TBP Balochi

بلوچستان ءِ جتاجتائیں دمگاں پاکستانی پوج ءِ کاروان، گاڑیانی ءُ چوکیانی سر ءَ سلاہ بندیں مردماں اُرش ءُ تراکانی ھال دیم ءَ اتکگ، کہ بازیں کارندھانی بیرانی ءُ ٹپی بیتگ اَنت، وھدے کہ پوجی گاڑیانی تاوان رس اِتگ-

زیارت کراس ءِ ھند سر ءَ پاکستانی پوج ءِ کاروان سلاہ بندیں اُرش ءِ نشانگ کنگ ءِ ھال اِنت- بنداتی ھالانی ٹاہ دیگ بیتگ کہ اُرش ءِ آسر ءَ دو گاڑی تباہ کتگ، آیانی تہ ءَ یک بوجی ٹرکے ھم ھوار اِنت، وھدے کہ کساس پانزدہ کارندھانی بیرانی ءِ ٹاہ دیگ بیگ ءَ اِنت اے ھم گوشگ بیگ ءَ اِنت کہ اُرشکاراں کارندھانی سلاہ ھم برتگ اَنت-

دومی نیمگ ءَ سوراب ءِ ھند ھاجیکہ ءَ ھم پاکستانی پوج ءِ کاروان گاڑی ءِ پُریں شورواں چہ نشانگ کنگ ءِ ھال اِنت-بنداتی ھالانی رِد ءَ دو گاڑیاں تاوان رس اِتگ، آیانی تہ ءَ یک گاڑی یے سرجمی ءَ تباہ بیتگ وھدے کہ دومی ءَ کمو تاوان رس اِتگ-

تراک ءِ آسر ءَ دہ کارندہ بیران یا ٹپی بیگ ھال اِنت، بلے بیرانی ءُ ٹپیانی کچ تنی وھدے زانگ بیگ ءَ نہ اَنت-

ھالانی رِد ءَ سوراب ءَ گوستگیں شپ ءَ چہ انٹرنیٹ سروس بند اِنت، وھدے کہ ھُزدار ءُ کلات ءَ ھم نٹ ورک سروسز بند بیگ ھال اِنت-

یک رپورٹے ءِ رِد ءَ واشک ءَ پاکستانی پوج ءِ کساس ھژدہ گاڑیانی ھمگرنچیں کاروان سی پیک دگ سر ءَ یک مزنیں اُرشے نشانگ کنگ بیتگ- بنداتی ھالانی رِد ءَ سک جانی تاوان ءِ تُرس پدر کنگ بیگ ءَ اِنت، بلے وئیل ءَ بیران ءُ ٹپی بیتگینانی کچ پدر کنگ نہ بیتگ اَنت-

زیارت کراس ءِ نزیک ڈپٹی کمشنر ھرنائی ءِ اسکواڈ سر ءَ ھم اُرش ءِ ھال اِنت- لھتے انچیں رپورٹس ءَ گوشگ بیتگ کہ وئیل ءَ دو سلاہ بندیں مردم ٹپی بیتگ اَنت- اے وئیل ءِ گیشیں ھال دیم ءَ نیتکگ-

ھمے وڑ مستونگ ءِ ھند گورو ءَ شال – کراچی بُنجاھی شھدگ سر ءَ پاکستانی پوج ءِ یک کاروانے ءِ سر ءَ سلاہ بندیں مردمانی نیمگ ءَ سنگر گپتگ ءُ اُرش کتگ- تنی وھدے بیرانی ءُ ٹپیانی کچ پدر نہ بیتگ اَنت-

دومی نیمگ ءَ کشنگی ءِ ھند ءَ سینڈک منسوبہ ءَ چہ ھمگرنچیں گاڑی ھم سلاہ بندیں مردمانی نیمگ ءَ چہ نشانگ کنگ بیتگ اَنت-

