بلوچستان ءِ دمگ بولان ءَ سلاہ بندیں مردماں تیرگواری کتگ ءُ پت ءُ چُک کُشتگ انت-
تیرگواری ءِ وئیل ءِ مچ ءِ ھند کرتہ ءَ پیش اتکگ ءُ تیرگواری ءَ بیران بیتگیں مردمانی پجار وسیم خان ءُ عبدالمالک ءِ ناماں زانگ بیتگ انت کہ پت ءُ چُک گوشگ بوگ ءَ اَنت –
لیویز بنشون ءِ رد ءَ وئیل ٹکی جیڑہ ءِ پژدر ءَ پیش اتکگ ءُ لاش اژدری چار ءُ ٹپاس ءَ پد کھولانی ھوالگ ءَ کنگ بیتگ اَنت، گیشیں پٹ ءُ پول لیویز کنگ ءَ اِنت-
کاؤنٹر ٹیررازم ڈیپارٹمنٹ (سی ٹی ڈی) ءَ بلوچستان ءِ دمگ پشین سرخاب ءَ ناگتی بیڑ بران ءَ تیرگواری ءِ میان ءَ چار اُرشکارانی کُشگ ءِ ٹاہ داتگ-
سی ٹی ڈی ءِ جارکش ءِ گوشگ اِنت کہ تیرگواری ءِ میان ءَ ناشریں گل ءِ چار اُرشکار کشتگ انت ءُ بنجل ءَ سلاہ ءُ گولہ شورو دزکپتگ انت-
کُشگ بیتگیں مردمانی سیادی تھریک تالبان پاکستان گوشگ بوگ ءَ اِنت-
سر بیتگیں ھالانی رد ءَ روکپتی بلوچستان ءَ ایرانی لشکر ءِ تیرگواری ءَ یک ورنایے بیران بیتگ-
گیشیں اھوالانی رد ءَ روکپتی بلوچستان ءِ دمگ پھرہ( ایرانشھر )ءَ ایرانی لشکر ءَ تیرگواری کتگ ءُ یک ورنایے کشتگ-
بیران بیتگیں ورنا ءِ پجار بیست ءُ دو سالی ئیں مھدء نقیبی ء ھاشم جھمنند کوھک سراوان ءِ نام ءَ زانگ بیتگ-
روکپتی بلوچستان ءَ ایرانی لشکر ءِ تیرگواریاں یکشل ءَ مردم مرگ ءُ زوال بوگ ءَ اَنت اے تیر آماچی گیشتر ھمے داب ءَ پیش کاینت کہ راہ ءَ روکیں گاڑیانی سر ءَ پورس تیرگواری کنت ءُ چریشی ءَ چہ اود ءَ ناوشیں وئیل دیم ءَ کاینت اِنت-
زانگ بہ بیت ھمے ماہ ءَ دلگان ءَ ھم یک پرپٹ سواریں ورنایے ھمے داب ءَ تیرانی آماچ کنگ ءُ کشگ بیتگ-
ھمے وڑ ءَ گوستگیں روچ ءَ ماں سرباز ءَ نصیر اللہ اربابی ء ابراھیم ناشناساں تیرگواری کتگ ءُ کشتگ بیتگ-
ھندوستان ءِ ریاست گجرات ءِ شھر سورت ءَ پولیس ءَ یک مردمے دزگیر کتگ کہ آئی ءِ سر ءَ بھتام اِنت آئی ءَ وتی پجار بستار انڈین اسپیس ریسرچ آرگنائزیشن آئی آر او ءِ سائنسدان ءَ کتگ ءُ رسانکدراں آئی ءَ انٹرویو ءِ میان ءَ ٹاہ داتگ بیتگ مشن ءَ چندریان تھری ءِ کارمرد بیتگیں چاند گاڑی آئی ءَ ڈیزائن کتگ-
این ڈی ٹی وی ءِ رد ءَ پولیس ءِ یک آفیسرے ءَ گوشتگ مِتل تری ویدی ءِ ھلاپ ءَ شکایت سر بیتگ انت آئی ءَ ٹی وی ءَ وتی پجار یک سائنسدانے ءِ دروشم ءَ انٹرویو دیان گندگ بیتگ کآئی ءَ وتی انٹرویو ءَ گوشتگ چاند گاڑی وکرم ءَ ڈیزائن کتگ-
انڈین ءِ ھال سرکنوک ءِ رد ءَ متل ترء ویدی ءَ وتی پجار آئی ایس ار او ءِ اسسٹنٹ چیئرمین ءِ بستار ءَ کتگ ءُ وتی دروگ ءِ راست کنگ ءِ یک لیٹرے ھم نبشتگ کتگ بیتگ-
پولیس ءَ یک درشانے ءَ گوشتگ کہ سرجمیں پٹ ءُ پول بوگ ءَ پد گپ دیم ءَ اتکگ اے مرد ءَ چندریان تھری مشن ھچ سیادی نیست اِنت ءُ آئی ءَ آئی ایس آر او ءِ ملازمت ءِ درگت ءَ ھم دروگیں ٹاہ داتگ انت –
زانگ بہ بیت گوستگیں ھپتگ ءَ انڈیا ءِ نیمگ ءَ روان دیگ بیتگیں چندریان تھری ءِ مشن زرباری ماہ ءِ بھر ءَ سوبمندی ءِ گون ءَ ایر کپتگ –
چندریان تھری کہ آئی ءِ سنسکرت ءِ مٹ چاند گاڑی اِنت بیست ءُ سَے اگست ھندوستان ءِ دمگی وھد ءُ پاس ساھت شش ءَ پد ماہ ءِ زرباری بھر چک اتگ –
چندریان ءِ مشن چاردہ جولائی ءَ انڈیا ءِ زرباری ریاست اندھرا پردیش ءَ روان دیگ بیتگ چِل روچ ءَ پد دراج کشیں سپر ءَ ءَ ماہ ءِ زرباری بھر ءَ ایر کپتگ-
