بلوچستان ءِ ھند نوکنڈی ءُ کش گوراں سلاہ بندیں اُرش ءُ دگہ وئیلانی ھال دیم ءَ اتکگ انت, آیانی تہ ءَ نیشنل ہائی وے اتھارٹی (این ایچ اے) ءِ سروکی ءَ جوڑ بوؤکیں نوکنڈی تاں ماشکیل دگ شوربندی ءِ اسفالٹ پلانٹ ،پاکستانی لشکر ءِ یک کاروانے،مائننگ کمپنی ءِ سائٹ ءُ لیویز فورس ءِ یک چوکی یے ھوار انت۔
اھوالانی رد ءَ ناشناسیں سلاہ بندیں مردماں نوکنڈی تاں ماشکیل دگ شوربندی ءِ اسفالٹ پلانٹ نشانگ کتگ ءُ مزنیں مشینری تاوان داتگ انت۔وئیل ءَ چہ جانی تاوان رسگ ءِ تنیگی ھچ وڑیں ھال دیم ءَ نہ یتکگ۔
دومی نیمگ ءَ نوکنڈی ءَ نزیک ءَ پاکستانی لشکر ءِ یک کاروانے ءِ سر ءَ پیسر ءَ چہ سنگر گپتگیں سلاہ بنداں نشانگ کتگ۔
بنداتی ھالانی رد ءَ اے ارش ءَ جانی تاوانانی ھم ھال انت , بلے انگت ءَ آیانی کچ ءُ کساس ءِ دلجمیں ھال سر نہ بیتگ انت۔
اشاں ابید یک مائننگ کمپنی ءِ سائٹ ءُ لیویز فورس ءِ یک چوکی ءَ سر ءَ سلاہ بندانی دستیگ کنگ ءِ دو جتاھیں وئیل دیم ءَ اتکگ۔
اھوالدار ءِ رد ءَ سلاہ بندیں مردماں مائننگ کمپنی ءُ لیویز فورس ءِ کارمند دزگیر کتگ انت وھدیکہ لیویز فورس ءِ جنگی ازباب دستیگ کتگ انت۔
زانگ بہ بیت کہ نیشنل ہائی وے اتھارٹی (NHA) پاکستان ءِ یک سرکاری ادراھے کہ آ سرجمیں پاکستان ءِ دگ ءُ مزن دگانی جوڑ کنگ شاھگانی ءُ پُرشت پروشانی چار ءُ گُزار کنگ ءِ زمہ وار انت۔