ھمے وڑ کیچ ءِ تھسیل تمپ ءَ گومازی ءُ ملانٹ ءِ میانی ءَ برجاہ پاکستانی پوج ءِ یک چوکی ءِ سر ءَ اُرش کنگ بیتگ- دمگی ھالانی رِد ءَ دمگ ءَ کم چہ کم پنچ تراک اش کنگ بیتگ – بلے تراکانی تُرندی ءَ گمانی جانی تاوان ءُ چوکی ءَ بیتگیں تاوانانی پدری نہ بیتگ-

وئیلانی زمہ واری انگت ھچ گل ءَ نہ زرتگ اَنت-

بلوچ یکجھتی کمیٹی ءِ رِد ءَ یک جولائی 2026 ءَ سی ٹی ڈی ءِ بیڑ ءِ وھد ءَ سید بی بی چہ وتی گس ءَ دزگیر کنگ بیتگ۔ تربت ءَ ڈاکٹر مھرنگ ءُ شاہجی ءِ عمر قید ءِ ھلاپ ءَ زھرشانی ءِ پد ءَ 2 جولائی ءَ یل کنگ بوتگ۔

بلے چہ یل کنگ ءَ بس یک روچے ءَ پد 3 جولائی ءَ پد ءَ دزگیر کنگ بوتگ ءُ 3MPO ءِ رد ءَ دو ماہ ءَ بندیگ کنگ بوتگ۔ گڈسر ءَ 31 اگست 2026 ءَ چہ زندان ءَ یل کنگ بیتگ۔

بی وائی سی ءِ رِد ءَ آ بندیگ جاہ ءِ اے ماھانی تہ ءَ آئی ءَ زندان ءِ دیوالانی پُشت ءَ بازیں بلوچ راج ءِ رنج ءُ ناانساپی وتی چماں گوں دیستگ انت۔ اے تجربگ ءَ انسانی ھک ءُ انساپ ءِ جھد ءِ تہ ءَ آئی ءِ جزم ءَ گیشتر مھکم کتگ ءُ زلم ءِ انسانی نھاد ءِ بابت ءَ آئی ءِ سرپدی گیش ءُ گیوار کتگ۔

تربت ٹیچنگ ھسپتال ءَ ڈاکٹر، پیرامیڈیکل ءُ دگہ جانسلامتی ءِ کارندہانی زھرشانی، جانسلامتی ءِ ھزمتانی سر ءَ مھتلی-

بنشون ءِ رد ءَ اسلام آباد ءَ ھوار پاکستان ءِ جتا جتائیں شھراں چہ اھوالکار ءُ یوٹیوبرز ءِ آیگ ءِ موہ ءَ پاکستانی لشکر ءَ نادراھجاہ ءِ نیمگ ءَ روگ ءِ راہانی سر ءَ بندش جتگ ۔ ھمے وھد ءَ ڈاکٹر، پیرامیڈیکل اسٹاپ ءُ دگہ جانسلامتی کارندہ ھم نادراھجاہ ءَ روگ ءَ دارگ بیتگ انت-

جانسلامتی ءِ کارندھانی گشگ انت کہ چہ وتی ڈیوٹی ءِ ھاترا نادراھجاہ ءِ تہ ءَ روگ ءِ دارگ ءَ پد جانسلامتی ءِ کار سکا سانمند بیتگ انت کہ ایشی ءِ ھلاپ ءَ ڈاکٹر ءُ پیرامیڈیکل باسکاں زھرشانی بندات کتگ ءُ جانسلامتی ھزمتانی سر ءَ بائیکاٹ کتگ۔

ہسپتال ءِ بنشون ءِ رد ءَ ایف سی ءِ کارندہاں لھتیں مزنیں ڈاکٹرانی ھلاپ ءَ ترند ءُ زوراکی ءِ رویش کتگ۔ بنشون ءِ گشگ انت کہ لھتے ڈاکٹرانی سر ءَ توپک دارگ بیتگ ءُ بیھار دیگ بیتگ انت-