بلوچستان ءِ بُنجاھی شھر شال ءَ پاکستانی پوج ءَ زورانسری آوار جنی ءِ نشانگ کتگ ءُ گوں وت برتگ-
گیشیں ھالانی رِد ءَ گوستگیں شپ ءَ شال ءِ دمگ سریاب ءَ پاکستانی پوج ءُ چیریں ادارھانی کارندھاں بیڑبرتگ ءُ یک ورنایے زورانسری آوار جنی ءِ نشانگ کتگ-
آوار جنگ بیتگیں ورنائے پجّار حسن بنگلزئی نام ءَ چہ بیتگ مردمانی گْوشگ اِنت کہ حسن وتی مات ءُ پت ءِ یکیں ورنا ایں پجّیں ءُ دو جاڑیں چُکانی پت اِنت-
زانگ بہ بیت بلوچستان ءَ ھمکروچ زورانسری آوار جنی ءِ تہ ءَ گیشی آھگ ءَ اِنت دومی نیمگ ءَ بیگواھیں آصف ءُ رشید گھار سائرہ بلوچ ءَ اسلام آباد پریس کلب دیم ءَ سے روچی شُدکُشیں ھڑتال ءِ نندانک جتگ پہ وتی بیگواھیں مردمانی یل کنائینگ ءِ ھاتر ءَ-
بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جیئند بلوچ ءَ وتی آفیشل ٹیلی گرام چینل ھکل ءَ شنگ کرتگیں درشانے ءِ تہ ءَ پنجگور ءُ کلات ءِ اُرشانی زمہ واری منّ اِتگ گوشتگ کہ سرمچاراں بنجاھی بُنجل ءُ پانگسے ءِ سر ءَ اُرش کتگ یک کارمندے کُشتگ ءُ پنچ زدگ کتگ انت –
جارکش ءِ رِد ءَ بی ایل اے ءِ سرمچاراں گوستگیں روچ ءَ اسُر ءِ وھد ءَ کلات ءِ دمگ جوہان ءَ شاہ مردان زورگیریں پاکستانی پوج ءِ بنجاھی بنجل دو نیمگاں اُرش کتگ کہ سرمچاراں راکٹ ءُ دگہ مزنیں سلاہ کارمرز کتگاں کہ یک کارمندے ھما دمان ءَ مُرتگ ءُ کم چہ کم سَے زدگ بوتگ انت –
جارکش جیئند بلوچ ءِ رِد ءَ سرمچاراں بیست ءُ ھپت اگست دوھزار بیست ءُ سَے ءِ بیگاہ ءَ پنجگور کیڈٹ کالج ءِ سر ءَ برجاھیں زورگیریں پاکستانی پوج ءِ پانگس ءِ سر ءَ گرنیڈ لانچرے بازیں گولے ءِ آس داتگ کہ گرنیڈ پانگس ءِ تہ ءَ کپتگ انت ءُ چریشی ءَ دو دژمن کارمند سک باز زدگ بوتگ انت –
بلوچ لبریشن آرمی ءَ ھردو اُرشانی زمہ واری منّ اِتگ ءُ گوشتگ کہ مئے اُرش بلوچستان ءِ آجوئی ءَ تاں برجاہ مان انت –
سربوتگیں ھالانی رِد ءَ بلوچستان ءِ دمگ ژوب ءَ سُھرک ءِ نادراھی ءَ چار زھگ بیران بوتگ انت –
اھوالکار ءِ رِد ءَ مینا بازار کلی کژہ غاڑہ ءَ سُھرک ءِ نادراھی ءَ چار زھگ بیران بوتگ انت وھدیکہ نادراھی ءِ گیشتر تالان بوگ ءِ ترس است انت –
دمگی مردماں جانسلامتی ءِ واکداراں گوں لوٹ کتگ کہ زوتاں زوت گامگیج زورگ بہ بیت – جانسلامتی ءِ واکدارانی رِد ءَ اے دمگ ءَ ویکسین ریفیوزل بوتگ، اے دمگ ءَ ٹولی دیم دیگ بوتگ –
زانگ بہ بیت گوست ءَ بلوچستان ءِ بازیں ھند ءُ دمگاں سُھرک ءِ نادراھی ءِ ھال آیگ انت کہ آیانی تہ ءَ مزنیں کچے ءَ زھگ آماچ انت وھدیکہ یکرندے اے نادراھی شنگ بیت گڈا یک مزنیں اینٹی بائیوٹیک درمان ءِ دیگ ءَ گر ءُ دار بوت کنت ءُ درمانانی کورس ءِ سرجم بوگ ءَ اے دارگ بیت –
چاگردی مردمانی گوشگ انت کہ بلوچستان ءَ جانسلامتی ءِ درگت ءَ ھچ وڈیں آسراتی نیست ـ ھر وڈیں ڈیھے ءَ سُھرک ءِ نادراھی ءِ ارزانی ءَ الاج بیت بلے بلوچستان ءَ اے وڈیں نادراھی زھگانی مرگ سوب جوڈ بنت –
