِ سرجم بوگ ءَ پد مئے سرمچار سلامتی ءَ درایگ ءَ سوبین بیتگ انت-

گڈسر ءَ آئی ءَ گوشتگ مئے گُل بی آر جی اے اُرش ءِ زمہ واری ءَ من ایت ءُ مئے اے دابیں اُرش بلوچستان ءِ آجوئی ءَ برجاہ مان انت-

نوشکی بازار ءَ پولیس ءِ سر ءَ تیرگواری ءَ یک پولیس کارمندے بیران بوتگ ءُ اے اُرش ءَ سٹی پولیس اسٹیشن ءِ ایس ایچ او غلام محی الدین نشیب رک اتگ-

پولیس بنشون ءِ رد ءَ نوشکی بازار ءَ پولیس کارندہ نشانگ جوڑ کنگ بوتگ اَنت کہ ایشی ءِ آسر ءَ تیرگواری ءَ پولیس ءِ کارندہ عبدالناصر جاہ پہ جاہ ءَ بیران بوتگ۔ وئیل ءَ پد پولیس ءَ دمگ انگر کتگ ءُ چمدیستگین یکجا کنگ بندات کتگ انت۔

پولیس بنشون ءَ گشتگ کہ اے اُرش سٹی پولیس اسٹیشن ءِ ایس ایچ او غلام محی الدین نشیب ءِ سر ءَ بوتگ بلے اُرش ءَ آئی ءَ را ھچ وڑیں تاوان نہ رس اتگ۔

کُشگ بوتگیں کارندہ عبدالناصر ءِ لاش پہ المی کارروائی ءِ ھاتر ءَ ٹیچنگ ہسپتال نوشکی ءَ دیم دیگ بوتگ کہ اود ءَ کانونی کارروائی سرجم کنگ بوھگ ءَ اِنت۔

وئیل ءَ چہ پد نوشکی بازار ءُ کش ءُ گور ءِ دمگاں سیکورٹی گیش ترند کنگ بوتگ انت ۔

چہ شال ءَ ھمگرنچیں شعبان ءِ کوھی دْرچاں پاکستانی پوج ءِ جیٹ بالگرداں چہ بمبگواری ءَ، دمگ ءَ تُرندیں تراک ءِ توار اش کنگ بیتگ-

بلوچستان ءِ بُنجاھی شھر چہ شال ءَ ھمگرنچیں دمگ شعبان ءِ کوھی دْرچاں گوستگیں شپ ءَ پاکستانی پوج ءِ جیٹ بالگرداں بمبگواری کتگ – دمگی اِھوالکار ءِ رِد ءَ شپ ءِ نیم ءَ دمگ ءَ بازیں تُرندیں تراکانی ھمراھی ءَ بالگرداِنی توار اش کنگ بیتگ اَنت-

بمبگواری ءِ سوب ءَ تاوانانی درگت ءَ چہ تنی وھدے ھچ وڑیں ھال دیم ءَ نیتکگ وھدے کہ واکدار ءَ ھم ھچ وڑیں درشان شنگ نہ کتگ-

زانگ بہ بیت دو روچ ءِ میان ءَ پاکستانی پوج ءِ نیمگ ءَ چہ بلوچستان ءَ بمبگواری ءِ اے دومی وئیل اِنت-

پشمبے ءِ شپ ءَ کلات ءِ دمگ دشت گوران ءَ جیٹ بالگرداں چہ بمبگواری کنگ بیتگ بلے بمبگواری ءَ ھچ وڑیں جانی تاوان ءِ ھال نیست-دمگ مردمانی رِد ءَ تراکاں چہ بازیں لوگے تباہ بیتگ اَنت اے وھد ءَ لوگ ءَ ھچ کس ساڑی نہ بیتگ اَنت-

گوستگیں ماہ ءَ سوراب ءِ دمگ گدر، گوندان ءَ پاکستانی پوج ءَ لس آبادیانی سر ءَ جیٹ بالگردانی بمبگواری ءِ نشانگ بیتگ اَنت چریشی ءِ آسر ءَ بیست ھپت مردم بیران بیتگ اَنت- اے مردمانی گیشتر زالبول ءُ چُک بیتگ اَنت وھدے کہ مستونگ، زھری ءَ ھوار کیچ ءِ دمگاں پوج ءِ نیمگ ءَ چہ ڈرون ءُ مارٹر اُرشاں ھم جانی تاوان ءِ وئیل دیم ءَ اَتکگ اَنت-