اے وئیل ءِ پد ءَ نادراھجاہ ءِ کش ءُ گوراں پیرامیڈیکل اسٹال ءُ پیرامیڈیکل ایسوسی ایشن ءِ نیمگ ءَ زھرشانی ءِ روانک کشگ بوتگ کہ ایشی ءِ تہ ءَ پاکستانی لشکر ءِ کارندھانی رویش ءِ ھلاپ ءَ اوگام جنگ بوتگ۔

جانسلامتی باسکانی نیمگ ءَ چہ زھرشانی ءُ سروسز ءِ بائیکاٹ ءِ سبب ءَ نادراہ مشکلانی آماچ اَنت وھدے کہ نادراھجاہ ءِ جانسلامتی سروسز ءِ جاور ھال انگت ءَ سانمند بوھگ ءِ ھال اِنت۔

بلوچستان ءِ دمگ نوشکی ءَ گمانی آپریشن ءِ چِن ءُ لانچ ءَ بازیں جاھاں آبادی ھلکاں لڈ ءُ بار کنگ ءِ اھوال دیم ءَ اتکگ انت- ھمے وڑ دمگی مردمانی رد ءَ سانمندیں دمگاں ماہ ءِ ستمبر ءِ وھد ءَ وتی لوگاں درایگ ءِ کڈنی پرمان دیگ بیتگ –

سیکیورٹی اھوالانی رد ءَ شال تپتان تجارتی راہ ءَ ھواریں دمگ نوشکی ءِ ھند کلی بھٹو، کلی ھارونی، کلہ احمدوال ءُ کلی جورکین ءَ مھلوک دو ماہ ءِ واستا لڈ ءُ بار کنگ بیت انت- دمگی مردمانی رد ءَ اے مھلوک کڈن کنگ بیتگ کہ وتی لوگاں واتر بوگ ءَ پد احمد وال زائرین بنجل ءَ وتی رجسٹریشن ءَ بہ کنائین انت – جھمنندیاں گوشگ بوتگ کہ آ وتی ھمک روچی زلورتی ساز ءُ ساماناں گون وت بیار انت دگہ ساز ءُ سامان لوگانی توک ءَ ایر کنگ بہ بنت-

سیکیورٹی بنشون ءِ رد ءَ گمانی پوجی آپریشن ءِ وھد ءَ دمگاں روگ ءُ آیگ ءِ راہ بند کنگ ءِ گمان ھست انت- ھمے درچ ءَ نوشکی، دالبندین روڈ ءُ نوشکی ھاران روڈ گچینی روچانی واستا بند بوگ ءِ گمان ھست انت-

دمگی مردماں گیش گوشتگ بھٹو ءَ داں جورکین ءَ داں انگت ءَ کرفیو انت – دمگی اھوالانی رد ءَ کرفیو ءِ سبب ءَ دراھیں دکان ءُ پٹرول پمپ بند انت ءُ شھریانی سر ءُ پر کم کنگ بیتگ انت-

مستونگ ءِ باگ ءُ ریاستی نیزوری

ٹی بی پی شونگال

ھمے زوتاں بلوچستان ءِ اڑوکی سروزیر سرفراز بگٹی ءَ شال ءَ مستونگ ءَ لس مھلوک ءَ بیھار دیوکیں گپتاراں گپ کنان ءَ گوشتگ اگاں باگانی نیمگ ءَ پاکستانی پوج ءِ سر ءَ اُرش کنگ بیت گڑا باگانی واھند ھم آسراتی دیوک سرپد بہ ایں – سرفراز بگٹی ءِ رد ءَ مستونگ ءِ مھلوک ءِ گور ءَ دو راہ ھست انت ؛ یا لڈ ءُ بار بہ کن انت یا آئی ڈی پیز ءِ واستا ساجو بہ باں یا باگ تباہ کنگ بنت- اے درشان ھنچیں وھدے ءَ دیم ءَ اتکگ وھدیکہ بلوچستان ءِ گیشتریں دمگ ءُ گچینی شھدگانی سر ءَ بلوچ آجوئی دوستیں گلانی کاروائی ترند بیتگ انت- ھمے داب ءَ مستونگ ءَ گوستگیں ھپتگ ءُ ھمے ماہ ءِ میان ءَ پاکستانی پوج ءِ سر ءَ ھترناکیں اُرش بیتگ انت- ایشی ءِ ھواری ءَ ھال انت مستونگ ءُ آئی ءِ کش ءُ گوری دمگاں بلوچ لبریشن آرمی ( بی ایل اے) ءِ زور گیش بوان انت-