بلوچستان لبریشن فرنٹ ءَ وتی شنگ کتگیں درشان ءِ تہ ءَ گوشتگ دلاور ء واھد بکش ءِ کوش ءِ سر ءَ سرپراز بنگلزھی ءِ بی ایل ایف ءِ بگیری ءَ بیان گیر زمہ داری یے۔ زانگ نہ بیت کہ سرپراز بنگُلزھی چہ نازانتی ءَ چو وتی ھمبل گلزار امام ءِ وڑ ءَ دُژمن ءِ دست ءَ لیبو جوڑ بیتگ ءُ بلوچ راجی آجوئی زْرمبشت، ایوک ءَ بی ایل ایف ءُ ”براس“ ءِ بگیری ءَ کارمرز بیگ ءَ اِنت یا کہ چہ پریشانی ءِ سْوب ءَ وتی بےسوبی ءَ پہ زانت آدگرانی سر ءَ لَڈگ لوٹ ایت۔ بی این اے چہ ھم سَنتانی پندلاں نہ بلکیں چہ وتی سروکانی نازانتی ءُ بچکیانی سْوب ءَ دو سال ءِ تہ ءَ وتی آسر ءَ سر بوت۔ سرپراز ءِ بگیری ءَ کَس ءَ پندل کنگ نہ لوٹ ایت۔آ وتی بگیری ءَ وت پندل کنگ ءَ بَس اِنت۔
بی ایل ایف ءِ جارکش میجر گوھرام بلوچ ءَ گوشتگ سرپراز ءِ بی ایل ایف ءِ سر ءَ دومی گل ءِ باسکانی لب دیگ ءُ پروشگ ءِ بھتام رَد اِنت۔سرمچارانی جنگی جوزگ ءُ آیانی کِر ءَ جنگی مڈی ءِ کمی ءِ سر ءَ نَپ زورگ ءُ آیان ءَ مڈی ءِ لب دیگ ءُ گلانی پروشگ سرپراز ءِ وتی کار بیتگ۔ مرچی ھمے انور ءِ سر ءَ بھتام جنگ ءُ سرپراز بنگلزھی بی ایل ایف ءِ بگیری ءَ درشان شنگ کنگ ءَ اِنت ھمے انور کولواھی سال 2018/19 ءَ سرپراز بنگلزھی ءَ مڈی ءِ لب دات ءُ چہ بی ایل ایف ءَ کَش اِت ءُ یو بی اے ءَ ھوار کُرت۔ انور ءَ گوں وتی ھمراہ ءُ سیادانی ھواری ءَ بی ایل ایف یل دات ءُ سرپراز بگلزھی ءِ گون ءَ ھوار بوت۔آئی ءِ کِر ءَ بی ایل ایف ءِ داتگیں جنگی سلاہ ءُ سامان کہ بیتگ اَنت، بی ایل ایف آ جنگی سلاہ ءُ سامانانی لوٹگ ءِ ھگدار بیتگ بلے بی ایل ایف ءَ وتی آ ھک کارمرز نہ کُرتگ۔اگاں بی ایل ایف ءِ سروک چو نزور بوتین اَنت آیاں ھما وھد ءَ وتی جنگی سلاہ ءُ سامان گیپتگ اِت اَنت۔بلے بی ایل ایف ءِ سروکاں دورچاری کُرتگ ءُ چوش نہ کُرتگ چے ءَ کہ چہ ایشی ءَ آ بے سلاہ بوت اَنت ءُ دُژمن ءَ پہ ارزانی ءَ نشانگ کُرت اَنت۔
آئی ءَ گوشتگ ھمے وڑ ءَ بلوچ سروک واجہ ھیربکش مری ءِ بیران بیگ ءَ پد وھدے کہ سرپراز ءِ وڑیں نادانیں مردمے ءَ وتگڑیں مڈیانی واھُندی ءِ نام ءَ بی ایل اے ءُ یو بی اے ءِ میان ءَ جنگ ءُ براس کُشی ءِ چاگردے ودی کُرت گڑا بی ایل ایف ءَ گوں دگہ بلوچ ھمبلانی ھواری ءَ دوئیں گلانی میان ءَ جنگ ءِ گِر ءُ دار کنگ ءِ جُھد کُرت۔ چونائی ءَ آ وھداں گوں بی ایل اے ءَ بندوکیں لھتیں مردم چاگردی رسانکدر ءَ بی ایل ایف ءِ بگیری ءَ مزنیں کچے ءَ دروگیں بُھتام جنگ ءُ بی ایل ایف کِرد ءِ ایرموش کنگ ءَ یک زھرناکیں تُکشامے ھلائینگ ءَ بیتگ اَنت۔ بی ایل ایف ءِ سروکاں ھما دُرسیں ردی یکِر کُرتگ اَنت ءُ دوئیں گلانی میان ءَ سلاہ کنگ ءِ جُھد برجاہ داشتگ ءُ گُڈی ءَ 2018 ءَ دوئیں گلانی میان ءَ سلاہ کُرتگ۔
جارکش ءَ گوشتگ گلزار ءُ سرپراز ءِ نازانتی چہ ھمے گپ ءَ زانگ بیت کہ بی این اے ءِ جوڑ کنگ ءَ یک سالے سرجم نہ بیتگ اَت کہ آیاں سرمچاری ءِ واھگداری درشان کنوکیں مردمانی بابت ءَ پٹ ءُ پول ءُ زانگ ءَ ابید مردمانی زورگ بندات کُرت کہ اے وڑ ءَ و لیویز مردماں نہ زور ایت۔ ایشانی پہ دیم مردمانی زورگ ءِ سر ءَ دُژمن ءَ نَپ زُرت ءُ بازیں کچے ءَ وتی چاریگ ھمایانی تہ ءَ راہ دات اَنت۔ ھمے سْوب ءَ بی این اے ءِ اوتاگ ڈرون اُرشانی نشانگ کنگ بوت اَنت ءُ چہ ایشی ءَ درزنانی کَچ ءَ سرمچار شھید بوت اَنت ءُ گلزار امام دزگیر کنگ بوت۔
