بلوچستان ءِ دمگ کچلاک ءَ ھَند چمن ءَ 15 سالی جنک لوگ بانک ابدالستار ءَ ٹارچر کتگ ءُ کُشتگ ءُ آئی ءَ را تیزیں سریاھاں چہ ٹپّی کتگ ءُ کش اِتگ۔
زدگیں جنین ءِ کھول ءِ رد ءَ زدگیں جنین ءِ لاش ءِ سر ءَ ٹارچر ءِ سکیں نشان گندگ بوتگ اَنت وھدے کہ آئی ءِ جند ءِ جتا جتائیں بھراں چہ ٹپّ ءُ ٹور بوتگ اَنت کہ آھانی تہ ءَ آئی ءِ گردن، سینہ، لاپ ءُ دیم ھوار اَنت۔ ٹارچر ءِ وھد ءَ جنک ءِ پُشت ءِ ھَڈ ٹُٹ اِتگ۔
ھاندان ءِ گشگ ءِ رد ءَ زدگ بیتگیں مردم ءَ چہ ابدالستار ءَ نزیک ءَ دو سال پیسر ، تھنا 13 سال ءِ اُمر ءَ گوں ابدالستار ءَ آروس کتگ ، گْوشگ بیت کہ زدگ بیتگیں مردم چہ اُثمانزئی ٹک ءَ اِنت ۔ ھاندان ءِ گشگ اِنت کہ مالی جیڑھانی سبب ءَ آئی ءَ کسانیں اُمر ءَ نکاہ کتگ۔
کربانی ءِ مات ءُ پت ءَ کہ آئی ءَ را کسانیں اُمر ءَ ابدالستار ءَ گوں آروس کتگ ات، اے وئیل ءِ سر ءَ جیڑگ ءِ درشانی کتگ ءُ سرکار ءُ سیادی داروکیں ادارگاں چہ لوٹ کتگ کہ اے کوش ءِ سر ءَ شپاپ ءُ در جانبداریں پٹ ءُ پول کنگ بہ بیت، ملزم ءَ را کانون ءِ رد ءَ سک سز ءَ دیگ بہ بیت ءُ کربانی ءِ ھاندان ءَ را انساپ دیگ بہ بیت۔
دمگی مردمانی گشگ ءِ رد ءَ ملزم ءَ پیسر ءَ دگہ جنینے ءِ کوش ءِ بُھتام جتگ ءُ اے درگت ءَ کیس ھم درج کنگ بوتگ۔
بلوچستان ءِ تہ ءَ زالبولانی سر ءَ زوراکی ءِ گیشتریں ندارگ
کچلاک ءِ اے وئیل بلوچستان ءَ زالبولانی سر ءَ زوراکی، زوتیں آروس، لوگی زوراکی ءُ نام ءَ عزت ءِ کوش ءِ برجاھیں وئیلانی درگت ءَ ارزشت دار اِنت۔
بلوچستان ءَ لوگی زوراکی ءِ آسر ءَ زالبولانی کوش ءِ وئیل باز رند ءَ گندگ بوتگ اَنت۔ زالبول فاؤنڈیشن ءِ سالانہ رپورٹ ءِ رد ءَ جنوری 2023 ءَ شنگ بوتگیں رپورٹ ءِ رد ءَ 2022 ءَ بلوچستان ءَ لوگی زوراکی ءِ وئیلاں کم چہ کم 66 جنین آدم بیران بوتگ اَنت وھدے کہ 2021 ءَ اے کچ 57 بوتگ۔
رپورٹ ءِ رد ءَ 2022 ءَ کُشگ بوتگیں 66 جنین آدمانی تہ ءَ 19 زالبول نام نہاد عزت ءِ نام ءَ کُشگ بوتگ اَنت۔
زالبول فاؤنڈیشن ءِ (اعداد و شمار) ءِ رد ءَ بلوچستان ءَ 2019 ءَ بگر داں 2023 ءِ نیام ءَ زالبولانی سر ءَ زوراکی ءِ 324 وئیل گندگ بوتگ اَنت ءُ ھمے وھد ءِ تہ ءَ نام ءَ ازت ءِ نام ءَ 179 مردم بیران بوتگ اَنت۔
اے وڑیں وئیل گوستگیں سالاں ھم برجاہ بوتگ اَنت۔ اکتوبر 2025 ءَ ھب ءِ دمگ بھوانی ءَ یک جنینے ءَ را لوگی جیڑھ ءِ سر ءَ وتی مرد ءِ تیرگواری ءَ بیران کتگ۔ پولیس ءِ رد ءَ وئیل ءَ پد ملزم تچگ ءَ پد کیس نبشتہ کنگ بوتگ ءُ آئی ءِ پٹ ءُ پول بندات کنگ بوتگ۔
جولائی 2025 ءَ نسیر آباد ءِ نزیک ءَ یک جنینے ءِ وتی مرد ءِ دست ءَ گوں گٹ ءَ کشگ ءِ ھال ھم شنگ بوتگ۔ پولیس ءَ کیس درج کتگ ءُ اے وئیل ءَ را ازت ءِ کشگ لیک اِتگ۔
بلوچستان ءِ زالبولانی سر ءَ زوراکی ءِ بازیں واکھانی تہ ءَ پاکستانی لشکر ءُ ریاستی کمک ءِ ڈیتھ اسکواڈانی نیمگ ءَ زالبولانی زوراکی ءَ بیگواہ کنگ، آوار جنگ ءُ ٹارچر کنگ ءِ بے کساسیں واکیہ بوتگ انت۔ گوستگیں روچ ءَ تربت ءِ سرکاری سرپرستی ءَ ڈیتھ اسکواڈ ءَ جنینے تپنگ ءِ نشانگ ءَ آوار جتگ ءُ آئی ءَ را ٹارچر کتگ ءُ کُشتگ۔
پد ءَ بلوچستان ءِ بازیں جنین آدم انگت زوراکی ءَ بیگواہ کنگ ءِ آماچ اَنت کہ پاکستانی لشکر ءِ دست ءَ دارگ ءَ پد ناشناسیں جاھے ءَ دیم دیگ بوتگ اَنت کہ چہ ایشی ءَ پد آ سرکاری رنگ ءَ پیش نہ بوتگ اَنت۔
زالبولانی ھک ءِ ھاتر ءَ کار کنوکیں دمگانی رد ءَ اے وڑیں واکھانی دیم ءَ دارگ ءِ ھاتر ءَ زھگانی آروس، لوگی زوراکی، نام ءِ اِزت ءِ کشگ ءُ دگہ جنسی زوراکی ءِ کیسانی تہ ءَ موثریں کانونی کارروائی کنگ المی اِنت کہ آماچیں زالبولانی رکینگ ءُ انساپ ءِ دسترس ءَ را دل یکیمی کنگ بہ بیت۔