مستونگ بلوچستان ءِ ھما دمگاں ھوار انت بے کچوئیں زمین ءُ اسٹریٹجک ءِ واستا گچینی زانگ بیت انت- اے شال ءِ نزیک ءَ انت ءُ بلوچستان دمگاں ھوار گیجوکیں راھانی واستا گچین انت- بلوچستان ءِ اڑوکی سروزیر سرفراز بگٹی ءِ نیمگ ءَ مستونگ ءِ مھلوک ءَ باگانی ھلاس کنگ یا لڈ ءُ بار کنگ ءِ چن ءُ لانچ ایوک ءَ یک سیاسی درشانے نہ انت بلکیں بلوچستان ءَ ریاست ءِ ھما پالیسیانی پدراھی ءَ کنت کہ چریشی ءِ تَک ءَ سیکیورٹی ءِ بے سوبی ءِ بوج گڈسر ءَ لس آبادی ءِ کوپگاں دیگ بیت انت- سرکار یکشل ءَ بلوچستان ءَ رِٹ ءِ برجم کنگ ءِ ٹاہ ءَ دنت بلے ریاستی گپ تھنا سڑکانی سر ءَ پورسز ءِ جاڑیگ بوگ، چیک پوسٹ یا مزنیں سلاھانی سرجمی نہ انت-

بلوچستان ءَ برجاھیں آجوئی ءِ زرمبشت یک راستگیں راستی یے – ریاست ءِ نیمگ ءَ جوڑینتگیں پالیسی، یکشل ءَ پوجی آپریشنز، برزی تاکت ءِ کارمرد کنگ، دزگیری، بیڑ ءُ تاکت ءِ دگہ تکاں اے گپ ءِ منانک انت کہ ریاست آیاں نیزور کنگ یا نابود کنگ ءَ بے سوب بیتگ – اگاں سرکار اے سرپد بیت کہ باگانی تباہ کنگ ءَ سلاہ بندانی سر ءُ پُر ھلاس بنت گڑا اے سیکیورٹی ءِ واستا سکا کپتگیں لیکھے بیت – مروچی باگ انت – باندا دگہ کوھے ءِ دمگ ءَ ھم بیت کنت پونشی ویرانگے ماڑی بوت کنت پد ءَ شھدگے، بازار، گنجان آباد دمگ ھاں گڑا آ ھرجاہ ءَ تباہ کنت کہ اود ءَ سلاہ بندانی کاروائی بنت؟

بلوچستان ءَ زورانسری بیگواھیانی درچ یکشل ءَ برجاہ انت چار مردم زورانسری بیگواہ کنگ بیتگ انت ءُ پنچ بندیگ یل کنگ بیتگ انت-

مستونگ کھڈکوچہ ءُ یک ستمبر ءَ سناء اللہ مھمد انور ایف سی ءَ ساھت ءِ نُھ ءَ آوار جتگ ءُ برتگ-

چہ شال ءَ حاجی قاسم شاھوانی اسٹریٹ ءَ سِی سالی ئیں امداد شاھوانی ء رؤف شاھوانی سِی اگست ءِ سھب ساھت ھپت ءَ سی ٹی ڈی ءَ دزگیر کنگ ءَ پد بیگواہ کتگ-