آئی ءَ گوشتگ داں جاھے کہ بی ایل ایف ءِ سر ءَ آجوئی زْرمبشت ءِ تاوان دیگ ءِ بُھتام اِنت گڑا چہ سرپراز ءَ ھمے جُست ءَ کن ایں کہ 29 مئی 2015 ءَ کڈکوچگ ءَ چہ مساپر کوچ ءَ 22 بے میاریں پشتون مساپر کہ یو بی اے ءِ آ وھد ءِ کماندار سرپراز پنام مُرید ءَ کُشت اَنت چہ ایشی ءَ راجی زْرمبشت ءَ کجام نَپ رس اِت؟ بوت کنت مرید ءِ ھمے بےسریانی سْوب ءَ یو بی اے ءَ کَش اِت۔ سرپراز بنگلزھی ءُ آئی ءِ نزیکیں ھمراہ دلپروش مہ بنت ”براس“ ءَ آیان ءَ آسر ءَ دات ءُ داں کہ دُژمن ءِ بگیری ءَ ھچ سَنگر مہ کپ ایت۔ مُرید ءِ تہ ءَ اگاں زانت بوتیں گڑا گلزار امام ءِ دزگیری ءَ پد بی این اے ءِ چو ھلاس نہ بیتگ اَت۔نوں زانگ نہ بیت کہ بی این اے ءِ ھست اِنت کہ انہ، اگاں ھست اِنت گڑا بی این اے ءِ ھمے مردم کہ بی این اے ءِ نام ءَ کسان کسانیں کار کن اَنت یا کہ سرپراز پنام مرید بی این اے اِنت کہ ایوک ءَ آدگرانی درشاناں رَد کنت ءُ آجوئی زْرمبشت ءَ بندوکیں گل ءُ مردمانی سر ءَ بھتام جنگ ءِ کار ءَ کنگ ءَ اِنت؟
آئی ءَ گوشتگ ما بلوچ راج ءَ اے گپ ءَ سرپد کنگ لوٹ ایں کہ گلزار امام ءُ سرپراز بنگلزھی ءِ گون ءَ گیشتر ھما جنگول گون بیتگ اَنت کہ آیاں آدگہ بلوچ سلاہ بندیں گل یل کُرتگ اَنت ءُ گوں ھمیشاں ھوار بیتگ اَنت۔پمشکا وھدے کہ گلزار دزگیر بوت گڑا آ مردم چہ بی این اے ءِ جوڑ بیگ ءَ پیش گلزار امام ءِ گون ءَ بیتگ اَنت سرپراز بنگلزھی ءَ چہ وتی رویشت ءُ نابودی ءِ سْوب ءَ آ مردم گوں وت کُرت نہ کُرت اَنت۔ھمے وڑ ءَ گلزار امام ءِ گیشتریں ھمراھاں بی ایل اے ( جیھند) ءَ ھوار بیگ ءِ سْوڑگ کُرت گڑا سرپراز بنگلزھی ءَ آیانی جنگی سلاہ ءُ سامانانی سر ءَ واھُندی کنگ ءِ بنیاد ءَ جیڑہ بندات کُرت ءُ آیانی بے سلاہ کنگ ءِ سر ءَ زور دات ءُ اے گپ ءِ سر ءَ گوں بی ایل اے ءَ کش ءُ چیل بوت۔ بی ایل ایف ءِ سروک یکبرے پد ءَ میان ءَ اتک اَنت ءُ نہ تیوک ءَ اے جیڑہ گیش ءُ گیوار کُرت بلکیں سرپراز ءِ پریشانی ءُ ایوک بیگ ءُ یک مزنیں مردمے ءِ پارست ءَ آئی ءَ بی ایل ایف ءِ وڑیں مزنیں گلے ءِ تہ ءَ جُھد ءِ برجاہ دارگ ءِ لوٹ کنگ بوت بلے سرپراز بنگلزھی ءَ گدان ٹی وی ءَ داتگیں گلگدار ءِ تہ ءَ نہ ایوک ءَ بی ایل ایف ءِ دلجمیں لوٹ دگہ رنگے دات بلکیں بی ایل اے جیھند ءِ سر ءَ ھم بُھتام جت۔
بی ایل ایف ءَ گوشتگ انیگیں بلوچ راجی آجوئی زْرمبشت ءِ تہ ءَ بی ایل ایف ءِ شوندات، کِرد ءُ سروکانی گپ اِنت گڑا ما اے گپ ءَ تچکے ءَ گْوش ایں کہ مرچی آجوئی زْرمبشت ءِ سلاہ بندیں پِڑ ءَ چہ دو دھکاں یکشل ءَ بی ایل ایف ءِ کار آئی ءِ ھستی ءِ سْوب اِنت۔ بی ایل ایف ءَ مدام گوں آجوئی زْرمبشت ءَ بندوکیں گلانی یکجاہ کنگ ءَ جوانیں کِردے پیلو کُرتگ ءُ بے بیسھی ءُ دوریانی کم کنگ ءِ شوندات ءِ سر ءَ وتی کِرد پیلو کُرتگ۔ گُڈی ءَ ما سرپراز بنگلزھی ءَ ھمے شور ءَ دئیں کہ چہ بی ایل ایف دُژمنی ءَ در بئیت، بی ایل ایف ءُ آجوئی زْرمبشت ءِ آدگہ گلانی بگیری ءَ بھتام جنگ ءِ جاہ ءَ وتی دلگوش ءَ دُژمن ءِ بگیری ءَ بہ کنت۔
اگست ءِ ماہ ءُ بلوچستان
ٹی بی پی گچینی
زارین بلوچ
