بلوچستان ءِ دمگ ھاران ءُ پنجگور ءَ بیگاہ ءِ وھد ءَ پاکستانی لشکر ءُ آہانی ساماناں نشانگ جوڑ کنگ ءِ اھوال دیم ءَ اتکگ انت-
دمگی مردمانی رد ءَ بیگاہ ءِ وھد ءَ ھاران شھر ءِ نزیک ءَ پاکستان ءِ لشکر ءِ کاروان سلاہ بندیں مردماں نشانگ جوڑ کتگ۔ دمگی مردمانی گشگ انت کہ اُرش ءِ وھد ءَ کم چہ کم سئے فوج ءِ گاڑی تچک ءَ تیر گواری ءِ زد ءَ اتکگ انت۔
بنداتی ھالانی رد ءَ اے اُرش ءَ سرجم ءَ نزیک ءَ دہ فوجی کارندہ بیران ءُ ٹپیگ بوتگ اَنت۔ اے وئیل، ٹپی ءُ اُرش ءِ ھال ءُ اھوال ءِ بابت ءَ چہ واکدارانی نیمگ ءَ ھچ وڑیں بیان شنگ نہ بوتگ۔
دومی نیمگ ءَ پنجگور ءِ دمگ پروم ءَ پاکستانی لشکر ءِ راشن ءَ لوڑیں گاڑی سلاہ بندیں مردماں مانداشتگ۔
دمگی مردمانی رد ءَ اے وئیل ءِ وھد ءَ دگہ گاڑی یے ھم سلاہ بندیں مردماں دستیگ کتگ-
پنجگور ءِ دمگ چیدگی ماشکیل کور ءَ دگہ یک وئیلے ءَ دمگی مردماں گشتگ کہ سلاہ بندیں مردماں پاکستانی لشکر ءِ نیمگ ءَ ھستیں نگرانی کیمرہ تباہ کتگ انت۔
بلوچستان ءَ گوستگیں ماھاں فورسز، سرکاری کارجاہ ، سرویلنس سسٹم ءُ سپلائی گاڑیانی سر ءَ اُرش بوتگ انت ءُ ھاران ءُ پنجگور ءَ ھوار سلاہ بندیں کارانی وئیل گیش گندگ بوتگ انت۔
داں انگت ءَ اے اُرشانی زمہ واری کس ءَ پہ وت نہ زرتگ انت بلے اے دمگاں بلوچ آجوئی لوٹوکیں سلاہ بندیں گل پرکار انت کہ یکشل ءَ پاکستانی لشکر ءَ نشانگ کنگ ءَ انت-