ھمے ڈول ءَ چہ شال ءَ ھژدہ سالی ئیں شامروز شاھوانی ء منیر احمد دوازدہ مئی ءِ شپ ءِ ساھت نُھ ءَ سی ٹی ڈی ءُ پولیس ءَ دزگیر کنگ ءَ پد بیگواہ کتگ- ھمے دمگ ءَ نودر حذیف شاھوانی ء نزام الدین ھپت اپریل ءِ شپ ءِ ساھت دو ءَ سی ٹی ڈی ءُ پولیس ءَ اَچ لوگ ءَ دزگیر کنگ ءَ پد بیگواہ کتگ-

دومی نیمگ ءَ چہ بلوچستان ءَ سیادی داروکیں پنچ مردم یل کنگ بیتگ انت، آواران گیشکور کولواہ 22 اگست ءَ آوار جنگ بیتگیں شاکر ء عبداللہ 24 اگست ءَ یل کنگ بیتگ-

چہ واشک سیاھوزئی بسیمہ ءَ 23 اگست ءَ آوار جنگ بیتگیں زبیر ء مھمد یاکوب 31 اگست ءَ یل کنگ بیتگ-

چہ سوراب ءَ 12 جولائی ءَ آوار جنگ بیتگیں سعید اھمد ء عبدالعزیز 20 اگست ءَ آر سی ڈی سوراب ءَ یل کنگ بیتگ- چہ سوراب ءَ 12جولائی ءَ آوار جنگ بیتگیں خلیل احمد ء مھمد نور 25 اگست ءَ یل کنگ بیتگ-

چہ ھاران کلی سراوان 23 اگست ءَ آوار جنگ بیتگیں سیپ الدین بلوچ ء مھمد اقبال بلوچ 31 اگست ءَ چہ کراچی ءَ یل کنگ بیتگ-

مستونگ ءِ دمگ کھڈکوچہ ءَ ترندیً جنگ ءُ چوپانی ھشت کلاکانی گوزگ ءَ شال کراچی شھدگ ھرچ وڑیں روانی ءِ واستا بند-

دمگی مردمانی رد ءَ مروچی سھب ءِ نُھ ءُ دَہ ءِ میان ءَ سلاہ بنداں بازیں کچے ءَ پاکستانی پوج ءِ یک بکتر بند گاڑی یے آئی ای ڈی اُرش ءِ نشانگ کتگ- چریشی ءَ پد زوت سنگر گپتگیں سلاہ بنداں اُرش کتگ-

دمگی مردمانی رد ءَ اُرش ءَ پد سلاہ بند ءُ پوج ءِ میان ءَ دو جتا جتائیں جاھاں جنگ ءُ چوپ بیتگ انت- جنگ ءِ وھد ءَ پوج ءِ بازیں کارندہ بیران ءُ زدگ بوگ ءِ ھال انت-

وئیل ءَ پد دمگ ءِ جاورھال ناگیگ انت ءُ چال کراچی ءِ شھدگ سرجمی ءَ بند انت –

بلوچستان ءِ دمگ نوشکی احمد وال ءَ خاران کراس ءَ فرنٹیئر کور ءِ کارندھانی تیرگواری ءَ یک اوگان شھری بیران ءُ سَے ٹپی بوتگ انت۔

دمگی مردمانی رد ءَ اے وئیل ھما وھد ءَ بوتگ کہ گاڑی ءِ سر ءَ نہ اوشتگ ءِ سبب ءَ تیرگواری کنگ بوتگ۔ بنشون ءِ گشگ انت کہ گاڑی ءَ اوگان مساپر سپر کنگ ءَ بوتگ انت ءُ آ شال ءِ نیمگ ءَ روگ ءَ بوتگ انت۔