اگست ءِ ماہ ءِ مانگیشینتگیں جیڑھانی نیام ءَ وھدے پاکستان وتی آجوئی ءِ روچ ءَ وت ءَ پُرجزبگیں شاتکامیاں گوں زندگ دار ایت، ھمود ءَ چہ بلوچستان ءَ یک جتائیں ءُ اجبیں ناٹاھی ءِ دیم ءَ کئیت اِنت۔ اے دمگ ءِ مردمانی ھاتر ءَ اے ماہ شاتکامی کنگ ءَ ابید راجدپتری جد ءُ جھد ءُ بجگ ءِ چیدگی ءَ کنت۔ وھدیکہ بیرک ءُ شوشنگ پاکستان ءِ دگانی زیبائی جوڑ بیت ھمود ءَ دومی نیمگ ءَ بلوچستان یک جتاھیں جزبگانی درشانی ءَ کنت کہ آ گھگیری، جد ءُ جھد، یاتگیری ءُ وت واجھی ءِ کسھاں زندگ دار ایت۔
اے ماہ ءَ پاکستان ءِ راجی شاتکامی روچ ءِ پُشدر ءَ بلوچستان وتی یک جتائیں ءُ گچینی لیکھے دیم ءَ کار ایت۔ کہ اود ءَ “آجوئی ءِ روچ” پاکستانی راج ءِ دلگوشی ءِ سوب بیت، ھمود ءَ دومی نیمگ ءَ بلوچستان اے مراگش ءَ وتی لیکہ ءَ گوں یاد کنت، چُشکہ یک انچیں روچے کہ زور آؤرتگیں سرکاری ءِ ھلاپ ءَ گھگیری ءَ ودی کنت۔ اے ماہ ھمگونگیں چیدگ ءِ رد ءَ ھم گچینی اِنت کہ دو دمگانی ھاتر ءَ جتائیں منزل ءُ راھانی سر ءَ جیڑگ ءُ پکر کنگ ءَ لاچار کنت، پرچا کہ اے دمگ سیمسراں وَ بھر کَن اَنت بلے چہ یک دومیگیں یکدم بیگانگ ءُ جتا اَنت۔ وھدے پاکستانی ھواریں دروشم ءَ شاتکامی ءِ سر ءَ دلگوش گور کَن اَنت گُڑا بلوچستان ءِ کَش ءُ مانکشیں تجربگ ءُ آئی ءِ سوب ءَ برجاہ بیتگیں پنچیں جنگانی موج اود ءِ مردمانی یک جتاُیں پجار ئِے پدر کنت ءُ پسھی لیکہ ءَ پدراہ کنت۔
اگست ءِ ماہ بلوچستان ءِ مھلوک ءِ ھاتر ءَ باز ارزشت دار ایت کہ ایشانی تہ ءَ راجدوست ھم ھوار اَنت، کہ آ بلوچستان ءَ پاکستان ءِ جائزیں بھرے نہ بلکیں “زورگپتگیں ھاکمی” ءِ چیردستیں کالونی ءِ سرپد بنت۔ بلوچ راجدوستانی گُشتن اِنت کہ 11 اگست 1947 ءَ وھدے چہ کساندراب ءَ زوراکیں برتانیہ ءِ درکپگ ءَ ھوار بلوچستان جھانی نکشہ ءِ سر ءَ یک آجوئیں ڈیھے ءِ بستار ءَ دیم ء اَتکگ ءُ بلوچ راج ءَ وتی ڈیھ ءُ بھت ءِ سر ءَ دوبر دزرسی رس اتگ، بلے چہ جنجال ءَ گپتگیں اَے آجوئی کسان وھدی اَت۔
پاکستان ءِ ٹاھینوک ءُ اولی گورنر جنرل محمد علی جناح ءَ بلوچستان ءِ سروک خان آف قلات ءِ سر ءَ پاکستان ءَ گوں یکجاہ بوگ ءَ پہ زور پر داتگ۔ مکن کنگ ءِ پد ءَ پاکستانی پوج ءَ 27 مارچ 1948 ءَ بلوچستان زورانسری گِپتگ ءُ ھوار کُتگ۔ چہ ھما روچ ءَ بلوچستان ءَ جنگانی پنچ مزنیں ءُ ترندیں موج دیستگ اَنت، کہ ایشانی تہ ءَ درستیں گوستگیناں چہ گیشتر ھترناک بیتگ۔ بلوچ راجدوستانی گُشگ اِنت کہ پنچمی موج، کہ انی برجاہ اِنت، اے سرجمیں بلوچستان ءِ پراہ ءُ شاھگانی ءَ شنگ اِتگ ءُ گوستگیں چاریں موجاں چہ گیشتر پیچیدگ، مستر ءُ شاھگان اِنت۔
آجوئی لوٹوکیں سیاسی پاٹی بلوچ نیشنل موومنٹ ءَ رسانکدری درشان ءِ تہ ءَ 11 اگست بلوچستان ءِ “آجوئی ءِ روچ” ءِ رد ءَ برجاہ داشتگ ۔ بی این ایم ءِ سروک ڈاکٹر نسیم بلوچ ءِ رد ءَ اے روچ بلوچستان ءِ سر ءَ برتانیہ ءِ نوآباتیاتی سرکار ءِ یک کرن ئے ھلاسی ءِ چیدگ بیتگ۔ آئی ءَ گُشتگ اے ھما روچ اِنت کہ بلوچ راج ءَ وتی ڈیھ ءُ ھواریں بھت ءِ پیسلھانی سر ءَ پد ءَ دزرسی رس اتگ۔ بی این ایم ءِ چیرمین ءَ کساندراب راجدپتری وئیلانی ءُ بلوچستان ءِ جتائیں بستار ءِ درشان کُتگ۔ آئی ءَ گُشتگ کہ 4 اگست 1947 ءَ بلوچستان ءِ ھاکم خان آف قلات ءَ کساندراب ءِ برتانیائی رھشون ءُ مسلم لیگ ءِ سروک محمد علی جناح ءَ گوں یک دستاویز ءِ سر ءَ دزنشان کنان ءَ بلوچستان ءَ یک آجوئیں ءُ وت واکیں راجے نامینتگ۔ یک ھپتگی ءَ پد 11 اگست ءَ بلوچستان ءِ آجوئی ءِ برپارو جار وائسرائے ہاؤس دھلی ءَ جھان ءِ دیم ءَ کنگ بیتگ۔ آئی ءَ اپسوز ءِ درشان کنان ءَ گُشتگ کہ بلے آجوئی کسانیں وھدے ءِ ھاتر ءَ بیتگ، پرچہ کہ انگریزاں گوں جناح ءَ ھوار بیتگ بلوچستان ءِ سر ءَ ترندی ءَ گوں اُرش کُتگ، ءُ سانمدیں وڑے ءَ اِشی ءِ سر ءَ زورگری کُتگ۔ آئی ءَ گُشتگ داں مروچی، بلوچستان زور برجاہ داشتگیں ھاکمی ءِ چیر دست اِنت۔
