پیسریگیں پولیس سرجن ڈاکٹر عائشہ فیض انسداد ناشرکاری آمید گس شال ءِ دیما پیش کنگ بوتگ، اود ءَ آمیدگس ءَ آ سَے روچ ءِ جسمانی ریمانڈ ءِ واستا کاؤنٹر ٹیررازم ڈیپارٹمنٹ ( سی ٹی ڈی) ءِ دست ءَ داتگ۔
ڈاکٹر عائشہ فیض سی ٹی ڈی ءِ نیمگ ءَ انسداد ناشرکاری آمید گس ءِ جج سید علی موبین ءِ دیما پیش کنگ بوتگ۔ کیس ءِ گوشدارگ ءِ وھد ءَ پٹ ءُ پولی واکداراں آمید گس ءَ چہ ڈاکٹر عائشہ فیض ءِ جسمانی ریمانڈ ءِ لوٹ کتگ تانکہ کیس ءِ تہ ءَ گیشیں پٹ ءُ پول ءُ سبوت یکجا کنگ بہ بنت۔
آمید گس ءَ لیکہ داروکانی دلیل ءُ پٹ ءُ پولی واکدارانی لوٹ ءِ گوشدارگ ءَ پد ڈاکٹر عائشہ فیض ءِ سئے روچی جسمانی ریمانڈ من اتگ ءُ سی ٹی ڈی ءِ دست ءَ داتگ۔
بنشون ءِ رد ءَ پیسریگیں پولیس سرجن ڈاکٹر عائشہ فیض ءِ ھلاپ ءَ پیکا ایکٹ ءِ رد ءَ نیشنل سائبر کرائم انوسٹی گیشن ایجنسی ءَ ( این سی سی آئی اے) ءَ کیس ھم درج کنگ بوتگ۔ بنشون ءِ گشگ انت کہ اے کیس ءَ ھم ڈاکٹر عائشہ فیض ءِ ھلاپ ءَ کارروائی برجاہ انت۔
دومی نیمگ ءَ پیسریگیں پولیس سرجن ءِ ھلاپ ءَ ھم نزیک ءَ سئے روچ پیسر انسداد ناشرکاری ءِ مھکمہ ءَ کیس درج کنگ بوتگ کہ ایشی ءِ درگت ءَ آ دزگیر کنگ بوتگ ءُ آمید گس ءَ پیش کنگ بوتگ۔
بنشون ءِ رد ءَ سی ٹی ڈی ءَ کیس ءُ پٹ ءُ پول ءِ ھوالگ ءَ آمید گس ءَ را ھال داتگ بلے کیس ءِ تہ ءَ داتگیں شکی ئیں سرجمیں ھال زوت پدر کنگ نہ بوتگ انت۔
آمید گس ءَ آئی ءَ سئے روچ ءِ جسمانی ریمانڈ ءِ اجازت دیگ ءَ پد سی ٹی ڈی ءِ کارندھاں کیس ءِ سلسلگ ءَ ڈاکٹر عائشہ فیض ءَ چہ گیش جست ءُ پرس کت کن اَنت۔ آئی ءَ جسمانی ریمانڈ ءِ سرجم بوھگ ءَ پد پد ءَ آمید گس ءَ پیش کنگ بیت۔
زانگ بہ بیت کہ ڈاکٹر عائشہ فیض ءَ لھتیں روچ پیش یک پریس کانفرنسے ءِ تہ ءَ بلوچستان ءِ سرجمیں سیاسی جاور، آئی ءِ راجدپتری پیشگرد ءُ نوکیں وئیلانی بابت ءَ وتی ھیال درشان کتگ ات انت۔
آئی ءَ بلوچ آجوئی ءِ زرمبشت ءِ تہ ءَ زالبولانی کرد ءِ بابت ءَ گپ جتگ ات۔ دیمترا آئی ءَ بلوچستان ءِ سر وزیر ءِ نیمگ ءَ آیوکیں زوراکی ءِ وئیل ءِ وھد ءَ مستونگ ءِ باگانی بلڈوز ءِ بابت ءَ داتگیں بیان ایر جتگ ات۔