تیرگواری ءِ آسر ءَ 50 سالی ئیں افغان شھری گل احمد بیران بوتگ ءُ گاڑی ءِ ڈرائیور نوشکی ءِ نندوکیں زاھد مینگل ءُ دو افغان شھری عبدالکریم ءُ اللہ داد ٹپی بوتگ انت۔

لاش ءُ ٹپیگ پہ اولی کمک ءَ سرکاری ٹیچنگ ہسپتال نوشکی ءَ سر کنگ بوتگ اَنت، چہ اود ءَ سک ٹپیگیں مردم پہ گیشیں درمان ءِ واستا شال ءَ دیم دیگ بوتگ اَنت۔

تربت ءَ فرنٹیئر کور (ایف سی) ءَ مروچی دو مردم ءِ لاش تربت ٹیچنگ ھسپتال ءَ برتگ اَنت-

ھسپتال ءَ آرگ بیتگیں پجّار یونس ء سبزل، جھمنند دشت ڈڈہ ءُ دودا ء ابراھیم جھمنند گوادر ءَ نام ءَ چہ بیتگ اَنت-

اِھوالکار ءِ رِد ءَ دوئیں لاش مروچی ایف سی ءِ نیمگ ءَ تربت ٹیچنگ ھسپتال ءَ سر کتگ اَنت، اود ءَ کانودی کاروائی کنگ بیگ ءَ اِنت-

لال خان اَھد ءِ مُجاں اندیم نہ بیت

نبشتہ کار: مھروان کمبر

دی بلوچستان پوسٹ

ھردیں بلوچستان ءِ کوہ بے توار بہ بنت، گُڑا وھد ھم وتی کراماں مھتل کنت۔ وھدے زِر اُوشت ءِ آماچ بہ بیت گُڑا زمین ءِ چیریں ٹپ چیھال جن انت۔ اگاں یک گِھگیری کنوکیں زمین زادگے وھد ءِ پیشانی ءَ وتی ھُونانی لیکگ ءَ بہ کَش اِیت ءُ گُمنامی ءِ سیمسراں بہ گوز ایت، گُڑا اے تھنا یک بیرانی یے نہ بیت بلکیں یک اَھدے ءِ ھلاسی ءِ جار بیت۔

مروچی ما یک اَنچیں ساھتے ءِ دیم پہ دیم اِیں ، بزاں یک بلوچ جُھدکارے ءِ نمیرانی ءَ پُرسیگ ایں۔ اے جُھدکار ءِ نمیرانی تھنا یک انسانے ءِ رُکست نہ اِنت بلکیں یک وابے، اُمیتے ءُ یکشل ءَ رؤکیں چراگے ءِ نمیرانی اِنت۔ ھما جُھدکار کہ آئی ءَ وتی ورنائی ءِ بھاریں نوبت کوھانی دامن ءَ کل کُتگ اَنت، ھمائی ءَ کہ وتی واب ءِ بدل ءَ بلوچ ءِ رکینگ، ءُ اِشک ءُ مھر ءِ جاہ ءَ گھگیری ءِ کِشک گچین کُتگ اَت۔ آئی ءَ ند ءِ جاہ ءَ توپک گچین کُت کہ وتی زور کبزہ بیتگیں وتن ءِ بے زبانی ءَ نوکیں توارے دات بہ کناں۔

آئی ءَ وتی مرگ ھما وھد ءَ گچین کُت کہ ما درست زندگ اِت ایں بلے وتی زمیر ءَ چہ یاگی اِت ایں۔ آ بے نامیں کِشکاں جنگ ءَ اَت – آ سارتیں کوھانی تہ ءَ جنگ ءَ اَت – آ ھما شپاں ھم جنگ ءَ اَت کہ دُژمن واب اَت ءُ گھگیر آگاہ اَت۔ آئی ءِ ھر ساہ ءَ بلوچ گُلزمین ءِ وشبو ھوار اَت، آئی ءِ چمّانی تہ ءَ آجوئی ءِ زِر چول جنگ ءَ اَت ءُ آئی ءِ دستاں ھما توپک اَت کہ یک پدریچے ءِ رِتکگیں ھُون ءُ ارسانی بیر اَت۔