پہ وت ءَ تھاریں بھت ءَ منگ ءَ ابید، بلوچ آجوئی لوٹوکاں دلیری ءَ گوں وتی آجوئی ءَ پہ جد ءُ جھد کُتگ، جتائیں دیما اتکگیں زوراکی ءُ چکاساں ابید بلوچاں وتی ڈیھ ءِ سر ءَ زورگپتگینانی دیم ءَ کدی سر جَھل نہ کُتگ۔ آئی ءَ گُشتگ جنگ ءِ یک بے دروریں موجے دیم ءَ جُنزگ ءَ اِنت، داں ھما وھد ءَ کہ بلوچستان وتی لوٹ اتگیں آجوئی ءَ پد ءَ دز نہ گِپت۔
بی این ایم ءِ مشکے چیپٹر ءَ 11 اگست ءِ یات ءَ یک مچی یے اڈ داتگ اَت۔ اے مچی ءَ گوں ترانکاراں جزباتی ءِ دروشم ءَ وتی پِت پیروکانی دیمھونیانی درگت گپ کُت کہ آیاں “بلوچستان ءِ سر واجھی ءِ ھاتر ءَ وتی ھون ریتکگ اَنت۔” مچی ءَ گوں تران کنان ءَ، بی این ایم ءِ رھشون شے بلوچ ءَ گُشتگ، “اے نمیران بلوچستان ءِ وت واجھی ءِ لازوالیں جد ءُ جھد ءِ منانک اَنت۔ بازیں نمیران بیتگ اَنت، وھدیکہ دگراں درملکاں وتگڑیں سیاسی باھوٹی گچین کُتگ، بلے پد ءَ ھم ھچ کس ءَ چہ اے مکسد ءَ وتی ھمبستگی نہ سستگ۔ اے نہ لرزوکیں گاماں دھکاں ءُ کرنانی درد برداشت کُتگ اَنت، کہ آ یاتگیری کنائن اَنت کہ راستیں آجوئی ءَ وھد پکار بیت۔ بلوچستان ءِ کِشک ترند اِنت، بلے پہ وت واجھیں راجی ءِ نیمگ ءَ مساپری یکشلی ءَ برجاہ اِنت۔
بلوچ اسٹوڈنٹس آرگنائزیشن (آزاد) ءَ ھم 11 اگست ءَ راجدپتر ءِ پرارزشتیں تابے نامینتگ ءُ برجاہ داشتگ، کہ بلوچستان ءِ سر ءَ برتانیہ ءِ سد سالی ھاکمی ءِ ھلاسی ءِ چیدگ اِنت۔ گل ءَ گُشتگ بدبھتی ءَ اے آجوئی یک سالے ءَ چہ ھم کمتریں وھد ءَ پاکستان ءِ سرجمیں اُرش ءَ پچگرگ بیتگ۔ بلوچستان ءَ 75 سالی ایردستی ءُ زورگری ءِ دیمپانی ءَ پد ءَ ھم سر جَھل نہ کُتگ۔ البت، محراب خان، نورا مینگل، ءُ خلیل ءِ پئیمیں دلیریں بلوچ کارستاں بلوچستان ءِ آجوئی ءِ ھاتر ءَ زورگپتانی دیم ءَ دلیری ءَ گوں جنگ کنان ءَ، ایردستی ءِ منگ ءَ چہ انکار کُتگ اِش۔ گل ءَ گُشتگ کہ ایشانی نمیرانی ءَ برتانیہ ءِ سرجمیں زیردستی بے سوب کُتگ۔
سلاہ بندیں گلانی لیکہ
آجوئی لوٹوکیں بلوچ سلاہ بندیں گلانی جزبگانی توار ھم بلوچستان ءِ “آجوئی ءِ روچ” ءَ زندگ دار انت۔ اے گل اگست ءِ ماہ ءَ وتی سُرپُرانی تہ ءَ تیزی کار اَنت۔ اے ماہ ءَ ترندی ءِ وئیلانی تہ ءَ گیشی کئیت، کہ اشانی تہ ءَ نہ تھنا پاکستانی لشکر بلکیں پاکستانی “آجوئی ءِ روچ” ءَ پہ بیرک بھاکنوک ھم نشانگ کنگ بنت۔ سلاہ بندیں گلانی نیمگ ءَ 14 اگست ءَ “سیاھیں روچ ” دارگ بیت، ءُ چہ مردماں دزبندی کنگ بیت شاتکامی کنگ ءَ پھریز بہ کن اَنت۔ بلوچستان ءَ مدامی پئیم ءَ اگست ءَ ترندی ءِ تہ ءَ گیشی گندگ ءَ اَتکگ۔ پاکستان ءِ “آجوئی ءِ روچ” ءَ چہ تھنا دو روچ پیسر سلاہ بندیں گلاں دو جتا جتائیں اُرشانی تہ ءَ پاکستانی بیرک بھا کنوکیں اسٹال نشانگ کُتگ اَنت۔ اے اُرشانی تہ ءَ اسٹالانی واھند ءُ دگہ بازیں مردم ٹپی بیتگ اَنت۔