پاکستانی پوج ءَ لَس آبادی نشانگ کنگ ءِ وئیل سر ءَ ایرجنی ءِ دیمپانی – سیاسی ءُ چاگردی پارٹیانی نیمگ ءَ چہ اے وئیلاں گر ءُ دار ءِ ھاتر ءَ زور دیگ ھمراھی ءَ میان اُستمانی مردماں کرد ءِ پیلو کنگ ءِ دزبندی گندگ ءَ اَتکگ-

زھری ءَ گوستگیں بازیں ماھاں برجاھیں کرفیو گیش ترند کنگ بیتگ ءُ پاکستانی لشکر ءِ نیمگ ءَ آپریشن ھال انت-

بلوچستان ءِ دمگ زھری ءَ پاکستانی پوج ءِ نیمگ ءَ کرفیو ءِ وھد ءَ چہ سنی ءَ 25 مردم بیگواہ کنگ بیتگ انت ءُ ھمے وڑ زھری ءِ بازیں جاھاں آپریشن ءِ ھال انت-

چہ سنی ءَ ھال انت پاکستانی لشکر ءِ کواڈ کاپٹر اُرش ءَ آپ ءِ پُر کنگ ءِ وھد ءَ یک زالبولے بیران ءُ اُرش ءَ یک زالبولے ءَ ھوار دو مردم ٹپی بیتگ انت-

زھری ءَ کرفیو ءِ سبب ءَ موبائل سروسز بند کنگ بیتگ ءُ چریشی ءِ سبب ءَ زورانسری بیگواہ بیتگین ءُ بیران ءُ زدگ بیتگیں مردمانی پجار کنگ مشکل انت-

زانگ بہ بیت ھزدار ءِ دمگ زھری گوستگیں بازیں ماھاں کرفیو ءِ لپیٹ ءَ انت کہ اود ءَ شھری چہ لوگ ءُ بازار ءَ شت نہ کن انت ءُ اود ءَ ڈن ءَ درکپگ ءَ پورسز ءِ گور ءَ اجازت ءِ درکاری انت-

ایشی ءَ پیش زھری ءَ کرفیو ءِ وھد ءَ سوبندہ ءَ پاکستانی لشکر ءِ نیمگ ءَ یک آپریشنے ءِ وھد ءَ بیست ءَ گیش شھری کشگ بیتگ انت- ھمے وڑ بازیں جاھاں بازیں کچے ءَ مردم بیگواہ کنگ بیتگ انت-

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءَ گوشتگ سرمچاراں مرچی زیارت کراس ءَ زورگیریں پاکستانی لشکر ءِ کاروان ءِ تہ ءَ ھواریں چار گاڑی نشانگ جوڑ کتگ اَنت کہ ایشی ءِ آسر ءَ دیم پہ دیمیں اُرش ءَ زورگیریں لشکر ءِ ٹرک ءَ ھوار دو گاڑی تباہ کتگ اَنت۔ سرمچاراں زورگیریں لشکر ءِ 18 سپاھیگ کُشتگ ءُ آیانی سلاہ برتگ اَنت ءُ زورگیریں لشکر ءِ 5 سپاھیگ ٹپی بیتگ ءُ تتکگ انت۔ بلوچ لبریشن آرمی ءِ ‘فتح اسکواڈ’ اے آپریشن ءَ ھوار بوتگ۔

جارکش ءَ گوشتگ سوراب ءِ ھاجیکا ءِ دمگ ءَ بلوچ لبریشن آرمی ءِ اسپیشل ٹیکٹیکل آپریشن اسکواڈ ءَ گاڑی ءَ پریں شورو ریموٹ کنٹرول ءِ سرا تراک کتگ کہ ایشی ءِ تہ ءَ دژمن ءِ یک گاڑی یے سرجم ءَ تباہ بوتگ وھدے کہ 7 سپاھیگ مرتگ انت۔

جیئند بلوچ ءَ گوشتگ اے اُرشانی تہ ءَ سرجم ءَ دژمن ءِ 25 کارندہ مرتگ اَنت۔ اے ارشانی زمہ واری ءَ بلوچ لبریشن آرمی من ایت۔ اے کارروائیانی سرجمیں ھال ءُ اھوال گل ءِ آیوکیں ھپتگی سرجمیں بیان ءَ شنگ کنگ بنت۔