آئی ءِ بیرانی نہ اناگتی بیتگ اَت نہ کہ مئے گُمان ءَ چہ ڈن یک زمین پھازیں پُسگے زانت کہ آئی ءِ گچین کُتگیں کِشک ءَ پُل نہ سراپینتگ بلکیں کُنٹگ چکاریں کِشک ءَ مرگ لک پاد اوشتاتگ۔ آ زانت کہ آئی ءِ کسمت ءَ کوھانی تھنائی نبشتہ اِنت، وھدے آ نمیران بیت گُڑا ھمے کوہ گواہ جوڑ بہ اَنت کہ مئے پھریزگ ءَ زمین زادگے ءَ وتی ھیشی سر بکشاتگ۔

آ وتی اَھد ءِ ھما کتاب اِنت کہ آئی ءِ ھر تاک ءِ سر ءَ دیمھونی نبشتہ اِنت۔ آ مرچی ھم گواتانی شیکگاں، کوھانی برمشاں ءُ ھر بلوچ ءِ دل ءَ یک بے دروریں ھوسلے ءِ دروشم ءَ زندگ اِنت۔ تُرند رواجیں وھد ءُ اَھد ءِ زوراک آئی ءِ داتگیں دیمھونی ءَ گار کُت نہ کن انت، پرچا کہ آ یک ھیالے، جزبگے ءُ یک درپشوکیں چراگے کہ ھِچبر نہ مر ایت۔

ھمے جزبگ، نوکیں پدریچے ءِ دل ءَ چو کندیلے ءَ بل ایت، آئی ءِ رُژن ءِ ساھگ ءَ گھگیری کنوکیں جُھدکارے ءِ یات ءُ دیمھونی زندگ بنت۔ آئی ءِ جد ءُ جھد، آئی ءِ ھوسلہ، ءُ آئی ءِ داتگیں دیمھونی ھر ھما بلوچ ءِ دل ءِ دریکگاں ھوار اِنت کہ آ وتی زمین، وتی دودمان ءُ وتی آجوئی ءَ سلاہ بند اِنت۔ ھمے سوب اِنت کہ گھگیری کنوکیں جُھدکار ھچبر وھد ءِ مُجاں گار نہ بنت۔

پہ ما چنچو گران ءُ چنچو تاوان اِنت، پہ ما تھنا زمین ءِ مھروانیں ھمبلے، ءُ اُمیتانی استالے نہ سستگ، بلکیں آشوبے درورے، یک رھدربرے ءُ اُمیتانی چراگے سستگ۔

بلے آ مرگ ءَ چہ پد ھم مئے واباں، بلوچ گُلزمین ءِ آجوئی ءِ جنگاں ءُ مئے نبشتانکانی تہ ءَ زندگ اِنت۔

پرچا کہ یک گھگیری کنوکیں بلوچ پُسگے کہ مرگ ءَ امباز کنت گُڑا آ یک سوتے جوڑ بیت – اَنچیں سوتے کہ تیرانی توار ءَ ھم اِش کنگ بیت ءُ ھما اوگامانی تہ ءَ ساہ زیر ایت زوراک ءِ بگیر ءَ گُشگ بنت۔

اے یک اَھدے ءِ ھلاسی نہ اِنت بلکیں یک نوکیں اَھدے ءِ بندات اِنت۔ ما آئی ءِ داتگیں دیمھونیاں چراگے کن ایں ءُ وتی تھاریں کِشکاں رُژن بکشا ایں داں ھما وھد ءَ کہ مئے کوہ دُوبر سُوت مہ گُش انت، کور، کورجو، چمگ ءُ شند دوبر مہ تچ انت ءُ بلوچ گُلزمین گُلامی ءِ ٹپاں چہ دراہ مہ بیت ءُ بچکنداں مہ جنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-