ھمے پئیم لھتیں روچاں پد 13 اگست، ءَ بلوچ لبریشن آرمی (BLA) ءَ گوادر ءَ پاکستانی پوج ءِ پجیگ ءَ چینی انجینئرانی کاروان ءِ سر ءَ اُرش کُتگ۔ بی ایل اے ءَ اے اُرش ءِ زمہ واری زیران ءَ یک درشانے شنگ کتگ اَت، کہ آئی ءِ تہ ءَ پدر کنگ بیتگ اَت کہ اے اُرش مجید بریگیڈ ءَ سیادی داروکیں دو “پدائیاں” کُتگ، کہ آ بی ایل اے یک ھاسیں ءُ ھترناکیں ٹولی یے۔ مجید بریگیڈ وتکُشیں تراکانی تہ ءَ وتی بلدی ءِ سوب ءَ زانگ بیت اِنت۔ اُرش ءَ پد پاکستانی پھازگی لشکر ءَ دمگ انگر کُتگ ءُ پَٹ ءُ پولی بیڑ بندات کُتگ۔ دی بلوچستان پوسٹ ءَ ھندی اھوالکاراں چہ سرپدی رس اتگ کہ لشکریاں بازیں بیڑ بُرتگ ءُ باز مردم “زورانسری بیگواہ” کُتگ اَنت۔
بی ایل اے ءَ سرجمیں اھوال درشانے تہ ءَ شنگ کُتگ اَنت۔ ایشی ءِ تہ ءَ پاکستانی پھازگی لشکری ءُ پاکستان ءِ “آجوئی ءِ روچ” ءِ مراگشاں نشانگ کنگ ءِ، آئی ءِ جنگولانی نیمگ ءَ چہ بولان، تربت، پنجگور، قلات، ءُ مستونگ ءَ کُتگیں اُرشانی زمہ واری من اتگ اَنت۔ اے اُرشانی آسر ءَ بازیں مُرتگ اَنت ءُ بازیں ٹپی بیتگ اَنت۔ بی ایل اے ءَ “بلوچ ماتیں سرڈگار ءِ آجوئی ءَ” داں “زورگپتیں تاکتانی” نشانگ کنگ ءِ وتی جزم نوک کُتگ۔
بی ایل اے ءِ اُرشانی یکشلی ھمد ءَ آسر نہ بوتگ بلکیں آئی ءَ ھمے ماہ ءَ دگہ بازیں اُرش کُتگ۔
آجوئی لوٹوکیں دگہ یک گلے بلوچستان لبریشن فرنٹ ءَ اگست ءِ اولی دو ھپتگانی تہ ءَ پاکستانی لشکریانی نشانگ کنوکیں بازیں اُرشانی زمہ واری من اتگ۔ بی ایل ایف ءَ ٹاہ داتگ کہ اے اُرشاں پاکستانی لشکریانی بازیں کارمند کُشتگ ءُ ٹپی کُتگ اَنت، چد ءُ گیشتر، لشکریاں دگہ ھم تاوانانی دیمپانی کنگ کپتگ۔
اھوالانی رد ءَ سرجمیں بلوچستان ءَ بلوچ سلاہ بندیں ٹولی ءِ نیمگ ءَ کم چہ کم 81 ترندیں اُرش کنگ بیتگ اَنت۔
پھازگی لشکریانی پدگرد
ودوکیں نگیگی ءَ ماران ءَ پاکستانی لشکریاں بلوچستان ءِ دمگ زامران ءَ 11 اگست ءَ بگاوت ءِ بگیری ءَ بیڑ ءِ بندات کُتگ۔ کہ ایشی ءِ تہ ءَ زمینی پوج ءَ گن شپ ھیلی کاپٹر ءُ ملٹری ڈرون ءِ کمک گون بیتگ۔ سیاسی، چاگردی ءُ انسانی اگبالانی باسکاں پوجی گامگیجانی سر ءَ تُرس ءِ درشان کنان ءَ گُشتگ اَے کاروائی “زورانسری بیگواھی” ءُ “کوش” ءِ یک دروشم اَنت۔ بیڑ ءِ نیام ءَ پاکستانی لشکری ءُ بی ایل ایف ءِ سرمچارانی نیام ءَ جنگ ھم بیتگ کہ ایشانی آسر ءَ بی ایل ایف ءِ دو سرمچار شھید کنگ بیتگ اَنت۔ گل ءَ رسانکدر ءَ یک درشانے شنگ کُتگ ءُ گُشتگ: نمیران بیتگیں سرمچاراں دو پاکستانی لشکری کارمند کُشتگ ءُ بازیں ٹپی کُتگ اَنت ءُ وت شھمیری امباز اتگ-
دومی نیمگ ءَ، بلوچ جھدکاراں ھم پھازگی لشکریانی تکشام ءِ سر ءَ رژنائی تالان کُتگ۔ انسانی اگبالانی باسک ءُ وائس فار بلوچ مسنگ پرسنز ءِ آرگنائزر ھوران بلوچ ءَ شال ءَ یک پریس کانفرنسے ءِ تہ ءَ گُشتگ کہ چون آئی ءِ کھول ءَ آئی ءِ سُرپُرانی سوب ءَ ترسینگ ءُ بیھارانی دیمپانی کنگ کپگ ءَ اِنت۔ گمانی پئیم ءَ پھازگی لشکریاں آئی ءِ لوگ ءَ پُترتگ ءُ آئی ءِ لوگ ءِ مردم تُرسینتگ اَنت ءُ آئی ءِ سُرپُرانی دارگ ءِ کوشست کُتگ۔
ٹی بی پی ءَ اے ھم سرپدی رس اتگ کہ اگست ءِ ماہ ءَ سرجمیں بلوچستان ءَ پاکستانی سلاہ بندیں پوج ءِ نیمگ ءَ کم چہ کم 56 بیڑ، دگانی بندگ ءُ فوجی بیڑ کنگ بیتگ اَنت۔ اے ترندء وئیلانی تہ ءَ 7 لاشانی دزکپگ ءِ ھال ھم رس اتگ۔
اگست ءِ ماہ ءَ یک پرارزشتیں بلوچ سروک نواب اکبر بگٹی ءِ سالروچ ھم دارگ بیتگ۔
26 اگست 2006 ءَ کوھلو ءَ پاکستانی پوج ءِ دستاں آئی ءِ کوش بلوچستان ءِ راجدپتر ءَ یک گچینی پھناتے – نواب بگٹی نلوچستان ءِ مھلوک ءِ بیوکیں ناانساپی ءُ بلوچ مھلوک ءِ واتواجھی ءُ مڈیانی نہ دیگ ءِ پژدر ءَ پاکستانی ریاست ءَ گوں ناوش بیتگ – سوئی ،ڈیرہ بگٹی ءَ گمانی ڈول ءَ پاکستانی پوج ءِ کارمند ءَ یک ڈاکٹریں زالبولے ءِ گون ءَ جنسی زوراکی ءِ یک گچینی ٹپے بیتگ-
نواب بگٹی ءَ ھما وھد ءَ سلاہ چِست کتگ ھما وھد ءَ زوراک پرویز مشرف ءَ ھوار پاکستانی واکداراں یک زالبولے ءِ گون ءَ کتگیں جرمکار ءَ دست ءَ دیگ ءِ انکاری کتگ بیتگ – پاکستانی پوج ءَ بگٹی انگیر کنگ ءِ واستا ڈیرہ بگٹی ءَ ترندی ءَ لشکر کشی کتگ – بلے آ کوھانی نیمگ ءَ شتگ بیتگ ءُ آئی ءَ چیرجنگی پہ وت گچین کتگ – نواب بگٹی آ وھد ءَ ناگتی شھید کنگ بیت پاکستانی پوج یک گارے ءِ توک ءَ بیت اِنت ھمے گار ڈروینگ بیتگ ٹ بلوچستان ءِ مھلوک ءِ واستا نواب بگٹی گھگیری ءِ چیدگ جوڑ بیتگ ءُ پاکستانی ریاست ءِ چماں آ آیانی واک ءَ یک چیلنج کنوکیں مجرمے بیتگ-
اگست بلوچستان ءَ یک ھون ءُ چیدگی رنگ ءَ زانگ بیت اِنت – پرچاکہ ھمے ماہ ءَ بلوچ راجدوست ءُ آجوئی ءِ منوکیں ٹولی شاتکامی ءُ گمے یک پھناتے دار اَنت – اے یک ھنچیں ماھے کہ بلوچستان ءَ گچیج آجوئی ءِ موج ءَ یاتگیری کنت اِنت – اے ھما ماہ اِنت کہ وھدیکہ “زورگر” پاکستان دنیا ءِ نکشہ ءِ سر ءَ یک ڈیھے جوڑ بیت اِنت – اگست بلوچستان ءُ شرکن ءُ زھر ءِ ھردوکانی تاماں دنت اِنت – کہ گیشتر زھری ءِ رنگ ءَ جلکشان بیت اِنت – جزبگ ءِ ایراداری ءَ اے نہ پروشگیں سرڈگار کسھانی بُکچھاں پُراپ اِنت – چُشکہ راستی واتواجھی ءِ گرمشانیں مردمانی نپ ءِ جزبگانی منانک اِنت-
پاکستانی پوج ءِ بنجل ءِ سر ءَ سلاہ بندیں مردماں راکٹ ءُ دگہ سلاھانی گون ءَ اُرش کتگ ءُ پشت مانداتگ ءُ شتگ انت-
بلوچستان ءِ دمگ کلات ءِ ھند جوھان ءَ شاہ مردان ءَ ھستیں پاکستانی پوج ءِ بنجل ءِ سر ءَ سلاہ بندیں مردماں مزنیں کچے ءَ گوستگیں شپ ءَ اُرش کتگ-
دمگی مردمانی رد ءَ پوج ءِ بنجل ءِ سر ءَ جتا جتائیں نیمگاں راکٹ ءُ دگہ سلاھانی گون ءَ اُرش بیتگ-
واکداراں اُرش ءِ درگت ءَ تاوانانی بارو ءَ دگہ اھوال نہ کتگ انت ءُ بلے بنجل ءِ کش ءُ گوراں پوج تر ءُ تاب ءَ گندگ بیتگ-
بلوچستان ءِ دگہ ھندانی ڈول ءَ کلات ءَ ھم بلوچ آجوئی دوستیں گل پرکار اَنت کہ اود ءَ پوج ءِ سر ءَ جتا جتائیں دروشماں اُرشانی دیمپانی کنگ کپگ ءَ اِنت-
ھمے ماہ ءَ کلات جوھان ءَ سلاہ بندیں مردماں پاکستانی پوج ءِ دو کارندہ ھما وھد ءَ نشانگ کنگ ءُ کشگ بیتگ ات اَنت آ بازار ءَ درمان ءُ دگہ چیزانی گرگ ءَ پد پرپٹ ءِ گون ءَ وتی بنجل ءَ روگ ءَ بیتگ اَنت-
اے اُرش ءِ زمہ واری بلوچ لبریشن آرمی ءَ پہ وت زرتگ ات کہ گل ءِ جارکش جیئند بلوچ ءَ درشان ءَ گشتگ ات کہ اے کارندہ جوھاب بنجل ءِ سر ءَ بی ایل اے ءِ اُرش ءَ زدگ بیتگیں کارندھانی واستا درمان برگ ءَ بیتگ انت ءُ ھال ءِ سر بوگ ءَ سرمچاراں اُرش کتگ بیتگ-
مروچی بیتگیں اُرش ءِ زمہ واری کس ءَ پہ وت ءَ نہ زرتگ-
